Red Purple Black

شێخ مورشید خه‌زنه‌ویی: گه‌ر ئیسلام وه‌ک کوردێک منی قه‌بوڵ نه‌بێت من ئه‌و ئیسلامه‌ ڕه‌تده‌که‌مه‌وه‌ ... گۆران هه‌ڵه‌بجه‌یی

PDFPrintE-mail

ساڵی 2004 ڕژێمی به‌عسی سوری تاوانیکی گه‌روره‌ی له‌ رۆژئاوای کوردستان ئه‌نجامدا، ئه‌ویش تاوانی کوشتی که‌سایتی ئاینی و نه‌ته‌وه‌یی شێخ معشوق خه‌زنه‌وه‌ی بوو. ته‌رۆرکردنی شێخ معشوق پاش ئه‌وه‌ هات که‌ ئه‌و ڕژێمه‌ بۆی ده‌رکه‌وت نه‌به‌ پێدانی ئمتیازات نه‌ به‌ پاره‌ و ته‌نانه‌ت نه‌ به‌ هه‌ڕه‌شه‌ش بۆی بێده‌نگ ناکرێت، ئیدی په‌نای برده‌ به‌ر ته‌رورکردنی. به‌عسی سوری واتێده‌که‌شت به‌ تیرۆرکردنی ئه‌و که‌سایه‌تیه‌ ئیدی گیانی به‌رخوردان و ناڕه‌زایی و شۆڕش خامۆش ده‌بێت. لێ ئه‌و حسابه‌یان هه‌ڵه‌ ده‌رچوو، له‌دوای ته‌رۆری شێخ گیانی مقاوه‌مه‌ت و خه‌بات وکوردایه‌تی به‌رده‌وام بوو، مه‌شخه‌لی شیخ که‌سانی دیکه‌ به‌رزیان کردوه‌وه‌، کوره‌کانی شێخ معشوق [مورشید و موراد] له‌بری باوکیان درێژه‌ به‌ خه‌‌بات ده‌ده‌ن و له‌سه‌ر ڕێبازه‌که‌ی به‌رده‌وامن. له‌م دیمانه‌یه‌دا یه‌کێک له‌ کوره‌کانی ده‌دوێنم ئه‌ویش شێخ مورشید خه‌زنه‌وییه‌.

پ/ ڕژێمی سوریا بۆ باوکتی کوشت؟

و/ ڕژێمی سوریا به‌ جۆرێک ده‌یڕوانیه‌ دۆزی کورد له‌ سوریا که‌ هه‌ر بزاوتێک له‌لایه‌ن ئه‌وانه‌وه‌ بۆ به‌ده‌ست هێنانی مافه‌کانیان هه‌ڕه‌شه‌یه‌ بۆ سه‌ر ڕژێمه‌که‌ی، دیاره‌ بزافه‌ کوردیه‌کانی ‌ڕۆژئاوای کوردستان مۆرکی ئاینیان نیه‌ و هه‌موو بزافی عه‌لمانین. بیرم دێت جارێک له‌ دائیره‌ی ئه‌من به‌ باوکمیان ووتبوو، ئێمه ده‌زانین کورده‌کان چه‌ندین حیزبیان هه‌یه‌و چالاکن و کارده‌که‌ن، هه‌ر بۆیه‌ش تا ئێستا بۆ ئێمه‌ ئاسان بوو که‌ تۆمه‌تی کفرو بێ ئیمانیمان ده‌دایه‌ پاڵیان، به‌ڵام ئێستا تۆ هاتوویت به‌ جبه‌و عه‌مامه‌که‌ت و به‌ ئیسلامیه‌که‌ته‌وه‌‌ هۆشیاریان ده‌که‌یته‌وه‌، ئیدی ئه‌و ریگه‌یه‌شت له‌ ئێمه‌ گرت.

باوکم ڕۆڵیکی مه‌زنی هه‌بوو له‌ شه‌قامی کوردی و له‌ نێو لاوانی کوردا بۆ به‌رزکرنده‌وه‌ی هه‌ستی نه‌ته‌وایه‌تی.

بۆیه‌ ڕژێمی سوریا تێگه‌شت گه‌ر باوکم به‌رده‌وامبێت له‌سه‌ر جۆشدانی گیانی شۆڕش و به‌رخوردان و به‌رهه‌ڵستکاری، ئه‌وه مه‌ترسیه‌کی گه‌ره‌ دروست ده‌کات، بۆیه‌ هه‌وڵیان دا له‌ ڕێگه‌ی هه‌ره‌شه‌، ترساندن، رازی کرد ‌پێدانی ئیمتیازات و زۆر شتی تره‌وه‌ بێده‌نگی بکه‌ن، به‌ڵام ده‌مێک زانیان هه‌وڵه‌کانیان شکستی خوارد، ئیدی بڕیاری کوشتنیان دا. له‌ مه‌شدا هه‌ر شکستیان به‌ده‌ست هێنا چونکه‌ ڕاسته‌ باوکم به‌ جه‌سته‌ جێی هێشتوین به‌ڵام به‌ فیکر به‌ڕۆح به‌ ده‌نگ له‌ نیوماندا ماوه‌، ئـێمه‌ له‌سه‌ر ریبازه‌که‌ی به‌رده‌ام ده‌بین تا په‌یامه‌که‌ی ده‌گه‌یه‌نین، باوکم‌ دیزانی نه‌ئیمانه‌که‌ی و نه‌ئیسلامیه‌که‌ی ته‌وانابێت و ئیماندارێکی ڕاست نابێت گه‌ر لایه‌نه‌ نه‌ته‌وه‌ییه‌که‌ی پشتگوێ بخستایه‌.

پ/ چۆن ئه‌و هه‌سته‌ نه‌ته‌وایه‌تیه‌ به‌رزه‌ لای باوکت درووست بوو، به‌وه‌ی پیاوه‌ ئاینیه‌کان که‌متر تێکه‌ڵاوی سیاسه‌ت ده‌بن؟

و/ من ناتوانم بڵێم چۆن هه‌ستی نه‌ته‌وایه‌تی لای باوکم درووست بوو، چونکه‌ باوکم کوردبوو ‌دایک و باوکی کورد کوردبوون، وه‌ ئه‌م هه‌سته‌ له‌ منداڵیه‌وه‌ له‌ ناوماندا چه‌که‌ری کردووه‌ و وه‌ک خیزان هه‌رده‌م له‌ خزمه‌تی نه‌ته‌وه‌که‌ماندابووین. له‌وانه‌یه‌ له‌ هه‌ندێک کاتدا ئه‌وه‌ ده‌نگه‌ کزبووبێت به‌ڵام ده‌مێک باوکم وه‌ک وڵاتپاریزیک هاته‌ مه‌یدان ئه‌م هه‌سته‌ی نوێکرده‌وه‌. وه‌ک بیرم بێت باوکم له‌ هه‌شاکانه‌وه‌ ئه‌م نه‌هجه‌ی هه‌بووه‌، باوکم ڕیبازی تایبه‌تی خۆی هه‌بوو له‌کارکردندا، ئاره‌ززوی ده‌کرد سه‌ره‌تا و به‌ر له‌ هه‌ر چالاکیه‌کی جه‌ماوه‌ری میلله‌ت هۆشیار بکاته‌وه. باوکم پتر له‌ ١٥ ساڵ له‌ پێناوی به‌رزردنه‌وه‌ی گیانی کوردایه‌تی له‌ نێو کوردانی ڕۆژ ئاواداکاری کردووه‌، به‌دوو ئاراسته‌ کاری ده‌کرد، یه‌که‌م دژ به‌ ڕژێمی داگیرکه‌ر دووه‌م دژ به‌و پیاوه‌ ئاینیه‌ کوردانه‌ی که‌ پشتگیریان له‌ ڕژێم ده‌کرد و به‌ ناوی ئیسلامه‌وه‌ نه‌ته‌وه‌که‌میان بێهۆش ده‌کرد.که‌واته‌ سه‌ره‌تا به‌ هۆشیارکردنه‌وه‌ ده‌ستی پێکرد تا له‌ کۆتایدا گه‌نجه‌کانمان په‌یامه‌که‌یان هه‌ڵگرت و کاریان پێکرد.

پ/ ڕۆلی باوکت تا چ راده‌یه‌ک کاریگه‌ر بوو له‌هۆشیارکردنه‌وه‌ی میلله‌تدا؟

و/ بێگومان باوکم ڕۆڵی کاریگه‌ری هه‌بوو له‌ هۆشیار کردنه‌وه‌ی خه‌ڵکدا وه‌ک پێشتر ئاماژه‌م پێدا، باوکم کۆمه‌ڵگه‌ی کوردی واده‌بینی که‌ کۆمه‌ڵگه‌یه‌کی ئیماندار و هاوکات مته‌سه‌وفن، بۆ بیرهێناه‌وه‌ش خێزانی خه‌زنه‌وی خیزانێکی سۆفین له‌سه‌ر ته‌ریقه‌تی نه‌قشه‌به‌ندی له‌ ده‌ڤه‌ره‌که‌ماندا. به‌هۆی یتکه‌ڵاوی له‌ نیو خه‌ڵکداو به‌ پێی ئه‌زموونی خۆی بۆی ده‌رکه‌وتبوو که‌ ئه‌و که‌لێنه‌ی دووژمن له‌ رێگه‌یه‌وه‌ دزه‌ده‌کاته‌ نیو هه‌ست و هۆشی نه‌ته‌وه‌ی کورد مه‌سه‌له‌ی جه‌هله‌، مه‌سه‌له‌ی نه‌زانین و غیابی رۆشنفکریه‌.بۆیه‌ هه‌ستا به‌ به‌ئاگاهێنانه‌وه‌ و ئاگادارکردنه‌وه‌ی نه‌ته‌وه‌که‌مان به‌ وه‌ی که‌ ملکه‌چی فه‌رمایشی که‌س نه‌بن، خوانه‌بێت.

