Red Purple Black

سه‌عدی ئه‌حمه‌د پیره‌: ناكرێت به‌عه‌قڵی شاخ ئیداره‌ی شار بكرێت ... دیمانه‌: كامه‌ران محه‌مه‌د-هه‌ولێر

PDFPrintE-mail

ئه‌ندامێكی مه‌كته‌بی سیاسی یه‌كێتی نیشتمانی كوردستان باس له‌وه‌ده‌كات كه‌ ده‌بێ یه‌كێتی و پارتی له‌وه‌ بگه‌ن كه‌ كه‌ناڵی تایبه‌تی خۆیان هه‌یه‌، بۆ ده‌بێ له‌رێگه‌ی رێكخراوو كۆمیته‌كان ته‌داخول بكه‌ن، ده‌بێ دابنشین له‌گه‌ڵ حكومه‌ت، هه‌روه‌ها ده‌ڵێت ناكرێت به‌عه‌قڵی شاخ ئیداره‌ی شار بكرێت. له‌و چاوپێكه‌وتنه‌یه‌دا (سه‌عدی ئه‌حمه‌د پیره‌) ئه‌ندامی مه‌كته‌بی سیاسی یه‌كێتی نیشتیمانی كوردستان ئاماژه‌ به‌وه‌ده‌كات كه‌ قه‌زای مه‌خموور بووه‌ته‌ قوربانیی ململانێی سیاسی نێوان حیزبه‌كان، پێشی وایه‌ بایكۆتكردنی لیستی برایه‌تی نه‌ینه‌وا له‌قازانجی مه‌خمووردا نه‌بووه‌و به‌پێچه‌وانه‌وه‌ زیانی به‌و ناوچه‌یه‌ گه‌یاندووه‌ به‌تایبه‌ت له‌ڕووی كه‌می خزمه‌تگوزاری و پرۆژه‌ی ئاوه‌دانییه‌وه‌.

دیمانه‌: كامه‌ران محه‌مه‌د-هه‌ولێر

* زۆر جار باس له‌كێشه‌ی حیزب و حكومه‌ت ده‌كرێ، له‌زۆربه‌ی وڵاتان به‌ر له‌هه‌بوونی حیزب حكومه‌ت هه‌بووه‌، به‌ڵام له‌كوردستان به‌پێچه‌وانه‌وه‌ حیزب به‌ر له‌ حكومه‌ت دروست بووه‌، حیزب له‌ قوَناغێكی مێژوودا حكومه‌ت و په‌رله‌مانی دروست كرد، رای به‌رێزتان له‌سه‌ر ئه‌مه‌؟

