Red Purple Black

حاكم قادر حه‌مه‌جان: چیتر رێگه‌ نادرێ به‌ بێ مۆڵه‌ت، كۆبوونه‌وه‌ و خۆپیشاندان بكرێ … دیمانه‌ی ئینته‌رنێتی: فه‌ره‌یدون بێوار

PDFPrintE-mail

حاكم قادر حه‌مه‌جان، ئه‌ندامی ده‌سته‌ی كارگێڕی مه‌كته‌بی یه‌کێتی نیشتمانی کوردستان، له‌ باره‌ی كێشه‌ ناوخۆییه‌كانی یه‌كێتییه‌وه‌ ده‌دوێ

رووبه‌ر: هێشتا سه‌ركرده‌كانی یه‌كێتی وه‌ڵامی ئه‌و پرسیاره‌یان نه‌داوه‌ته‌وه‌ ئایا كێ یه‌كه‌م كه‌س خاوه‌نی بیرۆكه‌ی دامه‌زراندنی یه‌كێتی نیشتیمانی كوردستان بووه‌، هه‌ندێك نه‌وشیروان و هه‌ندێك مام جه‌لال به‌خاوه‌نی بیرۆكه‌ و دامه‌زرێنه‌ری یه‌كێتی ده‌زانن، ده‌كرێ له‌م ڕووه‌وه‌ زانیاری و روونكردنه‌وه‌ی زیاترمان بده‌یتێ؟  

حاكم قادر: به‌رێز مام جه‌لال له‌گه‌ڵ چه‌ند هه‌ڤاڵێكی تردا كه‌ ناویان تۆماره‌و به‌رێز مام جه‌لالیش ئاماژه‌ی پێكردووه‌، دامه‌زرێنه‌ری (ی. ن. ك) بوون. شوێن و كات و ناوه‌كان به‌ڵگه‌ی سه‌لمێنه‌ری راستی و دروستین.

رووبه‌ر: له‌ساڵیادی 36 ساڵه‌ی دامه‌زراندنی یه‌كێتیدا، تاڵه‌بانی سكرتێری گشتی یه‌كێتی مه‌سه‌له‌ی نوسینه‌وه‌ی مێژووی یه‌كێتی زیندوو كرده‌وه‌و ئاماژه‌ی به‌ده‌سته‌ی دامه‌زرێنه‌رانی شاخ كرد و سه‌ركرده‌كانی ناوشاری فه‌رامۆش كرد، له‌سه‌ر ئه‌وه‌ش رای جیاواز و ناكۆكی دروست بووه‌ و ته‌نانه‌ت مه‌لابه‌ختیار وه‌ڵامی تاڵه‌بانی دایه‌وه‌، هه‌ندێك پێیانوایه‌ له‌به‌ر ئه‌وه‌ی یه‌كێتی كوتله‌گه‌ریی و جیابوونه‌وه‌ی زۆری تێدا روویداوه‌، بۆیه‌ مێژووه‌كه‌ی نانوسنه‌وه‌، ئایا بۆچی تا ئه‌م ساته‌ وه‌خته‌ش مێژووی یه‌كێتی نه‌نوسراوه‌ته‌وه‌؟