باوکم هه‌ر له‌م باره‌وه‌ کتیبێکی هه‌یه‌ که‌ پاش بلاو کردنه‌وه‌ی به‌ هه‌فته‌یه‌ک له‌ بازاره‌کان له‌لایه‌ن ئاسایشی سیاسیه‌وه‌ قه‌ده‌غه‌کرا به‌نێوی{ومظات فی ظلال توحید}.ئه‌م کتێبه‌ باسی کاریگه‌ری سه‌لبی خورافات و نووشته‌و بدع و شرک ده‌کات له‌سه‌ر هه‌ست و هۆشی خه‌ڵکی کورد، جا باوکم ئه‌م شتانه‌ی ناو نابوو موخه‌دراتی مه‌عنه‌وه‌ی که‌ له‌ نێو جه‌سته‌و عه‌قڵی کورددا چێنراون، ئه‌و پێی وابوو به‌هۆی ئه‌م جۆره‌ موخه‌درانه‌وه‌ مه‌سه‌له‌ سه‌رکیه‌که‌یان له‌ بیر ده‌چێته‌وه‌ که‌ئه‌ویش کارکردنه‌وه‌ بۆ میلله‌ت.بۆنمونه‌ ده‌مێک باوکم باسی چه‌وساندنه‌وه‌و ناعه‌داله‌ی وبێمافی نه‌ته‌وه‌که‌ی بۆ کوردێکی ساده‌ی ئیمانداری ناهۆشمه‌ند ده‌کرد، وه‌ڵامی ئه‌وه‌ بوو که‌ ئه‌مه‌ قه‌ده‌ری خوایه‌و ناتوانین بیگۆڕین، به‌ڵام باوکم زۆر به‌ ڕاشکاوانه‌ وه‌ڵامی ده‌دایه‌وه‌ ده‌یوت نه‌خێر ئه‌مه‌ قه‌ده‌ری خوا نیه‌ و قه‌ده‌ری ئێمه‌ش نیه‌ ده‌توانین بیگۆڕین هاواکات ده‌یگوت بۆ ئه‌وه‌ی بتوانین ئه‌و قه‌ده‌ره‌ بگۆڕین گه‌ره‌که‌ عه‌قڵمان ئازادبێت به‌وه‌ی واز له‌ عیباده‌تی مرۆڤ بهێنین که‌ وه‌ک ئێمه‌ مرۆڤن، ئیدی ئه‌و که‌سه‌ والی بێت شێخ بێت مه‌لا بێت گه‌نانه‌ت گه‌رپێغه‌مبه‌ریش بێت، گه‌ره‌که‌ ته‌نها و ته‌نها عیباده‌تی خوابکه‌ین،

پ/ ئایا ئه‌م رۆڵه‌ی باوکت که‌ ئێستا باست کرد هۆکار نه‌بوو بۆکوشتنی؟به‌وه‌ی ڕۆڵی

پیاوانی ئاینی دیارتر و کاریگه‌رتره‌. 

و/ بێگومان ڕاسته‌، ئه‌وه‌ و ئه‌و کارانه‌ش که‌ به‌داویدا هاتن هۆکاری ته‌رۆرکردنی بوون، دیاره‌ ده‌سه‌ڵاتی به‌عس له‌سوریا ده‌رکیان به‌م مه‌ترسیه‌ کردبوو، باوکم وه‌ک عالمێک وه‌ک پیاوێکی ئاینی ده‌مێک به‌ عه‌مامه‌و جبه‌که‌یه‌وه‌ ئاماده‌ی ئاهه‌نگی نه‌ورۆز ده‌بوو، یاخود ده‌مێک له‌ خوتبه‌کانیدا باسی هه‌قخوراوی میلله‌ته‌که‌ی ده‌کرد. ئه‌مانه‌ گه‌وره‌ترن مه‌ترسی بوون بۆ سه‌ر ده‌سه‌ڵات.

بۆیه‌ ڕژێم له‌ کاره‌کانی باوکم زۆر نیگه‌ران بوو به‌پێی ئه‌و قسه‌ باوه‌ی لای خۆمان هه‌یه باوکم‌ مه‌ترسی بوو بۆ سه‌ر ئاسایشی ده‌وڵه‌ت، جا به‌ پێی ئه‌م بۆچوونه‌ که‌سی مه‌ترسیدار بۆ سه‌ر ئاسایشی ده‌وڵه‌ت ده‌بێ له‌ناو ببرێت.

باوکم ته‌نها که‌س بوو که‌ زۆرێک له‌ باڵویزه‌کانی ولاتانی ئه‌ورپی بانگهێشت کرد بۆ قامشلو وله‌گه‌ل بزافه‌کوردیه‌کاندا کۆبوونه‌وه‌ی بۆڕێکخستن.

باوکم له‌ دوو گۆشه‌نیگاوه‌ سه‌یری خۆی ده‌کرد، له‌ گۆشه‌نیگا ئاینیه‌که‌وه‌ وه‌ک پێاوایکی ئاینی ئه‌رکی لابردن و پوچه‌ڵکردنه‌وه‌ی ئه‌و مینانه بوو که‌ به‌ ناوی ئاینه‌وه‌ له‌ لایه‌ن که‌سانێکه‌وه‌ به‌نێوی ئیسلامه‌وه‌ له‌ ڕیگه‌ی نه‌ته‌وه‌که‌یدا دایاننابوون، که‌ باوکم ئه‌م شتانه‌ی ناونابوو [مینی ئاینی] که‌بێگومان ئیسلام به‌ریه‌ لییان.

گۆشه‌نیگای دووه‌م ئه‌و ڕۆڵه‌ بوو که‌ باوکم ده‌یبینی له‌ په‌یوه‌ندیه‌کانیدا له‌گه‌ل ئه‌ورووپیه‌کان، عه‌ره‌ب، تورک ونه‌ته‌وی دیکه‌و ناساندنیان به‌دۆزی کورد.

پ/ په‌یوه‌ندی باوکت چۆن بوو له‌گه‌ڵ حیزبو لایه‌نه‌ کوردستنایه‌کان له‌ هه‌رچوار پارچه‌ی کوردستان؟به‌ نهێنی بێت یا به‌ئاشکرا؟

و/ بێگومان باوکم په‌یوه‌ندی باشی هه‌بوو له‌گه‌ڵ زۆربه‌ی حیزبه‌ کوردیه‌کان، بۆ نمونه‌ له‌ رۆژئاوای کوردستان په‌یه‌وه‌ندی ئاشکرای ‌له‌گه‌ڵ زۆربه‌ی حیزبه‌کان هه‌بوو، ئه‌وانیش ڕیزیان له‌ باوکم ده‌گرت.له‌ ده‌ره‌وی ڕۆژئاوای کوردستانیش په‌یوه‌ندی باشی له‌گه‌ڵ زپۆبه‌ی حیزبه‌ کوردستانیه‌کان هه‌بوو.

پ/ له‌ شه‌هاده‌ی مردنی باوکتدا چیان نووسی ؟واته‌ هۆکاری مردنی باوکتیان چۆن یاداشت کردبوو؟

و/ من ئه‌و شه‌هاده‌ی وه‌فاته‌م نه‌بینی و نازانم چیان تیدا نووسی بوو، چونکه‌ دۆسیه‌که‌ تا ئێستاش دانه‌خراوه‌، له‌وه‌ده‌چێت هیچ له‌و باره‌وه‌ نه‌نووسرابێت.

به‌ڵام وه‌ک بۆم ده‌رکه‌وت له‌ ڕاپۆرتی لێکۆڵینه‌وه‌ی کوشتنی باوکمدا نووسره‌ كه‌ کۆمه‌ڵێک ئیسلامی ته‌رۆریستی سۆفی به‌خنکاندن کووشتوویانه‌.هۆکاریش گوایه‌ باوکم هه‌ره‌شه‌بووه‌ بۆسه‌ر سیاسه‌تی ئه‌و گرووپانه‌. ئێمه‌ لای خۆمانه‌وه‌ ئه‌وه‌مان ره‌تکرده‌وه‌و، خۆمان کۆمه‌ڵێک به‌ڵگه‌و دۆکۆمانتمان هه‌یه‌ که‌ له‌ لایه‌ن هه‌ندێک رێکخراوی نیو ده‌وله‌تیه‌وه‌ شیکرونه‌ته‌وه‌ قسه‌یان له‌ باره‌وه‌ کراوه‌و له‌ هه‌ندێک دادگای نێو ده‌وڵه‌تش وه‌ک به‌ڵگه‌ی حاشا نه‌ویست وه‌رگیراون. بۆیه‌ ئێمه‌ بروامان به‌و چیرۆکه‌ی ده‌سه‌لات نیه‌. له‌دیمه‌شق داوایان له‌ من کرد که‌ واژۆی ئه‌و سکاڵایه‌ بکه‌م که‌ ئاماده‌کرابوو دژ به‌و گرووپه‌ ئیسلامیانه‌، منیش واژۆم نه‌کردو وتم پیێان من سکاڵا دژی ماهر ئه‌سه‌د برای به‌شار ئه‌سه‌د تۆمار ده‌که‌م، ئه‌و به‌ تاوانبار ده‌زانم له‌ کوشتنی باوکمدا.

