Red Purple Black

هەڵۆ ئەحمەد كوردە، بەرپرسی لقی 4ی (پ.د.ك) لە سلێمانی: هێزێك نییە لەسەر ئەم كەونە بارەگای لق بە ئێمە چۆڵ بكات ... دیمانە: فەرەیدون بێوار، سلێمانی

PDFPrintE-mail

·     ئۆپۆزسیۆن لە هەندێك هەڵوێستدا سیاسەتێكی دروستیان نەبووە بەرامبەر بە خۆشیان و واقیعەكەش، ئێستا پەلەقاژەی ئەوەیانە چۆن خۆیان رزگار بكەن

·          گۆڤاری لڤین و زۆریتری وەك لڤین، جێگەی باوەڕ نەماون

·          ئۆپۆزسیۆن هەموو هەوڵێكی خۆیدا، هەر ئەوەندەی پێكراوە و لەوەش زێتری پێناكرێت

 

پ: ئەو گۆڕانكاریانەی كە پارتی دەیكات بەتایبەتی لەسلێمانی، ئایا بەپێی بەرژەوەندییەكانی حزبە، یان بەپێی پێداویستییەكانی خەڵكە؟

و: تائێستا گۆڕانكارییەكی ئەوتۆ لە سلێمانی نەكراوە. تەنیا كاك هیوا ئەحمەد كە لێرە بەرپرسی لقی چوار بووە گوازراوەتەوە و من هاتوومەتە جێگەكەی، ئەمەش شتێكی سروشتییە، تەنانەت پێش كۆنگرەش بڕیار هەبوو ئاڵ و گۆڕ لە بەرپرسی لقەكان بكرێت، بە گوێرەی بەرژەوەندی و خواستی حزب، هەڵەبەت حیساب بۆ خواستی خەڵكیش دەكرێت.

 

پ: وا تێبینی دەكرێت كە ئەنجوومەنی سەركردایەتی پارێزگاكان قۆرخی دەسەڵاتی لقەكانی كردووە، بەو مانایەی لقەكان دەبێ بۆ هەر بڕیارێك بگەڕێنە بۆ ئەنجومەنی سەركردایەتی پارێزگاكەیان؟

و: كۆنگرە بڕیاری لەسەر ئەنجومەنی سەركردایەتی پارێزگاكان داوە و جێبەجێش دەكرێت. تا ئێستا ئەنجومەنی سەركردایەتی پارێزگاكان بە كردەیی بە قۆڵایی نەكەوتۆتە ناو ئیشەوە، چونكە هێشتا هەندێك پێداویستییان ماوە، بۆیە دەرنەكەوتووە تا ئەو رادەیەی بزانین ئایا دەبێ بە گرفت بۆ لقەكان یاخود نا.

مەبەستی حزب و كۆنگرە لەم ئەنجومەنانە ئەوە بووە كە جۆرێك لە لامەركەزی هەبێ بۆ ئەنجومەنی سەركردایەتی پارێزگاكان و دەسەڵاتیان هەبێ، بۆ ئەوەی چیتر لقەكان نەگڕێنەوە بۆ مەكتەبی سیاسی، بەڵكو لەو ئەنجومەنانە ئیشەكانیان رایی بكرێت.

 

پ: لە نزیك گوندی (كانی بەردینە) كۆمەڵێك زەوی خەت خەتكراون كە پێیان دەوترێت زەوییەكانی پارتی، گوایە پارتی ئەو زەویانەی كڕیوە و بەنیازە بیاندات بە لایەنگرانی خۆی، بە تایبەتی كەس و كاری شەهیدان؟

و: ئەوە راست نییە و پەیوەندی بە پارتییەوە نییە.

