Red Purple Black

هه‌ڵۆی ئه‌حمه‌دكورده‌: ئۆپۆزیسیۆن كه‌وتوونه‌ته‌ بیانووگرتن به‌ده‌سه‌ڵات. ... دیمانه‌: ئاسۆ عوسمان

PDFPrintE-mail

* تا ئه‌م چركه‌یه‌ ئۆپۆزیسیۆن خۆی باوه‌ڕی به‌ حكومه‌ت نییه‌ و بڕوای به‌ هه‌ڵوه‌شاندنه‌وه‌ی حكومه‌ته‌

*حكومه‌تێك كه‌ تۆ باوه‌ڕت پێی نه‌بی و هه‌ڵیبوه‌شێنیته‌وه‌ نابی داوای بودجه‌شی لێبكه‌یت

*من گه‌شبینم به‌ وتووێژ، به‌ دیالۆگ، یه‌كێك له‌ پره‌نسیپه‌كانی یان بنه‌ماكانی كولتوری دیموكراسی یه‌كتر قبوڵكردنه‌.

 

*ئه‌م ده‌سه‌ڵاته‌ به‌ هه‌ڵبژاردن هه‌ڵبژێردراوه‌ و ده‌نگی خه‌ڵكی هێناوه‌، ئه‌وانیش له‌ هه‌ڵبژاردندا به‌شدارییان كردووه‌ ئه‌گه‌ر شه‌رعیه‌ت بۆ ئه‌م هه‌ڵبژاردنه‌ نه‌بووبێت كه‌واته‌ شه‌رعیه‌تی ئه‌ندام په‌رله‌مانه‌كانی ئه‌وانیش نییه‌

* ئۆپۆزیسیۆن به‌ هه‌ڵه‌ یه‌ك له‌دوای یه‌كه‌كانی خۆیان هه‌موو ده‌رگاكانیان له‌سه‌ر خۆیان داخستووه‌ و كه‌وتوونه‌ته‌ بیانووگرتن هه‌ر جاره‌ی به‌ شێوازێك.

*ئۆپۆزیسیۆن بڕیاری داوه‌ چاك و خراپ تێكه‌ڵ بكات

هه‌ڵۆی ئه‌حمه‌د كورده‌ به‌رپرسی لقی چواری پارتی دیموكراتی كوردستان له‌ڕێگای ئه‌م دیمانه‌ تایبه‌ته‌ی گۆڤاری ئاسۆه‌وه‌ تیشك ده‌خاته‌ سه‌ر هه‌ڵوێستی پارتی دیموكراتی كوردستان له‌مه‌ڕ هه‌ڵپه‌ساردنی كۆبوونه‌وه‌كانی ئۆپۆزیسیۆن و ده‌سه‌ڵات و پێی وایه‌ تاكه‌ ڕیگه‌ بۆ گه‌یشتن به‌ ئامانجه‌كان دیالۆگه‌ له‌نیوان هێزه‌ سیاسیه‌كان. به‌رپرسی لقی چوار له‌ سلێمانی به‌دووری ده‌زانێت كه‌ جارێكیتر خۆپیشاندانه‌كان وه‌ك 17 ی شوبات سه‌رهه‌ڵبداته‌وه‌ و خۆپیشانده‌رانیش بچنه‌وه‌ سه‌ر باره‌گاكانی ئه‌وان.

ئاسۆ: كاك هه‌ڵۆ وه‌ك ده‌زانین ئۆپۆزیسیۆن كۆبوونه‌وه‌ی پێنج قۆڵی هه‌ڵپه‌سارد، ئێوه‌ چ خوێندنه‌وه‌یه‌كتان هه‌یه‌ وه‌كو پارتی بۆ هه‌ڵپه‌ساردنی كۆبوونه‌وه‌كان؟

