Red Purple Black

چه‌تۆ حه‌وێزی- ئه‌ندامی پێشووی سه‌ركردایه‌تی یه‌كێتی: وازهێنانی كۆسره‌ت ره‌سوڵ له‌ یه‌كێتی خه‌ونه‌ ... دیمانه‌: ستیڤان شه‌مزینانی

PDFPrintE-mail

* له‌ناو یه‌كێتی توانای گه‌نج خه‌فه‌ نه‌كراوه‌، به‌ڵام به‌ پرۆسه‌یه‌كی رێكخراو كاری له‌سه‌ر نه‌كراوه‌

*كاتی گۆڕانی جۆری په‌یوه‌ندییه‌كانی نێوان حزبه‌كانه‌ له‌ دژایه‌تییكردنه‌وه‌ بۆ دروستكردنی په‌یوه‌ندیی ئاسایی

*خۆ لێكگرێدان له‌گه‌ڵ دروستبوونی یه‌كێتی هاتووه‌ و له‌ هه‌ر سه‌رده‌مێكدا به‌ جۆرێك خۆی ده‌نوێنێت

چه‌تۆ حه‌وێزی ئه‌ندامی پێشووی سه‌ركردایه‌تی یه‌كێتی، له‌م دیمانه‌یه‌ی گۆڤاری "شه‌پۆل"دا باس له‌ پرۆسه‌ی خۆنوێكردنه‌وه‌ و ریفۆرمی ناو یه‌كێتی و هێنانه‌ پێشه‌وه‌ی گه‌نج بۆ سه‌ركردایه‌تی یه‌كێتی ده‌كات، له‌ به‌شێكی تری دیمانه‌كه‌دا باس له‌ كێشه‌ی ده‌سته‌گه‌ریی نێو ریزه‌كانی یه‌كێتی ده‌كات و پێیوایه‌ وشه‌ی باڵباڵێن له‌ جێگه‌ی خۆیدا نییه‌. له‌ كۆتایی دیمانه‌كه‌شدا دێته‌ سه‌ر باسی په‌یوه‌ندیی نێوان یه‌كێتی و گۆڕان و دۆخی یه‌كێتی له‌ قۆناغی دوای مام جه‌لال.

شه‌پۆل: یه‌كێتی نیشتمانیی كوردستان پێویستی به‌ خۆنوێكردنه‌وه‌ و ریفۆرم هه‌یه‌، پێتوایه‌ یه‌كێتی چۆن ده‌توانێت ریفۆرم بكات؟. جگه‌ له‌مه‌ش ده‌بێت پرۆسه‌ی خۆنوێكردنه‌وه‌ و ریفۆرمی حزبیی یه‌كێتی له‌ كوێوه‌ و له‌ چ هه‌نگاوێكه‌وه‌ ده‌ستپێبكات؟.

