Red Purple Black

جه‌لال كه‌ریم، بریكاری وه‌زیری ناوخۆ: ئه‌گه‌ر به‌رپرسی پێشووی لقی چوار بێته‌ سنووری سلێمانی، پۆلیس ده‌بێ بیگرێت ... دیمانه‌: فه‌ره‌یدون بێوار

PDFPrintE-mail

له‌م دیمانه‌یه‌دا بریكاری وه‌زیری ناوخۆ باس له‌ گرتنی مسته‌شاره‌كان ده‌كات و ئه‌وه‌ش ئاشكرا ده‌كات كه‌ لیژنه‌كیان پێكهێناوه‌ بۆ گرتنی ئه‌و تاوانبارانه‌ی له‌ ژێر ده‌سه‌ڵاتی یه‌كێتی و پارتیدان. راشیده‌گه‌یه‌نێت ئه‌گه‌ر به‌رپرسی پێشووی لقی چوار بێته‌ سنووری سلێمانی، پۆلیس ده‌بێ بیگرێت و ته‌سلیمی دادگای بكات. دان به‌وه‌شدا ده‌نێت كه‌ هه‌موو په‌یوه‌ندییه‌ حزبییه‌كان له‌گه‌ڵ ئێران له‌رێگه‌ی قه‌رارگای ره‌مه‌زان و سوپای قودسه‌وه‌یه‌.

پ: دوایین په‌ره‌سه‌ندنه‌كانی نێوان لیژنه‌ی ئه‌منی هه‌رێم و لیژنه‌ی ئه‌منی ئێران، سه‌باره‌ت به‌ كێشه‌ سنوورییه‌كان به‌ كوێ گه‌یشتووه‌؟

جه‌لال كه‌ریم: ئێمه‌ وه‌كو حكومه‌ت كێشه‌مان له‌گه‌ڵ ئێران نییه‌ و هیچ رێكه‌وتنێك نه‌كراوه‌، ئه‌وان كێشه‌یان له‌گه‌ڵ باره‌گاكانی پژاك هه‌یه‌ كه‌ له‌ ناو خودی خاكی ئێراندایه‌، به‌ڵام نزیكی سنووره‌كانی هه‌رێمه‌، كه‌ پێكه‌وه‌ شه‌ڕ ده‌كه‌ن ئێران تۆپبارانی گونده‌كانی بناری قه‌ندیل ده‌كات، بۆ ئه‌وه‌ی له‌ پشته‌وه‌، له‌ سنووری ئێمه‌وه‌، هاوكاری و گواستنه‌وه‌ی بریندار و... یان بۆ نه‌كرێت.

تا شه‌ڕی نێوان ئێران و پژاك به‌رده‌وام بێت تۆپبارانكردن كۆتایی پێنایه‌ت. ئه‌گه‌ر ئێستاش بوه‌ستێت ئه‌وا ماوه‌یه‌كی تر سه‌رهه‌ڵده‌داته‌وه‌.

پ: ئایا پژاك سنووری هه‌رێمی به‌زاندووه‌؟

و- شوێنه‌كه‌ چۆڵه‌ و شاخاوییه‌، بۆیه‌ بێگومان دێن.

پ: رێكخه‌ری په‌یوه‌ندییه‌كانی كۆمه‌ڵی ئیسلامی له‌گه‌ڵ ئێران باس له‌وه‌ ده‌كات كه‌ به‌رپرسانی ئێرانی پێیانوتوون لیژنه‌ی ئه‌منی هه‌رێم رێگه‌ی به‌ ئێرانداوه‌ سنووره‌كان تۆپباران بكات؟

و- ئه‌و شته‌ ئه‌سڵ و ئه‌ساسی نییه‌. به‌ هیچ شێوه‌یه‌ك په‌یوه‌ندی به‌ حكومه‌تی هه‌رێمه‌وه‌ نه‌كراوه‌ بۆ جێبه‌جێكردنی ئه‌و تۆپبارانكردنه‌. هه‌ر وڵاتێكیش كه‌ كێشه‌ی ناوخۆیی له‌گه‌ڵ ئۆپۆزسیبۆنی خۆی هه‌بێت ناچێت پرس   به‌ وڵاتی درواسێ بكات بۆ شه‌ڕ كردن، چونكه‌ هێشتا پژاك له‌ناو خاكی ئێرانه‌.