پ/ هوادارم به‌ راشکاوانه‌ وه‌ڵامی ئه‌م پرسیاره‌م بده‌یته‌وه‌، که‌ ده‌ڵی لای شێخ معشوق خاک و نه‌ته‌وه‌ یه‌که‌مه‌ یا ئاین؟ ئه‌م پرسیاره‌م بۆیه‌ کرد چونکه‌ ده‌مێک هه‌مان پرسیار ئاراسته‌ی بڕێکی زۆر له‌ که‌سانی سه‌ر به‌ حیزبه‌ ئیسلامیه‌کان یا سه‌له‌فیه‌کان یا ئه‌و ئیسلامانه‌ی گرنگی به‌ لایه‌نی نه‌ته‌وه‌یی ناده‌ن، به‌ بی سێو دوو زۆربه‌یان ده‌ڵێن ئاین یه‌که‌مه‌.له‌گه‌ڵ ئه‌وه‌شدا خاک و نه‌ته‌وه‌ نه‌گۆڕن به‌ڵام ئاین قابلی گۆڕینه‌، بۆنمونه‌ که‌سێک ئیمڕۆ موسوڵمانه‌ ده‌شی سبه‌ی ببێته‌ کریستیان یا بێئاین، یا هه‌ر ئاینێکی تر، به‌لام نه‌ته‌وه ‌نه‌گۆڕه‌ که‌سێکی کورد تامردن هه‌ر به‌ کوردی ده‌مێنێته‌وه‌، هه‌روه‌ها هه‌مان شت به‌نسبه‌ت که‌سانی سه‌ر به‌ نه‌ته‌وه‌کانی تر.

و/ ڕاسته‌ وایه‌ نه‌ته‌وه‌ نه‌گۆڕه‌ و ئاین ده‌شێ بگۆڕدرێت. به‌لام وابزانم ئه‌م پرسیاره‌ هه‌ڵه‌یه‌کی تیدایه‌.

چۆن؟

 و/ مرۆڤ له‌ نیوان دوو شتی وه‌ک یه‌کدا ئیختیار ناکات، به‌ڵکو له‌نێوان دوو شتی دژ به‌یه‌ک ئیختیار ده‌کات، ئاین و نه‌ته‌وه‌ دووشتی جیاوازن، ده‌توانی له‌ ڕووی ئاینه‌وه‌ پێم بڵێت تۆ موسوڵمانیت یا مه‌سیحیت یا ئه‌زیدی یا هه‌ر ئاینێکی تر، به‌ڵام گه‌ر بمخه‌یته‌ نیوان ئاین و نه‌ته‌وه‌ پێم بڵیت کامیان هه‌ڵده‌بژێریت، وابزانم ئه‌وه‌ جۆرێک له‌ هه‌ڵه‌ی تێدایه‌. من باگراونی پرسیاره‌که‌ت تێده‌گه‌م، ده‌زانم شۆڤێنیه‌کان له‌ لای ئێمه‌ مه‌به‌ستم عه‌ره‌به‌کانه‌، کوردێکی هه‌ژاری ساده‌یان ده‌خسته‌ ئه‌م هه‌ڵویسته‌وه‌ که‌ کامیان بۆ ئه‌و گرنگه‌ ئاین یا نه‌ته‌وه‌که‌ی، دیاره‌ ئه‌ویش نه‌یده‌زانی کامیان هه‌ڵبژێرێت چونکه‌‌ هێنده‌ رۆشنبیر نه‌بووه‌ تا بتوانێت به‌ باشی وه‌لامیان بداته‌وه‌.

من به‌ر له‌ هه‌مووشت کوردم هاواکات موسوڵـمانم که‌ ئه‌مه‌ پێویستی به‌ سه‌لماندن نیه‌، دیاره‌ ئێمه‌ ده‌مێک به‌ ئیسلام ئاشانا بووین که‌ منداڵ بووین، ئه‌وده‌مه‌ باوکانمان فێری قورئان خوێندنیان کردین، به‌ڵام ده‌مێک له‌ زگی دایکماندا بووین چه‌ندین وشه‌ ده‌هاته‌ به‌ر گویمان وه‌ک[ هه‌ره‌ وه‌ره‌ ڕابه‌ ڕوونه‌] ئه‌و وشه‌ کوردیه‌ جوانانه‌مان ده‌بیست ده‌مێک له‌ زکی دایکماندا بووین پاشانیش له‌ باوک و براو دراوسێکانمان ده‌بیستنه‌وه‌.که‌واته‌ من به‌ر له‌ هه‌مووشت کوردم، هه‌روه‌ها موسوڵمانم و هه‌ر وه‌ک چۆن شانازی به‌ کوورد بوونمه‌وه‌ ده‌که‌م هه‌رواش شانازی به‌ئیسلام بوونمه‌وه‌ ده‌که‌م.گه‌ر ئاینه‌که‌م وه‌ک کوردێک منی قه‌بوڵ نه‌بێت من ئه‌و ئیسلامه‌ ره‌ت ده‌که‌مه‌وه‌، هاوکات گه‌ر کوردیه‌تیه‌که‌م وه‌ک موسوڵمانیک منی قه‌بوڵ نه‌بێت دیسان ئه‌و کوردبوونه‌ش ره‌ت ده‌که‌مه‌وه‌، من ناتوانم جیاوازی له‌ نێوانیاندا بکه‌م.

من ناتوانم موسوڵمانێکی کامڵ بم گه‌ر کوردێکی باش نه‌بم، هه‌روه‌ها به‌ پێچه‌وانه‌وه‌، که‌واته‌ دژایه‌تیه‌ک له‌ نێوانیاندا نابینم تا یه‌کێکیان هه‌ڵبژێرم.

من ده‌رک ده‌که‌م و ده‌زانم که‌ ئاینه‌که‌م یاری زۆری پێکراوه‌ له‌لایه‌ن به‌رژه‌وه‌ندیدارن و پۆست دارانه‌وه‌ و ئه‌م ئیسلامه‌یان شێوه‌اندووه‌، به‌ڵام من پێاوێکی کوێر نیم ده‌گه‌ڕێم به‌داوای راستیدا، قورئان ده‌خوێنم، وه‌ده‌زانم پێگه‌ی من وه‌ک کوردێکی موسوڵمان که‌متر نیه‌ له‌ پێگه‌ی عه‌ره‌بێکی موسوڵمان، وه‌ دووباره‌ی ده‌که‌مه‌وه‌ گه‌ر ئه‌م ئیسلامه‌ وه‌ک کوردێک منی قه‌بوڵ نه‌بێت من ئه‌و ئیسلامه‌ ره‌ت ده‌که‌مه‌وه‌.

پ/ بۆ ئێمه‌ی کورد نه‌مانتوانیوه‌ سوود له‌ ئاینی ئیسلام وه‌ربگرین وه‌ک‌ هه‌ندێ نه‌ته‌وه‌ بۆنمونه‌ عره‌ب، تورک فارس؟

و/ سه‌رتا ده‌بی ئه‌وه‌ بزانین که‌ ئیسلام ئاینێکی نێو نه‌ته‌وه‌یه‌، گه‌ر ئیسلام ته‌نها ئاینێکی عه‌ره‌بی بوایه‌و و تایبه‌ت بوایه‌ به‌ عه‌ره‌ب، ئه‌وده‌مه‌ جگه‌ له‌عه‌ره‌ب که‌س سودی لێ نه‌ده‌بینی‌. به‌ڵام له‌به‌ر ئه‌وه‌ی ئاینێکی جیهانیه‌ ده‌بینین نه‌ته‌وه‌کانی تریش سو‌دیان لێ وه‌رگرتوه‌، به‌ ده‌لیل تورک و فارس، تورکه‌کان ده‌وڵه‌تێکیان درووست کرد به‌ ناوی ده‌وڵه‌تی عوسمانیه‌وه‌، یاخود باشتر بڵێم ئیمپراتۆریه‌تی دیکتاتۆریه‌تی تورکی. هه‌روه‌ها فارسه‌کانیش دیکتاتۆریه‌تی فارسیان دروست کرد، ئه‌مانه‌ هه‌مووی له‌ژێر په‌رده‌ی ئیسلامدا درووست بوون و به‌ناوی ئیسلامه‌ حکومیان ده‌کرد. کوردیش پێگه‌ی هه‌یه‌ له‌ ئیسلامدا، به‌ڵام به‌ نسبه‌ت ئێمه‌وه‌ عه‌یبه‌ له‌ ئیسلامدا نیه‌ له‌ خۆماندایه‌ وه‌ک کورد.

چۆن؟

و/ به‌داخه‌وه‌ ئێمه‌ به‌رده‌وام دڵسۆزین ته‌نانه‌ت گه‌ر ئیسلامیش نه‌بین، ده‌مێک بڕوا به‌ ئیسلام دێنین به‌ دڵسۆزی بڕوای پێدێنین، وه‌ ده‌مێکیش باوه‌ڕ به‌ ئه‌زیدی ده‌هێنین دیسان به‌ دڵسۆزی ئیمانی پیده‌هێنین، ده‌مێک باوه‌ڕ به‌ شوعیه‌ت ده‌هێنین دیسان به‌ دڵسۆزیه‌وه‌ باوه‌ڕی پێدێنین وه‌ هه‌موو بیروباوه‌ڕێک هه‌روا.