 

پ: هێشتا یەكلایی نەبۆتەوە ئایا بارەگای لقی چوار هی پارتییە یاخود مۆڵكی گشتییە؟

و: بارەگای لقی چوار پێشتر موڵكی قادر ئاغا بووە، كە لە ساڵی 1970 پێشكەشی كردووە بە بارزانی نەمر. دوای ئەوەی كە نێوانی شۆڕش و حكومەت تێكچوو، پارتی چۆتەوە شاخ، دوای پلانی جەزائیر كە نوشستی بەسەر شۆڕشی كورددا هات، زەوییەكە بە بەتاڵی ماوەتەوە. دواتر كە بەعس هاتۆتەوە سلێمانی زەوییەكەی لەو ماڵە سەندووە و بینایەی لەسەر بەشێكی زەوییەكە دروست كردووە. دوای ساڵی 1994، لەكاتی شەڕی ناوخۆ، برادەرانی یەكێتی نیشتمانی كوردستان هاتوون زەوییەكەیان كردووە بەناوی وەزارەتی داراییەوە، بەڵام لە ئەسڵدا هی پارتی بووە، بەڵام بەعس ئاڵ و گۆڕی بەسەر بەڵگە و تاپۆكاندا هێناوە، ئێستا لە دیراسە كردندایە بۆ چارەسەر كردن.

 

پ: بە پێی سەرچاوە رۆژنامەوانییەكان مام جەلال و كاك مەسعود لە پەیوەندییەكی تەلەفونیدا ریكەوتوون لەسەر وەرگرتنەوەی پۆستی سەرۆكی حكومەت لە لایەن پارتییەوە و پێدانی جێگری سەرۆكی هەرێم و سەرۆكی پەرلەمان و جێگری سەرۆكوەزیرانی عێراق بۆ یەكێتی؟

و: شتی وام نەبیستووە.

 

پ: ئۆپۆزسیۆن بایكۆتی دانیشتنەكانی بەستۆتەوە بە جێبەجێكردنی چوار مەرج، پرسیارەكە ئەوەیە بۆچی یەكێتی و پارتی بە فێعلی چاكسازی ناكەن و داخوازییەكانی شەقام و ئۆپۆزسیۆن جێبەجێ ناكەن؟

 و: كەس لەپێش جەنابی سەرۆكەوە باسی چاكسازی نەكردووە، بەرلەوەی ئۆپۆزسیۆن باسی چاكسازی بكات جەنابی سەرۆك دەستی پێكردووە و ئێستاش بەردەوامە. بەر لە پرۆژەكەی ئۆپۆزسیۆنیش ئێمە پرۆژەمان هەبووە، چاكسازی لە هەولێر زۆر كراوە و لە سلێمانیش بەدەستەوەیە.

چاكسازی پرۆسەیەك نییە و بە دوو سێ رۆژێك تەواو بێت، بەڵكو پرۆسەیەكی بەردەوامە و چەندین لیژنەی بۆ دانراوە و لە هەموو بوارەكاندا چاكسازی دەكرێت.

 

پ: ئەو رەخنەیە لە سەرۆكی هەرێم دەگیرێت كە دەبا چاكسازی لە كەسە گەورەكانەوە دەست پێكردبا بەتایبەتی لە ئەندامانی سەركردایەتی حزبەكەی و كەسە نزیكەكانی خۆی؟

و: ئەم وڵاتە تەنیا لە پارتی پێكنەهاتووە، بەڵكو لە دەیان حزب و رێكخراو و سەركردەی تر پێكهاتووە، هەمووشیان بەشێوازێك لە شێوەكان قسەیان لەسەر هەیە، جا تاچەند ئەوە راستە یان راست نییە ئەوە داویی دەركەوێت، ئێمەش وەكو پارتی بەشێكمان بەردەكەوێت. ئەو بەشەی كە بەر ئێمە كەوتووە چاكسازیمان تێدا كردووە، باشترین نموونە كۆنگرەیە.

 

پ: بەپێی بەڵگەنامە رۆژنامەوانییەكان نزیكەی (4) هەزار مامۆستای ئایینی لە سلێمانی، بەناوی جۆراوجۆرەوە موچە لە پارتی بەتایبەتی لقی چوار وەردەگرن؟

و: شتی وانییە، حەز دەكەم هەموو رۆژنامەنووسەكان بێن هەموو بەڵگەنامەكانیان تەسلیم دەكەین، ئەگەر یەك كەس موچەی لە لقی چوار وەرگرت ئەوسا راست دەكەن. بەڵام ئێمە نامانەوێ وەڵامی گۆڤاری لڤین بدەینەوە، چونكە پێمانوایە لڤین و زۆریتری وەك لڤین، جێگەی باوەڕ نەماون.