ئه‌و براده‌ره‌ی كۆمه‌ڵ كه‌ وایوتووه‌ به‌هیچ جۆرێك یاسا عێراقی و نێوده‌وڵه‌تییه‌كان رێگه‌ی نادات كه‌ بچێت له‌گه‌ڵ حكومه‌تی ئێران دانیشێت له‌و باره‌یه‌وه‌ گفتوگۆ بكات، چونكه‌ ئه‌و حزبی سیاسییه‌ و نوێنه‌ری حكومه‌ت نییه‌. حكومه‌تی هه‌رێم نوسینگه‌ی نوێنه‌رایه‌تی و حكومه‌تی عێراق باڵوێزخانه‌ی له‌ ئێران هه‌یه‌، ئێمه‌ هه‌ر په‌یوه‌ندییه‌كمان هه‌بێت له‌ رێگه‌ی ئه‌وانه‌ ده‌یكه‌ین. نوێنه‌ری حزبه‌كان بۆیان نییه‌ ئه‌و جۆره‌ ته‌داخولانه‌ بكه‌ن. ئه‌گه‌ر بیشیكه‌ن، ئه‌وا خۆیان ژێر به‌ ژێر له‌رێگه‌ی ده‌زگا هه‌واڵگرییه‌كانی خۆیانه‌وه‌ ده‌یكه‌ن، ئه‌وه‌ مه‌سه‌له‌یه‌كی تره‌.

پ: ئایا نیگه‌رانییه‌كانتان به‌ كۆنسوخانه‌كانی ئێرانان له‌ هه‌رێم گه‌یاندووه‌، وه‌ڵامی ئه‌وان چی بووه‌؟

و- به‌ڵێ ئاگادار كراونه‌ته‌وه‌، ئه‌وان ده‌ڵێن هه‌تا پژاك زه‌خت بكات ئێمه‌ ناتوانین وازیان لێبێنین بێنه‌ناوه‌ و خه‌ڵكمان لێبكوژن.

پ: باس له‌وه‌ ده‌كرێ كه‌ حزبه‌كان له‌ چوونه‌ ده‌ره‌وه‌یان و كۆبوونه‌كانیان له‌گه‌ڵ وڵاتان وه‌زاره‌تی ناوخۆ و حكومه‌تی هه‌رێم ئاگادار ناكه‌نه‌وه‌. ئایا ئێوه‌ ئاگاداری ورده‌كاری سه‌ردانی حزبه‌كان هه‌ن؟

و- ئه‌وان كه‌ ده‌چنه‌ده‌ره‌وه‌ به‌ فه‌رمی به‌ناوی حزبه‌وه‌ ناچن، به‌ڵكو وه‌كو هاوڵاتییه‌ك ڤیزه‌ وه‌رده‌گرن و ده‌چن بۆ ئێران یان... ئیدی له‌وێ له‌ پشتی فه‌رمیاته‌وه‌ په‌یوه‌ندی سیاسی و دیپلۆماسی خۆیان ده‌كه‌ن.

پ: هه‌ندێكجار باس له‌وه‌ ده‌كرێ كه‌ كۆمه‌ڵی ئیسلامی په‌یوه‌ندییه‌كی نهێنی و هه‌وڵگری له‌گه‌ڵ ئێران هه‌یه‌؟

و- هه‌موو په‌یوه‌ندییه‌كی حزبی له‌گه‌ڵ وڵاتاندا، له‌رێگه‌ی په‌یوه‌ندی هه‌وڵگرییه‌وه‌یه‌، له‌ ئێران قه‌رارگای ره‌مه‌زان و قودس كه‌ دوو ده‌زگای هه‌واڵگرین سه‌رپه‌رشتی ئه‌و په‌یوه‌ندییانه‌ ده‌كه‌ن.

