Red Purple Black

ئاواتی شێخ جه‌ناب، هه‌ڵسوڕوای بزوتنه‌وه‌ی گۆڕان ... دیمانه‌: فه‌ره‌یدون بێوار، سلێمانی

PDFPrintE-mail

فه‌ره‌یدون: له‌رووی په‌یوه‌ندی دیپلۆماسییه‌وه‌، په‌یوه‌ندی بزوتنه‌وه‌كه‌تان له‌گه‌ڵ كۆی حزبه‌ كوردستانییه‌كان چۆنه‌؟

ئاوات شێخ جه‌ناب: ئه‌و حزبانه‌ی كه‌ گۆڕان لێیانه‌وه‌ نزیكه‌ كۆمه‌ڵ و یه‌كگرتوون، ئێمه‌ له‌گه‌ڵ پارتی و یه‌كێتیدا ناكۆكی سیاسیمان هه‌یه‌، ده‌نا كێشه‌ی ترمان نییه‌، ئه‌و ناكۆكییه‌شی كه‌ هه‌مانه‌ سه‌رچاوه‌كه‌ی له‌ دوو حزبی ده‌سه‌ڵاته‌وه‌ هاتووه‌، ده‌نا ئێمه‌ هۆكاری خراپی په‌یوه‌ندییه‌كان نین.

له‌گه‌ڵ باقی حزبه‌كانی تریش كێشه‌مان نییه‌، هه‌ر وه‌ختێك ئه‌وان له‌گه‌ڵ ئێمه‌ ده‌ستی هاوكاری و ئاشتیان راكێشا، ئێمه‌ش به‌هه‌مانشێوه‌ لێیان ده‌چینه‌ پێشه‌وه‌.

فه‌ره‌یدون: به‌ڵام وا ته‌عبیر ده‌كرێ كه‌ گۆڕان له‌ رووی په‌یوه‌ندی دیپلۆماسییه‌وه‌ داخراو و گۆشه‌گیره‌، ته‌نیا خۆی له‌ سلێمانی و گرده‌كه‌دا ده‌بینێته‌وه‌، ته‌نانه‌ت دوای 17ی شوبات له‌ كۆمه‌ڵ و یه‌كگرتوو نزیكه‌ بۆوه‌، ده‌نا پێشتر له‌گه‌ڵ ئه‌وانیشدا په‌یوه‌ندی نه‌بوو؟

ئاوات شێخ جه‌ناب: پارتی و یه‌كێتی هه‌وڵیانداوه‌ بزوتنه‌وه‌ی گۆڕان گۆشه‌گیر بكه‌ن، ده‌نا گۆڕان خۆی نه‌یویستووه‌.

له‌ به‌غدا یه‌كێتی و پارتی له‌ حه‌قی گۆڕانیان زه‌وت كرد، هه‌روه‌ها هه‌وڵیشیانداوه‌ هه‌موو لایه‌نه‌كان له‌ گۆڕان دوور بخه‌نه‌وه‌. ئه‌و دوو لایه‌نه‌ ته‌حه‌مولی ئه‌وه‌ ناكه‌ن هێزێكی گه‌وره‌ ئۆپۆزسیۆن بێت و كاریگه‌ری هه‌بێت له‌سه‌ر نه‌خشه‌ی سیاسی له‌م وڵاته‌دا. بۆیه‌ هه‌تا پێیان بكرێت گۆشه‌گیری ده‌كه‌ن بۆ ئه‌وه‌ی نه‌بێته‌ نموونه‌ی ئیجابی بۆ لایه‌نه‌كانی تر.