حاكم قادر: به‌ڕێز مام جه‌لال له‌و وتاره‌ گرنگه‌یدا، باسی له‌دامه‌زراندن و ده‌سته‌ی دامه‌زرێنه‌رانی (ی. ن. ك) كرد، پاشان ئاماژه‌ی به‌وه‌ كرد كه‌ چێوه‌یه‌كی گشتی هه‌یه‌ بۆ خه‌باتی یه‌كێتی، مه‌به‌ست خه‌باتی پێشمه‌رگایه‌تی و دیپلۆماسی و سیاسی و فكری و كۆمه‌ڵایه‌تییه‌ به‌گشتی، له‌ناوه‌وه‌و ده‌ره‌وه‌ پێكه‌وه‌. كه‌ دیاره‌ له‌چوارچێوه‌ی (ی. ن. ك) دا تێكۆشان و خه‌باتی هه‌موو لایه‌ك ئاشكرایه‌و هه‌ر ئه‌و گشتگیرییه‌ بوو، هێزی ته‌واوی دایه‌ یه‌كێتی و به‌سه‌ركه‌وتنی گه‌یاند، ئه‌گینا ده‌سته‌ی دامه‌زرێنه‌رو سه‌ركردایه‌تی ناوه‌وه‌ی وڵات پێكه‌وه‌ له‌سه‌روه‌رییه‌كاندا به‌شدارن، مێژووی خه‌باتی سیاسی، پێشمه‌رگایه‌تی، فكری و راگه‌یاندنی (ی. ن. ك) ئه‌وه‌نده‌ ده‌وڵه‌مه‌نده‌ نه‌ك له‌ته‌نیا وتارێكدا جێی ناكرێته‌وه‌، به‌ڵكو پێویستی به‌چه‌ندین لێكۆڵینه‌وه‌ی زانستی و توێژینه‌وه‌وكتێب هه‌یه‌. ئه‌وه‌ی به‌رێز كاك مه‌لا به‌ختیاریش په‌راوێزو ئیزافه‌یه‌ك بوو بۆ وته‌كه‌ی جه‌نابی مام جه‌لال كه‌ هه‌ڵسه‌نگاندنی تێكۆشانی ناوه‌وه‌ی وڵات بوو، كه‌ دیاره‌ هه‌ڤاڵ مام جه‌لال بۆ یادی دامه‌زراندنی یه‌كێتی ئه‌و وتاره‌ی پێشكه‌شكردووه‌ و باسی ئه‌ندامانی دامه‌زرێنه‌ری یه‌كێتی كردووه‌.

رووبه‌ر: كۆسره‌ت ره‌سول به‌شداری له‌یادی دامه‌زراندنی یه‌كێتیدا نه‌كرد، كه‌ له‌ سلێمانی و به‌ ئاماده‌ بوونی مام جه‌لال و مه‌سعود بارزانی به‌رێوه‌چوو، ئایا ئه‌مه‌ هه‌ڵوێست وه‌رگرتن نه‌بوو به‌رامبه‌ر به‌مه‌سعود بارزانی و حزبه‌كه‌ی، كه‌ رێگه‌یان نه‌دا له‌بازگه‌ی دێگه‌ڵه‌ بچێته‌ هه‌ولێر، یان هه‌ڵوێست وه‌رگرتن بووه‌ به‌رامبه‌ر به‌ مه‌كته‌بی سیاسی یه‌كێتی كه‌ له‌ سه‌ر ئه‌و بابه‌ته‌ وه‌ده‌نگ نه‌هاتن؟

حاكم قادر: هه‌ڤاڵی به‌ڕێز كاك كۆسره‌ت له‌یادی 36 ساڵه‌ی دامه‌زراندنی (ی. ن. ك) دا له‌ئاهه‌نگه‌كه‌ی هه‌ولێر وه‌ك جێگری سكرتێری گشتی یه‌كێتی به‌شداربوو و وتاری پێشكه‌شكرد. كه‌ له‌ هه‌مان رۆژدا ئه‌نجامدرا، بۆیه‌ نه‌ده‌كرا له‌ئاهه‌نگه‌كه‌ی سلێمانی به‌شداربێت. ئه‌م مه‌سه‌له‌یه‌ هیچ په‌یوه‌ندیی به‌ بارگرژی ئه‌و كاته‌ی بازگه‌ی دێگه‌ڵه‌وه‌ نه‌بووه‌، یان هه‌ڵوێست وه‌رگرتن بێت له‌هه‌ڤاڵه‌كانی مه‌كته‌بی سیاسی. كاك كۆسره‌ت كه‌سێكی به‌ڕێز و تێكۆشه‌رێكی ماندوونه‌ناسه‌، له‌سه‌ر ره‌فتاری وا هه‌ڵوێست وه‌رناگرێ، ئه‌و خۆی بۆ خه‌باتی گه‌له‌كه‌ی و یه‌كێتی ته‌رخانكردووه‌ و ئێستا جێگری سكرتێری گشتی یه‌كێتییه‌، دیاره‌ له‌و رووداوه‌شدا، له‌لایه‌ك مه‌كته‌بی سیاسی بێده‌نگ نه‌بوو، به‌ڵكو قسه‌ی له‌سه‌ر كردووه‌ له‌كۆبوونه‌وه‌ی دوو قۆڵیدا له‌گه‌ڵ برایانی پارتی. براده‌رانی پارتیش له‌سه‌ر ئاستی به‌رز هه‌ر زوو به‌ده‌م كێشه‌كه‌وه‌ چوون و چاره‌سه‌ریان كرد. دوای ئه‌وه‌ له‌یادی (ی. ن. ك) دا به‌ئاماده‌بوونی به‌رێز كاك كۆسره‌ت ئه‌و مه‌راسیمه‌ گه‌وره‌ جه‌ماوه‌رییه‌ كرا.