زۆربه‌ی حزبه‌كانی باشووری كوردستان له‌كاتی ئۆپۆزسیۆن بوونیان دژی رژێمی به‌عس له‌ ئێران بوونه‌ و ئێرانیش هاوكاری ئۆپۆزسیۆنی كردووه‌ دژی رژێمی به‌عس، به‌ڵام ئێستا كوردستان حكومه‌تی خۆی هه‌یه‌ و نوێنه‌رایه‌تی هه‌رێم و باڵوێزخانه‌ی عێراق له‌ ئێران هه‌یه‌، بۆیه‌ هه‌ر هاوكاری كردنێكی ئێران بۆ حزبه‌كان ده‌چێته‌ بابی تێكدانی ئه‌زموون و ئاسایشی هه‌رێمی كوردستان. ده‌نا له‌سه‌ر چی بنه‌مایه‌ك هاوكاری حزبێك ده‌كات.

پ: ده‌ستگیركردنی مسته‌شاره‌كان كه‌ فه‌رمانی دادگای عیبَراقی و هه‌رێمیان بۆ ده‌رچووه‌، به‌ڵام تائێستا له‌ لایه‌ن ئێوه‌ ئه‌و بڕیاره‌ جێبه‌جێ نه‌كراوه‌، بۆچی؟

و- وه‌زاره‌تی ناوخۆ خه‌ڵك ده‌ستگیر ناكات، به‌ڵكو كه‌ بڕیاری دادگا ده‌رده‌چێت بۆ ده‌ستگیركردنی تاوانبارێك، ئێمه‌ش ده‌یده‌ینه‌ بنكه‌كانی پۆلیس. به‌ڵام كه‌یسی ئه‌و مسته‌شارانه‌ هه‌ڵوه‌سته‌یه‌كی تێدایه‌.

پ: ئایا ره‌هه‌ندێكی سیاسی له‌ پشت ده‌ستگیر نه‌كردنی مسته‌شاره‌كانه‌وه‌ هه‌یه‌؟

و- من كه‌سێكی سیاسی پێی نه‌وتووم جێبه‌جێی مه‌كه‌، ناوه‌كانیش نێردراون بۆ بنكه‌كانی پۆلیس بۆ ده‌ستگیر كردنیان. به‌ڵام پێویستیی بڕیارێكی سیاسیش هه‌یه‌، چونكه‌ مسته‌شاره‌كان دوو جۆرن، جۆرێكیان تاوانبار و بكوژن، ئه‌گه‌ر كه‌سێك شكات له‌ مسته‌شارێكی تاونایباربكات و به‌ ڵگه‌وه‌ تاوانباربوونی بسه‌ڵمێنێت و حاكم بڕیاری ده‌ستگیر كردنی بدات، ئه‌وا جێبه‌جێ ده‌كرێت و كه‌س ناتوانێ لاری لێ هه‌بێت، جۆری دووه‌میان ئه‌وانن كه‌ سوودیان له‌ لێبوردنی به‌ره‌ی كوردستانی وه‌رگرتووه‌. كه‌ هه‌ندێكیان له‌ كوردستان ماوه‌ و بوونه‌ پێشمه‌رگه‌ و تێشیاندایه‌ شه‌هید بووه‌، یان هه‌ڵوێستی باشی هه‌بووه‌ و كوردپه‌روه‌ره‌، هیچ زیانی بۆ كورد نه‌بووه‌، ده‌ستی له‌ تاوانی ئه‌نفالدا نه‌بووه‌، تێیاندایه‌ به‌ بڕیاری بزوتنه‌وه‌ی كوردی بۆته‌ مسته‌شار بۆ به‌رژه‌وه‌ندی كورد و هاواكری كردنی پێشمه‌رگه‌. تێشیاندایه‌ سوودیان له‌ لێبوردنه‌كه‌ی به‌ری كوردستانی وه‌رنه‌گرت و دوای راپه‌رین چوونه‌وه‌ ناو رژێم و دژایه‌تی كوردیان كرده‌وه‌، حه‌قه‌ ئه‌مانه‌ لێیان نه‌وه‌ستین بۆ ده‌ستگیركردنیان.

بڕیاره‌كه‌ی دادگا گشتگیره‌، بۆیه‌ پێویسته‌ هه‌ڵاوێركردنێك هه‌بێت و لێكجیابكرێنه‌وه‌.