فه‌ره‌یدون: ده‌وترێت هه‌وڵێك هه‌یه‌ بۆ كه‌رتكردنی ئۆپۆزسیۆن، ئایا هه‌وڵێكی له‌مجۆره‌ له‌ ئارادایه‌؟

ئاوات شێخ جه‌ناب: وه‌ك وتم یه‌كێتی و پارتی ده‌یانه‌وێ گۆڕان گۆشه‌گیر بكه‌ن، بۆیه‌ هه‌وڵده‌ده‌ن به‌ره‌ی ئۆپۆزسیۆن كه‌رت بكه‌ن، بۆ ئه‌وه‌ی گۆڕان به‌ ته‌نیا بمێنێته‌وه‌ و ته‌سلیمی ئه‌جندای ده‌سه‌ڵات بێت و به‌شداری پێبكه‌ن له‌ كێكه‌ی ده‌سه‌ڵاتدا بۆ ئه‌وه‌ی قه‌ناعه‌تی پێبكه‌ن.

فه‌ره‌یدون: سه‌ركرده‌كانی گۆڕان ره‌خنه‌ له‌ رێكه‌وتننامه‌ی ستراتیژی یه‌كێتی و پارتی ده‌گرن، كه‌چی ئێستا خودی گۆڕان له‌گه‌ڵ دوو پارته‌ ئیسلامییه‌كه‌ رێكه‌وتنێكی كاتی كردووه‌. پرسیاره‌كه‌ ئه‌وه‌یه‌: ئایا خراپی رێكه‌وتننامه‌كه‌ی یه‌كێتی و پارتی له‌چیدایه‌ و چاكه‌ی رێكه‌وتنه‌كه‌ی ئێوه‌ چییه‌؟

ئاوات شێخ جه‌ناب: رێكه‌وتننامه‌ی ستراتیژی له‌ ناو په‌رله‌ماندا دیكاتۆرییه‌تی زۆرینه‌ی لێ له‌دایكبوو. كوردستانی كردووه‌ به‌ دوو هه‌رێمی سه‌وز و زه‌رد، دوو ده‌زگای ئاسایش و دوو وه‌زاره‌تی دارایی و دوو وه‌زاره‌تی پێشمه‌رگه‌ هه‌یه‌ به‌ فێعلی.

ئه‌و رێكه‌تنه‌ ستراتیژییه‌ رێكه‌وتنه‌ له‌سه‌ر دابه‌شكردنی ده‌سه‌ڵات و سه‌روه‌ت له‌م وڵاته‌دا، ئه‌مه‌ لایه‌نه‌ خراپییه‌كانێتی.

رێكه‌وتنی سێ لایه‌نه‌ ئۆپۆزسیۆنه‌كه‌ له‌ دژی گه‌نده‌ڵییه‌، داوای چاكسازی وڵات و شه‌فافیه‌ت و گه‌ڕاندنه‌وه‌ی بودجه‌ بۆ میلله‌ت ده‌كه‌ن، داوا ده‌كه‌ن حكومه‌ت له‌ پاشكۆی حزبی ده‌رچێت. پێشمه‌رگه‌ سوپای گه‌ل بێت.

فه‌ره‌یدون: ئه‌و ره‌خنه‌یه‌ له‌ئێوه‌ ده‌گیرێت كه‌ له‌سه‌ره‌تای جیابوونه‌وه‌تان سیاسه‌تێكی دوژمنكارانه‌تان به‌رامبه‌ر به‌ یه‌كێتی گرته‌به‌ر، دواتر ئه‌م سیاسه‌ته‌ درێژ بۆوه‌ به‌رامبه‌ر به‌ پارتی، واته‌ ده‌وترێت ئێوه‌ ئۆپۆزسیۆنێكی راسته‌قینه‌ نه‌بوون؟

ئاوات شێخ جه‌ناب: ئه‌گه‌ر ئۆپۆزسیۆنی راسته‌قینه‌ به‌و جۆره‌ بێت كه‌ یه‌كێتی و پارتی به‌ دڵیانه‌، به‌ دڵنیاییه‌وه‌ ئێمه‌ ئه‌و ئۆپۆزسیۆنه‌ نین.

ئێمه‌ ئه‌و ئۆپۆزسیۆنه‌ین كه‌ ئامانج و به‌رنامه‌ی سیاسی خۆی راگه‌یاندووه‌ كه‌ ده‌زانێ چی ده‌وێت.