رووبه‌ر: زۆرن ئه‌وانه‌ی ئێستا له‌ناو یه‌كێتیدان و خوازیاری ئه‌وه‌ن تاڵه‌بانی ده‌ست له‌كاربكێشێته‌وه‌و بیره‌وه‌رییه‌كانی خۆی بنوسێته‌وه‌، تاچه‌ند ئه‌و مه‌سه‌له‌یه‌ له‌ئارادایه‌؟

حاكم قادر: هیچ كه‌سێك خوازیار نییه‌ به‌رێز تاڵه‌بانی ده‌ست له‌كاربكێشێته‌وه‌، چونكه‌ به‌رێزی هه‌میشه‌ رۆڵی گرنگ و به‌رچاوی هه‌بووه‌ و هه‌یه‌تی له‌رابردووه‌وه‌ تا ئێستا، بۆ یه‌كێتی و گه‌له‌كه‌مان گرنگ و پێویسته‌، مه‌سه‌له‌ی وا له‌ئارادا نیه‌. هه‌ر وه‌ك مه‌سه‌له‌ی نوسینه‌وه‌ی بیره‌وه‌ریه‌كان زۆر گرنگ و پێویسته‌ بۆ هه‌موو لایه‌ك و نه‌وه‌ی نوێ چاوه‌ڕوانی ئه‌وه‌ن به‌رێز مام جه‌لال بیره‌وه‌رییه‌كانی بنوسێته‌وه‌، كه‌ رۆڵی میحوه‌ری ده‌بینێ له‌ په‌یوه‌ندیی به‌مێژوو و خه‌باتی سیاسی و كوردایه‌تی و ململانێ و ناكۆكییه‌كان له‌سه‌ر ئاستی كوردستان و عێراق و ناوچه‌كه‌ به‌گشتی و به‌تایبه‌تی.

رووبه‌ر: ماوه‌یه‌كه‌ یه‌كێتی دوای مام جه‌لال هاتووه‌ته‌وه‌ به‌رباس، ئایا چ خوێندنه‌وه‌یه‌كت بۆ یه‌كێتی دوای مام جه‌لال هه‌یه‌ و دوای مام جه‌لال سكرتێری یه‌كێتی كێ ده‌بێ؟

حاكم قادر: هه‌ر رووداوێك و بابه‌تێك له‌گه‌ڵ بارودۆخی خۆی هه‌ڵده‌سه‌نگێنرێت، جه‌نابی مام جه‌لال سه‌ركرده‌یه‌كی به‌توانایه‌و هیوای ته‌مه‌ندرێژی بۆ ده‌خوازین. ئه‌وانه‌ش كه‌ مه‌سه‌له‌ی له‌و جۆره‌ باسده‌كه‌ن، له‌راستیدا هه‌ڵه‌ ده‌كه‌ن، له‌كاتێكدا جه‌نابی مام جه‌لال له‌ لوتكه‌ی چالاكی و خه‌باتدایه‌و رۆڵی گرنگی هه‌یه‌ له‌ناو سه‌رجه‌م پێكهاته‌ عیراقییه‌كاندا و له‌پێشه‌نگی سه‌ركرده‌ هه‌ڵسوڕاوه‌كانی ئاستی ناوچه‌كه‌و عیراق و كوردستانه‌.

رووبه‌ر: یه‌كێتی بۆ ماوه‌ی 62 رۆژ به‌رامبه‌ر به‌خۆپیشاندان نه‌رمی نواند و پشتگیری داواكانی ده‌كردن، كه‌چی دوای كۆبوونه‌وه‌ی مام جه‌لال و مه‌سعود بارزانی، له‌پڕ به‌زه‌بری هێز به‌رده‌ركی سه‌رای پێ چۆڵ كردن، ئایا ئه‌مه‌ له‌ژێر فشاری پارتیدا بوو وه‌ك هاوپه‌یمانی یه‌كێتی، یان ئه‌مریكا گڵۆپی سه‌وزی بۆ ده‌سه‌ڵاتی كوردی پێ كرد؟