چه‌تۆ حه‌وێزی: بۆ هه‌موو پارت و رێكخراوێك چاكسازیی و خۆ نوێكردنه‌وه‌ پێویسته‌ بۆ ئه‌وه‌ی بتوانێت له‌گه‌ڵ ره‌وتی گۆڕانكارییه‌كان رێبكات و له‌ ئاستی رووداو و داخوازییه‌ جۆراوجۆره‌كانی كۆمه‌ڵگا بێت. یه‌كێتی نیشتمانی كوردستان یه‌كێكه‌ له‌و هێزه‌ سه‌ره‌كی و بنه‌ڕه‌تییانه‌ی كوردستان كه‌ رۆڵی كاریگه‌ر و گرینگی هه‌یه‌ له‌سه‌ر رووداوه‌كان و هه‌رئه‌وه‌ش وایكردووه‌ كه‌ ئه‌ركێكی قورسی بكه‌وێته‌ ئه‌ستۆ بۆیه‌ پێویستی به‌ نوێبوونه‌وه‌ و چاكسازیی هه‌یه‌. نوێبوونه‌وه‌ و چاكسازیی كارێك نییه‌ كه‌ له‌ خاڵێكه‌وه‌ ده‌ست پێبكات و كۆتایشی هه‌بێت، به‌ڵكو پرۆسه‌یه‌كی به‌رده‌وامه‌ له‌ ژیانی حزبایه‌تیدا، بۆیه‌ له‌هه‌ر جومگه‌یه‌ك ده‌ستی پێبكرێ هه‌نگاونانه‌ بۆ ئه‌وانی تر، بۆیه‌ یه‌كێتی نیشتمانی كوردستان ده‌بێت له‌ جێبه‌جێكردنی دروشمه‌كانییه‌وه‌ ده‌ست پێبكات له‌گه‌ڵ ئه‌و به‌رنامه‌و بڕیار و راسپاردانه‌ی له‌ دوا كۆنگره‌دا په‌سندكراون به‌ ره‌چاوكردنی ئه‌و گۆڕانكارییانه‌ی هاتوونه‌ته‌ پێش. هه‌روه‌ك له‌دیمانه‌یه‌كی تر ده‌رمبڕی ده‌بێت به‌رای من یه‌كێتی:

یه‌كه‌م: پێشڕه‌ویی سه‌قامگیركردنی یاسا و دادپه‌روه‌ریی بێ له‌ ناوخۆ و له‌ناو كۆمه‌ڵگادا. دووه‌م: كاربكات بۆ چه‌سپاندنی كاركردن به‌ سیستمی دامه‌زراوه‌یی و جێبه‌جێكردنی په‌یڕه‌و و پاراستنی له‌ پێشێلكاریی. سێیه‌م: پێداچوونه‌وه‌ بكات له‌ چه‌ندایه‌تی و چۆنایه‌تی كادیر و لێپرسراوان و چۆنێتی دابه‌شكردنیان به‌سه‌ر ئۆرگانه‌كان به‌پێی پێویستی بۆئه‌وه‌ی ئۆرگانه‌كان دوور بخاته‌وه‌ له‌ ئاوسان به‌ كادیر و سه‌ودیش وه‌رگرێ له‌تواناكانیان له‌بواره‌كانی تر. چواره‌م: یه‌كێتی له‌شكرێك كادیری به‌ توانای بێ كاری هه‌یه‌ كه‌ ده‌توانرێ له‌بواره‌ جیاجیاكان سوودیان لێوه‌ربگیرێ و بخرێنه‌وه‌ كاركردن. پێنجه‌م: چاوبخشێنێته‌وه‌ به‌ مامه‌ڵه‌كردن له‌گه‌ڵ ره‌وته‌ كۆمه‌ڵایه‌تییه‌كان و ده‌رئه‌نجامی هه‌ڵسوكه‌وت و كاره‌كانی له‌ماوه‌ی چه‌ند ساڵه‌ی كاركردنی وه‌رگرتنی بڕیاری گونجاو بۆ به‌ره‌و پێشه‌وه‌بردنی كۆمه‌ڵگا كه‌ هه‌رده‌م له‌ پێناویدا خه‌باتی كردووه‌ بۆ به‌ره‌و كۆمه‌ڵگایه‌كی كورده‌واری سه‌رده‌میانه‌. شه‌شه‌م: گه‌ڕانه‌وه‌ بۆ وته‌ی خه‌ڵكی شیاو بۆ شوێن شیاو، له‌ دانان و پێشنیاركردنی تاكه‌كان بۆ پۆسته‌ حكومیی و حزبییه‌كان.