زمانی توندی راگه‌یاندن ئیمه‌ لیێ به‌رپرسیار نین، له‌و كاته‌وه‌ ده‌ستی پێكرد كه‌ له‌ راگه‌یاندنی پارتی و یه‌كێتییه‌وه‌ تاراده‌ی ته‌خوین له‌سه‌ر ئێمه‌ رۆیشتن. ئێستا شه‌ڕێكی نهێنی له‌سه‌ر ئاستی سیاسی و كۆمه‌ڵایه‌تی و رۆشنبیری و عێراق و هه‌رێمی له‌ دژی ئێمه‌ به‌رپا كراوه‌. ئێمه‌ له‌سه‌ر دیارده‌ قسه‌مان كردووه‌و ده‌یكه‌ین نه‌ك كه‌سه‌كان.

له‌سنوری پارتیدا چالاكوانی ئێمه‌ بۆیان نیه‌ به‌ ئازادی ئیش بكه‌ن. له‌ سنووری یه‌كێتیشدا هه‌موو ئه‌مانه‌ دووباره‌ بۆته‌ تاراده‌ی كوشتنیش.

ئێمه‌ نامانه‌وێ ئه‌و جۆره‌ ئۆپۆزسیۆنه‌ بین كه‌ ده‌سه‌ڵاتی خۆی وێنه‌ی ده‌كێشێت كه‌ چۆن بێت.

له‌ راستیدا ئه‌و سێ لایه‌نه‌ ئۆپۆزسیۆنی حه‌قیقین، چونكه‌ به‌رژه‌وه‌ندی ته‌سكی حزبایه‌تیان خسۆته‌لاوه‌، به‌رژه‌وه‌ندی به‌رزی نیشتمانیان خستۆته‌ پێشه‌وه‌.

فه‌ره‌یدون: دوای ئه‌وه‌ی نه‌شیروان مسته‌فا به‌شداری پرسه‌ی دایكی سه‌رۆكی هه‌رێمی كرد، شاندێكی پارتی سه‌ردانی باره‌گه‌ی گۆڕانیان كرد و له‌گه‌ڵ نه‌وشیروان كۆبوونه‌وه‌. ده‌كرێ زانیاری زێتره‌مان له‌باره‌ی ناوه‌رۆكی سه‌ردانه‌كه‌ بۆ باس بكه‌ی؟

ئاوات شێخ جه‌ناب: هه‌ندێك كه‌س خۆشی به‌وه‌ نایه‌ ئێمه‌ له‌گه‌ڵ پارتی به‌یانی باشیشمان هه‌بێت. كه‌ كاك نه‌وشیروان و زۆربه‌مان چووینه‌ بۆ پرسه‌ی ئه‌و مه‌رحومه‌ به‌ ئه‌ركێكی كۆمه‌ڵایه‌تیمان زانیوه‌، له‌ هه‌مانكاتدا ره‌هه‌ندی سیاسیشی تێدایه‌، چونكه‌ دایكی سه‌رۆكی هه‌رێمه‌. به‌ڵام هاتنی كاك ئه‌دهه‌م بۆ لای كاك نه‌وشیروان ره‌هه‌ندێكی سیاسی نه‌بوو.

فه‌ره‌یدون: زانیارییه‌كان باس له‌وه‌ ده‌كه‌ن كه‌ پارتی به‌ ته‌نیا له‌گه‌ڵ گۆڕان به‌ نهێنی كۆبۆته‌وه‌؟

ئاوات شێخ جه‌ناب: نه‌خێر شتی وانییه‌.