حاكم قادر: له‌جیهاندا مۆڵه‌ت مه‌رجی سه‌ره‌كییه‌ بۆ ئه‌نجامدانی خۆپیشاندان، كه‌ ئه‌مجۆره‌ چالاكییانه‌ (خۆپیشاندان، كۆبوونه‌وه‌، مانگرتن) مافێكی ره‌وا و یاسایی هه‌موو هاووڵاتییه‌كه‌ كه‌ به‌ یاساو له‌ده‌ستوریشدا سه‌لمێندراوه‌. به‌ڵام خۆپیشاندان و مانگرتن و كۆبوونه‌وه‌ پێویسته‌ كات و شوێن و ئامانجی تیا دیاری بكرێت. كه‌ دیاره‌ له‌ سلێمانی جگه‌ له‌رۆژی یه‌كه‌م كه‌ مۆڵه‌تی گردبوونه‌وه‌یان هه‌بوو، هه‌موو رۆژه‌كانی دیكه‌ به‌ نایاسایی و بێمۆڵه‌ت ئه‌نجامدراوه‌. ئه‌م مۆڵه‌ت وه‌رنه‌گرتنه‌ش ئاماژه‌یه‌كی نایاسایی و نه‌گونجاو بوو، كه‌ بێگومان چاوه‌ڕوانی دۆخێكی نادروستی لێده‌كرا. ئاشكرایه‌ كه‌ له‌و ماوه‌یه‌دا چه‌ندین كێشه‌ و رووداوی دڵته‌زێن روویاندا، كه‌ بووه‌ مایه‌ی ناره‌زایه‌تی خه‌ڵك، بێ ئیشی و دۆخی نائارامی لێكه‌وته‌وه‌، چونكه‌ چییان بۆ كرا كردیان، بۆیه‌ بۆ به‌رژه‌وه‌ندی گشتی، به‌پێی به‌رنامه‌یه‌كی دروست رێگه‌ له‌م نائارامییه‌ گیراو چیتر رێگه‌ نه‌درا و نادرێ به‌بێ مۆڵه‌ت، كۆبوونه‌وه‌و خۆپیشاندان بكرێ. ئه‌مه‌ش دوورو نزیك په‌یوه‌ندی به‌ برایانی پارتی و گڵۆپی سه‌وزی ئه‌مریكیه‌كانه‌وه‌ نه‌بوو، به‌ڵكو په‌یوه‌ندی به‌ژیان و ئارامی خه‌ڵكه‌وه‌ بوو. هه‌ر چه‌نده‌ له‌لایه‌كه‌وه‌ ئه‌مریكیه‌كان ئاماده‌ییان بۆ حكومه‌تی هه‌رێم و ئارامی و ئاسایش و سه‌روه‌ری یاسا ده‌ربڕیوه‌، هه‌روه‌ك پشێوی و نائارامی هه‌رێمی كوردستانیان پێخۆش نیه‌، به‌گشتی ئه‌مه‌ بڕیارێكی گونجاو بوو نه‌ك شتی تر، چونكه‌ له‌و كاته‌وه‌ تا ئێستا هیچ رووداو و گرفتێكی ناخۆش و دڵته‌زێن روینه‌داوه‌.

رووبه‌ر: دوای ئه‌وه‌ی وه‌فدێكی یه‌كێتی دووجار سه‌ردانی سه‌ركرده‌كانی بزوتنه‌وه‌ی گۆڕانی كرد له‌گرده‌كه‌، یه‌كێتی ئاماده‌یی خۆی بۆ هه‌ڵوه‌شاندنه‌وه‌ی حكومه‌ت ده‌ربڕی، كه‌چی له‌پڕ له‌و به‌ڵێنه‌ی خۆی په‌شیمان بۆوه‌ و هه‌ڵوه‌شاندنه‌وه‌ی حكومه‌ت و دكتۆر به‌رهه‌می به‌ هێڵی سور ناوبرد، به‌ڵام له‌ئێستادا كه‌ ده‌نگۆی لێسه‌ندنه‌وه‌ی سه‌رۆكایه‌تی حكومه‌ت هه‌یه‌ له‌لایه‌ن پارتییه‌وه‌، گوایه‌ یه‌كێتی دووباره‌ نه‌رمی نواندوه‌ بۆ هه‌ڵوه‌شاندنه‌وه‌ی حكومه‌ت، ئایا به‌ هه‌ڵوه‌شاندنه‌وه‌ی حكومه‌ت رازی ده‌بن یان هێشتا به‌ لای ئێوه‌وه‌ هێڵی سوره‌؟ 

