Red Purple Black

حەرامكردنی شۆفێری ژنان و بەیاساكردنی هاوسەرگیری لەزەت ... كەژاڵ ئیسماعیل

PDFPrintE-mail

دیاردەی قەدەغەكردنی شۆفێری یان رێگەنەدان بە ژنان لەوڵاتی سعودییە، كە ئۆتۆمبێل لێبخوڕن دیاردەیەكی سەیرە، ئەگەر بەراورد بكرێت لەگەڵ هەندێ دیاردەی دیكە لەو وڵاتانەی كە زیاتر باپەندن بەئاینی ئیسلامەوە، ئێران وەك نموونە، زۆرجار هەواڵە ‌سەیر و ناوازەكان وامان لێدەكەن بكەوینە گومانەوەو دەیان جار بیر بكەینەوە كە ئاخۆ ژن لەنێو ئەو كۆمەڵگانەدا بۆ هێند بچوك دەكرێتەوە!؟
گەر ژن لەدەرەوەی ماڵ كاربكات، لەزۆر كایە ئیداری و رۆشنبیرییەكاندا رۆڵی هەبێت چ پێویست دەكات بەو شێوەیە بخرێتە ژێر هەندێ پرس كە كاریگەری سلبی دەكاتە سەر پێگەی ژن، ئاخر لەكاتێكدا تیمێكی وەرزشی ژنانی ئێران بەشداری لەخولێكی نێودەوڵەتیدا دەكات ئەمە خۆی لەخۆیدا هەنگاوێكی جوانەو تائێرە هیچ قسەمان نییە. . هەڵبەت ئەو تیمە بەتوانای خۆیان گەیشتنە خولی كۆتایی لەوڵاتی ئەردەن، بەڵام بەداخەوە لەبەر ئەوەی خانمانی بەشداربوو قایل نەبوون كە روسەرییەكانیان لابدەن و كڵاوی تایبەت لەسەر بكەن، یاری كۆتایی بۆ خانمانی وڵاتی ئەردەن بەسێ بەرابەر هیچ حساب كراو كاسەكەیان دۆڕاند!! ئەوی سەیرە لەم رووداوەدا بەشداریكردن و سەفەركردن و تێكەڵبوونی كۆمەڵێك خانمە بە جیهانی دەرەوە و پۆشینی بەرگی تایبەت بەیاریكردن و لەكۆتایدا پێداگرتن لەسەر لابردنی ڕووسەرییەكانیان، كەخۆی لەخۆیدا گەلێ پرسیار هەڵدەگرێت!؟ لەویش سەیرتر لەوڵاتی ئێران حەلاڵكردنی هاوسەرگیری لەزەت (زواج المتعە) بەفەرمی كراوەتە یاسا و ئێستا لەبەڕێوەبەراییەتییەكانی تۆمار و ناسنامە پیاوان بەئارەزووی ویستی خۆیان بۆیان هەیە داوای ژنان بكەن و بەگوێرەی ئەو مواسەفاتانەی كە خۆیان گەرەكییانە، لەكاتێكدا هاوسەرگیری موتعە تەنها جۆرێكە لەبازرگانیكردن بەجەستەی ژن و لەسەر حیسابی تێركردنی ئارەزووی زایەندی پیاو حەڵاڵ كراوە، بەرپرسانی ئەو وڵاتە بەشودانی كچانیان لەلایەن خێزانەكانیانەوە ئازاد كردووە، گەر خوێندكاربن یان كچی ماڵ لەژێر تەمەنی یاسایی كە ١٨   ساڵە ئەمیش بەبیانوی كەمكردنەوەی دیاردەی (سێكسی ناشەرعی)، دیارە هەر بەرپرسەكان دانیان ناوە بەڕاستی بوونی دیاردەی لەشفرۆشی و كڕینی سێكس لەو وڵاتەدا لەكاتێكدا كە   (سزای بەردبارانكردن و جەڵد دەسەپێنرێت بەسەر ژناندا و تائێستا لەسێدارەدان یەكێكە لەسزا توندەكانی ئەو وڵاتە).
بمانەوێت یان نا هاوسەرگیری لەزەت بەگوێرەی عەقدێكی كاتی مۆر دەكرێت، هیچ سودێكی بۆ ژن نییە، تەنها بۆ تێركردنی حەزی پیاوە، لەكاتێكدا پیاو بۆی هەیە ژنێك یان زیاتر بەو رێگەیە لەخۆی حەڵاڵ بكات، كەچی ژنان هیچ مافێكی یاسایی تایبەت بەیاسای هاوسەرگیرییان نییەو بەحەزی مانەوەیەكی كاتی لەگەڵ پیاوێكدا دەژین و دوای تێربوونی پیاو و توڕدانیان دەبێ ماوەی شەرعی كە لەچل رۆژ كەمترە دانیشن تا پیاوێكی دیكە لەزەتیان لێوەردەگرێت.

دیاردەی قەدەغەكردنی شۆفێری خانمان لەوڵاتی سعودییە زۆر لەو كارەساتانە گەورەترە، ئاخر هیچ شتێكی تێدا نییە كە دژ بەیاسای ئیسلام بێت و كارێكی نابەجێ ئەنجام نادرێت، بەڵكو بۆ ئەنجامدانی كاروباری رۆژانەی خانمان پێویستییەكی حەتمییە، دەسگیركردنی ئەو چەند خانمەی كە ژمارەیان لەپەنجەكانی دەستێك تێناپەڕێت لەلایەن پیاوانی هەیئەی ئەو وڵاتەوە دەلالەت لەبوونی زوڵمێكی گەورەیە لەكاتێكدا یەك لەو خانمانە هاوسەرەكەی دەریكردووەو بۆی نییە لەگەڵ شۆفێرێكی نامەحرەمدا دانیشێت، ئەگەر بەگوێرەی فەتوای شیردان بەگەورە ئەو شۆفێرەی گۆش نەكردبێت!! ئەوی نكۆلی لێناكرێت دەستدرێژی شۆفێرەكانی ئەو وڵاتە رۆژانە لەبنكەی پۆلیسەكان تۆمار دەكرێت و ژنان گەیشتونەتە ئەو حاڵەی لەترسی شۆفێرە پیاوەكان یاسا بشكێنن و تاك وتەرا خۆیان بدەنە بەر ڕێژنەی سەرزەنشتی پیاوانی ئەو وڵاتە (كە پێیان وایە ئەو تۆمەتانە تەنها ژنان بۆیە دەیخەنە پاڵ شۆفێرەكانیان تا ئۆتۆمۆبێلەكانیان ببەنە ئەو دیو هێڵی سوورەوە!) سەیر لەوەدایە كە فەتوانی شیردانی ژنانی ئەو وڵاتە بەپیاوانی گەورە وەك شۆفێری ژنان ڕێی پێنەگیراوەو قسەی لەسەر نییە و جیاوازییەكەشیان نێوانی ئاسمان و ڕێسمانە لەنامەعقولی و بێشەرمیدا.

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.