پ: له‌ رووداوه‌كانی 17ی شوبات و دواتر، داواكاری گشتی كۆمه‌ڵێك كه‌س و لایه‌نی تۆمه‌تبار كرد به‌ ته‌قه‌ كردن و كوشتنی هاوڵاتیان، به‌ڵام تائێستا تۆمه‌تباران ده‌ستگیر نه‌كراون، بۆچی؟

و- جگه‌ له‌ جه‌ماعه‌تی لقی چواری پارتی كه‌ ناوه‌كان دیاری نه‌كراون، ته‌نیا ناوی به‌رپرسی ئه‌وكاتی لقی چوار هاتووه‌، كه‌ ره‌نگه‌ به‌رپرسی لق هه‌ر ته‌قه‌شی نه‌كردبێت.

به‌ڵام ئه‌وانه‌ی كه‌ سه‌ر به‌هێزه‌كانی ناوخۆن ته‌نیا دوو كه‌سیان داوه‌، یه‌كێكیان عه‌مید ئاسۆیه‌ كه‌ ته‌سلیممان كردووه‌، ئه‌ویتریان پۆلیسسێكه‌ ئێستا رایكردووه‌، هه‌روا به‌شوێنیدا ده‌گه‌ڕێین، به‌ڵام له‌ ناوچه‌ی سلێمانیدا نه‌ماوه‌.

دو كه‌سیتریش ناویان هاتووه‌، به‌ڵام ئه‌وانه‌ پۆلیس نین و هاوڵاتین، واته‌ په‌یوه‌ندیان به‌ ئێمه‌وه‌ نییه‌، ئێستا ئه‌مر قه‌بزیان بۆ ده‌رچووه‌، به‌ڵام شوێنیان دیار نییه‌ و نه‌گیراون.

له‌ چه‌مچه‌ماڵیش به‌ناو كه‌س تۆمه‌بار نه‌كراوه‌ كه‌ بۆته‌ هۆی شه‌هید كردنی گه‌رمیان، هه‌ر كه‌سێك له‌و باره‌یه‌وه‌ داوا بكرێت ده‌یخه‌ینه‌ به‌رده‌ستی دادگا.

پ: وه‌ك خۆت ئاماژه‌ت پێدا داواكاری گشتی داوای گرتنی به‌رپرسی پێشووی لقی چواری پارتی كردووه‌، ئایا ده‌ستگیر نه‌كردنی ئه‌و په‌یوه‌ندی به‌ ره‌هه‌ندی سیاسییه‌وه‌ هه‌یه‌؟

و- نازانم، به‌ڵام ئه‌گه‌ر به‌رپرسی پێشووی لقی چوار بێته‌ سنووری سلێمانی، پۆلیس ده‌بێ بیگرێت و ته‌سلیمی دادگای بكات. به‌ڵام ئێستا له‌ سلێمانی نه‌ماوه‌ و گواستویانه‌ته‌ و شوێنه‌كه‌ی نازانین. مادام بڕیاری دادگای له‌سه‌ره‌ هه‌ر ده‌بێ رۆژێك بێت جێبه‌جێ بكرێت، ئه‌مساڵ نا، ساڵێكی تر دوویتر.

پ: باس له‌وه‌ ده‌كرێ هه‌ندێك تاوانباری ناوچه‌ی ژێر نفوسی پارتی رایانكردۆته‌ ناوچه‌ی ژێر نفوسی یه‌كێتی و هه‌روه‌ها به‌پێچه‌وانه‌شه‌وه‌، ئایا ئه‌مانه‌ كه‌ی ده‌ستگیر ده‌كرێن.

و- ماوه‌یه‌ك له‌مه‌وبه‌ر وه‌زاره‌تی ناوخۆ كۆبوونه‌وه‌یه‌كی به‌ هه‌ندێك هێزی تایبه‌تی و به‌ڕێوه‌به‌ری هێزه‌كان كرد، ناوی ئه‌و تاوانبارانه‌ی كه‌ داواكراون له‌ لایه‌ن دادگاوه‌ چ له‌ هه‌ولێر و دهۆك بن یان چ له‌سلێمانی و گه‌رمیان بن، ئه‌وانه‌ی سنووری سلێمانی و گه‌رمیان هه‌ڵاتوون و چوونه‌ته‌ هه‌ولێر و دهۆك دانیشتوون، یان به‌ پێچه‌وانه‌وه‌، چونكه‌ سوودیان له‌ ناوچه‌ی نفوسی یه‌كێتی و پارتی وه‌رگرتووه‌، ئێستا لیژنه‌یه‌ك دانراوه‌ و ناوه‌كانمان له‌ هه‌ر دوولا وه‌رگرتووه‌ و داومانه‌ به‌ هێزه‌كانمان بۆ ده‌ستگیر كردنیان.