فه‌ره‌یدون: دوای دوو ساڵ هێشتا گۆڕان كۆنفرانس و كۆنگره‌ی نه‌به‌ستووه‌، به‌هۆی كۆمه‌ڵێك بیانوو كۆنگره‌ی دواخستووه‌ و هه‌ڵبژاردن بۆ هه‌ڵبژاردن جه‌ماوه‌ره‌كه‌ی له‌ چاوه‌ڕوانیدا هێشتۆته‌وه‌؟

ئاوات شێخ جه‌ناب: ئه‌و قسه‌ی راگه‌یاندنه‌كانه‌. له‌ ماوه‌ی رابردودا پارتی بۆ ماه‌یه‌كی زۆر كۆنگره‌ی نه‌به‌ست كه‌ حزبه‌كه‌ مێژوویه‌كی زۆری هه‌یه‌، كه‌س پرسیاری لێنه‌كرد پارتی بۆ كۆنگره‌ نابه‌ستیت؟ هه‌وروه‌ها له‌ نێوان كۆنگره‌ی یه‌كه‌م و دوومی یه‌كێتی ماوه‌یه‌ی زۆر هه‌یه‌، واته‌ به‌ستنی كۆنگره‌ مه‌سه‌له‌یه‌كی ناوخۆیی حزبه‌.

فه‌ره‌یدون: ئایا ئێوه‌ش ده‌تانه‌وێ هه‌مان ئه‌زموونی یه‌كێتی وپارتی تاقیبكه‌نه‌وه‌ و كۆپی ئه‌وان بن؟

ئاوات شێخ جه‌ناب: نه‌خێر، ئێمه‌ نامانه‌وێ ئه‌زموونی ئه‌وان تاقیبكه‌ینه‌وه‌، به‌ڵام كۆنگره‌ مه‌سه‌له‌یه‌كی ناوخۆیی بزوتنه‌وه‌ی گۆڕانه‌.

فه‌ره‌یدون: كۆی حزبه‌كانی كوردستان له‌ په‌یڕه‌وی ناوخۆیاندا ماوه‌ی خول و ساڵی (سه‌رۆك، سكرتێر، ئه‌میندار، ئه‌میر) یان دیاری نه‌كردووه‌، له‌ ره‌شنووسی ده‌ستووری (په‌یڕه‌وی ناوخۆ) ی گۆڕانیشدا هه‌مان شته‌، بۆچی ئێوه‌ وه‌ك حزبێكی نوێ ماوه‌ی سه‌رۆكی حزبه‌كه‌تان دیاری نه‌كردووه‌؟

ئاوات شێخ جه‌ناب: ئه‌م ره‌شنووسه‌ی ده‌ستووره‌ قابیلی ئه‌وه‌یه‌ له‌ كۆنگره‌دا جارێكی تر ده‌ستكاری بكرێت، ده‌كرێ ئه‌وه‌ پێشنیارێكی گونجاو بێت و له‌ كۆنگره‌دا باس بكرێت.

فه‌ره‌یدون: له‌ رووی هه‌یكه‌ل و رێكخستنی حزبییه‌وه‌، وا ده‌خوێنرێته‌وه‌ كه‌ بزوتنه‌وه‌ی گۆڕان ته‌نیا له‌ ناو و ده‌سته‌واژه‌دا گۆڕانكاری كردووه‌، ده‌نا هه‌مان هه‌یكه‌ل و رێكخستنی حزبه‌ ته‌قلیدییه‌كانی تره‌، بۆ نمونه‌ ناوی (مه‌كته‌ب) ی گۆڕیوه‌ بۆ (ژوور)، (مه‌ڵبه‌ند و لق) ی كردووه‌ به‌ (ئه‌نجومه‌ن)، هه‌روه‌ها (ناوچه‌ و كۆمیته‌) ی ناوناوه‌ (مه‌كۆ)، ده‌نا له‌ ناوه‌رۆكدا هه‌ر یه‌كن؟

ئاوات شێخ جه‌ناب: نا وانییه‌، مه‌سه‌له‌ی ئه‌ندام بوون لای ئێمه‌ وه‌ك حزبه‌ ته‌قلیدییه‌كان نییه‌. ئێمه‌ ژماره‌یه‌كی كه‌م ئه‌نداممان هه‌یه‌، به‌ڵام ژماره‌یه‌كی زۆر پشتیوانمان هه‌یه‌. ئه‌وانه‌ی لای ئێمه‌ ئه‌ندامن نابنه‌ فه‌رمانبه‌ری حزبی وه‌ك لای باقی حزبه‌كانی تر باوه‌.