- دیاره‌ حیزب دیارده‌یه‌كی شارستانییه‌، ته‌جروبه‌ی حكومڕانی ئێمه‌ وه‌كو كورد له‌ناوعێراقدا ته‌جروبه‌یه‌كی زۆر نوێیه‌، زۆرجار باسده‌كرێ كه‌ ئێمه‌ 20 ساڵه‌ حكومه‌تی هه‌رێممان هه‌یه‌، 20 ساڵ له‌ مێژووی وڵاتێك شتێك نییه‌، ئێمه‌ قه‌ت رۆژانێك وه‌كو هاوڵاتی پله‌ یه‌ك له‌عێراق حیسابمان بۆنه‌كراوه‌. ئه‌وانه‌ی له‌دوای راپه‌رینی 1991ه‌وه‌ هاتن ده‌ستیان كرد به‌پێكهێنانی حكومه‌ت، به‌ڵێ راسته‌ زۆرێكیان پێشمه‌رگه‌ی شاخ بوون، دیاره‌ به‌عه‌قڵیه‌تی شاخ ئیداره‌ی شار ناكرێ، ده‌بێ ورده‌ ورده‌ فێربین، پێموایه‌ حكومڕانی كوردی تائه‌مڕۆ به‌قۆناخی جیاجیا تێده‌په‌رێت، سه‌ره‌تا قۆناخی دروستبوون له‌ساڵی 1991 ده‌ستپێده‌كات، كه‌ كورد زۆر بوێرانه‌ له‌لایه‌ن به‌ره‌ی كوردستانییه‌وه‌ بڕیارماندا هه‌ڵبژاردن بكرێت، ئه‌وه‌بوو له‌مانگی 5ی 1992دا هه‌ڵبژاردنێكی زۆر گرینگ كرا، كه‌ پێموایه‌ كلیلی هه‌موو ده‌رگا داخراوه‌كان بوو له‌به‌رده‌م بزوتنه‌وه‌ی رزگاریخوازی گه‌ڵی كوردستان، كه‌بووه‌ هۆی ئه‌وه‌ی وڵاتانی ئیقلیمی ته‌حه‌مولی بكه‌ن و كۆمه‌ڵگه‌ی نێونه‌ته‌وه‌یش وه‌كو حكومه‌تی ئه‌مری واقیع قبوڵی بكه‌ن. له‌وكاته‌وه‌ تاوه‌كو 2003 له‌ژێر دووگه‌مارۆی ئابووری دابووین، گه‌مارۆی عێراق و وڵاتانی دراوسێی وه‌كو توركیاو ئێران هه‌ركات بیانه‌وێ سنووری كوردستانیان به‌زاندووه‌، تاوه‌كو ده‌رچوونی بڕیاری 986ی ئه‌نجوومه‌ی ئاسایش، كه‌ كه‌مێك باری هه‌رێمی كوردستانی سووك كرد. ئه‌گه‌ربێتو به‌راوردی شاره‌كانی كوردستان و عێراق بكرێت ئه‌وا ده‌بینین جیاوازییه‌كی یه‌كجار زۆر به‌دی ده‌كرێت، جگه‌ له‌مه‌ش ئێمه‌ له‌ناو هه‌رێمی كوردستان رۆڵێكی سه‌ره‌كیمان هه‌بوو، یه‌كێتی و پارتی به‌رپرسیاربوونه‌ له‌خه‌باتی شاخ و دۆڵه‌كان بۆگه‌یاندنی مه‌سه‌له‌ی كورد بۆ ئه‌مڕۆ، به‌ڵام له‌گه‌ڵ ئه‌وه‌ش هه‌ندی