به‌ڵام عره‌ب تورک فارس ده‌مێک باوه‌ڕیان به‌ ئیسلام هێنا بۆ به‌رژه‌وه‌ندی باوه‌ریان پێهێناو به‌هۆیه‌وه‌ ده‌وڵه‌تیان درووست کرد، ئیـمه‌ش بڕوامان به‌ ئیسلام هێنا به‌ڵام له‌ به‌ر ئه‌وی دڵسۆزبین بۆ ئه‌و ئاینه‌، بوینه‌ پاسه‌وانی ده‌وڵه‌ته‌کانی تر.خه‌ڵک ئیمانی به‌ شوعیه‌ت هێنا به‌ شوعیه‌ت ده‌وڵه‌تیان بیناکرد، به‌ڵام ده‌بینی زۆرێک له‌ کورد بروایان به‌ شوعیه‌ت هێنا پاریزگاریان له‌ ده‌وڵه‌ته‌کانی ئه‌وان ده‌کرد، ئێمه‌ به‌رده‌وام کۆیله‌ی که‌سانی تر بووین، به‌ شوعیه‌ت کۆیله‌بووین و به‌ئیسلام کۆیله‌ بووین و به‌ هه‌موو بیروباوه‌رێ کۆیله‌ بووین.ئێمه‌ دڵسۆزیمان ڕیگه‌ی لێده‌گرتین که‌ ئه‌و ئاین و بیرۆباوه‌ڕانه‌ بۆ به‌رژه‌وه‌ندی خۆمان به‌کار بهێنین، به‌ڵام خه‌ڵکانی تر به‌دووی به‌رژه‌وه‌ندیدا ده‌گه‌را. سه‌یر بکه‌ ئیمڕۆ پتر 22 ده‌وڵه‌تی عه‌ره‌بی هه‌یه‌ هه‌موو شتێک باش ده‌ڕوات، خه‌ڵک هه‌موو بێده‌نگن، دکتاتۆره‌کان سودمه‌ندن، گه‌ڵان چه‌وساوه‌ن، ، به‌ڵام ده‌مێک کورد به‌رامبه‌ر به‌ 22 ده‌وڵه‌تی عه‌ره‌بی دوای ده‌وڵه‌تی سه‌ربه‌خۆی خۆی ده‌کات به‌ دڕندانه‌ترین شیوه‌ دژایه‌تی ده‌کرێت، ده‌ڵێن خێمه‌ی ئیسلامتان سوتان، نازانن که‌ خێمه‌ی ئیسلام خۆیان سوتاندیان و هیچ ڕووینه‌دا، تورک سووتاندی و هیچ ڕووینه‌دا.فارس سوتاندی و هیچ رووینه‌دا، به‌ڵام ده‌مێک کورد دوای مافی خۆی ده‌کات، داوای ژیان ده‌کات، داوای ئه‌وشته‌ ده‌کات که‌ خوا به‌ خشیویه‌تی به‌ مرۆڤ.که‌چی دونیا هه‌ڵده‌گێڕنه‌وه‌‌ و وه‌ک ئه‌وه‌ی گوایه‌ دژایه‌تی ئسلاممان کردبێت.

تۆ سه‌یری جیهانی ئیسلامی بکه‌ هه‌ندێک وڵات هه‌یه‌ وا له‌ خۆی ده‌ڕوانێت که‌ پارێزه‌ری ئیسلامه‌، بۆ نمونه‌ ئێران تورکیاو هه‌ندێک وڵاتی تر. سه‌یر له‌وه‌دایه‌ ملێۆنان دۆلار خه‌رج ده‌که‌ن له‌ بۆ هه‌ندێک نه‌ته‌وه‌ی غه‌یره‌ ئیسلام بۆ ئه‌وه‌ی ببنه‌ ئیسلام که‌چی نه‌ته‌وه‌یه‌کی 40 ملیۆنی وه‌ک کورد پشت گوێ ده‌خه‌ن، با مافی خۆمانمان پێبده‌ن ئێمه‌ ئۆتۆماتیکیه‌ن ئیسلامین. دووباره‌ی ده‌که‌مه‌ به‌داخه‌وه‌ به‌ هۆی دڵسۆزیمانه‌وه‌ سودمان له‌ ئیسلام وه‌رنه‌گرتوه‌.ئه‌مه‌ به‌شێکه‌ له‌ موسیبه‌ته‌که‌مان به‌ڵام به‌شێکی تری لای خۆمانه‌، من زۆر جار نامه‌وێت بیدرکێم یا به‌راشکاوانه‌ بیڵێم، ئه‌ویش بۆ رێزگرتن له‌ هه‌ستی نه‌ته‌وه‌که‌م وه‌ زۆر جاریش شه‌رم دامده‌گرێت و نامه‌وێت بیڵێم یا بۆ جۆره‌ ده‌ربڕینێک ده‌گه‌رێم که‌ نه‌ته‌وه‌کم ئازار نه‌دات ده‌ڵێم [ به‌هۆی ته‌خدیرکردنمانه‌وه‌یه‌.]

پ/دیاره‌ نه‌ته‌وه‌ی کورد مماره‌سه‌ی ئاینی خۆی ده‌کات و وه‌ک به‌رێزیشت ئاماژه‌ت پیدا دڵسۆزه‌ بۆ ئاینه‌که‌ی، ده‌مێک ئه‌م نه‌ته‌وه‌ موسوڵمانه‌ داوای مافی خۆی ده‌کات ئه‌وه‌ ئاشکرایه‌ که‌ عه‌ره‌بی شۆڤێنی چۆن دژایه‌تی ده‌کات، به‌ڵام کێشه‌که‌ له‌وه‌دایه بزاوته‌‌ ئیسلامیه‌ عه‌ره‌به‌کانیش به‌ئه‌ندازه‌ی عه‌ره‌به‌ شۆڤێنیسته‌کان دژایه‌تی ئه‌م داخوازیه‌ ده‌که‌ن ئه‌مه‌ بۆ؟

و/ بێگومان وایه‌، به‌پێی دراسه‌ت و بۆچوونم من باوه‌ڕم به‌ شتێک نیه‌ ناوی ئیسلامی سیاسی بێت.حیزبی سیاسی درۆو هه‌ڵخڵه‌تاندنی خه‌ڵکی ساده‌یه‌‌، گه‌ر باش گوزارشتی لێ بکه‌م ده‌ڵێم ئه‌مه‌ش واته‌ ئیسلامی سیاسی ده‌رزیه‌کی نوێیه‌ بۆ بێهۆشکردنی خه‌ڵک، وه‌ مه‌به‌ست لێی ده‌سکه‌وتی‌ پله‌و پاره‌یه‌یه‌‌.

بۆ نمونه‌ گه‌ر من بڵێم سه‌ر به‌ حیزبی فڵانم چه‌پ ڕاست سه‌ر خوار، ئاسانه‌ خه‌ڵک بڵێت باوه‌ڕت پێناهێنین، به‌ڵام ده‌مێک سوبغه‌یه‌کی ئیسلامی به‌ حیزبه‌که‌م ده‌ده‌م و ده‌ڵێم من فلان حیزبی ئیسلامیم، یانی من پیاوی خوام خه‌لیفه‌ی خوام له‌سه‌ر زه‌وی، ئه‌و ده‌مه‌ زۆر ئاسانه‌ که‌سانی ساده‌و ده‌روێش ئاسا پێم بخڵه‌تێن و ده‌نگیان و پاره‌یان به‌دست بهێنم و زۆر شتی تریش،

جا بۆیه‌ به‌ڕای من ئیسلامی سیاسیش ڕه‌تمانده‌کاته‌وه‌ وه‌ک نه‌ته‌وه‌.

پ/ بۆچی

 و/ چونکه‌ دژی به‌رژه‌وه‌ندیه‌کانیانین.

ئێمه‌ وه‌ک کورد نه‌دژی خوداین نه‌دژی ئیسلامین نه‌ پێغه‌مبه‌ر درودی خوای لێبێت نه‌ دژی قرئانین، به‌ڵام به‌ بێ گومان ئێمه‌، یا با به‌ناوی خۆمه‌وه‌ قسه‌بکه‌م دژی هه‌ر پێاوێکم که‌ خۆی به‌ خه‌لیفه‌ی خوا بزانێت له‌سه‌ر زه‌وی.

بۆ جه‌خت له‌سه‌ر وه‌ڵامه‌که‌ت به‌ڕێز عومه‌ر شێخ غه‌ریب ساڵانێکی زۆر له‌مه‌وبه‌ر له‌ گۆڤاری[ مامۆستای کورد]دا له‌وباره‌وه‌ زنجیره‌ وتارێکی نووسی سه‌باره‌ت به‌ هه‌ڵوێستی دژانه‌ی ئیسلامی سیاسی عه‌ره‌ب.

 

کاک عومه‌ر له‌ و تارانه‌دا ده‌ریخستبوو که‌ ئیسلامی سیاسی عه‌ره‌ب وه‌ک نه‌ته‌وه‌ په‌رسته‌کانی عه‌ره‌ب شوڤێنین به‌تایبه‌تی به‌رامبه‌ر به‌ داخوازیه‌کانی گه‌لی کورد.