پ: باس له‌وه‌ ده‌كرێ كه‌ حكومه‌تی هه‌رێم هه‌موو ئه‌و پۆلیسانه‌ی خه‌ڵات كردووه‌ كه‌ له‌ كاتی خۆپیشاندانه‌كان له‌ ئه‌رك دابوونه‌، یان ته‌قه‌یان كردووه‌؟

و- نه‌خێر به‌و جۆره‌ نییه‌. به‌ڵكو ئه‌و هێزانه‌ی كه‌ به‌شدار بوون له‌ پاراستنی هاوڵاتیان و خۆپیشانده‌ران و شه‌قام و شوێنه‌ گشتییه‌كانی (ئیداره‌ی گه‌رمیان و پارێزگای سلێمانی) كه‌ زێتر له‌ دوو مانگ له‌سه‌ر شه‌قامه‌كان مانه‌وه‌ و شه‌ونخونیان كرد، ئه‌مانه‌ هه‌موویان پاداشت كران، هه‌موو ئه‌وانه‌ی كه‌ ته‌قه‌یان كردووه‌ ره‌نگه‌ (10 تا 50) كه‌سێك بن، به‌ڵام نزیكه‌لای (5 تا 6) هه‌زار كه‌س له‌ هێزه‌كانی ناوخۆ پاداشت كراون، ئه‌مه‌ په‌یوه‌ندی به‌ ته‌قه‌ كردنه‌وه‌ چییه‌. به‌ڵكو ئه‌مه‌ په‌یوه‌ندی به‌ ئه‌نجامدانی ئه‌ركێكه‌وه‌ هه‌یه‌ كه‌ نه‌یانهێشێت زه‌ره‌ری زۆر لێبكه‌وێته‌وه‌. ئه‌مان خۆپیشانده‌رانیشیان پاراست كه‌ نه‌یانهێشێت حزبێكی نه‌یار یان لایه‌نێك زه‌ره‌ریان پێبگه‌یه‌نێت و كاره‌ساتی گه‌وره‌ رووبدات.

پ: هه‌ر خێزان و هاوڵاتییه‌ك له‌ ده‌زگاكانی ئاسایش (كۆد) ێكی بۆ دروست كراوه‌، ئه‌مه‌ش واده‌خوێنرێته‌وه‌ كه‌ بۆ كۆنمترۆڵ كردنی تاكه‌كانه‌، هه‌روه‌ها ئه‌مه‌ش پێچه‌وانه‌ی یاسای وه‌زاره‌تی ناوخۆیه‌؟

و- كاتی خۆی ئاسایش بۆ هه‌ر خێزانێك كۆدیان دروستكرد، بۆ ئه‌وه‌ی هه‌ر هاوڵاتییه‌ك مامه‌ڵه‌یه‌كی له‌ فه‌رمانگه‌ی حكومی هه‌بوو و داوای پشتگیری ئاسایشیان لێكرد، پێویست به‌ مامه‌ڵه‌ی نوێ نه‌كات و به‌پێی كۆده‌كه‌ی كه‌ هه‌موو زانیارییه‌كی تێدایه‌ پشتگیرییه‌كه‌ی بۆ بكه‌ن. ئه‌م كۆده‌ بۆ ئاسانكاری ئه‌منی بووه‌ كه‌ له‌ سه‌ر كه‌سی باش و خراپ له‌به‌ر ده‌ستیان دابێت. به‌ڵام ئێستا (فه‌رمانگه‌ی زانیاری) هه‌یه‌ كه‌ قانونییه‌، ئه‌م فه‌رمانگه‌یه‌ په‌یوه‌ندیداره‌ به‌وه‌ی كه‌ هه‌موو هاوڵاتییه‌ك كارتی زانیاری هه‌بێت. ئه‌م فه‌رمانگه‌یه‌ سه‌ر به‌ پۆلیسه‌، له‌مه‌ودا ره‌نگه‌ كۆدی ئاسایش به‌تاڵ بێته‌وه‌ و ئیشی پێناكرێت.