فه‌رمانده‌ی سه‌ربازی هه‌بوون له‌دوای 1991ه‌وه‌ پێیان ناخۆشبوو كه‌ پۆسته‌كانیان لێ بسه‌نرێت و بدرێته‌ كه‌سانی مه‌ده‌نی، ره‌نگه‌ به‌وهۆیه‌وه‌ هه‌وڵیان دابێ ده‌ست بخه‌نه‌ ناو كاروباره‌كان، واتا به‌هه‌قی خۆی زانیوه‌ كه‌ ده‌ستكاریان بكات، بۆنموونه‌ به‌پێویستی زانیوه‌ مدیر ناحیه‌ ئه‌ندام رێكخراو بێت و قایمقامیش ئه‌ندام كۆمیته‌ بێت، ئه‌مه‌ شتی تازه‌ نین شته‌كه‌ بووه‌، به‌ڵام دیسانه‌وه‌ ئه‌گه‌ر به‌راورد بكه‌ین ده‌بینین چه‌ند فه‌رقی كردووه‌، به‌ڵام به‌ته‌واوی ئه‌و دیاردانه‌ بنه‌بڕ نه‌بووه‌، ئه‌وه‌ی باسم كرد مه‌ڵبه‌ندو لقه‌كان ئه‌وكاره‌یان نه‌كردووه‌ كه‌ ده‌بێ به‌رپرسه‌كان حیزبی بن، به‌بڕوای من لاوازی خودی قایمقام و مدیر ناحیه‌و به‌رپرسه‌ حكومییه‌كانه‌ كه‌ به‌و بارودۆخه‌ رازین!، ئه‌وان مه‌ترسیان له‌وه‌ هه‌یه‌ كه‌ كێشه‌یان بۆدروست بێت، بۆیه‌ ده‌بێ یه‌كێتی و پارتی له‌وه‌ بگه‌ن كه‌ ئێمه‌ كه‌ناڵی خۆمان هه‌یه‌، بۆ ده‌بێ له‌رێگه‌ی رێكخراوو كۆمیته‌كان ته‌داخول بكه‌ین، ده‌بێ دابنشین له‌گه‌ڵ حكومه‌ت، ئه‌و بڕیاری خۆی بدات و ده‌بێ پاریزگار بڕیاری خۆی بداته‌ قایمقام، نابێ كۆمیته‌و رێكخراوه‌كان ته‌داخول بكه‌ن. ئێمه‌ وه‌كو یه‌كێتی له‌كۆتایی ساڵی 2005 پرۆژه‌یه‌كمان هه‌بوو، له‌و پرۆژه‌یه‌ داواكرابوو كه‌ ده‌بێ حكومه‌ت و حیزب له‌یه‌ك جیابكرێنه‌وه‌، ده‌بێ حیزب كاری سیاسیی خۆی بكات بۆ هۆشیاری و كۆكردنه‌وه‌ی خه‌ڵك له‌ده‌وری به‌رنامه‌كانی خۆی، حكومه‌تیش حوكمڕانی بكات وه‌كو حكومه‌تی هه‌موو خه‌ڵك. من زۆرجار سه‌رم سورده‌مینێ له‌هه‌ندی بۆنه‌و یادی میللی ده‌بینین شه‌قامه‌كان پڕن له‌ئاڵای زه‌ردو سه‌وز، ئه‌وه‌ ده‌مانگێرێته‌وه‌ بۆ خاڵی یه‌كه‌م، پێویسته‌ له‌بۆنه‌ و یاده‌كان ئاڵای كوردستان به‌رزبكرێته‌وه‌ كه‌ هه‌موو ره‌نگه‌كانی تێدا كۆده‌كاته‌وه‌.