ناوی عومه‌ر شێخ غه‌ریبت هێنا‌، من ڕێزو سڵاوم هه‌یه‌ بۆی و هیوادارم باش بێت،

من نمونه‌یه‌کت بۆ ده‌هێنمه‌وه‌، به‌ر له‌وه‌ی ئه‌مه‌ریکا له‌ جه‌نگی که‌نداوی یه‌که‌مدا له‌ عێراق بدات من له‌ سعودیه‌ کارم ده‌کردو په‌یوه‌ندیم له‌ گه‌ڵ هه‌ندێک پیاوی ئاینی و مه‌شایه‌خ هه‌بوو، ئه‌وده‌مه‌ سوپای عیراق کوێتی داگیر کردبوو به‌نیاز بوو سعودیه‌ش داگیر بکات، به‌و پێیه‌ سعودیه‌کان دژی سه‌دام بوون ئیدی به‌رژه‌وه‌ندیه‌کان یه‌کیان گرته‌وه‌و بوونه‌ دۆستی کورد، جا یه‌کێک له‌و شیخانه‌ ببوه‌ هاوه‌ڵم، ده‌مێک ڕێکه‌وتمی ده‌کرد ده‌یوت سڵاو برای کورد وێنه‌ی سه‌لاحه‌دین له‌ تۆدا ده‌بینم، زیاده‌ڕۆی ده‌کرد له‌ پیاهه‌ڵدانمدا. به‌ڵام ده‌مێک بۆش هات و سه‌دامی روخان، هه‌مان شێخ به‌رژه‌وه‌ندی نه‌ما له‌گه‌ڵمد، ا وه‌ک عه‌ره‌بێک قسه‌ی ده‌کرد پێی ده‌وتم شێخ مورشید لام زۆر سه‌یره‌ هه‌م کورد هه‌م موسوڵمان هه‌م شێخ.یانی نه‌ئه‌چووه‌ عه‌قڵیه‌وه‌ چۆن کورد موسوڵمانه‌ یا شێخه‌. جا ئه‌مه‌ نمونه‌یه‌که‌ له‌شۆڤیه‌نه‌تی عه‌ربی موسوڵمان، به‌ڵام بائه‌وش بڵێم که‌ ئێمه‌ ناتوانین گشتگیری بکه‌ین، بێگومان له‌ نیو عه‌ربدا که‌سانی باش هه‌ن که‌ جێگه‌ی ریزن وه‌ له‌ ناو هه‌موو نه‌ته‌وه‌یکدا باش هه‌یه‌و خراپیش هه‌یه‌.

له‌ به‌رامبه‌ردا که‌سانی خراپ هه‌ن که‌ ته‌نانه‌ت ره‌تی بوونت ده‌که‌نه‌وه‌ به‌داخه‌وه‌ ئه‌مانه‌ش‌ هه‌ن.

پ/ که‌واته‌ لێره‌دا به‌رژه‌وه‌ندی شۆڤێنیه‌تی عه‌ره‌ب و ئیسلامی سیاسی عه‌ره‌ب یه‌کده‌گرنه‌وه‌.؟

و/ به‌ڵی وایه‌ بۆیه‌ من وه‌ک خۆم به‌رژه‌وه‌ندی میلله‌تی کورد له‌ودا ده‌بینمه‌وه‌ که‌ وڵاتێ عه‌لمانی پێکبهێنن، نه‌ک ده‌وڵه‌تێک له‌سه‌ر بنه‌مای ئاینی، ئه‌مه‌ش بۆ زامنکردنی مافه‌کانمان، بۆیه‌ گه‌ره‌که‌ به‌ ئاگا بێینه‌وه‌ و چیتر نه‌خله‌تێن که‌ پێشتر چه‌ندین جار خڵه‌تاوین. ده‌مێک من باس له‌ ده‌وڵه‌تی عه‌لمانی ده‌که‌م که‌ بۆ کورد باشه‌، مه‌به‌ستم عه‌لمانیه‌تی ئه‌تاتورک نیه‌ که‌ دژایه‌تی ئاینی ده‌کرد، به‌ڵکو من له‌ گه‌ڵ ئه‌و جۆره‌ ده‌وڵه‌ته‌ عه‌لمانیه‌دام که‌ ئاین له‌ ده‌وڵه‌ت جیا بکرێته‌وه‌ هاوکات ڕیز له‌ ئاینیش بگیرێت و پێگه‌ی خۆی هه‌بێت. من دژی ئه‌و جۆره‌ عه‌لمانیه‌م که‌ دژایه‌تی ئاین بکات.

پ/ بارودۆخی سوریا به‌ره‌و کوێ ده‌ڕوات؟

و/ئێستا واقعی سوریا و به‌تایبه‌ت ڕۆژئاوای کوردستان دوو شتمان بۆ ده‌رده‌خات.یه‌که‌م ئه‌و بزواته‌ سیاسیانه‌ی هه‌ن بزواتی کارتۆنین و ناتوانن هیچ بکه‌ن، بۆنمونه‌ که‌ به‌هاری ساڵی 2004 ئه‌و سه‌رهه‌ڵدانه‌ مه‌زنه‌ روویدا ڕۆڵی ئه‌و حیزبانه‌و به‌رنامه‌و هه‌ڵوێستیانمان بۆ ده‌رکه‌وت که‌ هیچ نه‌بوو، دووه‌م بزووتنه‌وه‌ی گه‌نجانی کورده‌ که‌ ئه‌وان ئیمڕۆ پێشه‌نگی خۆپیشاندانه‌کان ده‌که‌ن.

رۆڵی کورد غائیب نیه‌و مه‌وجوده‌و ده‌وری خۆی ده‌بینێت، وه‌ هاوسۆزو هاوپشتیان له‌ هه‌نده‌ران زۆره‌، که‌ من خۆشحاڵم یه‌کێک بم له‌وانه‌ و شه‌ره‌فه‌ بۆ من له‌ ته‌کیاندا بم و پشتگیریان بکه‌م.به‌ڵام ئه‌وه‌ی غیابه‌ له‌ نیوماندا له‌م کاته‌دا نه‌خۆشیه‌ کۆنه‌ نوێکه‌یه‌، ئه‌ویش یه‌کیه‌تی وته‌باییه‌. کاتی خۆی ئه‌حمه‌دی خانێش وتوویه‌تی گه‌ڵی کورد پاڵه‌وانه‌ میهره‌بانه‌ و چی و چیه، به‌ڵام عه‌یبێکی هه‌یه‌ ئه‌ویش نه‌بوونی یه‌کیه‌تییه‌ له‌ نیوانیاندا. ئه‌م نه‌بوونی یه‌کیه‌تیه‌ تایبه‌ت نیه‌ ته‌نها به‌ پارچه‌یه‌ک به‌ڵکو هه‌موو پارچه‌کان ده‌گرێته‌وه‌. جا به‌داخه‌وه‌ ئه‌م نه‌خۆشیه‌ له‌ ڕۆژئاواش هه‌یه‌و هه‌موو ده‌رکی پێده‌که‌ین و زۆریش له‌ باره‌یه‌وه‌ وتراوه‌و نووسراوه‌، به‌ڵام چاره‌سه‌ر نانووسرێت. چاره‌سه‌ریش هه‌یه‌ به‌ڵام به‌کاری ناهێنین. جا ئه‌حمه‌دی خانێ کاتی خۆی وتوویه‌تی گه‌ر یه‌کیه‌تی له‌ نیوانماندا هه‌بوایه‌ تورک و فارس و عه‌ره‌ب ده‌بوونه‌ کۆیله‌مان. به‌داخه‌وه‌ به‌هۆی نه‌بوونی ئه‌و یه‌کیه‌تیه‌وه‌ ئێمه‌ بووینه‌ته‌ خزمه‌تکارو کۆیله‌ی نه‌ته‌وه‌کانی تر و ئاله‌تێکیش به‌ده‌ستیانه‌وه.‌

 من شتێکت وه‌بیر دێنمه‌وه‌ له‌ هه‌شتاکاندا ده‌مێک ڕووداوه‌کانی باژێری حه‌ما روویاندا له‌ نیوان ئیخوانه‌کان و ڕژێمی به‌عسی سوریدا، هه‌لوێستی کورده‌کان زۆر شه‌رمه‌زاریانه‌بوو، ناڵێم هه‌مووی به‌ڵکو کۆمه‌ڵه‌ خه‌ڵکانیک و چه‌ند لایه‌نێک له‌ کورد، به‌جۆرێک ئیخوانه‌کان نووسیان [کورده‌کان سه‌گی عه‌له‌ویه‌کانن] به‌داخه‌وه‌ واهه‌ست ده‌که‌م بزواته‌ کوردیه‌کانمان ده‌یانه‌وێت هه‌مان ڕۆڵ ببیننه‌وه‌..له‌به‌رامبه‌ردا گه‌نجه‌ کورده‌کانمان له‌باژێره‌کان و شه‌قامه‌کانی قامشلۆ عه‌فرین و باژێره‌کانی تر خۆپێشاندان ده‌که‌ن و هاواکات پشتگیری له‌ سه‌رهه‌ڵدانی شاره‌کانی دیمه‌شق ده‌رعاو حمس و حه‌ما ده‌که‌ن و به‌ تێکراش ره‌تی دانووستان ده‌که‌ن له‌گه‌ڵ ڕژێمدا، که‌چی بزووتنه‌وه ‌سیاسیه‌کان سه‌رده‌هێنن و داوای ده‌ستپێشخه‌ری ده‌که‌ن بۆ چاره‌سه‌ر، هه‌موو له‌سه‌ر ئه‌وه‌ ڕێکه‌وتوون که‌ دانوستان ناکرێت، هه‌موو خۆپیشانده‌ره‌کان له‌ هه‌موو ناوچه‌کاندا یه‌ک درووشمیان به‌رز کردووه‌ته‌وه‌ ئه‌ویش [گه‌ل ڕۆخانی ڕژێمی ده‌وێت]، زۆر سه‌یره‌ که‌ بزافی سیاسی له‌ ڕۆژئاوای کوردستان ده‌ڵین ئه‌مه‌ درووشمی ئێمه‌ نیه‌.