فه‌ره‌یدون: ده‌وترێت كۆنه‌ یه‌كێتییه‌كانی ئێستای ناو گۆڕان رێگرن له‌ به‌ستنی كۆنگره‌، ده‌یانه‌وی هه‌ر له‌ پۆست و ده‌سه‌ڵات بمێننه‌وه‌ و نایه‌نه‌وی گۆڕان راده‌ستی نه‌وه‌ی تازه‌ بكه‌ن؟

ئاوات شێخ جه‌ناب: ئه‌وه‌ داڵغه‌یه‌كی بێمانایه‌ هه‌ندێك له‌و كه‌سانه‌ی كه‌ نه‌یاری گۆڕانن ئه‌و جۆره‌ داڵغانه‌ لێده‌ده‌ن. لای ئێمه‌ ئه‌وانه‌ی كه‌ له‌ لای یه‌كێتی یان پارتییه‌وه‌ هاتوون، ئه‌و كه‌سانه‌ن كه‌ هه‌موو به‌رژه‌وه‌ندی شه‌خسی خۆیان خستۆته‌لاوه‌. ئه‌گه‌ر دوای ئیمتیازات و پۆست بكه‌وتنایه‌ یه‌كێتیان جێنه‌ده‌هێشت، له‌وێ ئه‌و شتانه‌ زۆر و زه‌به‌ند بوون، كه‌ هاتۆته‌ ئێره‌ وازیان له‌ هه‌موو ئه‌و شتانه‌ هێناوه‌ له‌ پێناو راستكردنه‌وه‌ی هه‌ڵه‌یه‌كی سیاسی زۆر گه‌وره‌ كه‌ له‌و وڵاته‌دا به‌ڕێوه‌ ده‌ڕوات، ئه‌ویش جیا نه‌كردنه‌وه‌ی حزبه‌ له‌ حكومه‌ت، نه‌بوونی سه‌روه‌ری یاسایه‌.

فه‌ره‌یدون: باس له‌وه‌ ده‌كرێ كه‌ باڵی سه‌ربازی له‌ ناو گۆڕاندا زاڵه‌ به‌سه‌ر بڕیاره‌كاندا و ئه‌وان كاریگه‌ری زێتریان به‌سه‌ر سه‌رۆكی بزوتنه‌وه‌كه‌وه‌ هه‌یه‌؟

ئاوات شێخ جه‌ناب: ئێمه‌ له‌شكرمان نییه‌ تا باڵی سه‌ربازیمان هه‌بێت، كۆمه‌ڵێك هه‌ڵسوڕاومان هه‌یه‌ كه‌ كادیری عه‌سكه‌ری ئه‌وكاته‌ بوون، به‌ڵام عومرێكه‌ وازیان له‌كاروباری عه‌سكه‌ری هێناوه‌، به‌ڵام ئه‌وه‌ عینوانێكه‌ ئیستغلال ده‌كرێت.

فه‌ره‌یدون: له‌ناو گۆڕاندا كه‌یسێك هه‌یه‌ پێی ده‌وترێت نانبڕاوه‌كان، ئه‌و كه‌سانه‌ن كه‌ له‌ لایه‌ن هه‌ر دوو حزبی ده‌سه‌ڵاتداره‌وه‌ موچه‌كانیان بڕواوه‌، به‌ڵام تێبینییه‌كه‌ ئه‌وه‌یه‌ بۆچی ته‌نیا فه‌رمانبه‌ره‌ ساده‌كان نانبڕاو كراون و سه‌ركردایه‌تی گۆڕانی نه‌گرتووه‌، له‌ كاتێك زۆربه‌ی سه‌ركرده‌كانی گۆڕان موچه‌ی خانه‌نشینی وه‌رده‌گرن، یان ئێستاش له‌ ئه‌ركدان؟