حه‌وته‌م: چاوخشاندنه‌وه‌ به‌ زۆریی باره‌گا و بنكه‌ جیاجیاكان له‌ شار و شارۆچكه‌كان و دانانه‌وه‌یان به‌ گوێره‌ی پێویستی. هه‌شته‌م: سوود وه‌رگرتن له‌توانای لاوی به‌ ئه‌زموون و خوێنده‌وار و شاره‌زا له‌ بواره‌ هه‌مه‌لایه‌كان. نۆیه‌م: سوود وه‌رگرتن له‌توانای كه‌سانی پسپۆر ته‌نانه‌ت گه‌ر له‌ده‌ره‌وه‌ی بازنه‌كانی رێكخستنیش بن و گوێگرتن له‌رای به‌رانبه‌ر و كه‌ڵك وه‌رگرتن له‌پێشنیاره‌كانیان. ده‌یه‌م: په‌یڕه‌وكردنی مه‌بادئی سۆشیال دیموكراته‌كان به‌پێی رێنماییه‌كانی لایه‌نی په‌یوه‌ندیدار و ره‌نگدانه‌وه‌ی له‌ گوته‌ و كرداری كادیر و ئه‌ندامان له‌ ژیانی رۆژانه‌دا. یازده‌یه‌م: گۆشكردنی كادیر و ئه‌ندامان به‌گیانی فره‌ حزبی و گونجان و پێكه‌وه‌ژیان له‌ مه‌یدانی كاركركردنی سیاسیی و حكومڕانیدا. دوازده‌م: پێگه‌یاندنی كادیری پسپۆر بۆ سه‌ركردایه‌تی و به‌ڕێوه‌بردنی كاره‌كان. ئه‌مه‌و چه‌ندین ورده‌كاریی تر له‌ كاری رۆژانه‌ی حزبی بۆ بنیاتنانی په‌یكه‌ری كاركردن. هه‌ڵبه‌ته‌ ئه‌و كارانه‌ش هیچێكی ئه‌نجام نادرێ یا سه‌ركه‌وتوو نابێ بێ بوونی ئیراده‌یه‌كی به‌هێزی بڕیاردان بۆ به‌ئه‌نجام گه‌یاندن و به‌رده‌وامبوون له‌سه‌ری.

شه‌پۆل: باس له‌وه‌ ده‌كرێت نوخبه‌یه‌كی ده‌سه‌ڵاتداری ناو یه‌كێتی رێگرن له‌ پرۆسه‌ی خۆ نوێكردنه‌وه‌ و ریفۆرمی ناو یه‌كێتی. ئه‌گه‌ر ئه‌و نوخبه‌یه‌ رێگربن یه‌كێتی چۆن ده‌توانێت ریفۆرم له‌ خۆیدا بكات؟. پاشان ده‌پرسین به‌رژه‌وه‌ندییه‌كانی ئه‌و نوخبه‌یه‌ چییه‌ له‌ هێشتنه‌وه‌ی دۆخی یه‌كێتی له‌ حاڵی ئێستادا؟.

چه‌تۆ حه‌وێزی: راسته‌ هه‌موو چاكسازیی و گۆڕانكارییه‌ك له‌به‌رژه‌وه‌ندیی و ده‌سه‌ڵاتی هه‌ندێ كه‌س ده‌دات، به‌ڵام له‌به‌رئه‌وه‌ی خواست و داوای زۆرینه‌ی هه‌ره‌ زۆره‌ و له‌گه‌ڵ بوونی ئه‌و ئیراده‌یه‌ی باسمان كرد كه‌س ناتوانێ رووبه‌ڕووی بوه‌ستێ یا پێشی پێبگرێ. له‌لایه‌كی تره‌وه‌ مادام مایه‌ی به‌هێزبوونه‌وه‌ی حزبه‌ له‌ به‌رژه‌وه‌ندیی هه‌موو لایه‌كه‌ به‌تایبه‌تی هی لێپرسراو و كاربه‌ده‌سته‌كانی پۆسته‌ باڵاكان. تاكو ئێستاش نه‌مزانیوه‌ كه‌س له‌دژی گۆڕانكارییه‌كان رای هه‌بووبێ، له‌وانه‌یه‌ له‌سه‌ر میكانیزمی جێبه‌جێكردن بۆچوونی جیاواز هه‌بێ نه‌ك له‌سه‌ر پرۆسه‌كه‌ به‌ گشتیی.