* ده‌وترێت ئه‌گه‌ر ئۆپۆزسیۆن دیدو بۆچوون و به‌دیلی نه‌بێت بۆده‌سه‌ڵات ئه‌وا تراژیدیایه‌، و ئه‌گه‌ر ده‌سه‌ڵات به‌رنامه‌و دیدگای نه‌بێت ئه‌وا كۆمیدیایه‌، بۆیه‌ ده‌پرسم ئۆپۆزسیۆن له‌ره‌وتی دیموكراسیه‌ت له‌كوردستان له‌ چ ئاستێكدایه‌و چۆنی ده‌بینی؟

- ئۆپۆزسیۆنی هه‌رێمی كوردستان ئۆپۆزسیۆنی كوردستانه‌، ئه‌و خه‌ڵكه‌ی كه‌ له‌ناو هێزه‌كانی ئۆپۆزسیۆنن خه‌ڵكی ئه‌و هه‌رێمه‌ن، ئه‌وه‌نده‌ جیاوازییان نییه‌ له‌گه‌ڵ خه‌ڵكانی تر، پێموایه‌ ئه‌و بیركردنه‌وه‌یه‌ بیركردنه‌وه‌یه‌كی هه‌م سازه‌و هه‌م ناسازیشه‌، چونكه‌ ئه‌و ده‌ستكه‌وت و به‌رهه‌مانه‌ی هاتونه‌ته‌دی له‌رووی رۆشنبیری و سیاسی و ئابووری به‌رهه‌می خه‌باتی بێوچانی حكومه‌تی هه‌رێمه‌. ده‌كرێ ئۆپۆزسیۆن له‌به‌رئه‌وه‌ی زه‌وقی له‌حكومڕانییه‌ هه‌موو ئه‌وانه‌ زه‌ربی سفر بكا؟!، له‌ساڵی 2003ه‌وه‌ ده‌یان پرۆژه‌ی جیاجیا ئه‌نجامدراوه‌و سه‌دان و هه‌زاران قوتابخانه‌و سه‌نته‌ر دروستكراون، له‌وانه‌یه‌ ماڵه‌ شه‌هیدو كه‌م ئه‌ندامێك هه‌بێ كه‌ تائێستا كێشه‌یان چاره‌سه‌رنه‌كراوه‌، به‌ڵام زۆربه‌ی هه‌ره‌زۆری چاره‌سه‌ركراوه‌، به‌ڵام ئۆپۆزسیۆن هه‌ركه‌ ده‌ڵێت (حی علی الێلاه‌) ئه‌وان شتی ناڕه‌وا ده‌ڵێن، چونكه‌ ئه‌وان پێیانوایه‌ میلله‌تی ئێمه‌ چاوی باش نابینێ، له‌بیری چووه‌ دوێنێ چی بووه‌، ئه‌وان مراهه‌نه‌ له‌سه‌رئه‌مه‌ ده‌كه‌ن، ئه‌گه‌ریش ئۆپۆزسیۆن شتێكی باشتری هه‌یه‌ با پێشكه‌شی بكات، ئێمه‌ حكومڕانی یه‌كێتی و پارتیمان بینی با هی ئه‌وانیش ببینین، ئێمه‌ حكومڕانی ئیسلامییه‌كانمان له‌دونیا بینیوه‌، ئه‌وه‌ی بزوتنه‌وه‌ی گۆرانیش به‌رنامه‌ی ئاوه‌دانكردنه‌وه‌ی نییه‌، به‌رنامه‌یه‌كه‌ بۆ وه‌رگرتنی ده‌سه‌ڵات به‌لاسایی كردنه‌وه‌ی تونس و میسرو یه‌مه‌ن و لیبیا، كه‌ پێموایه‌ ئه‌و لاسایی كردنه‌وه‌ جوگرافیه‌ن و سیاسییه‌ن دروست نییه‌، چونكه‌ ئه‌و حكومه‌ته‌ی له‌هه‌رێمی كوردستاندا هه‌یه‌ نه‌ به‌ئینقلاب هاتووه‌، نه‌ حكومه‌تێكه‌ تۆ بڵێی ژه‌نگی گرتووه‌و بڵێی ده‌یان خۆی سه‌پاندووه‌ به‌سه‌ر ئه‌وخه‌ڵكه‌، له‌به‌رئه‌وه‌ی ده‌نگدان هه‌یه‌ له‌جیاتی ئه‌وه‌ بابێن سیسته‌می په‌رله‌مانی به‌هێزبكه‌ین و سیسته‌می وه‌به‌رهێنان به‌هێزبكه‌ین بۆ هێنانی سه‌رمایه‌ له‌ده‌ره‌وه‌ی وڵات و دۆزینه‌وه‌ی هه‌لی كارو مه‌ناخی ئه‌منی و ئابووری و رۆشنبیریمان به‌هێزبكه‌ین، به‌رده‌ركی سه‌رایان گرتووه‌ واده‌زانن مێژوو به‌به‌رده‌ركی سه‌رادا ده‌ڕوات، ئێستاكه‌ سه‌رده‌م گۆڕاوه‌ و هه‌لومه‌رجی نێوده‌وڵه‌تی و ئیقیلیمیش گه‌یشتۆته‌ ئه‌و ئه‌نجامه‌ی كه‌ ئیراده‌ی خه‌ڵك گرینگه‌، ته‌ماشابكه‌ین حوسنی موباره‌ك زۆر دۆستی ئه‌مریكابوو، به‌ڵام كه‌ دیتی كه‌ خه‌ڵكی میسر نایانه‌وێ بۆیه‌ سوپای لێ زه‌وت كرد، هه‌روه‌ها له‌تونس كه‌ بینی خه‌ڵك ئه‌و ده‌سه‌ڵاته‌ی ناوێ به‌هه‌مان شێوه‌ سوپای لێ قه‌ده‌غه‌كردو رووخا.