ئاوات شێخ جه‌ناب: ده‌بێ بزانرێت كه‌ سه‌ره‌تا ئێمه‌ و مانان موچه‌كه‌مان له‌سه‌ر ریكخراوه‌ دیموكراتییه‌كان نه‌بووه‌ تا به‌بیانووی ئیستیحقاقی حزبی بیبڕن، به‌ڕێوه‌به‌رایه‌تی ریكخراوه‌ دیموكراتییه‌كان به‌ڕێوه‌به‌رایه‌تییه‌كی سه‌ربه‌خۆیه‌ له‌ وه‌زاره‌تی دارایی، وه‌زیر و وه‌كیل وه‌زیر و... ی سه‌ر به‌ یه‌كێتی و پارتی كه‌ خانه‌نشین ده‌كرێن له‌و به‌ڕێوه‌به‌رایه‌تییه‌ موچه‌ وه‌رده‌گرن.

هه‌ر چه‌نده‌ ئه‌وانیش به‌ جۆرێك له‌ جۆره‌كان سزا دراون، به‌ڵام ره‌نگه‌ ته‌نیا موچه‌كه‌یان نه‌بڕابێت، به‌ڵام له‌ پاسه‌وان لێیان بڕیون، سه‌یاره‌یان لێوه‌رگیراوه‌ته‌وه‌، هه‌ندێكیان خانووه‌كانیان لێسه‌ندراوه‌ته‌وه‌، جگه‌ له‌مانه‌ هێرشێكی ناشیرینی راگه‌یاندنی ناراست له‌ دژیان به‌ كار هاتووه‌.

فه‌ره‌یدون: كه‌ بزوتنه‌وه‌ی گۆڕان یان سێ حزبه‌ ئۆپۆزسیۆنه‌كه‌ باسی خراپی بیست ساڵی سیسته‌می سیاسی و ئیداری ده‌كه‌ن، یه‌كسه‌ر یه‌كێتی و پارتی ئه‌وه‌ به‌ چاوتان داده‌نه‌وه‌ كه‌ ئێوه‌ش له‌ ماوه‌ی 18ساڵی رابردوودا به‌شدار و به‌رپرس بوونه‌ له‌و سیسته‌مه‌.

پرسیاره‌كه‌ی من ئه‌وه‌یه‌ ئایا ئێوه‌ به‌رپرسیارێتی 18ساڵی رابردووی خۆتان وه‌ئه‌ستۆ ده‌گرن؟

ئاوات شێخ جه‌ناب: ئێمه‌ ده‌بێ دابه‌شكردنی به‌رپرسیارێتی بزانین، ئه‌گه‌ر ئێمه‌ به‌شێك بووبێتین له‌ بڕیاری سیاسی له‌ناو یه‌كێتیدا، ئه‌وه‌ ته‌حه‌مولی به‌رپرسیارێتی ده‌كه‌ین. به‌ڵام هه‌ر چاودێرێكی سیاسی ده‌زانێ كه‌ بڕیاری سیاسی له‌ناو پارتی و یه‌كێتیدا به‌ ده‌ست یه‌ك كه‌سه‌. ئه‌وه‌ی رێكه‌وتنه‌كانی یه‌كێتی و پارتی و ته‌نانه‌ت رێكه‌وتنه‌كانی عێراقی كردووه‌ هه‌ر یه‌ك كه‌س بووه‌، ئه‌وه‌ی كه‌ ده‌سه‌ڵاتی هه‌بووه‌ وه‌زیرێك دانێ یان لایبه‌رێ هه‌ر یه‌ك كه‌س بووه‌... واته‌ ده‌سه‌ڵات له‌ ده‌ستی یه‌ك كه‌س دابووه‌.

له‌گه‌ڵ رێزم بۆ ئه‌ندامانی مه‌كته‌بی سیاسی پارتی و یه‌كێتی، هه‌ندێك كاروباری رۆتینی رۆژانه‌ ئیشی ئه‌وانه‌، ده‌نا بڕیاری سیاسی گرنگ له‌ ده‌ست ئه‌وان نییه‌.