پ/ که‌واته‌ له‌ نیو کورده‌کاندا دوو ره‌وت هه‌یه‌، یه‌کێکیان گه‌نجانی شه‌قامه‌ که‌ روخانی ڕژێمیان ده‌وێت و ئه‌وی دیکه‌ش زۆرێک له‌ حیزبه‌ سیاسیه‌کانه‌ که‌ داوای دانوستان ده‌که‌ن وانیه‌؟

و/ به‌ڵی وایه‌. من هه‌ردوێنی بیستیم که‌چه‌ند بزافێکی سیاسی کوردی که‌ هه‌مویان له‌ ژیر ناوی هیزه‌ سیاسه‌کاندا کۆبوونه‌وه‌ته‌وه‌ ده‌ڵێن تاێستاش درووشمه‌که‌مان هه‌ر کونه‌که‌یه‌ که‌ سه‌رتا له‌ ده‌رعا به‌رزکارایه‌وه‌، [ئازادی ئازادی].

ئه‌وڕۆژه‌ی سه‌رهه‌ڵدانه‌کان ده‌ستی پێکرد به‌شارئه‌سه‌د بانگهێشتی لایه‌نه‌کوردیه‌کانی کرد، هه‌ر هه‌مان کات گه‌نجه‌کانمان به‌ یاننامه‌یه‌کیان ده‌رکرد و تێدا نووسیبویان هه‌رکه‌سێک بچێت بۆ بینیی به‌شار ئه‌سه‌د‌ ناپاکه‌ به‌ گه‌ل و به‌ دۆزه‌که‌ی و له‌ ئێمه‌ نیه‌.

 نوێنه‌ری لایه‌ن سیاسیه‌کان له‌ جه‌زیره‌ وتیان ده‌چین بۆ بینی به‌شار ئه‌سه‌د، به‌ڵام ده‌مێک ئه‌و هه‌ڵوێسته‌ توونده‌ی گه‌نجانیان بینی پاشگه‌ز بوونه‌وه‌ له‌ بینی به‌سار ئه‌سه‌د.

پ/ به‌ڕێزت بۆ چی ده‌گه‌ڕینیته‌ هۆکاری به‌کار نه‌هێنانی تووندووتیژی و کوشتن له‌لایه‌ن ڕژێمی سوریاوه‌ به‌رامبه‌ر به‌کورده‌کان، وه‌ک چۆن به‌رامبه‌ر به‌ عه‌ره‌به‌کان به‌کاری ده‌هێنێت؟

و/ ڕژێمی سوری گه‌مژه‌ و بیئاگا نیه‌، به‌شار ئه‌سه‌د باشتر ده‌ڤه‌ره‌کوردیه‌کان ده‌ناسێت، و له‌ 2004 دا تاقیکرده‌وه‌ ده‌زانێت په‌رچه‌کرداری کورد چۆن ده‌بێت. گه‌ر دڵپۆپێک خوێن له‌ قامشلۆ یا عه‌فرین یا عامودا یا هه‌ر باژێڕێکی کوردی بڕژێت ده‌زانێت چی رووده‌دات، هه‌موو ڕۆژئاوای کوردستان هه‌ڵده‌سنه‌وه‌. له‌ 2004 دا ده‌مێک هه‌ندێک عه‌ره‌ب به‌ سوومبووڵه‌کانی ئێمه‌یان وت ناپاک، هه‌ڵساینه‌وه‌و 40 شه‌هیدمان دا، جا گه‌ر مه‌سه‌له‌که‌ په‌یوندی به‌ کوژرانی خه‌ڵک و مافمانه‌وه‌ هه‌بێت ده‌بێ چۆن بێت؟ جا بۆیه‌ ڕژێم هه‌وڵده‌دات دوورکه‌وێته‌وه‌ له‌ تووندوتیژی و ناخوازێت به‌ره‌نگاری گه‌نجانمان ببێته‌وه‌.

پ/ چاره‌نووسی ڕژێمی سوریا به‌ره‌وکوی ده‌چێت، ئایا به‌رگه‌ی ئه‌م وه‌شاندنانه‌‌ ده‌گرێت و به‌ چه‌ند چاکسازیه‌کی ڕووکه‌شی ده‌رباز ده‌بێت، یا چاره‌نووسی وه‌ک ڕژێمه‌کانی میسر و تونس ده‌بێت؟

و/چاره‌نووسی به‌شار ئه‌وه‌یه‌ که‌ له‌سه‌ر ئه‌و کورسیه‌ بێته‌ خواره‌وه‌ که‌ خۆیی و باوکی پتر له‌ 40 ساله‌ له‌سه‌ری دانیشتوون.ئه‌مه‌ مناقه‌شه‌ی تێدا نیه‌. دۆخه‌که‌ له‌ گه‌ڵ سه‌ره‌تا جیاوازه‌، ئه‌وده‌مه‌ گه‌نجه‌کان ته‌نها داوی ئازادیان ده‌کرد، به‌ڵام که‌ رژێمی سوریا بۆ وه‌ڵامدانه‌وه‌ی ئه‌و داخوازیه‌ ساده‌یه‌ به‌دڕندانه‌ترین شێوه‌ لێیان ده‌دات ئیدی هیچ بوارێک بۆ مانه‌وه‌ی نه‌ماوه‌، ئه‌وده‌مه‌ به‌شار ده‌یتوانی چاره‌سه‌ری بکات و ڕێگه‌نه‌دات بگاته‌ خوێن ڕشتن. پاش نه‌مانی رژێمی میسرو تونس و لاوازبوونی یه‌مه‌ن و لیبیا، له‌م دۆخه‌دا به‌شار ئه‌سه‌د خۆی بوه‌ هۆکاری هه‌ڵگیرسانی شوڕش.

له‌وانیه‌ زۆر که‌س ده‌رک به‌م ڕاستیه‌ نه‌که‌ن. ئه‌وه‌ی ده‌ستی به‌ شۆڕش کرد له‌ سوریا گه‌لی سوریا نه‌بوو به‌ڵکو خودی به‌شار ئه‌سه‌د بوو. ئه‌ویش له‌وه‌وه‌ سه‌ری هه‌ڵدا که‌ هندێک منداڵیان له‌ ده‌رعا ده‌ستگیرکرد که‌ ته‌مه‌نیان له‌ 10 ساڵ تێپه‌ڕی نه‌ده‌کرد، ده‌یتوانی چاوپۆشیان لێبکات مه‌ره‌خه‌سیان بکات، به‌ڵام گه‌مژه‌یی وای لێکرد که‌ ئه‌و کاره‌ نه‌کات، ئه‌وه‌بوو منداڵه‌کان ئه‌شکه‌نجه‌دران و که‌سوکاریشیان ئه‌و کاره‌یان قه‌بوڵ نه‌کردو به‌و جۆره‌ بڵیسه‌ی خۆپیشاندان هه‌ڵگیرسا. که‌واته‌ له‌ گرتنی سی چوار منداڵه‌وه‌ خۆپیشاندان ده‌ستی پیکرد و ئێستا 2000 شه‌هید و پتر له‌ 10 هه‌زار په‌نابه‌ر و هه‌زاره‌ها گیراو هه‌ن و جگه‌ له‌ کاولکرای و شتی تریش، که‌واته‌ ڕژێمی سوریا هه‌رده‌بێت بڕوات، گه‌ر ئه‌مه‌ریکا ویستی بمێنێته‌وه‌، گه‌ر ئیسرائیل ویستی بمێنێته‌وه‌، گه‌ر وڵاتانی ده‌ڤه‌ره‌که‌ ویستیان بمێنێته‌وه‌، گه‌ل نایه‌وێت بمێنێته‌وه‌ و هه‌ر ده‌بێ بروات، چونکه‌ مانه‌وه‌ی به‌شار ئه‌سه‌د یانی تۆڵه‌ سه‌ندنه‌وه‌ له‌ گه‌ل. من له‌و بڕوایه‌دام گه‌لی سوری هه‌رچی هه‌یه‌ ده‌یبه‌خشێت بۆ ئه‌وه‌ی جارێکی تر ملی خۆی نه‌خاته‌ به‌رده‌ستی ئه‌و جه‌لاده‌ی که‌ خۆیان درووستیان کرد.

 چ خۆی چ پێشتر باوکی له‌ زکی دایکیانه‌وه‌ نه‌بوونه‌ دکتاتۆر به‌ڵکو ئێمه به‌دستی خۆمان درووستمان کردن به‌ بێده‌نگیمان، به‌ چاوپۆشیمان درووستمان کردن.