پ: به‌پێی سه‌رچاوه‌ رۆژنامه‌وانییه‌كان، گوایه‌ وه‌زاره‌تی ناوخۆ لیستێكی (200) كه‌سی (كه‌ له‌ چالاكوانان و رۆژنامه‌نووسان و خۆپیشانده‌ران پێكهاتووه‌) ئاماده‌ كردووه‌ بۆ ده‌ستگیر كردن، ئه‌مه‌ تاچه‌ند راسته‌؟

و- ئه‌سڵ و ئه‌ساسی نییه‌. ئێمه‌ خه‌ڵكمان لایه‌ بۆ گرتن به‌ڵام وه‌زاره‌تی ناوخۆ ئاماده‌ی نه‌كردووه‌، به‌ڵكو ئه‌و كه‌سانه‌ن كه‌ له‌ دادگا وه‌كو شه‌خس داوایان له‌سه‌ر تۆمار كراوه‌ له‌ لایه‌ن لێپرسراوانی شار و ناو بازاڕ و هێزه‌ ئه‌منییه‌كانه‌وه‌، كه‌ رۆژانه‌ ته‌شهیریان به‌ حكومه‌ت و هێزه‌كانی ئێمه‌ كردووه‌ و ده‌ستی هه‌بووه‌ له‌ بریندار كردنی شه‌خس، ئه‌مانه‌ حاكم بڕیاری گرتنی بۆ ده‌ركردوون، هه‌ر كه‌سێك بڕیاری گرتنی دادگای هه‌بێت ئێمه‌ ده‌یگرین و ده‌یده‌ین به‌ دادگا.

پ: پارێزه‌ر كاروان كه‌مال، كه‌ له‌سه‌ر چنار ته‌قه‌ی لێكرا، دۆسیه‌كه‌ی به‌ كوێ گه‌یشت؟

و- ئه‌وه‌ نه‌ كێشه‌یه‌كی سیاسی نه‌ كۆمه‌ڵایه‌تی بوو، ئه‌گه‌ر ده‌سه‌ڵات بیه‌وێ كاروان بگرێت، ئه‌وا ده‌ستگیری ده‌كات و ده‌یدات به‌ یاسا، حكومه‌ت له‌ كه‌س ناترسێت.

ئه‌و وشێنه‌ی كاروان كه‌مالی لێ بریندار كرا، شه‌وی پێشتر دوو كه‌سی چه‌مچه‌ماڵی له‌گه‌ڵ خاوه‌ن نادییه‌كه‌ بووه‌ به‌ شه‌ڕیان له‌سه‌ر ئه‌و ئافره‌تانه‌ی كه‌ سه‌ما و ره‌قس ده‌كه‌ن، هه‌ر چه‌نده‌ سوڵح ده‌كه‌ن، به‌ڵام دواتر دێنه‌وه‌ و ته‌قه‌ له‌ نادییه‌كه‌ ده‌كه‌ن، شاگردی نادییه‌كه‌ و كاروان و یه‌كێكیتریش بریندار بووه‌، به‌رێكه‌وت كاروان له‌و نادییه‌ بووه‌ و بریندار بووه‌. ئه‌گه‌ر خۆشی گومانی له‌كه‌س هه‌یه‌ با داوا تۆمار بكات و ئێمه‌ بۆی ده‌ستگیر ده‌كه‌ین.

پ: ئێستا ده‌نگۆی ئه‌وه‌یه‌ كه‌ ئاماده‌كاری بۆ خۆپیشاندان ده‌كرێته‌وه‌، هه‌ڵوێستی ئێوه‌ چۆن ده‌بێ؟

و- دوو سێ ده‌زگای راگه‌یاندن ئه‌و ئیدیعایانه‌ ده‌كه‌ن، هه‌ر حه‌زیان له‌وه‌یه‌ خه‌ڵك هانبده‌نه‌ سه‌رجاده‌ و بیانخه‌نه‌ ئه‌زیه‌تدان، ئه‌وه‌ ده‌كه‌وێته‌ بابی ئاژاوه‌گێڕییه‌وه‌، ئه‌گه‌ر داواكاری گشتی ئه‌و كه‌یسه‌ بجوڵێنێت ده‌درێنه‌ دادگا و حه‌قه‌ لێپێچینه‌وه‌یان له‌گه‌ڵدا بكرێت.