فه‌ره‌یدون: ئۆپۆزسیۆن كه‌ دانیشتنه‌كانی له‌گه‌ڵ ده‌سه‌ڵات بایكۆت كردووه‌ داوای جێبه‌جێكردنی چوار مه‌رج یان خاڵی كردووه‌، یه‌كێتی و پارتیش له‌وه‌ڵامدا وتویانه‌ ئه‌و خالانه‌ شیاوی قسه‌ له‌سه‌ر كردن و جێبه‌جێكردنن، ئایا ئێوه‌ به‌و وه‌ڵامه‌ی ده‌سه‌ڵات ده‌گه‌ڕێنه‌وه‌ بۆ كۆبوونه‌كان؟

ئاوات شێخ جه‌ناب: ئێمه‌ به‌ به‌ڵێن و وه‌ڵام ناگه‌ڕێینه‌وه‌ بۆ كۆبوونه‌وه‌كان تاوه‌كو كرده‌وه‌ نه‌بینین. ئێمه‌ چوار كۆبوونه‌مان كرد كه‌ زێتر له‌ دوو مانگی خایاند، ده‌سه‌ڵات له‌ ماوه‌ی ئه‌و دوو مانگه‌دا ئه‌و به‌ڵێنانه‌ی جێبه‌جێ نه‌كرد، به‌ ته‌ما نین ده‌رفه‌تێكی تری دور و درێژی بده‌ینێ بزانین كه‌ی جێبه‌جێیان ده‌كات.

تا ئه‌م سیاسه‌ته‌ نا به‌رپرسیارێتی و پۆلیسییه‌ به‌رامبه‌ر به‌ ئۆپۆزسیۆن له‌ په‌یڕه‌و كردن دابێت، ئۆپۆزسیۆن ناگه‌ڕێته‌وه‌ بۆ سه‌ر مێزی گفتوگۆ.

فه‌ره‌یدون: ئه‌و قۆناغانه‌ی كه‌ سه‌رۆكی هه‌رێم له‌ باره‌ی جێبه‌جێكردنی پرۆژه‌ی چاكسازییه‌وه‌ رایگه‌یاندووه‌، ئێوه‌ تاچه‌ند به‌ هه‌نگاوی چاكسازی داده‌نێن؟

ئاوات شێخ جه‌ناب: له‌گه‌ڵ رێزم بۆ سه‌رۆكی هه‌رێم، ئه‌مه‌ وه‌ك ئه‌و شێعره‌ وایه‌ كه‌ ده‌ڵێت: ئای چی تۆڕێكه‌ ماسی بچوك قه‌تیس ده‌كات و ماسی گه‌وره‌ سوك و ئاسان تێده‌په‌ڕێت. من پێموایه‌ به‌ گۆڕینی سیسته‌می سیاسی و قانونی وڵاته‌كه‌ چاكسازی ده‌كرێت، تا حزب له‌ حكومه‌ت جیا نه‌كرێته‌وه‌ و دام و ده‌زگاكان به‌ نیشتمانی نه‌كرێن و... شتێك نییه‌ ناوی چاكسازی بێت. ئه‌مه‌ وه‌ك ئه‌وه‌ وایه‌ كابرایه‌ك تووشی نه‌خۆشی سه‌ره‌تان بووبێت، كه‌چی تۆ حه‌پی پاراستۆڵی بده‌یتێ.

فه‌ره‌یدون: تۆ پێتوایه‌ بۆچی ئیراده‌ی چاكسازی لای سه‌ركرده‌كانی یه‌كێتی و پارتی نییه‌؟

 ئاوات شێخ جه‌ناب: تا ئێستا سه‌ركردایه‌تی پارتی و یه‌كێتی نه‌گه‌یشتوونه‌ته‌ ئه‌و قه‌ناعه‌ته‌ی كه‌وا واز له‌ دابه‌شكردنی ده‌سه‌ڵات و سه‌روه‌ت بێنن.

ئه‌م بابه‌ته‌ له‌ گۆڤاری سڤیل بڵاوكراوه‌ته‌وه‌.

This e-mail address is being protected from spambots. You need JavaScript enabled to view it


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.