Red Purple Black

هارون الرشید.. ئه‌گه‌ڕێته‌وه ... كه‌ژاڵ ئیسماعیل - هولندا

PDFPrintE-mail

 له‌م دنیای قه‌زا و قه‌ده‌ره‌دا گه‌ر جاران دوای خوێندنه‌وه‌ی ڕۆژنامه یان گوێبیستی هه‌واڵه‌كان شتێكی نوێ یان نامۆمان بدیبا یان ببیستایه ئاگامان له‌ دنیا ئه‌بوو به‌ڵام به‌داخه‌وه ئێمه به‌حوكمی ئه‌وه‌ی له‌ژێر ده‌سه‌ڵاتی رژێمێكی دیكتاتۆردا زیندانیبوین كه‌متر په‌یوه‌ندیمان به‌جیهانی ده‌ره‌وه هه‌بوو یان بڵێم زۆر كه‌م و بێئاگابووین له گۆرانكاری و داهێنان و ته‌نانه‌ت سه‌یرو سه‌مه‌ره‌كانی ئه‌و دونیا فراوانه، ئێستا سوپاس بۆ ئازادی و ئه‌وجا بۆ ته‌كنه‌لۆجیا كه زۆر خێرا به‌ده‌نگ و ره‌نگ به‌جیهانی ده‌ره‌وه‌ی به‌ستوین و له كورترین كاتدا زۆرترین هه‌واڵ و زانیاریمان پێئه‌گات، گه‌رچی زۆرینه‌ی هه‌واڵه‌كان نیگه‌رانمان ئه‌كه‌ن له‌تواناشماندا نییه ڕیگرییان بكه‌ین.

یه‌ك له‌و هه‌واڵه سه‌یرو سه‌مه‌رانه‌ی كه نیگه‌رانم ده‌كه‌ن ئه‌و فه‌توا سه‌یرو بێمانا و بنه‌مایانه‌ن كه له‌لایه‌ن كه‌سانێكه‌وه ده‌رئه‌چن، هه‌ڵبه‌ت یان پیشتر ئاماده‌باشییان نییه بۆ ده‌ركردنی ئه‌و فه‌توایه یان بیریان نییه ئاكامی به‌چی ئه‌گات، خۆ هه‌ندێجاریش بۆ ناوده‌ركردن یان خۆ گه‌وره‌كردنه، ئاخر له‌كام كتێبی ئاسمانی یان یاسای زه‌مینیدا هاتووه مرۆڤ فرمانی كوشتنی مرۆڤه‌كان ده‌ربكات به‌ناوی فه‌تواو وئایینه‌وه له‌كاتێكدا ئایینه‌كان دژ به‌كوشتن و خراپه‌كارین.

یه‌ك له‌و فه‌توا مه‌ترسیدارانه كه له‌سه‌ر تۆری ئینترنێت بڵاوبۆته‌وه و مشتومرێكی زۆری لێكه‌وتۆته‌وه وه‌ڵامی پرسیارێكی زۆر ئاساییه كه له ( صالح الفوزان ) كراوه له‌لایه‌ن بینه‌رێكه‌وه له په‌خشێكی راسته‌وخۆدا، هه‌ڵبه‌ت پسیاره‌كه ده‌رباره‌ی چۆنێتی یاریده‌دانی هاوكار كراوه بۆ ئه‌وه‌ی نوێژ بكه‌ن، ئه‌و به‌ڕێزه له‌وه‌لامدا ئه‌ڵێت (( سه‌ره‌تا به ئامۆژگاری و دواتر دوركه‌وتنه‌وه، ئه‌وجا ده‌ركردنی كه‌سی نوێژ نه‌كه‌ر، ئه‌گه‌ر هه‌ر نه‌كه‌وته قه‌ناعه‌ت ئه‌وا پێویسته بیكوژیت، دواتر ئه‌ڵێت بۆ كافر نه‌‌‌هاتووه حوكمی موسوڵمان بكات )) ئه‌گه‌ر گوێرایه‌ڵی ئه‌و فه‌توایه له‌لایه‌ن كۆمه‌ڵگه موسوڵمانه‌كانه‌وه بكرێت ئه‌وا لافاوی خوێن هه‌ڵئه‌سێت و هه‌موشمان به هۆكاره‌كه‌ی ئاشناین، ئه‌مه‌یه كاریسه‌ی مرۆڤایه‌تی، ئاخر مرۆڤ چۆن بتوانێت مرۆڤێكی هاوكاری خۆی بكوژێت به‌تاوانێك كه ته‌نها خۆی به‌رپرسه لێی و ته‌نها خۆی روبه‌رووی لێپرسینه‌وه‌ی ئه‌بێت !؟