له‌ هه‌ر شوێنێك خۆپیشاندان بكرێت پێویسته‌ به‌پێی یاسای خۆپیشاندان مۆڵه‌ت وه‌ربگرێت، ئه‌گه‌ر مۆڵه‌تی وه‌رگرت ئێمه‌ پاسه‌وانی ده‌كه‌ین، ئه‌گه‌ر مۆڵه‌تی نه‌بوو قه‌ده‌غه‌ی ده‌كه‌ین.

پ: له‌هه‌ولێر رێگه‌درا به‌ خۆپیشاندان دژی ده‌وڵه‌تی ئێران كه‌ سنووره‌كانی هه‌رێم تۆپباران ده‌كات، كه‌چی له‌ سلێمانی مۆڵه‌ت به‌ جه‌ماوه‌ر نه‌درا خۆپیشاندان بكه‌ن دژی ئێران بكه‌ن، بۆچی؟

و- ئه‌وان داوای مۆڵه‌تی خۆپیشاندانیان نه‌كرد، به‌ڵكو داوای كه‌مپینیان كرد له‌ شوێنێكی دیاریكراو. ویستیان كه‌مپینێكی به‌رده‌وام بكه‌ن و بیكه‌نه‌وه‌ به‌ ئاژاوه‌ وه‌ك ئه‌وه‌ی به‌رده‌ركی سه‌را، ئێمه‌ش مۆڵه‌تمان پێنه‌دان، چونكه‌ له‌گه‌ڵ یاساكه‌ ناگونجێ.

پ: كێشه‌ی نێوان پۆلیسه‌كانی هاتوچۆ و دادوه‌ره‌كه‌ی گه‌رمیان به‌ كوێ گه‌یشت، گوایه‌ ئێوه‌ ئاماده‌ نین پۆلیسه‌كان راده‌ستی دادگا بكه‌ن؟

و- ئێستا فه‌رمانگه‌ی مرور كامێرای چاودێری بۆ شه‌قام و جاده‌كان داناوه‌، ئه‌و كامێره‌یه‌ی كه‌ ئه‌و حاكمه‌ی گرتووه‌ دیاره‌ خێرا لێیخوڕیوه‌، مروره‌كانیش پێیان وتووه‌ تۆ خێرا رۆیشتویت مۆڵه‌تی شۆفیرییه‌كه‌تمان بده‌رێ، حاكمه‌كه‌ش وتویه‌تی من خێرا نه‌رۆیشتووم و مۆڵه‌ته‌كه‌ی نه‌داوه‌، دیاره‌ هه‌ڵه‌تێگه‌یشتنێك روویداوه‌، به‌ڵام مروره‌كان واجبیان جێبه‌جێكردووه‌.

ئێستا حاكمه‌كه‌ی شكاتی كردووه‌، گوایه‌ مروره‌كان ته‌شهیریان پێكردووه‌، به‌ڵام بڕوا ناكه‌م مرور له‌ خۆیه‌وه‌ جنێو به‌ كه‌سێك بدات ئه‌گه‌ر ئیستفزاز نه‌كرابێت. له‌به‌ر ئه‌وه‌ی ئه‌و مرورانه‌ له‌ كاتی جێبه‌جێكردنی واجبدا تووشی ئه‌و كێشه‌یه‌ بوونه‌ ئێمه‌ به‌پێی یاسای عێراقی ناهێڵین بچنه‌ به‌رده‌م دادگا.

تێبینی

ئه‌م بابه‌ته‌ له‌ ژماره‌ (69) ی رۆژی (15\8\2011) ی رۆژنامه‌ی (چه‌تر) بڵاو بۆته‌وه‌.

  This e-mail address is being protected from spambots. You need JavaScript enabled to view it

 


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.