هه‌ڵۆ ئه‌حمه‌د كورده‌: به‌ بڕوای من ئۆپۆزیسیۆن، من پێم خۆش نییه‌ به‌ڕاستی ناویان وه‌ك ئۆپۆزیسیۆن بهێنرێت، چونكه‌ من تێبینیم هه‌یه‌ له‌سه‌ر ئۆپۆزیسیۆن به‌گشتی، به‌ڵام بۆ وه‌ڵامی پرسیاره‌كه‌ی ئێوه‌، من پێم وایه‌ ئۆپۆزیسیۆن به‌ هه‌ڵه‌ یه‌ك له‌دوای یه‌كه‌كانی خۆیان هه‌موو ده‌رگاكانیان له‌سه‌ر خۆیان داخستووه‌ و كه‌وتوونه‌ته‌ بیانووگرتن هه‌ر جاره‌ی به‌ شێوازێك، خۆشیان به‌ڕاستی رێگایه‌كیان نه‌دۆزیووه‌ته‌وه‌ كه‌ په‌نای بۆ به‌رن و هه‌ر جاره‌ی بیانوویه‌ك ده‌هێننه‌وه‌ بۆ هه‌ڵپه‌ساردنی گفتوگۆكان، پێشم وایه‌ ئامانجێكی لی به‌ده‌ست ناهێنن.

ئاسۆ: ئه‌وان ده‌ڵێن ته‌قه‌كه‌ره‌كان ته‌سلیم نه‌كراون و مه‌سه‌له‌ی بۆدجه‌ی حیزبه‌كانیش نه‌گه‌ڕاوه‌ته‌وه‌، ئێوه‌ ئاماده‌ن ئه‌و دوو داواكارییه‌ جێبه‌جی بكه‌ن، یان له‌و بڕوایه‌دایت كه‌ سه‌ركردایه‌تی پارتی و یه‌كێتی هه‌م بودجه‌كه‌ بۆ ئۆپۆزیسیۆن بگێڕێته‌وه‌ و هه‌م ته‌قه‌كه‌رانیش ته‌سلیم بكه‌ن؟

هه‌ڵۆ ئه‌حمه‌د كورده‌: من له‌ حكومه‌ت نیم، وه‌كو رای ئێمه‌، رای جه‌نابی سه‌رۆك هه‌میشه‌ وا بووه‌ موچه‌ی كه‌س نه‌بڕدرێت، نانی كه‌س نه‌بڕدرێت، به‌ڵام پرسیارێكی تر دێته‌ پێشه‌وه‌ كه‌ تا ئه‌م چركه‌یه‌ ئۆپۆزیسیۆن خۆی باوه‌ڕی به‌ حكومه‌ت نییه‌ و بڕوای به‌ هه‌ڵوه‌شاندنه‌وه‌ی حكومه‌ته‌، حكومه‌تێك كه‌ تۆ باوه‌ڕت پێنه‌بی و هه‌ڵیبوه‌شێنیته‌وه‌ نابی داوای بودجه‌شی لێبكه‌یت، ده‌بی چاوه‌ڕی بكه‌یت تا ئه‌و كاته‌ی هه‌ڵیده‌وه‌شێنیته‌وه‌ و حكومه‌تی خۆت دروست ده‌كه‌یت ئه‌وسا خۆت بودجه‌ دابه‌ش ده‌كه‌یت ئه‌وه‌ باسێكی دیكه‌یه‌، سه‌باره‌ت به‌ ته‌سلیمكردنی ته‌قه‌كه‌ره‌كان، ئێمه‌ وه‌ك سه‌ركردایه‌تی پارتی ره‌نگه‌ هه‌زاران جار وه‌ڵامی ئه‌م پرسیاره‌مان دابێته‌وه‌، ده‌ڵێین ئه‌م كارانه‌ كه‌ ڕوویداوه‌ هانده‌ریش هه‌بووه‌ و ته‌قه‌كه‌ریش هه‌بووه‌، هه‌موو ئه‌مانه‌ پێویسته‌ له‌به‌رده‌می یاسا بانگ بكرێن و دادگایی بكرێن، ئه‌گه‌ر كاتێك هه‌مووی بدرێت به‌ دادگا بێگومان ته‌قه‌كه‌ری ئێمه‌ش كی ته‌قه‌ی كردبێت ده‌دری به‌ دادگا و پارتیش هیچ شتێكی له‌به‌رامبه‌ر ئه‌وه‌دا نییه‌، ئه‌مه‌ له‌لایه‌ك، له‌لایه‌كی تر راستییه‌كه‌ی زۆر جار ئه‌مانه‌ وه‌همه‌ زۆرتر وه‌ك له‌وه‌ی ڕاستی بێت، چونكه‌ كه‌سێكی پارتی نییه‌ خه‌ڵكێك به‌ڕه‌سمی شكاتی لێكردبێت و بڵی ئه‌وه‌ ته‌قه‌ی كردووه‌، هه‌ر به‌ قسه‌ ده‌ڵێن ته‌قه‌كه‌ره‌كان، له‌ناو بینایه‌كدا پێنج سه‌د، شه‌ش سه‌د كه‌سی تیابووبێت تۆ چوزانیت ته‌قه‌كه‌ر كێیه‌، با ده‌ستنیشانی بكه‌ن (س) و (ێ) ته‌قه‌ی كردبێت له‌گه‌ڵ ئه‌وه‌ی هانده‌ره‌كانیش دیاری بكرێن، با بدرێن به‌دادگا ئێمه‌ قبوڵمانه‌.