بۆیه‌ ده‌بێ بزانین كه‌ ئێمه‌ به‌شێكین له‌عێراق، كام سه‌ربه‌خۆیمان هه‌بووه‌ كه‌ ئێمه‌ سوودمان لێ وه‌رنه‌گرتبێ؟، ئێستا ئێمه‌ ناتوانین شتێك بكه‌ین كه‌ سه‌رپێچی ده‌ستووری عێراقی بێت، ئێستاكه‌ كێشه‌ی نه‌وت و غازو ئاوو پێشمه‌رگه‌مان له‌گه‌ڵ عێراقدا چاره‌سه‌ر نه‌بووه‌، هه‌روه‌ها كێشه‌ی سنوورو دارشتنه‌وه‌ی سیاسه‌تی ده‌ره‌وه‌مان و ماده‌ی 140 چاره‌سه‌رنه‌بووه‌، له‌جیاتی ئه‌وه‌ی خاوه‌ن قه‌ڵه‌م و هزره‌كان دابنیشن به‌رنامه‌یه‌كی تۆكمه‌ دابنێن چۆن بتوانین له‌و ئامانجانه‌مان بگه‌ین كه‌چی هاتووین یه‌خه‌ی یه‌كتر ده‌گرین. بۆیه‌ ده‌یڵێم ئێستا رۆژگار گۆڕاوه‌و كۆمه‌ڵگه‌ی نێونه‌ته‌وه‌یش له‌گه‌ڵ ئیراده‌ی میلله‌تان هاوشان ده‌ڕوات، بۆچی ئێمه‌ سوودی لێ وه‌رنه‌گرین و یه‌خه‌ی حكومه‌تی خۆمان بگرین!.

* ده‌وترێت كه‌س خۆی به‌خاوه‌نی مه‌خموور نازانی؟ یان مه‌خموور ده‌ڤه‌رێكی مه‌غدووره‌و فه‌رامۆشكراوه‌، ده‌پرسم مه‌غدووریه‌تی ئه‌و ناوچه‌یه‌ له‌چیدایه‌؟

- مه‌غدووریه‌تی مه‌خموور له‌وه‌دایه‌ كه‌ به‌بڕیارێكی (مجلس قیاده‌ الپوره‌) و به‌بێ یاسا كرا به‌به‌شێك له‌پارێزگای مووسڵ و چه‌ند گوندێكیشی خرایه‌ سه‌ر پارێزگای كه‌ركوك، به‌ڵام مه‌خموور له‌بنه‌ڕه‌تدا ناوچه‌یه‌كی كشتوكاڵییه‌، جگه‌ له‌وه‌ش له‌و سنووره‌ زیاتر له‌ 300 بیره‌ نه‌وت هه‌یه‌ و توانای به‌رهه‌مهێنانی ژماره‌یه‌كی زیاتر له‌بیره‌ نه‌وت هه‌یه‌، هه‌روه‌ها له‌ودیوی چیای قه‌ره‌چووغ زیاتر له‌ ملیۆنێك و نیو زه‌وی كشتوكاڵی هه‌یه‌، به‌ڵام له‌به‌رئه‌وه‌ی مه‌خموور له‌سه‌ر هێلی باران دانییه‌، ئه‌گه‌رچی كه‌وتۆته‌ نێوان هه‌ردوو زێی (گه‌وره‌و بچووك) بۆیه‌ ده‌كرێ ئاوه‌دێری بۆ رابكێشرێت، وه‌كو پێشتر خه‌نده‌قی مام خه‌لیفه‌ هه‌بوو، ده‌بوایه‌ ئه‌و ناوچه‌یه‌ ئاوی بۆ بهێنرایه‌، چونكه‌ چاره‌سه‌ری كێشه‌ی مه‌خموور به‌بێ ئاودێری زه‌حمه‌ته‌، و ئێستاكه‌ ئیمكانیه‌تی عێراق زۆره‌و ده‌توانرێ پرۆژه‌ی ئاوه‌دێری بۆبكرێت. خاڵێكی تر له‌سه‌رده‌می به‌عس ژماره‌یه‌كی زۆر له‌دێهاته‌كانی ئه‌وناوچه‌یه‌ وێران كران و ئه‌گه‌ر ژماره‌ی شه‌هیده‌كانی ناوچه‌ی مه‌خموور بژمێرین ره‌نگه‌ به‌قه‌د نفوسی چه‌ندین شارۆچكه‌ بێت. جگه‌ له‌مه‌ش مه‌خموور چه‌ندین جار ته‌عریب كرایه‌ و به‌رشاڵاوی راگواستن بوه‌ته‌وه‌، بۆیه‌ ده‌بێت حكومه‌تی هه‌رێم بیرێكی جددی له‌ئاوه‌دانكردنه‌وه‌ی مه‌خموور بكاته‌وه‌و گرنگیی بدات به‌كارگه‌كانی گه‌چ و دروستكردنی كارگه‌ی چیمه‌نتۆ وچه‌ندین پرۆژه‌ی دیكه‌، چونكه‌ له‌داهاتوو ئه‌و سنووره‌ ده‌بێته‌ باشترین ناوچه‌ی پیشه‌سازی كه‌ سوودی بۆ هه‌موو عێراق و كوردستان ده‌بێت. ده‌مه‌وێ ئه‌وه‌ش بڵێم ئه‌وانه‌ی به‌رپرسیارن له‌ره‌وشی مه‌خموور به‌راستی ره‌نگه‌ نه‌ نه‌خشه‌ی مه‌خموور بزانن و نه‌ گرنگیی ئابووری مه‌خموور بزانن!، چونكه‌ مه‌خموور ده‌توانێ ببێت به‌عه‌مباری خۆراك بۆ هه‌موو ناوچه‌كه‌، و ئه‌وانه‌شی ده‌گه‌ڕێنه‌وه‌ ده‌بێ خانووبه‌ره‌یان بۆ دروستبكرێت و ئاووكاره‌باو نه‌خۆشخانه‌و مه‌كته‌ب و مزگه‌وتیان بۆ دابین بكرێت، بۆیه‌ پێویسته‌ ئاوڕی جددی لێبدرێته‌وه‌و به‌ئاودێری ده‌كرێت مه‌خموور ئاوه‌دانبكرێته‌وه‌.