پ/ به‌ر له‌ ماوه‌یه‌ک له‌ باژێری ئه‌نتالیا له‌ تورکیا زۆرێک له‌ لایه‌نه‌ ئۆپۆزسێنه‌کانی سوریا گۆنگره‌یه‌کیان به‌ناوی کۆنگره‌ی ئۆپۆزشێۆن گرێدا. وه‌ک ده‌رکه‌وت ژماره‌یه‌کی به‌رچاویش له‌ نوێنه‌ری لایه‌نه‌که‌ن و هه‌م وه‌ک که‌سایه‌تی کورد ئاامده‌بوون، کورد چ جۆره‌ چاوه‌روانیه‌ک له‌م جۆره‌ کۆنگرانه‌ ده‌کات؟

و/ گۆنگره‌که‌ له‌سه‌رتای مانگی حوزه‌یراندا به‌سترا، من به‌ شه‌خسی ئاماده‌نه‌بووم به‌ڵام براکه‌م شێخ موراد خه‌زنه‌ه‌ی به‌ناوی دامه‌زراوه‌که‌مانه‌وه‌ ئاماده‌بوو که‌ خودی خۆی سه‌رۆکیه‌تی، [دامه‌زراوه‌ی شێخی شه‌هید، شیخ محه‌مه‌د معشوق خه‌زنه‌وه‌ی بۆ دیالۆگ و لێبوردن و نوێکردنه‌وه‌ی ئاین]له‌وێ به‌ ناوی دامه‌زراوه‌که‌مانه‌وه‌ وتارێ خوێنده‌وه‌ که‌ تێیدا چه‌ند هێڵێکی کاری ده‌ستنیشان کردبوو، ڕاسته‌ کوردی تریش ئاماده‌بوون که‌ نزیکه‌ی 70 که‌س ده‌بوون، له‌ نێوانیاندا نوێنه‌رانی هه‌ندێک حیزب که‌سانی سه‌ربه‌خۆ.ئێمه‌ له‌سیاسه‌تدا غه‌شیم نین بۆیه‌ ده‌ه‌ڵێم سودی ئه‌م جۆره‌ کۆنگرانه‌ بۆ یه‌کبینین و یه‌کتر ناسینه‌، بۆ گه‌ڕانه‌وه‌ی ئه‌و متمانه‌یه‌ له‌ نیوان کودو عه‌ره‌بدا یا کوردو که‌سانی تر که‌ پێشتر نه‌بوو، جا ئه‌م دیالۆگانه‌ ئه‌م کۆنگرانه‌ بۆچوونه‌کان له‌یه‌کتر نزیک ده‌کاته‌وه‌ تۆووی متمانه‌ له‌ نیوان خه‌ڵکه‌کاندا ده‌چینێت وله‌‌ قۆناغی ئێستادا ڕێزه‌کان یه‌کده‌خات، به‌ڵام گه‌ر رژێم ڕوخا ئه‌وده‌مه‌ عه‌ره‌ب واته‌نی{بۆ هه‌ر ڕوداوێک قسه‌یه‌ک ده‌بێت}.

 له‌وی لیژنه‌یه‌کی سه‌رکردایه‌تی بۆ کۆنگره‌که‌ له‌ 31 که‌س هه‌ڵبژێردرا، هه‌ر له‌و لیژنه‌یه‌ش لیژنه‌یه‌کی باڵای له‌ 11 که‌س هه‌ڵبژارد، له‌سه‌ر ئه‌وه‌ ڕیکه‌وتن که‌ پشتگیری شۆڕشی ناوه‌وه‌ بکه‌ن، ده‌نگی شۆڕش بگه‌یه‌ننه‌ په‌رله‌مانه‌کانی ئه‌ورپاو دامه‌زراوه‌ جیهان.

 وه‌ک پێشتر وتم ئیمه‌ ئه‌م کاره‌مان بۆ ئه‌م قۆناغه‌ کردووه‌، دیاره‌ پاش که‌وتنی رژیم شته‌کان به‌ جۆرێکی ترده‌بن. له‌ کۆنگره‌که‌دا کورده‌کان وه‌ک گروپێک به‌دسته‌ جه‌معی ئه‌وه‌یان له‌ به‌یننامه‌ی کۆتایدا جێگیر کرد که‌ سوریا له‌ دوو نه‌ته‌وه‌ پێک هاتووه‌ ئه‌ویش کوردو عه‌ره‌به‌.ئێمه‌ له‌وێ داوای ده‌وڵه‌تێکی عه‌لمانیان کرد به‌ڵام گفتووگۆی زۆر له‌ نیوان ئێمه‌و و ئیخوانه‌کاندا له‌و ڕوه‌وه‌ درووست بوو، له‌وباره‌و زۆر وترا، له‌ کۆتایدا له‌سه‌ر چاره‌سه‌رێکی مامناوه‌ند ڕێکه‌وتین، که‌ ده‌وڵه‌تێکی مه‌ده‌نی پێک بهێنرێت.

ئێمه‌ ده‌زانین که‌سانی باش و ڕێک وپێک هه‌ن که‌ له‌گه‌ڵ ئێمه‌و مافه‌کانماندان، هاواکات ده‌زانین که‌سانی واش هه‌ن که‌ هه‌رڕۆژه‌ی له‌ به‌رگێکدا خۆیان ده‌نوێنێت، جا له‌ ئاینده‌دا جه‌ولاتمان له‌گه‌ڵ ئه‌و جۆره‌ که‌سانه‌دا ده‌بێت.

پ/ ترستان له‌ ئیخوانه‌کان نیه‌‌ بۆ وه‌رگرتنی ده‌سه‌ڵات؟

و/ نا

پ/ بۆ نا

و/ له‌به‌ر ئه‌وه‌ی ئێمه‌ی گه‌لی کورد بڕیاری خۆمان هه‌یه‌.

پ/ ئاخر ئه‌وان گه‌ر ده‌سه‌ڵات وه‌ربگرن به‌ ناوی ئاین و خواوه‌ حکوم ده‌که‌ن به‌رهه‌ڵستکردنیان ئه‌سته‌م ده‌بێت.

و/ بۆ یه‌کێکی ساده‌ یا ده‌روێشك یا هیچ نه‌زانێک زه‌حمه‌ته‌، به‌ڵام بۆ مرۆڤی به‌توانا و ئاقل و تێگه‌شتوو عالم زه‌حمه‌ت نیه، خوا شتێکه‌ ئیسلام شتێکه‌و حیزبه‌ ئیسلامیه‌کانیش شتێکی ترن.

پ/ په‌یوندیت له‌گه‌ڵ حیزبه‌ کوردیه‌کان له‌ هه‌موو پارچه‌کانی کوردستان چۆنه‌؟

په‌یوه‌ندیم هه‌یه‌ له‌گه‌ڵیاندا، هه‌یه‌ باشه‌ هه‌یه‌ زۆر باشه‌ هه‌یه‌ خراپه‌ هه‌یه‌ زۆر خراپه‌.

ئه‌مه‌ش ده‌گه‌رێته‌وه‌ بۆئه‌وه‌ی کوردستان گه‌وره‌یه‌و حیزبی زۆری تێدایه‌، ته‌نها له‌ رۆژئاوا 15 حیزبمان هه‌یه‌ ئینجا وه‌ره‌ سه‌یری هه‌نده‌رانیش بکه‌ هێنده‌ی تری لێیه‌، پاشان باشورو باکوریش که‌ له‌ کۆتایدا ده‌کاته‌ ژماره‌یه‌کی زۆر له‌ حیزب.

ته‌نانه‌ت ئه‌و حیزبانه‌ش که‌ من به‌ نه‌یاری خۆمیان ده‌زانم، دژی که‌سه‌کانیان نینم، دژی بیروباوه‌ری حیزبیان نیم به‌ڵکو دژی ته‌مبه‌ڵیانم. من به‌دوای پۆست و حیزبدا ناگه‌رێم وحیزبیش پێک ناهێنم، من پشتگیری له‌ هه‌ر حیزبێکی کوردستانی ده‌که‌م، گه‌ر حیزبێک کار بۆ به‌رژه‌ووه‌ندی کوردو کوردستان بکات من سه‌ربازی ئه‌وم، به‌ڵام حیزبێک دروشمێکی گه‌وره‌ به‌رز بکاته‌وه‌و له‌ ماڵه‌وه‌ دابنیشێت بێگومان من به‌رده‌وام دژی ده‌بم.

پ/ سه‌ردانی باشووری کوردستانت کردووه‌؟

و/ نه‌خێر سه‌ردانم نه‌کردوه‌ ئیشائه‌ڵا گه‌ر بارودۆخ گونجا له‌ ئاینده‌دا سه‌ردان ده‌که‌م، ده‌مێک له‌ وڵات بووم له‌ رووی ئه‌منیه‌وه‌ زه‌حمه‌ت بوو بۆم ئه‌و کاره‌ بکه‌م، ده‌مێکیش هاتمه‌ ده‌ره‌وه‌ به‌ هۆی سه‌رقاڵیمه‌وه‌ نه‌مپه‌رژاوه‌، ته‌نانه‌ت هاوسه‌رکه‌شم گله‌یم لێده‌کات که‌ کاتم نیه‌ بۆیان، به‌لام ئینشائه‌ڵا ئه‌و سه‌ردانه‌ هه‌ر ئه‌نجام ده‌ده‌م و هیوادارم بتوانم به‌وکاره‌ هه‌ستم.

پ/ ئامۆژگاتیت بۆ گه‌نجه‌کانمان...

و/ من ئامۆژگاریان ناکه‌م به‌ڵکو داوایه‌کی برایانه‌م هه‌یه‌ لێیان بۆ ئه‌وان و بۆ هه‌مو گه‌نجانی کوردستانی، پێیان ده‌ڵێم ئاینه‌که‌تان و ئیمانتان ته‌وا نابێت گه‌ر کوردێکی دڵسۆز نه‌بن، واته‌ گه‌ر ئه‌رکه‌ کوردایه‌تیه‌که‌ت پشتگوی خست ئه‌وده‌مه‌ ئیماندارێکی لاواز ده‌بیت، حه‌دیسێک هه‌یه‌ ‌ده‌ڵێت[ ئیماندارێکی به‌هێز باشتره‌ له‌ یه‌کێکی لاواز]، ئه‌مه‌ بنه‌مایه‌کی سه‌ره‌کیه‌.