حاكم قادر: هیچ وه‌فدێكی (ی. ن. ك) سه‌ردانی سه‌ركردایه‌تی بزوتنه‌وه‌ی گۆڕانی نه‌كردووه‌ له‌گرده‌كه‌، به‌ڵكو وه‌فدی (ی. ن. ك) و بزوتنه‌وه‌ی گۆڕان دووجار دانیشتنیان ئه‌نجامداوه‌، جارێكیان له‌ماڵی به‌ڕێز كاك نه‌وشیروان و جارێكی تر له‌ماڵی به‌رێز كاك دلێری سه‌ید مه‌جید. هیچ كات یه‌كێتی ئاماده‌یی ده‌رنه‌بڕیوه‌ بۆ هه‌ڵوه‌شاندنه‌وه‌ی حكومه‌ته‌كه‌ی به‌رێز كاك دكتۆر به‌رهه‌م، به‌ڵكو باس له‌حكومه‌تی بنكه‌ فراوان كراوه‌. بێگومان به‌هیچ جۆرێك (ی. ن. ك) نه‌رمی نه‌نواندووه‌ بۆ هه‌ڵوه‌شاندنه‌وه‌ی حكومه‌ت، حكومه‌تێك كه‌ به‌ زۆرینه‌ی ده‌نگی خه‌ڵك پێكهاتووه‌ و بۆ جارێكی تریش به‌ زۆرینه‌ی ده‌نگ له‌ پارله‌مانی كوردستان شه‌رعیه‌تی وه‌رگرته‌وه‌.

ئێمه‌ هیچ كات له‌گه‌ڵ هه‌ڵوه‌شاندنه‌وه‌ی حكومه‌تی هه‌رێمدا نین، به‌ڵكو له‌گه‌ڵ حكومه‌تی بنكه‌ فراوانداین. (ی. ن. ك) و پارتی، پێكه‌وه‌ حكومه‌تیان به‌رێوه‌بردووه‌ و به‌رپرسیارێتیان له‌ئه‌ستۆناوه‌. هه‌ر بۆیه‌ به‌رده‌وام ده‌بن تا ماوه‌ی یاساییان ته‌واوده‌بێ. هیواداریشین له‌گه‌ڵ ئۆپۆزسیۆن به‌مه‌به‌ستی پاراستنی ده‌ستكه‌وته‌كانمان و گه‌شه‌پێدانی زیاترو خزمه‌تگوزاری زیاتر و خزمه‌تی خه‌ڵكی كوردستان ده‌ست له‌ ناو ده‌ست كار بكه‌ین له‌ پێناو چه‌سپاندنی ئاشتی و ئازادی و یه‌كتر قبوڵكردن، ره‌خنه‌و گله‌یی و گازه‌نده‌ش مافی ره‌وای هه‌موو كه‌سێكه‌ له‌سه‌ر هه‌ر هه‌ڵه‌ و كه‌م وكورتییه‌ك كه‌ رووده‌دات.

رووبه‌ر: ڕاگه‌یاندنه‌كانی ئۆپۆزیسیۆن و ته‌نانه‌ت هه‌ندێك له‌سه‌ركرده‌كانیان گومان ده‌خه‌نه‌ سه‌ر سه‌ركه‌وتنی گفتوگۆ پێنج قۆڵیه‌كان و پێیانوایه‌ ده‌ره‌نجامی نابێت، له‌ئێستاشدا به‌شێك له‌جه‌ماوه‌ر و گروپ و ئه‌نجومه‌نه‌كانی مه‌یدانی ئازادی، هه‌ڕه‌شه‌ی دووباره‌ خۆپیشاندان ده‌كه‌نه‌وه‌، ئایا ئێوه‌ وه‌ك یه‌كێتی و ده‌سه‌ڵاتی سه‌وز له‌ سلێمانی و گه‌رمیان، رێگه‌ به‌ خۆپیشاندانی جه‌ماوه‌ری و مه‌یدانه‌كانی ئازادی ده‌ده‌نه‌وه‌؟