شه‌پۆل: له‌ كۆنگره‌ی سێیه‌می یه‌كێتیدا زۆرترین سه‌ركه‌وتن و پۆسته‌ باڵاكان به‌ر به‌رپرسانی ئه‌منی و سه‌ربازیی كه‌وت. ئه‌مه‌ش یه‌كێتی چه‌ند هه‌نگاوێك به‌ره‌و دواوه‌ برده‌وه‌. پێتوانییه‌ به‌رپرسانی باڵی ئه‌منی- سه‌ربازیی رێگرن له‌ پرۆسه‌ی گۆڕانكاریی ناو یه‌كێتیدا؟. ئێوه‌ چۆن سه‌یری سه‌ركه‌وتنی ئه‌و باڵه‌ ده‌كه‌ن؟.

چه‌تۆ حه‌وێزی: من له‌گه‌ڵ به‌كارهێنانی وشه‌ی باڵ نیم ئه‌وانه‌ی ئێوه‌ باسیان ده‌كه‌ن هه‌مووی ئه‌ندامی كۆنگره‌ بوون نه‌ به‌ جیا هاتوون و نه‌ به‌لیستی جیا دابه‌زیوون، به‌ڵكو ده‌نگی ئه‌ندامانی به‌شێكی كۆنگره‌یان هێناوه‌ ئه‌وه‌ش ئاسایی و یاساییه‌، له‌وانه‌یه‌ من حه‌زم كردبێ له‌جیاتی كه‌سێك كه‌سێكی تر ده‌رچووبایه‌، به‌ڵام ئه‌وه‌ پرۆسه‌ی ده‌نگدان و ده‌نگ وه‌رگرتنه‌ ده‌بێ ئه‌نجامه‌كه‌ی قبووڵ بكه‌ین. خۆشتان ده‌زانن ده‌نگی كه‌سانی ناو ده‌زگاكان گرد و كۆتره‌ له‌ده‌نگی كادیری ناو رێكخستنه‌كان و خه‌ڵكه‌ جیاجیاكان، به‌ڵام گه‌ر پرسیاری ئه‌وه‌م لێ بكه‌ی كه‌ خۆ لێكگرێدان و كاریگه‌ریی هه‌ندێ كه‌س هه‌بووه‌ له‌سه‌ر به‌شێك له‌ئه‌ندامان ده‌ڵێم به‌ڵی ململانێی تاكه‌كان هه‌بووه‌، به‌ڵێ كه‌سانی زۆر شیاو هه‌بوون به‌داخه‌وه‌ ده‌نگیان نه‌هێنا بۆیه‌ من لام وایه‌ ده‌رئه‌نجامه‌كه‌ی وه‌كو پێویست نه‌بوو كه‌ ده‌كرا به‌جۆرێكی تر بووایه‌، له‌ هه‌موو حاڵه‌ته‌كان هه‌موویان ئه‌ندامی یه‌كێتین و باس له‌سه‌ر بوونیان له‌و ده‌زگا و ئه‌و ده‌زگا نییه‌ باس له‌ توانا و مسته‌حه‌قی تاكه‌كان و پێویستییه‌كانی یه‌كێتییه‌.

شه‌پۆل: كۆنگره‌ی سێیه‌م نه‌یتوانی یه‌كێتی له‌ باڵباڵێن رزگار بكات، به‌پێچه‌وانه‌وه‌ ئێستا باڵه‌كان له‌سه‌ر شێوه‌ی ناوچه‌گه‌ریی كار ده‌كه‌ن. بۆ نموونه‌ باڵی سلێمانییه‌كان و خانه‌قینییه‌كان و هه‌ولێرییه‌كان. به‌ بۆچوونی ئێوه‌ ئه‌م سیاسه‌تی باڵباڵێنه‌ یه‌كێتی به‌ره‌و كوێ ده‌بات؟. پێتوانییه‌ دواجار ئه‌م ته‌كه‌تولانه‌ ناتوانن یه‌كتر تا سه‌ر قبوڵ بكه‌ن و دیسانه‌وه‌ ئه‌زموونی جیابوونه‌وه‌ی باڵی ریفۆرم دووباره‌ ده‌بێته‌وه‌؟.