ته‌نها درزێک که‌ هه‌موو دوژمنێک ده‌توانێت لێوه‌ دزه‌بکاته‌ ناوامان، درزی نه‌بوونی یه‌کیه‌تی و ته‌بایی و خۆشه‌ویستیه‌ له‌ نیوانماندا.

بێگومان ئێمه‌ هه‌موو جیوازیمان هه‌یه‌، هه‌رکه‌س له‌ ئێمه‌ تێرواننی خۆی هه‌یه‌ بۆ گه‌شتن به‌ ئامانجه‌ گه‌و‌ره‌که‌، که‌ کوردستانی پیرۆزه‌، ده‌بێ بۆ گه‌شتن به‌و ئامانجه‌ له‌سه‌ر خاڵه‌ بنه‌ره‌تیه‌کان‌ ڕێبکه‌وین.

ده‌مێک خوێندکار بووم له‌ په‌یمانگای شه‌رعی جاروبار نامیلکه‌یه‌کیان بۆ ده‌هێناین به‌ ناوی [پرۆتۆکۆلی حاکمه‌کانی سه‌هێون] ‌تێدا ده‌مانخوێنده‌وه‌ که‌ چۆن حاکمه‌کانی به‌نی ئیسرایل و سه‌هیۆن کۆده‌بوونه‌وه‌ ڕێکده‌که‌وتن له‌ سه‌ر دانانی پلانی نزیک و دوور، که‌ ده‌بینین تا ڕۆژی ئه‌مڕۆش له‌سه‌ر ئه‌و پلانه‌ ده‌ڕۆن.

.جا زۆر جار داومکردوه‌ و وتوومه‌ و له‌ نووسینه‌کانیشما ئاماژه‌م پێ‌داوه که‌ ئێمه‌ی کوردیش پیویستمان به‌ نامیلکه‌یه‌که‌ به‌ نێوی[ پرۆتۆکۆلی سه‌رکرده‌کانی کورد].

له‌مه‌دا نه‌نگی نیه‌ گه‌ر سود له‌ ئه‌زمونی جوه‌کان وه‌ربگرین.

پ/ به‌ریزت له‌گه‌ڵ مافی چاره‌نووسی گه‌لی کوردیت به‌ پێکهێنانی ده‌وڵه‌تی کوردیه‌وه‌؟

‌و/ له‌گه‌ڵ ئه‌وه‌دام خۆم هاوسه‌ره‌که‌م مناڵه‌کانم له‌ سه‌ر خاکی کوردستانی پیرۆز بژین که‌ له‌ سایه‌یدا ئاڵای کوردستان بشه‌کێته‌وه و تیدا تاکی کورد ئازاد بێت.

ئیداره‌ی خۆجێی و ئه‌وتۆنۆمی و فیدارالی و کۆنفدراڵی ئه‌مانه‌ به‌نسه‌به‌ت منه‌وه‌ که‌من، به‌ڵام من که‌سێکم تێگه‌شتنم بۆ واقیعه‌که‌ هه‌یه‌ و له‌ ده‌ره‌وی گه‌ردوون ناژیم یا له‌ دارستان، ده‌زانین که‌ شتێک هه‌یه‌ ده‌ڵێ سیاسه‌ت هونه‌ری مومکیناته‌، کوردستانی گه‌وره‌ له‌ و ده‌ڵ ویژدانماندا ده‌ژی و گه‌شتن پێی ئامانجی به‌رده‌واممانه‌، جا بۆگه‌شتن به‌و ئامانجه‌ له‌وانیه‌ له‌ ڕێگه‌دا به‌ که‌متر له‌وه‌ رازی ببین تا هه‌نگاوه‌کانمانی له‌سه‌ر بونیاد بنێن، وه‌من به‌وه‌ قایل نابم که‌ ده‌سکه‌وتی که‌متر ببێته‌ شتێکی چه‌سپاو، ده‌بێ هه‌نگاوه‌کانمان بۆ شتی گه‌وره‌ترو گرنگ تربێت تا ده‌گه‌ینه‌ ئامانجی کۆتایی.

پ/ به‌پیی روداو گۆرانکاریه‌کانی ده‌ڤه‌ره‌که‌و رۆژهه‌ڵاتی نیوین، دۆزی کورد به‌ کوێ ده‌گات ؟

و/ من وا هه‌ست ده‌که‌م به‌ره‌و ویرانه‌ ده‌ڕوات.

پ/ چۆن؟

و/خه‌ڵک گۆمه‌ڵگاکان ولاتان به‌دووی به‌رژه‌وه‌ندیدا ده‌گه‌رین، جا به‌ بۆچوونی من ئه‌و به‌رژه‌وه‌ندیانه‌ له‌ کن ئێمه‌ ده‌ست ناکه‌ون، به‌داخه‌وه‌ ئێمه‌ی کورد هیچمان بینا نه‌کردووه‌ و شتێکی واشمان به‌ده‌سته‌وه‌ نیه‌ که‌ کاسانی تر بۆی بگه‌ڕێن. ئه‌وه‌ی ئه‌وان بۆی ده‌گه‌ڕین لای ئێمه‌ نین، له‌یه‌زدان ده‌پاریمه‌وه‌ که‌ پلانی دوژمنه‌کانمان شکست پێ بهێنێت. من ترسم هه‌یه‌ هاواکات گه‌شبینیشم به‌ نه‌ته‌وه‌که‌م وبه‌ گه‌نجه‌کانی، به‌ڵام به‌ پێی سیاسه‌تی جیهانی من وه‌ک پیاوێکی کوردی ساده‌ وا هه‌ست ده‌که‌م ئێمه‌ گرنک نین بۆ لایه‌نه‌ کاریگه‌ره‌کان، له‌وانه‌یه‌ جاروبار مجامه‌له‌مان بکه‌ن، ئه‌مه‌ش له‌ به‌سه‌رهاته‌که‌ی فه‌ره‌زده‌ق ده‌چێت، ده‌مێک فه‌ره‌زده‌ق به‌ڕێگاوه‌ ده‌بێت بۆ کوفه‌ حسینی کوری علی ده‌یبینێ، حسین پرسیار له‌ فه‌ره‌زده‌ق ده‌کاو ده‌پرسی [ چۆن خه‌ڵکی عێراقت بینی؟]، له‌وه‌ڵامدا فه‌ره‌زده‌ق وتی[ بینیمن دڵیان له‌ لاته‌ به‌ڵام شمشێره‌که‌شیان له‌سه‌رته‌] جا له‌وانه‌یه‌ ئه‌وانه‌ی مجامه‌له‌مان ده‌که‌ن زۆر جار هه‌ڵمان بخڵه‌تێنن، لێ له‌ کۆتایدا به‌رژه‌وه‌ندی حه‌که‌مه‌. جا گه‌ر به‌رژه‌وه‌ندیان لامان نه‌بێت بیگومان شمشێره‌کانیان له‌سه‌ر ملمان ده‌بێت.

پ/ ئه‌ی خۆمان وه‌ک کورد وه‌ک حه‌حزاب وه‌ک سه‌رکرده‌ فرسه‌تی زۆر مان له‌ده‌ست نه‌داوه‌؟

و/ بیگومان له‌ده‌ستمان داوه‌، هیوادارم چیتر فرسه‌ت له‌ده‌ست نه‌ده‌ین، هیوادارم ده‌رک به‌ وه‌ بکه‌ین‌، داواکارم سه‌رکرده‌کانمان دانیشن و به‌خۆیاندا بێنه‌وه‌، من واهه‌ست ده‌که‌م سیاسه‌تی هه‌ندێک له‌ حیزبه‌کانمان ئه‌و مه‌سه‌له‌ کوردیه‌ ده‌یانگرێته‌وه‌ که‌ ده‌ڵێت { ئاشی نه‌زان خوا ده‌یگێڕیت} به‌داخه‌وه‌ عه‌قڵ و مه‌نتیق نایبات به‌ڕیوه‌.گه‌ره‌که‌ دابنیشن و پلان و به‌رنامه‌ دابنێن و بیر له‌ ئاینده‌ بکه‌نه‌وه‌.

من تمانه‌م به‌ پیاوه‌کانمان به‌ سه‌رکرده‌کانمان به‌ پیاوانی کورد هه‌یه‌، به‌ڵام هیواخوازم به‌خۆیاندا بچنه‌وه‌، ئێمه‌ فرسه‌تی زۆرمان له‌دست داوه‌ و هه‌ڵه‌ی زۆریشمان کردووه‌ که‌ نه‌ده‌بوو رووبده‌ن، ئومێده‌ورام ده‌رکی پێبکه‌ن ئینشائه‌ڵا هه‌ر واده‌بێت.

تێبینی/

+ ئه‌م دیداره‌ له‌ ناوه‌ڕاستی مانگی ته‌موزدا ئه‌نجامدراوه‌ به‌مه‌به‌ستی په‌خشکردنی له‌ ته‌له‌فزیۆندا.

+به‌هۆی دواکه‌وتنی مونتاجکردنیه‌وه‌، په‌خشکردنیشی دواکه‌وت، ئه‌وبوو له‌ ڕۆژانی جه‌ژنی ره‌مه‌زاندا له‌ که‌ناڵی ئاسمانی که‌ی ئێن ئێن په‌خشکرا.

+به‌ پێویستم زانی که‌ هه‌مان دیدار بخه‌مه‌ به‌ر دیدی خوێنه‌رانی به‌ڕێزیش.

 


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.