Red Purple Black

كۆمه‌ڵگه‌ی نیگه‌ران. . . . گه‌نجی توڕه ... که‌ژاڵ ئیسماعیل

PDFPrintE-mail

یه‌كێ له هۆكاره‌كانی خۆشنوده‌یی ئینسان ئارامییه، ئارامی جه‌سته‌ی، ده‌روونی، ئه‌و ئارامییه كاتێ فه‌راهه‌م ئه‌بێ كه بیری ساف، ژیانی ته‌با، ئاسوده‌بێت، ئه‌‌وانه‌ش به‌ئاسانی وه‌ده‌ست نایه‌ن و به‌ته‌نها مرۆڤ ناتوانێت ده‌سته‌به‌ریان بكات گه‌ر هه‌مئاهه‌نگی و هاوكاری ده‌سه‌ڵاتی له‌پشت نه‌بێ  !

ده‌سه‌ڵات ئه‌و چه‌مكه به‌هێزه‌ی به‌رپرسه له‌پاراستن و فه‌راهه‌مكردنی ئاشتی و ئاسایش، وێڕای ده‌سته‌به‌ركردنی ژیانێكی ئاسوده‌ و ئارام بۆ تاكی نێو كۆمه‌ڵگه وه‌ك چۆن بۆخۆی ده‌سته‌به‌ری ئه‌كات، بمانه‌وێت یان نا ته‌واوی به‌رپرسان و ده‌سه‌ڵاتدارانی پایه‌به‌رزی گشت ده‌ووڵه‌تێك هه‌ربه‌گه‌یشتن به‌كورسی ده‌سه‌ڵات و ئیداره‌ی ده‌وڵه‌ت له‌غه‌می پڕكردنه‌وه‌ی كه‌لێنه‌كانی ژیانی خۆی و خانه‌واده‌كه‌یدایه و به‌رژه‌وه‌ندی خۆی پێش به‌رژه‌وه‌ندی گه‌ل ئه‌خات، ئه‌مه‌یانمان پێ قه‌بووڵه به‌ڵام تائه‌وكاته‌ی ده‌سه‌ڵات نه‌بێته ڕێگر له‌به‌رده‌م وه‌ده‌ستهێنانی مافه‌كانی تاك و په‌رژه‌وه‌ندی گشتی نه‌كاته قوربانی به‌رژه‌وه‌ندی تاكڕه‌وی و خۆپه‌رستی، ئه‌وكات ڕقی جه‌ماوه‌ر ئه‌ستوورئه‌بێت له‌ناویاندا بزاڤی گه‌نج كه كۆڵه‌كه‌ی بونیادنان و مانه‌وه‌ی كۆمه‌ڵگه‌یه.

ئاسوده‌گی كۆمه‌ڵگه له‌ئاسوده‌گی گه‌نجدا به‌دیئه‌كرێت، ئارامیش له ئارامی ده‌رونی و ژیانی ئه‌و ده‌ستپێده‌كات. سه‌رهه‌ڵدانی شۆڕشه یه‌ك له‌دوایه‌كه‌كانی كۆمه‌ڵگه ڕۆژهه‌ڵاتییه‌كان زیندوترین نموونه‌ی نه‌مانی متمانه‌ و ئومێده به‌ده‌سه‌ڵاته دیكتاتۆرو گه‌نده‌ڵه‌كان، ئه‌و ده‌سه‌ڵاتانه‌ی كه به‌ده‌نگی جه‌ماوه‌ر هاتونه سه‌ركورسی و عه‌رشی ده‌سه‌ڵاتیان قۆرخكردووه، ئه‌و ده‌‌سه‌ڵاته گیرفان قوڵانه‌ی كه میلله‌تیان تاسه‌ر ئێسقان بوغزاندووه له‌پێناو به‌ده‌ستهێنانی ئاره‌زووه مادییه‌كانیاندا، ڕه‌نگدانه‌وه‌ی گه‌نده‌ڵی و فه‌راهه‌مكردی سیاسه‌تی میراتگری كورسی ده‌سه‌ڵات و گه‌نده‌ڵییه‌كانیان له‌ناخی برینداری گه‌نجدا چیتر جێگه‌ی نه‌ماوه‌ و هاتونه به‌رده‌م ده‌سه‌ڵات و داوای چاكسازی و به‌خۆداچونه‌وه ده‌كه‌ن، گه‌رچی سه‌راپا ئه‌و شۆڕشانه زێده‌ی هه‌ڵچونی ئاگری نێو ناخی گه‌نجه و هه‌رگه‌نجیش زیاتر باج ئه‌دات، ده‌سه‌ڵاته دیكتاتۆرو بوغراكان زۆر بێباكانه به ئاسن و ئاگر میلله‌ت سه‌ركوت ئه‌كه‌ن و گه‌نج ڕه‌وانه‌ی دوامه‌نزڵگایان.