* بۆچوونێك هه‌یه‌ ده‌وترێت مه‌خموور به‌ناوچه‌یه‌كی سه‌وز ناسراوه‌، ده‌پرسم ئێوه‌ یه‌كێتی نیشتیمانی كوردستان له‌به‌رامبه‌ر ئه‌و قوربانیدانه‌ی خه‌ڵكی ئه‌و ناوچه‌یه‌ چیتان كردووه‌؟

- به‌داخه‌وه‌ مه‌خموور له‌شه‌ڕی ناوه‌خۆ زه‌ره‌رمه‌ندبوو، هه‌روه‌ها به‌هۆی دابڕانی له‌كوردستان كه‌وته‌ ژێر ده‌ستی ده‌سه‌ڵاتی حكومه‌تی عێراق نه‌توانرا خزمه‌تی بكرێت تاوه‌كو ساڵی 2003، له‌دوای 2003ه‌وه‌ پێموایه‌ ململانێی حیزبی بوه‌ هۆكاری ئه‌وه‌ی مه‌خموور تووشی كێشه‌بێت، بۆنموونه‌ یاریگایه‌ك بۆ گه‌نجان ده‌كرێت، ئه‌گه‌ر سه‌وز بیكات، زه‌ردیش یاریگایه‌ك دروست ده‌كات و دژی ده‌بێت، و به‌پێچه‌وانه‌وه‌، هه‌روه‌ها مدیرناحیه‌ پێش ئه‌وه‌ی خۆی به‌مدیرناحیه‌ی خه‌ڵك بزانێ، خۆی به‌هی حیزب ده‌زانێ، قایمقامیش خۆی به‌قایمقامی حیزبێك ده‌زانی. بۆیه‌ پێموایه‌ مه‌خموور به‌وشێوه‌ی هه‌یه‌ سه‌رناگرێ، وپێشموایه‌ مه‌خموور هه‌ر سه‌وز ده‌مینێته‌وه‌، چونكه‌ له‌بنه‌ڕه‌تدا حیزبی شیوعی زۆر به‌قوه‌ت بوو، له‌پاشان خه‌ڵكه‌كه‌ به‌ره‌و یه‌كێتی بوو و ئێستاش هه‌روایه‌، ده‌بێ بزانین كه‌ یه‌كێتی هیچ ده‌سه‌ڵاتی له‌مه‌خموور نه‌بووه‌ تابڵێی یه‌كێتی چیكردووه‌!، به‌داخه‌وه‌ له‌پاش رزگاری عێراق شتێكی ئه‌وتۆ نه‌كراوه‌، راسته‌ هه‌ندی شت كراوه‌، جاری واهه‌یه‌ ده‌بێته‌ شه‌ڕ له‌سه‌ر ئه‌وه‌ی ئه‌و شه‌قامه‌ كێ كردوویه‌تی، موسڵ ده‌یكات هه‌ولێر ده‌ڵێ من كردوومه‌.