حاكم قادر: سه‌ركه‌وتنی گفتوگۆ، ئاواتی خه‌ڵكه‌ به‌گشتی، خه‌ڵكی كوردستان خواستیی ئاشتی و پێكه‌وه‌ ژیانه‌، جا له‌به‌ر ئه‌وه‌ی خواست و ئامانجی خه‌ڵكه‌، هه‌ڵه‌یه‌ به‌گومانه‌وه‌ تێیبڕوانرێت. چاره‌سه‌ری كێشه‌كان، گه‌نده‌ڵییه‌كان، ناڕه‌واییه‌كان به‌پێی یاسا و له‌دادگا ده‌كرێت، پێویسته‌ هه‌وڵی جدی بده‌ین بۆ سه‌رخستنی ئه‌م قۆناغه‌ و چاره‌سه‌ری كێشه‌كان به‌گفتوگۆ و دیالۆگ. هه‌ر كه‌سێكیش له‌لایه‌ن دادگاوه‌ بانگ ده‌كرێت پێویسته‌ بێ قه‌ید و شه‌رت له‌ دادگا ئاماده‌ بێت بۆ روونكردنه‌وه‌ی راستییه‌كان و ساغكردنه‌وه‌ و یه‌كلاكردنه‌وه‌ی ئه‌و پروپاگه‌نده‌ و تۆمه‌تانه‌ له‌ لایه‌ن دادگاوه‌ كه‌ ته‌نها یاسا ده‌توانی ئه‌و مه‌سه‌لانه‌ یه‌كلابكاته‌وه‌.

بۆ دووباره‌بوونه‌وه‌ی خۆپیشاندان و مانگرتن و كۆبوونه‌وه‌ش دیاره‌ ئه‌وه‌ مافێكی ڕه‌وا و یاسایی و ده‌ستورییه‌ بۆ هه‌موو كه‌س و لایه‌ن و رێكخراوێك، به‌ڵام بۆ ئه‌م مه‌به‌سته‌ پێویسته‌ مۆڵه‌ت وه‌ربگیرێ، واته‌ كار و داواكارییه‌كانمان بخه‌ینه‌ چوارچێوه‌ی یاساوه‌، هه‌روه‌ها هه‌موو خۆپیشاندان و مانگرتن یا كۆبوونه‌وه‌یه‌ك، پێویسته‌ كات و شوێن و ئامانجی چالاكییه‌كه‌ دیاری بكرێت و نابێت ئاسایشی گشتی هه‌رێم و ئارامی خه‌ڵك تێكبدرێت. ئێستاش كۆبوونه‌وه‌كان به‌پێی پرۆژه‌ ئاماده‌كراوه‌كان ته‌واوی داخوازییه‌كانی خه‌ڵكی تێدایه‌، له‌پرۆژه‌ی هاوبه‌شی نوێبوونه‌وه‌و ئاینده‌سازیی له‌ته‌وه‌ره‌كانی:

یه‌كه‌م: پره‌نسیپی سه‌روه‌ریی یاسا.

دووه‌م: هه‌ڵسه‌نگاندنی كاره‌ یاساییه‌كان له‌ بواره‌كانی پیاچونه‌وه‌، كۆمه‌ڵایه‌تی، دامه‌زراندن، ئه‌نجومه‌نی راژه‌، كه‌رتی تایبه‌ت، یاساكان، كاری بێگانه‌، پێشینه‌ی خانووبه‌ره‌ و هاوسه‌رگیری، خانه‌نشینی بۆ ئه‌نفال، قوربانیان و تێكۆشه‌ران و ئاواره‌، پشتیوانیی رێكخراوه‌یی.

سێیه‌م: چاكسازی یاسایی وه‌زاره‌ته‌كان و چاودێرییان، له‌بواره‌كانی، ده‌سته‌ی نه‌زاهه‌، چاودێری دارایی، نه‌هێشتنی دوو ئیداره‌یی، پرۆژه‌كان و لێپێچینه‌وه‌، نه‌وت و گازو یاسا، هه‌مواركردنی یاسای پارێزگاكان، زه‌وی كشتوكاڵی و نه‌هێشتنی پێشێلكاری.