چه‌تۆ حه‌وێزی: خۆ لێكگرێدان له‌سه‌ره‌تاوه‌ و له‌گه‌ڵ چۆنێتی دروستبوونی یه‌كێتی هاتووه‌ و له‌ هه‌ر سه‌رده‌مێكدا به‌ جۆرێك خۆی ده‌نوێنێت و كار ده‌كاته‌ سه‌ر ره‌وته‌كان و تاكوو ئێستاش هه‌ر ماوه‌. بۆیه‌ ئێستا بیرۆكه‌یه‌ك له‌لای هه‌ندێك له‌ هه‌ڤاڵان دروستبووه‌ بۆ رزگاربوون له‌و شێوازی كاركردنه‌ و بۆ پاراستنی یه‌كێتی له‌هه‌ر ئه‌گه‌رێك له‌وانه‌ ئه‌و ئه‌گه‌ره‌ی كه‌ ئێوه‌ باسی ده‌كه‌ن. بۆ ئه‌وه‌ی پشتیوانی له‌ یه‌كتر كردن له‌سه‌ر بنه‌مای به‌رژه‌وه‌ندیی تایبه‌تی نه‌بێت و ببێته‌ پشتیوانی له‌یه‌ك كردن له‌سه‌ر بنه‌مای پێشكه‌شكردنی به‌رنامه‌ و پڕۆژه‌ و بیرۆكه‌ی به‌سوود بۆ یه‌كێتی. بتوانرێت مینبه‌ری جیا جیای ئاشكرا هه‌بێت و له‌سه‌ر خاڵه‌ بنه‌ڕه‌تی و هاوبه‌شه‌كانیش له‌ ژێر چه‌تری یه‌كێتی كار بكه‌ن و هه‌موو بیر و را جیاوازه‌كان له‌ ناوه‌ندی بڕیاردان بوونی هه‌بێت و گوێی لێبگیرێت و پێشنیاره‌ باشه‌كان له‌ بڕیاردانه‌كان ره‌نگبده‌نه‌وه‌.

شه‌پۆل: له‌ كۆنگره‌ی سێیه‌می یه‌كێتیدا كه‌مترین گه‌نج و سیمای نوێ گه‌یشتنه‌ لوتكه‌ و ئاستی سه‌ركردایه‌تی نوێی یه‌كێتی. پێتوانییه‌ یه‌كێتی له‌ ئاینده‌دا رووبه‌ڕووی جۆرێك له‌ ململانێی سه‌ختی نه‌وه‌كانیش ده‌بێته‌وه‌؟. ئایا خه‌فه‌كردنی توانا نوێیه‌كان یه‌كێتی به‌ره‌و كام ئاقار ده‌بات؟.

چه‌تۆ حه‌وێزی: له‌ناو یه‌كێتی توانای گه‌نج خه‌فه‌ نه‌كراوه‌، به‌ڵام به‌ پرۆسه‌یه‌كی رێكخراو كاری له‌سه‌ر نه‌كراوه‌ بۆئه‌وه‌ی به‌پێی قۆناغه‌ یه‌ك له‌دوای یه‌كه‌كان و پێویستییه‌كان سه‌ربكه‌ون و سوودیان لێ وه‌ربگیرێ، له‌كۆنگره‌ش زۆربه‌ی لاو هاتوون گه‌ر ته‌مه‌ن حساب بكه‌ی بۆ كه‌سی سیاسیی كه‌من ئه‌وانه‌ی تازه‌ هاتوون.