ئاسۆ: سه‌ركرده‌كانی ئۆپۆزیسیۆن ده‌ڵێن ئه‌گه‌ر داواكارییه‌كانمان جێبه‌جی نه‌كرێن په‌نا ده‌به‌ینه‌وه‌ به‌ر خۆپیشاندان، له‌و بڕوایه‌دایت خۆپیشاندان وه‌كو جاری پێشوو زه‌مینه‌ی هه‌بێت و یان سه‌ربگرێته‌وه‌؟

هه‌ڵۆ ئه‌حمه‌د كورده‌: خۆپیشاندان ئه‌گه‌ر وه‌كو ناڕه‌زایی خه‌ڵك بێت، مۆڵه‌تی بۆ وه‌ربگیردرێت بۆ داواكارییه‌كی دیاریكراو بێت، بۆ كاتێكی دیاریكراو بێت كه‌س پێی ناخۆش نییه‌ و زۆر ئاساییه‌، به‌ڵام به‌و شێوازه‌ی كه‌ ئۆپۆزیسیۆن داوای ده‌كات ئه‌وه‌ خۆپیشاندان نییه‌، ئه‌وه‌ جارێكی تر جۆرێكه‌ له‌ تۆڵه‌كردنه‌وه‌ و له‌ په‌لاماردان و شه‌ڕ و پشێوی و ئه‌وانه‌، یه‌كه‌مجار بۆیان كرا و زۆریش بواریان بۆ ره‌خسێنرا، هاوكاریش كران، به‌ڵام باوه‌ڕ ناكه‌م ئه‌مجاره‌ بۆیان دووباره‌ ببێته‌وه‌ به‌و جۆره‌ی جاری پێشوو.

ئاسۆ: ئه‌گه‌ر ئه‌مجاره‌ مێژوو دووباره‌ بكه‌نه‌وه‌ و هاتنه‌وه‌ به‌رده‌م لقی چوار و 17ی شوبات دووباره‌ ببێته‌وه‌، ئێوه‌ چ هه‌ڵوێستێكتان ده‌بێته‌وه‌ جارێكی تر؟

هه‌ڵۆ ئه‌حمه‌د كورده‌: من بڕوا ناكه‌م بێنه‌وه‌ به‌رده‌می لقی چوار، چونكه‌ ئه‌گه‌ر خۆپیشاندانی خه‌ڵك بێت به‌مانای، ئه‌وه‌ بۆ خۆی جێی پرسیاره‌، خه‌ڵكی كورد، رۆڵه‌ی ئه‌م میلله‌ته‌ی ئێمه‌ بۆچی بێته‌ به‌رده‌می لقی چوار و به‌ردبارانی لقی چوار بكات! كه‌ ئه‌مه‌ بۆ ئێمه‌ پرسیاره‌ بۆچی خه‌ڵك وا بكات؟ ئه‌وه‌ش روویدا باوه‌ڕناكه‌م جارێكی تر دووباره‌ ببێته‌وه‌ و هیواداریشین دووباره‌ نه‌بێته‌وه‌.

ئاسۆ: سه‌رۆكایه‌تی هه‌رێم، یاخود سه‌رۆكایه‌تی حكومه‌ت باسی چاكسازیی ده‌كه‌ن، ده‌ڵێن ئێمه‌ ده‌ستمان به‌ پڕۆژه‌ی چاكسازیی كردووه‌، له‌به‌رامبه‌ردا سه‌رۆكی بزووتنه‌وه‌ی گۆڕان و سه‌ركرده‌كانی تری ئۆپۆزیسیۆن ده‌ڵێن ده‌سه‌ڵات گه‌مه‌ی كات كوشتن ده‌كات نه‌ك مه‌سه‌له‌ی چاكسازیی، ئێوه‌ چ رایه‌كتان هه‌یه‌ له‌مباره‌یه‌وه‌؟