چواره‌م: هه‌مواركردنی یاسای حزب و رێكخراوه‌كان وه‌ك یاسای حزبه‌كان و سه‌رده‌م، قه‌ده‌غه‌كردنی میلیشیا، ده‌وامی ره‌سمی و كۆبوونه‌وه‌ی نا رێسایی، رێگرتن له‌كۆبوونه‌وه‌ی حزبی ناو هێزه‌ چه‌كداره‌كان، ئاشكراكردنی سه‌رچاوه‌ی دارایی حزبه‌كان، په‌یوه‌ندی ده‌ره‌كی، یاساو میدیا، نۆژه‌نكردنه‌وه‌ی یاسای رێكخراوه‌كان.

پێنجه‌م: ته‌وه‌ری یه‌كخستنه‌وه‌ی وه‌زاره‌ته‌كان و ده‌زگاكان.

شه‌شه‌م: یاسای نوێی رێككاری به‌مه‌به‌ستی ئه‌كتیڤكردنی یاسای رێككاری فه‌رمانبه‌رانی ده‌وڵه‌ت.

جا ئه‌گه‌ر حكومه‌تی هه‌رێم ئه‌م داخوازییانه‌ جێبه‌جێبكات، ئاخۆ خۆپیشاندان چ مانایه‌كی بۆ ده‌مێنێته‌وه‌.

رووبه‌ر: پرسی لێكۆڵینه‌وه‌و چاكسازی له‌حكومه‌تدا ته‌نها به‌رپرسه‌كانی پارتی گرتۆته‌وه‌، هێشتا به‌رپرسێكی یه‌كێتی له‌كاره‌كه‌ی لا نه‌دراوه‌، هه‌ندێك پێیانوایه‌ یه‌كێتی له‌ترسی چونه‌ ناو گۆڕان لێپێچینه‌وه‌ له‌به‌رپرسه‌كانی ناكات، هه‌ندێكیش پێیان وایه‌ سه‌رۆكی هه‌رێم ده‌سه‌ڵاتی به‌سه‌ر سلێمانی و به‌رپرسانی یه‌كێتیدا ناشكێ؟

حاكم قادر: مه‌سه‌له‌ی چاكسازی ته‌نها بریتی نییه‌ له‌به‌لاوه‌نان و لابردنی به‌ربه‌سته‌كان، به‌ڵكو چاكسازی پرۆسه‌یه‌كی گرنگ و هه‌مه‌لایه‌نه‌یه‌ په‌یوه‌ندی به‌ عه‌داله‌تی كۆمه‌ڵایه‌تی، سه‌روه‌ری یاسا، گۆڕانكاریی، گه‌شه‌كردنی كۆمه‌ڵایه‌تی و زۆر بابه‌تی گرنگی تره‌وه‌ هه‌یه‌. په‌یوه‌ندی به‌خزمه‌تی گشتی ومافی وه‌كیه‌كی هاووڵاتیانه‌وه‌ هه‌یه‌. بۆیه‌ پێویستمان به‌چاكسازی و گه‌شه‌پێدان و گۆڕانكاری هه‌یه‌، له‌وانه‌ گۆڕینی به‌رپرسان پێویسته‌، یان هه‌ر به‌رپرسێ ده‌سه‌ڵاته‌كه‌ی بۆ به‌رژه‌وه‌ندی خۆی به‌ كار هێَنا یان بهێنێ جگه‌ له‌لادان و گۆڕینی ده‌بێت لێپێچینه‌وه‌شی له‌گه‌ڵدا بكرێ له‌رێگای دادگاوه‌.

 (ی. ن. ك) له‌وه‌ نه‌ترساوه‌ كێ لابدات و دوای لابردنی ده‌چێته‌ چ لایه‌نێكه‌وه‌، چونكه‌ ئه‌و كه‌سانه‌ی بۆ به‌رژه‌وه‌ندی خۆیان و مه‌رامی خۆیان كارده‌كه‌ن له‌هه‌ر شوێنێ بن ناتوانن خزمه‌ت بكه‌ن، ئێمه‌ له‌مه‌كته‌بی سیاسی (ی. ن. ك) پشتیوانی ته‌واو له‌به‌رێز كاك مه‌سعود بارزانی ده‌كه‌ین بۆ هه‌موو چاكسازی و گۆڕانكارییه‌ك و ده‌ستخۆشی لێ ده‌كه‌ین. دیاره‌ به‌رێزی به‌سیفه‌تی سه‌رۆكی هه‌رێم، پرۆژه‌و به‌رنامه‌ی چاكسازی ده‌ستپێكردووه‌، ئێمه‌ش پشتیوانی ته‌واوی لێده‌كه‌ین به‌مه‌به‌ستی سه‌ركه‌وتنی مه‌له‌فی چاكسازی و گۆڕانكاری و لێپێچینه‌وه‌و كاری یاسایی به‌رامبه‌ر هه‌ر كه‌سێك كاری ناقانونی و نادروستی كردبێت.