شه‌پۆل: ده‌وترێت له‌ قۆناغی دوای مام جه‌لال، شتێك به‌ناوی یه‌كێتییه‌وه‌ نامێنێت و زۆرینه‌ له‌ ژێر ئاڵای نه‌وشیروان مسته‌فادا كۆده‌بنه‌وه‌ و كه‌مینه‌یه‌كیش به‌ره‌و ناو پارتی ده‌ڕۆن. وه‌ك خۆت خوێندنه‌وه‌ت بۆ دۆخی سیاسیی یه‌كێتی چییه‌ له‌ قۆناغی دوای مام جه‌لال؟.

چه‌تۆ حه‌وێزی: له‌گه‌ڵ ئه‌وه‌ی ئێمه‌ هه‌موومان داوای ته‌مه‌ندرێژیی و ته‌ندروستی بۆ به‌ڕێز مام جه‌لال ده‌كه‌ین، به‌ڵام قسه‌كردن له‌وباره‌وه‌ بڤه‌ نییه‌ نه‌ له‌لای ئێمه‌ نه‌ له‌لای مام جه‌لال. بۆیه‌ به‌ رای من ئه‌وه‌ی مام جه‌لالی خۆش بووێت و باوه‌ڕی به‌ بیروڕاو بۆچوونه‌ سیاسییه‌كانی هه‌بێت، ده‌بێ بیر له‌وه‌ بكاته‌وه‌ كه‌ كاتێ مام جه‌لال پێ رانه‌گه‌یشت به‌ رێبه‌رایه‌تیكردن و به‌ڕێوه‌بردنی كاره‌كان چۆن پارێزگاریی له‌و باوه‌ڕ و بۆچوونانه‌ ده‌كات كه‌ هه‌وێنی كاركردنی سیاسیی مام جه‌لال بووه‌ و ده‌یكاته‌ ناوكی به‌رنامه‌ی كاركردنی قۆناغه‌ی كه‌ دادێ. بۆ ئاینده‌ی یه‌كێتیش كاتی ماوه‌ قسه‌ی له‌سه‌ر بكه‌ین و بۆ هه‌ر كاته‌ و قسه‌یه‌ك هه‌یه‌، به‌ڵام ده‌بێت كاریگه‌ریی مام جه‌لال له‌سه‌ر ره‌وتی خه‌باتی گه‌له‌كه‌مان به‌ گشتیی و له‌سه‌ر یه‌كێتی به‌ پله‌ی یه‌كه‌م دابنێین. ئومێد ده‌كه‌ین كه‌ مام جه‌لال و هه‌ڤاڵانیش كارێكی وا بكه‌ن پاشه‌كشه‌ی تێدا روونه‌دا و به‌ره‌و پێش بڕوات له‌ ئێستا و ئاینده‌شدا.

شه‌پۆل: په‌یوه‌ندییه‌كانی گۆڕان و یه‌كێتی به‌رده‌وام به‌ره‌و ئاڵۆزیی زیاتر ده‌ڕوات. به‌بڕوای ئێوه‌ هۆكاری ئه‌م ئاڵۆزییه‌ چییه‌؟. به‌ بۆچوونی تۆ ئایا گۆڕان یان یه‌كێتی كامیان به‌رپرسن له‌م ئاڵۆزییه‌ی كه‌ هه‌یه‌؟.

چه‌تۆ حه‌وێزی: من پێموایه‌ ده‌قی خۆی ده‌گرێ و رۆژ له‌ دوای رۆژ دژی ئه‌و ته‌مه‌نایانه‌م كه‌ بۆ ئاڵۆزیی ده‌خوازرێ، من له‌گه‌ڵ به‌یه‌كه‌وه‌ ژیان و هه‌ڵكردنم و هه‌موو توندوتیژییه‌ك ئاو له‌ئاشی دوژمن ده‌كات. ئێستا كات كاتی گۆڕانی جۆری په‌یوه‌ندییه‌كانی نێوان حزبه‌كانه‌ له‌ دژایه‌تییكردن و هه‌وڵدان بۆسرینه‌وه‌ی یه‌كتر بۆ دروستكردنی په‌یوه‌ندیی ئاسایی له‌ نێوانیاندا و گرتنه‌به‌ری شێوازی تازه‌ی كاركردنی سیاسیی و حوكمڕانییه‌ له‌ كوردستان و ناوچه‌كه‌ش.