هه‌ڵۆ ئه‌حمه‌د كورده‌: خۆ برایانی ئۆپۆزیسیۆن به‌ هیچ شتێكیان نه‌وتووه‌ باش و بێگومانیش به‌ هیچ شتێك ناڵێن باش، ده‌نا ئه‌و چاكسازییانه‌ی كه‌ هه‌نگاوی بۆ نراوه‌ من پێم وایه‌ تازه‌ نییه‌ و له‌ژێر فشاری ئۆپۆزیسیۆندا نییه‌، هه‌میشه‌ و به‌رده‌وام جه‌نابی سه‌رۆك بارزانی ده‌ستپێشخه‌ریی له‌ ئیشی چاكدا كردووه‌ و ده‌ستپێشخه‌ریی له‌ چاكسازیش كردووه‌ و كراویشه‌ و به‌رده‌وامیشه‌، به‌ڵام ئۆپۆزیسیۆن بڕیاری داوه‌ چاك و خراپ تێكه‌ڵ بكات و باوه‌ڕناكه‌م بڵێن ئه‌م شته‌ باشه‌، ئه‌وان دان به‌وه‌دا نانێن.

ئاسۆ: زۆر جار ئۆپۆزیسیۆن له‌ڕێگای كه‌ناڵه‌كانی راگه‌یاندنی خۆیانه‌وه‌، راسته‌وخۆ ده‌ڵێن ده‌سه‌ڵات شه‌رعیه‌تی نه‌ماوه‌ و به‌هێز خۆی سه‌پاندووه‌، ئه‌گه‌ر فرسه‌تێك بێته‌ ده‌ست خه‌ڵك ئه‌م ده‌سه‌ڵاته‌ راده‌ماڵێت، تۆ چ خوێندنه‌وه‌یه‌كت هه‌یه‌ بۆ ئه‌م ده‌سته‌واژانه‌.

هه‌ڵۆ ئه‌حمه‌د كورده‌: به‌ڕای من ئه‌مه‌ هه‌مووی قسه‌ی ئه‌وانه‌ی ئۆپۆزیسیۆن نین، ئۆپۆزیسیۆن زۆریان واقیعیانه‌تر قسه‌ ده‌كه‌ن، ره‌نگه‌ تاكوته‌را هه‌بێت له‌مجۆره‌ قسانه‌ بكات، به‌ڵام ئه‌وه‌ی كه‌ له‌مجۆره‌ قسانه‌ش ده‌كات با باش ئه‌وه‌ی بێته‌وه‌ بیر ئه‌م ده‌سه‌ڵاته‌ به‌ هه‌ڵبژاردن هه‌ڵبژێردراوه‌ و ده‌نگی خه‌ڵكی هێناوه‌، ئه‌وانیش له‌ هه‌ڵبژاردندا به‌شدارییان كردووه‌ و به‌ڕێژه‌ی خۆیان ده‌نگیان هێناوه‌، ئه‌گه‌ر شه‌رعیه‌ت بۆ ئه‌م هه‌ڵبژاردنه‌ نه‌بووبێت كه‌واته‌ شه‌رعیه‌تی ئه‌ندام په‌رله‌مانه‌كانی ئه‌وانیش نییه‌، پێش هه‌موو شتێك پێویسته‌ 25 ئه‌ندام په‌رله‌مانه‌كه‌ی خۆیان بكشێننه‌وه‌ و بڵێن ئێوه‌ شه‌رعیه‌تتان نه‌ماوه‌، ئه‌و كاته‌ باسی شه‌رعیه‌تی په‌رله‌مان و حكومه‌تیش بكه‌ن، به‌ڵام من باوه‌ڕ ناكه‌م هه‌موو ئۆپۆزیسیۆن وا بڵێت، به‌ڵكو هه‌ندێكه‌ له‌مانه‌ وا ده‌ڵێن، دیسانه‌وه‌ ئه‌وه‌ رای خۆیانه‌.