رووبه‌ر: ده‌نگۆی ئه‌وه‌ هه‌یه‌ كه‌ پارتی به‌هۆی ئه‌و نا سه‌قامگیرییه‌ی له‌سلێمانی هه‌یه‌، نایه‌وێت هه‌وڵێریش وه‌كو سلێمانی لێ بێت، ئایا ئه‌وه‌ جۆرێك له‌ به‌رته‌سككردنه‌وه‌ی ئازادی نییه‌، به‌رێزت له‌وباره‌یه‌وه‌ چ بۆچونێكت هه‌یه‌؟

حاكم قادر: سلێمانی له‌ هه‌ولێر و هه‌ولێر له‌ سلێمانی جیا ناكرێته‌وه‌، شاره‌كانی كوردستان له‌سنوری هه‌رێمی كوردستاندان و هیچ جیاوازییه‌كیان نییه‌، بۆیه‌ پێویسته‌:

1. ئارامی ته‌واو بۆ خه‌ڵك ده‌سته‌به‌ر بكه‌ین به‌مه‌به‌ستی خزمه‌تی گشتی و پاراستنی ئه‌زمونه‌كه‌مان و گه‌شه‌پێدان.

2. هه‌وڵی جدی بدرێ بۆ چاكسازی و گۆڕانكاری به‌ ئاراسته‌ی داخوازییه‌ ڕه‌واكانی خه‌ڵك.

3. نابێت ئازادی بیروڕاو ئازادی رۆژنامه‌گه‌ری به‌رته‌سك بكه‌ینه‌وه‌، به‌ڵكو پێویسته‌ زیاتر بكرێ له‌چوارچێوه‌ی یاسا و به‌رژه‌وه‌ندییه‌ گشتیه‌كانی نه‌ته‌وه‌كه‌ماندا.

رووبه‌ر: ئه‌گه‌ر ئۆپۆزیسیۆن و ده‌سه‌ڵات نه‌گه‌یشتنه‌ رێكه‌وتن و پرۆژه‌یه‌كی هاوبه‌ش، ئایا ئێوه‌ وه‌ك هه‌ردوو حزبی ده‌سه‌ڵاتدار به‌ته‌مای چین و چی ده‌كه‌ن، یان هه‌ڵوێستتان چی ده‌بێت؟

حاكم قادر: ئومێد ده‌خوازین بگه‌ینه‌ ئه‌نجام، كه‌ ئه‌مه‌ هیوای هه‌موو لایه‌كمانه‌و خواستی خه‌ڵكیشه‌، تائێستاش باش به‌رێوه‌چووه‌، بۆ گه‌یشتن به‌پرۆژه‌یه‌كی هاوبه‌ش، گه‌ر نه‌گه‌یشتینه‌ ئه‌نجام، هه‌ڵبژاردنی پێشوه‌خت باشترین رێگه‌یه‌، واته‌ گه‌ڕانه‌وه‌ بۆ لای خه‌ڵك و بۆ لای میلله‌ت، چونكه‌ به‌ ته‌نها گه‌ل سه‌رچاوه‌ی ده‌سه‌ڵاته‌.

رووبه‌ر: بۆچی یه‌كێتی له‌مه‌ڕ توندوتیژییه‌كانی حكومه‌تی سوریا كه‌ به‌رامبه‌ر به‌ كوردستانی رۆژئاوا ده‌یكات، به‌یانی ئیدانه‌كردنی ده‌رنه‌كردووه‌؟

حاكم قادر: هه‌ڵوێستی (ی. ن. ك)، روون و ئاشكرایه‌، ئێمه‌ باوه‌ڕمان به‌دیموكراسیه‌، دژی هه‌موو جۆره‌ توندوتیژییه‌كین، هه‌ر كه‌سێك، هه‌ر ده‌سه‌ڵاتێك، هه‌ر حكومه‌تێك ئه‌نجامی بدات، (ی. ن. ك)، هه‌موو كارێكی توندوتیژی و پێشێلكردنی مافی مرۆڤ مه‌حكوم ده‌كات.



ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.