Red Purple Black

بۆ هەمیشە مێ تاوانلێكراوە؟... كەژاڵ ئیسماعیل

PDFPrintE-mail

رۆژانە وتاری نوێ لەزۆربەی رۆژنامە ناودارەكاندا بڵاو دەكرێتەوەو هەندێكیشیان دەبنە مانشێتی ئەو رۆژنامانە، سەیر لەوەدایە وتارەكان باس لەكێشەی ژن دەكەن لەتەواوی دونیادا، بەتایبەت وڵاتەكانی رۆژهەڵاتی ناوەڕاست، لەویش سەیرتر نووسەری وتارەكان زۆربەیان پیاون، بانگێشە بۆ ئازادی و رزگاربوونی ژن دەكەن لەو قەیرانە كۆمەڵایەتییەی تێیدا دەژی، منیش دەپرسم كێیە ئازاری ژن دەدات؟     
لەهەفتەی پێشوودا ئەو تاوانبارەی كە بووبووە هۆی ترس و دڵەڕاوكێی دانیشتوانی شاری جدەی وڵاتی سعودییە دەستگیركرا، ئەو تاوانبارە نەدزی دەكردو نە پیاوانی دەكوشت، بەڵكو بەدڕندەترین تاوان كۆمەڵگەی بریندار دەكرد (ئەو تاوانبارە لەماوەی چەند مانگێكدا ١٣ كچی بچووكی ئەو شارەی رفاند و دەستدرێژی ناموسی دەكردە سەریان و ئازاری دەدان) دواجار لەرێگەی دوا نێچیرییەوە كە كچێكی تەمەن ژێر دە ساڵان بوو توانرا دەسگیر بكرێت، هەرچی لەسەر چۆنێتی ئەنجامدان و دەستگیركردنی بنووسرێت بایەخی نییە، ئەوەی دەمەوێت باسی بكەم ئەنجامدانی تاوانێكە كە پەیوەندی بە حاڵەتی دەروونێكی نەخۆشەوە هەیەو تۆڵەسەندنە لەڕەگەزی مێ لەرێگەی دامركاندنەوەی شەهوەیەكی قێزەون و لەسەر پیرۆزترین زەوی دونیا  !!
ئایا ئەو پیاوە رۆشنبیرانەی بۆ داكۆكی لەمافی ژن دەنووسن ئاگایان لەژیانی رەگەزی مێیە یان تەنها بۆ پڕكردنەوەی لاپەڕەی رۆژنامەیەك دەنووسن؟ 
دەربارەی ئەو تاوانەی پێشتر باسم لێوەكرد نووسەرێكی وڵاتی سعودییە دەڵێت (ئەو تاوانبارە دیارییەكی خودایە بۆ ئەو نەتەوەیە لەتۆڵەی بەشودانی كچانی ناباڵق) ئەو نووسەرە باس لەوە دەكات كە هیچ جیاوازییەك نییە لەو تاوانەی ئەو كەسە ئەنجامی داوە لەگەڵ تاوانی هەتككردنی منداڵانی مێی ئەو وڵاتە بەناوی زەواجكردنەوەو تاوانەكە دەخاتە گەردنی خێزان...
هەڵبەت منیش هاوڕام لەگەڵ ئەو نووسەرە، بەڵام ئایا خودا لەئاسمانەوە شەیتانێك دەكاتە دیاری بۆ هەتككردنی ئەو منداڵانەی كە هێشتا یاری بەبووكە شووشە دەكەن و مانای ژیان نازانن؟ 
گەر خێزان تاوانبار بێت لەفرۆشتنی كچەكانیان بەناوی زەواجەوە بەرامبەر بڕێك پارەی زۆر، ئەوا ئەو پیاوانە سەدان جار تاوانبارترن كە قەبوڵیانە منداڵێك بكەنە هاوسەر كە واپێویستە لەباوەشی دایكی و بووكە شووشەكەیدا بخەوێت، گەر هەردوو تاوانەكە هاوشێوەبن لەخاڵێكدا جیاوازییان هەیە، ئەویش جۆری دەستدرێژیكردنەكەیە، ئەویان كۆمەڵگە رەفزی دەكات و ئەمیان پێی قەبوڵە.
پێموانییە تەنها ئەوە یەكەم تاوان و یەكەم وڵات بێت كە تاوانی لەو شێوانەی تێدا ئەنجام دەدرێت، بەڵكو دیاردەی بەمێردانی كچان لەژێر تەمەنی ١٠ ساڵیدا لەزۆر لەوڵاتە ئیسلامییەكاندا هەیە. هەندێك پێیانوایە وا پێویستە كچ زوو لەماڵە باوك دەربكرێت تا شەرەفی خێزان پارێزراو بێت، هەندێكی دیكە هەژاری و كەمدەرامەتی دەكەنە پاساو بۆ ئەو جۆرە بازرگانییەی كە خێزان بەرابەر بڕێ پارە لەو سەفقەیە سودمەند دەبێت، كەوابوو بەناوی پاراستنی شەرەفی بنەماڵەوە مێینە بۆتە نێچیری پیاوە نەوسنەكان و خێزانە ناهۆشیارەكان و لەئاكامیشدا سەرگەردانی بۆ ژن و ئازایەتی بۆ ئەو پیاوانەی كە بەناوی رۆشنبیرییەوە داكۆكی لە ژن دەكەن، ئاخر ژن ئێستا كاڵایەكی هەرزان و فرە رەواجە لەبازاڕەكانی جیهاندا چ بەناوی هونەر یان ریكلامكردن یان بەناوی دەرخستنی جوانییەكانییەو بۆتە كەرەسەیەكی هەرزان بەدەست بازرگانە‌كانەوە. (كەوابوو هە‌میشە شەرەف پاساوە بۆ كوشتن و ئازاردان و هەتككردنی ژن). 
ئاخۆ خودی ژن تاوانكار نییە بەرانبەر بەخودی خۆی و ناهۆشیار نییە لەوەی كە زوڵمی لێدەكرێت، یان هەر بەتەنها ژن زوڵملێكراوەو جێی بەزەییە؟ 

 تایبه‌ت به ژماره ٩٢ ی گۆڤاری سڤیل 

گۆشه‌ی ئاریشه


 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.