ئاسۆ: كاك نه‌وشیروان له‌ دوایین دیمانه‌یدا ده‌ڵێت ئه‌گه‌ر ده‌سه‌ڵات لاساریی بكات، ئه‌گه‌ر ده‌سه‌ڵات نه‌یه‌وێت هیچ چاكسازیی بكات، ئه‌مجاره‌ خۆپیشاندان به‌فراوانی ده‌ستپێده‌كات، مه‌به‌ست له‌ به‌رفراوانیش ئه‌وه‌یه‌ كه‌ ئه‌وان وه‌كو ئۆپۆزیسیۆن به‌شداری تێدا ده‌كه‌ن، مه‌به‌ستی پرسیاره‌كه‌م زیاتر ئه‌وه‌یه‌: له‌و بڕوایه‌دایت ئۆپۆزیسیۆن بتوانی له‌ هه‌ولێر به‌هه‌مان قه‌باره‌ی سلێمانی چالاكی بكات یان خۆپیشاندان به‌ڕێبخات؟

هه‌ڵۆ ئه‌حمه‌د كورده‌: ئه‌گه‌ر خۆپیشاندان وه‌ك وتمان خۆپیشاندانی گله‌یی و گازنده‌ و ناڕه‌زایی خه‌ڵك بێت له‌ شتێكی دیاریكراو بۆ كاتێكی دیاریكراو، له‌ هه‌ولێریش ده‌توانی و له‌ سلێمانیش ده‌توانی، چونكه‌ ئازادی هه‌یه‌ و دیموكراتیه‌ت هه‌یه‌ و جه‌ماوه‌ریش هه‌قی خۆیه‌تی و بواریشی بۆ ده‌ڕه‌خسێت و پۆلیسیش پاسه‌وانی ده‌كا و ده‌یپارێزێت، به‌ڵام به‌و شێوه‌یه‌ی كه‌ ئۆپۆزیسیۆن باسی ده‌كه‌ن كه‌ جاری پێشوو روویدا، ئۆپۆزیسیۆن خۆی كرد به‌ خاوه‌نی، ئاشكراشه‌ ده‌ستی ده‌ره‌كیشی له‌پشت بوو، نه‌ له‌ هه‌ولێر و نه‌ له‌ سلێمانیش باوه‌ڕ ناكه‌م به‌و شێوه‌یه‌ رووبدات.

ئاسۆ: تۆ گه‌شبینیت به‌ ئایینده‌ی ئه‌م گفتوگۆیانه‌، یان زۆر جار لێره‌وله‌وی گوێمان لێده‌بێت ده‌ڵێن ئه‌گه‌ر ده‌سه‌ڵات گوی نه‌گرێت ئه‌وا ره‌نگه‌ كوردستان به‌ره‌و لیبیا بڕوات، تۆ له‌و بڕوایه‌دایت كوردستان ببێته‌ لیبیای دووه‌م، مه‌به‌ستم له‌وه‌یه‌ ناڕه‌زایه‌تی جه‌ماوه‌ر سه‌ر بكێشێت بۆ كاری چه‌كداریی و توندوتیژیی؟

هه‌ڵۆ ئه‌حمه‌د كورده‌: من گه‌شبینم به‌ وتووێژ، به‌ دیالۆگ، یه‌كێك له‌ پره‌نسیپه‌كانی یان بنه‌ماكانی كولتوری دیموكراسی یه‌كتر قبوڵكردن و دیالۆگه‌، بۆیه‌ گه‌شبینم به‌ دیالۆگ و باوه‌ڕیشم وایه‌ هه‌میشه‌ به‌ دیالۆگ ئێمه‌ ده‌توانین بگه‌ینه‌ ئه‌نجام، كوردستانیش لیبیا نییه‌ و شوێنی تر نییه‌، كوردستان تایبه‌تمه‌ندیی خۆی هه‌یه‌، ئێمه‌ تا ئێستا سنووره‌كانمان به‌ده‌ست خۆمانه‌وه‌ نییه‌، ئێمه‌ خاوه‌نی ده‌وڵه‌تی سه‌ربه‌خۆی خۆمان نین، من باوه‌ڕم وایه‌ هه‌موو كوردێك پێش هه‌موو شتێك ده‌بێت بیر له‌ ده‌وڵه‌تی سه‌ربه‌خۆ بكاته‌وه‌، ئه‌و كورده‌ی بیر له‌ ده‌وڵه‌تی سه‌ربه‌خۆ نه‌كاته‌وه‌ و هه‌ر شتێكی تر بكات، من پێم وایه‌ بۆ خۆی رێگره‌ له‌ سه‌ربه‌خۆییبوونی كوردستان.


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.