 

پ: نووسەرێك دەڵێت: لایەنگرانی پارتی لە سلێمانی زیاد و كەم ناكات، مەگەر بە پرۆسەی هاوسەرگیری نێوان ئەندامەكانی، تالیقی تۆ لەسەر ئەو قسەیە چییە؟

و: ئەوە رای ئەوە، كەیفی خۆیەتی.

 

پ: ئێوە وەك پارتی ئایا خاوەنی سلێمانین یان میوانن لەم شارە؟

و: نەخاوەنین و نە میوانیشین، ئێمە یەكێك لە حزبە دێرینەكانی كوردستانین، كە لەم شارە و لە كوردستاندا دامەزراوین، تا ئەم ساتەش جەماوەری خۆمان هەیە، رۆژێك بووە هەموو جەماوەری ئەم شارە لەگەڵ ئێمە بووە، بەڵام ئێستا حزبی تر دروست بووە و هەر یەكە و بەشی خۆی هەیە، ئێمەش بەشی خۆمان هەیە، نەك میوان نین، بەڵكو خاوەنی شارەكەشین.

 

پ: لە رووی رێكخستن و كاری سیاسی و حزبییەوە، ئایا ئێوە لەسلێمانی گرفتتان هەیە؟

و: نەخێر، گرفتی سیاسی و حزبیمان نییە.

 

پ: بیلال سلێمان رێكخەری پەیوەندییەكانی كۆمەڵی ئیسلامی لەگەڵ ئێران، ئاماژە بەوە دەكات كە تۆپبارانكردنی ناوچە سنوورییەكانی هەرێم بە تەنسیق و ئاگاداری یەكێتی و پارتییە، ئایا ئێوە رێگەتان بە ئێرانداوە؟

و: بیلال سلێمان درۆ دەكات و راست ناكات.

 

 

پ: دەنگۆی ئەوە هەیە ئەگەر ئۆپۆزسیۆن و دەسەڵات نەگەنە رێكەوتن لەسەر پرۆژەیەكی هاوبەش، ئەوا دووبارە خۆپیشاندان دەست پێدەكاتەوە، سەركردەیەكی ئۆپۆزسیۆنیش رایگەیاندووە كە ئەمجارە بە فەرمی دەچنە ناو خۆپیشاندانەكانەوە، ئایا ئێوە ترستتان لە دووبارە سەرهەڵدانەوەی خۆپیشاندان نییە؟

و: ئێمە نەك ترسمان لێی نییە، بەڵكو پێمانوایە ئۆپۆزسیۆن هەموو هەوڵێكی خۆیدا، هەر ئەوەندەی پێكراوە و لەوەش زێتری پێناكرێت. دیسان ئەوان باجی ئەوەش دەدەن كە لە هەندێك هەڵوێستدا سیاسەتێكی دروستیان نەبووە بەرامبەر بە خۆشیان و واقیعەكەش. ئێستا پەلەقاژەی ئەوەیانە چۆن خۆیان رزگار بكەن، ئەوە كۆمەڵێك كارتی فشارە بەكاری دەهێنن، ئێمە لەوەش تێدەگەین و گوێشیان لێدەگرین، چونكە هەموومان رۆڵەی ئەم میللەتەین، گرنگ ئەوەیە منداڵی خەڵك بە هەڵەدا نەبەین، بڕواش ناكەم ئەوان ئەوە دووبارە بكەنەوە.

 

پ: دەنگۆی ئەوە هەبوو كە لە 15\7 لە سلێمانی خۆپیشاندان بكرێت، گوایە پارتی لە ترسی پەلاماردانی جەماوەر بارەگای لقی چواری چۆڵ كردووە، ئەمە تاچەند راستە؟

و: پێمخۆشە هەموو كورد بزانێت هێزێك نییە لەسەر ئەم كەونە بارەگای لق بە ئێمە چۆڵ بكات. چۆڵكردنی بارەگای لق قسەیەك نییە كە باس بكرێت.

له‌ژماره‌ 70ی رۆژنامه‌ی چه‌تر بڵاوبۆته‌وه‌.

 

This e-mail address is being protected from spambots. You need JavaScript enabled to view it   

 


 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.