شه‌پۆل: چۆن سه‌یری رێككه‌وتننامه‌ی ستراتیجی نێوان پارتی و یه‌كێتی ده‌كه‌یت؟. پێتوایه‌ یه‌كێتی له‌ هه‌بوونی رێككه‌وتنی ستراتیجی له‌گه‌ڵ پارتی چ زیانێكی كردووه‌؟.

چه‌تۆ حه‌وێزی: هه‌موو رێككه‌وتنێك له‌ نێوان حزبه‌كانی كوردستان كارێكی پیرۆزه‌ ده‌بێت پشتیوانی بكه‌ین و هه‌وڵ بده‌ین فراوانتری بكه‌ین به‌تایبه‌تی له‌ ئێستادا كه‌ ناوچه‌كه‌ له‌به‌رده‌م قۆناغێكی تازه‌ و چاره‌نووسسازه‌، به‌تایبه‌تی بۆ كورد، به‌ڵام هه‌موو رێككه‌وتننامه‌یه‌ك بۆ قۆناغێكی دیاریكراوه‌ و ده‌كرێ به‌ پێی قۆناغه‌كان چاوی پێدا بخشینرێته‌وه‌ و ده‌ستكاریی بكرێت به‌ مه‌رجێك له‌ئاستی قۆناغه‌كه‌ بێ و به‌رژه‌وه‌ندیی هه‌موو لایه‌نه‌كانی رێككه‌وتننامه‌كه‌ی تێدا پارێزراو بێ.

شه‌پۆل: هه‌ندێك كه‌وادری ناوه‌ندیی یه‌كێتی ره‌خنه‌ له‌ شێوازی بڵاوه‌پێكردنی خۆپیشاندانه‌كانی شاری سلێمانی ده‌گرن و پێیانوایه‌ ئه‌وه‌ له‌سه‌ر ناوبانگی یه‌كێتی كه‌وتووه‌. وه‌ك خۆت چۆن سه‌یری پرۆسه‌ و فۆرمی بڵاوه‌پیكردنی خۆپیشاندانه‌كان ده‌كه‌یت له‌ مانگی نیسانی رابردوودا؟.

چه‌تۆ حه‌وێزی: هه‌موو كارێك كاردانه‌وه‌ی هه‌یه‌، حكوومه‌ت به‌مافی خۆی ده‌زانێ ئه‌گه‌ر هه‌ستی كرد كه‌ ئاڕاسته‌ی كاره‌كان به‌ره‌و توندوتیژیی بڕوات پێشی پێبگرێ و رێگه‌ نه‌دات بۆ هه‌ندێ به‌رژه‌وه‌ندیی تایبه‌تی به‌كاربێت. له‌به‌رئه‌وه‌ی داواكردنی داخوازییه‌كان له‌ رێگه‌ی خۆپێشاندان له‌لای ئێمه‌ تازه‌ و نامۆیه‌، بۆیه‌ له‌ مامه‌ڵه‌كردن له‌گه‌ڵی ده‌بێ وردبین، چ له‌لای ئۆپۆزیسیۆن چ له‌لای حكوومه‌ت، له‌ شوێنان ده‌یان جار خۆپیشاندان ده‌كرێ و بڵاوه‌شی پێ ده‌كرێ و ده‌ستیش پێده‌كاته‌وه‌ به‌ڵام به‌پێی یاسا و رێسای وڵاته‌كه‌، گرینگ ئه‌وه‌یه‌ كاری توندوتیژیی لێ نه‌كه‌وێته‌وه‌ له‌ هیچ لایه‌كه‌وه‌ و به‌هێمنی ئامانجی خۆی بپێكێ.