پێم وایه جێی ئه‌سه‌فه و سه‌د مه‌خا بۆ ئه‌و ده‌سه‌ڵاته‌ی گه‌نجی توڕه‌یه و پشت له‌یاساو ڕێساكانی ده‌كات، كۆمه‌ڵگه‌ی نیگه‌رانه. ئاخر كاتێ ئاشتی وئارامی سه‌قامگیر ئه‌بێت كه‌ گه‌نج له‌پشت ده‌سه‌ڵاته‌وه هێزی بزوێنه‌رو داهێنانی خۆی بخاته‌ گه‌ڕ، متمانه وه‌ربگرێت له‌هه‌مبه‌ر توانا و ده‌سه‌ڵاتیدا تاوه‌كو ئه‌ركه‌كانی له‌به‌رابه‌ر مافه‌كانیدا وه‌ك یه‌ك په‌یڕه‌و بكات، ئاخر گه‌نج چه‌ن ئه‌ركی به‌رابه‌ر ده‌سه‌ڵات و یاسا هه‌یه هێنده‌ش مافی هه‌ن و پێویسته ده‌سه‌ڵات به‌رپرسیارێتی خۆی له‌و مافانه قوتار نه‌كات و ڕقی ئه‌ستوری گه‌نج نه‌كا به‌گژ داهاتویدا.

له‌كاتێكدا ده‌سه‌ڵات خاوه‌ن سامان و توانای به‌ه‌‌یز بێت ئه‌سه‌فه كۆمه‌ڵگه‌ی له‌خزمه‌تگوزاری بێبه‌شبن، كۆمه‌ڵگه ببێته دوو چین، چینێك لافوگه‌زافی سه‌روه‌تو سامان لێبدات وچینێكی له‌ژێر هێڵی سووری هه‌ژارییه‌وه بناڵێنێت.

ئه‌وی ده‌سه‌ڵاتدارانی ده‌وڵه‌ته پیشكه‌وتوخوازه‌كانی ئاسوده‌كردووه به‌خشینی متمانه‌یه به‌ گه‌نج و ده‌سته‌به‌ركردنی مافه‌كانی تاكه بێ جیاوازی له‌نێوان مناڵ، گه‌نج و گه‌وره‌ و پیردا، ته‌نانه‌ت ئاژه‌ڵانیش له‌و ووڵاتانه به‌ئاسوده‌یی ئه‌ژین و له‌ژێر سایه‌ی سیاسه‌ت و یاسادا ژیانیان پارێزراوه.

ئاخۆ ده‌سه‌ڵاته دیكتاتۆرو گه‌نده‌ڵه‌كان، به‌رپسه گیرفان قوڵه‌كان كاتێك سه‌ردانی ئه‌و ووڵاتانه ئه‌كه‌ن بۆ ته‌نها ساتێك بیریان ناچێته سه‌ر چۆنێتی په‌یڕه‌وكردنی ده‌سه‌ڵات!؟ پرسیار ناكه‌ن له هۆكاری نه‌بونی ئاشتی و سه‌قامگیری؟ كۆمه‌ڵگه‌كانیان له‌چی نیگه‌رانن؟ گه‌نجیان بۆ توڕه و نائومێدن؟

تێبینی / تایبه‌ت به گۆشه‌ی (كه‌ژاڵ ئه‌نووسێت) گۆڤاری شه‌قام ژماره ٢٠٠.

   

   



ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.