خاتو ( سلوی المطیری ) كه چالاكوانی سیاسی ورۆشنبیرییه له ووڵاتی كوێت هیچی كه‌متر نه‌وتوه له‌و به‌ڕێزه‌ی خوێنی نوێژنه‌كه‌رانی كردۆته كاسه‌وه به‌ڵام ئه‌م خاتونه به‌ڕێگه‌یه‌كی جیاواز و له‌سه‌ر مه‌سه‌له‌یه‌ك كه ده‌بوو گه‌لێ وریاتر بیری لێبكردایه‌وه پێش قسه‌كردن، ئاخر هه‌‌ندێجار قسه‌كردن بێبه‌رنامه قسه‌كه‌ر ئه‌خاته هه‌ڵه‌‌یه‌ك، یان گه‌لێ نه‌فام ئه‌بینرێت یان زیاتر ده‌ناسرێت به‌ڵام له‌سه‌ر حسابی كۆمه‌ڵگه‌، ئه‌و خاتونه له‌ وه‌ڵامی راپرسییه‌ك ده‌رباره‌ی چاره‌سه‌ركردنی دیارده‌ی به خراپه‌ چوونی پیاوان له‌ده‌ره‌وه‌ی ماڵ و بۆ چاره‌سه‌ركردنی ئه‌و كێشه كۆمه‌ڵایه‌تییه ئه‌ڵێت (( من پێم باشه بۆ ووڵاتی كوێت ژن هاوه‌رده بكرێن و پیاوان وه‌ك كه‌نیزه‌ك ( جارییه ) بیانكڕن له بری ئه‌وه‌ی له‌ده‌ره‌ی ماڵ خراپه بكه‌ن با هه‌ر پیاوێك چه‌ن ژنێك بكڕێت و له‌گه‌ڵی بنوێت، ئه‌و خاتونه كه به‌ناو ڕۆشنبیر و چالاكوانه دوای راپرسی خۆی به پیاوانی ئایین گه‌یشتۆته ئه‌و قه‌ناعه‌ته و ئه‌ڵێت : راسته ئه‌بێت كه‌نیزه‌ك له جه‌نگا بگیرێت و له ئاكامی داگیركردنی وولاتێكی موسوڵمان بۆ ووڵاتێكی كافر ژنه‌كان داگیربكرێن وه‌ك چۆن له‌زه‌مانی خوله‌فای راشدیندا كراوه و له‌سه‌رده‌می بڵاوكردنه‌وه‌ی ئاینی ئیسلامدا ئه‌و دیارده‌یه هه‌بووه !! با پیاوه ده‌وڵه‌مه‌نه‌كانی كوێت له ووڵاتی چیچان ژن بكڕن و هاورده‌یان بكه‌ن خۆ ئه‌و ووڵاته قه‌یره‌ و بێوه‌ژنی دوای جه‌نگی زۆرن )). به‌رای ئه‌و خاتونه هارون الرشید ٢٠٠ جارییه‌ و یه‌ك ژنی هه‌بوون، ئاساییه گه‌ر ئه‌و دیارده‌یه بگه‌ڕێته‌وه و پیاوان چیتر له‌ده‌ره‌وه‌ی ماڵ خراپه نه‌كه‌ن !! كاریسه‌كه له‌وه‌دایه ئه‌و ژنه ڕۆشنبیره كڕینی ژنی لائاساییه وه‌ك كاڵایه‌ك و نووستنی ناشه‌رعی پێباشتره له‌گه‌ڵیاندا، ئاخۆ قه‌بوڵی ئه‌كات هاوسه‌ره‌كه‌ی چه‌ن جارییه‌ك بكڕێت و ئیش و كاری بێته نیشتنه سه‌ر ئه‌و ژنانه‌ی كه‌ته‌نها تاوانێكیان هه‌بێت ( ژن بوونه له ووڵاتێكی كاول و وێرانی دوای جه‌نگی وه‌ك شیشان !؟ )

به‌ڕاستی شه‌رمه ته‌نها گوێگرتن له‌و جۆره فه‌تواو قسه ناماقوڵانه‌ی مرۆڤ هێن بچووك و بێ نرخ ئه‌كه‌ن تا ئاستی به‌زه‌یی و گریان.

تایبه‌ت به گۆشه‌ی ( كه‌ژاڵ ئه‌نوسێت ) ژماره ٢١٠ ی گۆڤاری شه‌قام.

٠١-٠٧-٢٠١١


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.