شه‌پۆل: جار به‌جار ده‌نگۆی وازهێنانی كۆسره‌ت ره‌سوڵ، له‌ یه‌كێتی له‌ میدیاكاندا بڵاوده‌بێته‌وه‌. تۆ پێتوایه‌ كۆسره‌ت ره‌سوڵ له‌ یه‌كێتی بێزاربووه‌؟. ئه‌گه‌ر هاتو كۆسره‌ت ره‌سوڵ له‌ یه‌كێتی بێته‌ ده‌ره‌وه‌، ئه‌وا چاره‌نووسی یه‌كێتی چی به‌سه‌ر دێت؟.

چه‌تۆ حه‌وێزی: وازهێنانی كاك كۆسره‌ت له‌ یه‌كێتی یه‌كێكه‌ له‌و خه‌ونه‌ ناخۆشانه‌ی كه‌ ناوناوه‌ به‌ یه‌كێتییه‌وه‌ ده‌بینرێ، ئه‌وه‌ی من ئاگادارم كاك كۆسره‌ت هه‌موو ئاینده‌یه‌كی فكریی و كاری له‌ ناو یه‌كێتی ده‌بینێته‌وه‌، به‌ دڵنییایه‌وه‌ راو بۆچوونی تایبه‌ت به‌خۆی هه‌یه‌ له‌ بواری كاركردندا، به‌ڵام مانای هه‌ڵنه‌كردنی نییه‌ له‌ناو یه‌كێتی و نابێته‌ مایه‌ی وازهێنان و دووركه‌وتنه‌وه‌ی له‌ناو هێزێك كه‌ نه‌خشێكی گه‌وره‌ی تێدا هه‌یه‌، منیش ده‌پرسم بۆ تاكه‌ پرسیارێكتان له‌سه‌ر لایه‌نه‌ دره‌وشاوه‌كانی یه‌كێتی نه‌بوو؟ هه‌مووی له‌ تاریكی ده‌سوڕایه‌وه‌.

چه‌تۆ حه‌وێزی

چه‌تۆ حه‌وێزی خه‌ڵكی شاری كۆیه‌، ساڵی 1951 له‌ دایكبووه‌، له‌ ته‌مه‌نی بچووكییه‌وه‌ به‌هۆی كاریگه‌ریی بنه‌ماڵه‌كه‌یان هاتۆته‌ دنیای سیاسه‌ته‌وه‌ و له‌ قوتابیانی سه‌ر به‌ باڵی مه‌كته‌بی سیاسیی ده‌ستی پێكردووه‌ و بێ دابڕان له‌ هه‌ردوو شۆڕشه‌كه‌ به‌شداریی كردووه‌، زۆر پله‌ و پۆستی له‌ ناو ی. ن. ك وه‌رگرتووه‌، ساڵی 1989 بووه‌ به‌ ئه‌ندامی سه‌ركردایه‌تی ی. ن. ك له‌دوای راپه‌ڕینیش چه‌ندین پۆستی وه‌رگرتووه‌ تا كۆنگره‌ی دووه‌م. دوای ئه‌وه‌ له‌ حكوومه‌ت كاری وه‌رگرتووه‌ به‌پله‌ی وه‌زیر. دواتر بووه‌ به‌ئه‌ندامی په‌رله‌مانی كوردستان. پێش كۆنگره‌ی سێیه‌می یه‌كێتی ئه‌ندامی ئه‌نجومه‌نی ناوه‌ندیی بووه‌ و ئێستاش هاووڵاتی خانه‌نشینه‌.

تێبینی: ئه‌م دیمانه‌یه‌ له‌ ژماره‌ "1" گۆڤاری "شه‌پۆل" له‌ 4\9\2011 بڵاوكراوه‌ته‌وه‌.


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.