ئه‌وه‌ی ده‌مینێته‌وه‌ ئه‌وه‌یه‌ خه‌ڵكی مه‌خموور خۆی ده‌زانی ده‌نگ به‌كێ ده‌دات، نابێ سزای مه‌خموور بدرێت به‌وه‌ی سه‌وزه‌ یان زه‌رده‌، چونكه‌ مه‌خموور شارێكه‌ هه‌ره‌شه‌ی ته‌عریب و وێرانكردنی له‌سه‌ربووه‌و زۆرخراپ سزا دراوه‌، ئێستاكه‌ كاتی ئه‌وه‌نییه‌ شه‌ڕی سه‌وزو زه‌ردو سووری لێ دروست بكه‌ین، باشه‌ڕی ئاوه‌دانكردنه‌وه‌و پێشبركێی پێشكه‌شكردنی خزمه‌تگوزاری و ئاوه‌دانكردنه‌وه‌ بكه‌ین، پاشان ئه‌وه‌ بۆ مه‌خموور جێبهێڵین كه‌ ده‌نگ به‌كێ ده‌دات.

* فه‌رمانگه‌كان و ئیداره‌ی مه‌خموور له‌لایه‌ن هه‌ولێره‌وه‌ سه‌رپه‌رشتی ده‌كرێت، پێتوایه‌ هه‌ولێر تاچه‌ند كارو پرۆژه‌ی بۆ ئه‌و ناوچه‌یه‌ به‌ئه‌نجام گه‌یاندووه‌؟

- له‌هه‌مووی گرنگتر ئه‌وه‌یه‌ به‌هه‌موولایه‌ك له‌پێناو ئاوه‌دانكردنه‌وه‌و نیشته‌جێكردنه‌وه‌ی خه‌ڵك له‌وناوچه‌یه‌ كاربكه‌ین، چونكه‌ ئه‌گه‌ر له‌داهاتوو باس له‌سنووری كوردستان ده‌كرێت، سنووره‌كه‌ له‌وێیه‌و ده‌بێ جێگیر بكرێت، ئه‌م كاره‌ش به‌وه‌ده‌بێ كه‌ تادوورترین گونده‌ له‌سه‌رسنووری عه‌ره‌ب ئاوه‌دان بكه‌ینه‌وه‌، كه‌ ئاوه‌دان بكرێته‌وه‌ خه‌ڵكی تێدابێت ئه‌وا خۆی به‌رگری له‌به‌رژه‌وه‌ندی خۆی ده‌كات. ده‌بێ بزانین كه‌ میزانییه‌ی مه‌خموور له‌سه‌ر موسڵه‌، و ئاوه‌دانكردنه‌وه‌ی مه‌خموور پاره‌یه‌كی زۆری تێده‌چێت، ئه‌و پرۆژانه‌ی له‌سه‌ر كوردستان ده‌كرێت له‌سه‌ر حیسابی ئاوه‌دانكردنه‌وه‌ی هه‌ولێره‌، به‌ڵام ئێستاكه‌ مه‌خموور بایكۆتی پارێزگای موسڵی كردووه‌، ئه‌و پاره‌ی بۆ مه‌خموور هه‌یه‌ ده‌گه‌ڕێته‌وه‌ بۆ لیستی حه‌دباو پارێزگای موسڵ، من پێمباشبوو كورد له‌وپارێزگایه‌ وه‌كو ئۆپۆزسیۆن بمابوایه‌و پارێزگاری له‌و ناوچانه‌ بكردایه‌، به‌ڵام ئه‌م بایكۆته‌ سوودی بۆ ناوچه‌یه‌كی وه‌كو مه‌خموور نه‌بوو، به‌پێچه‌وانه‌وه‌ زیانی به‌و ناوچه‌یه‌ گه‌یاندووه‌و بێبه‌شی كردووه‌ له‌پرۆژه‌كان.



ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.