Red Purple Black

د. نیاز لاجانی - به‌ڕێوه‌به‌ری گشتیی زاگرۆس تیڤی: بینه‌ران تا ئێستاش متمانه‌یه‌كی ته‌واویان به‌ به‌رنامه‌كانی زاگرۆس تیڤی هه‌یه‌ ... دیمانه‌: ستیڤان شه‌مزینانی

PDFPrintE-mail

* پارتی پاڵپشتمان بووه‌ له‌ رووی ماددیی و مه‌عنه‌ویی، به‌ڵام ئه‌مه‌ هیچ زیانێكی له‌ كاره‌كانی زاگرۆس نه‌داوه‌

* له‌ ئاینده‌یه‌كی نزیكدا به‌رنامه‌ی ته‌رفیهی باشمان ده‌بێت و له‌ ئێستاشدا به‌رنامه‌یه‌كمان له‌ ئاماده‌كردندایه‌

* به‌ ویژدانه‌وه‌ ده‌ڵێم ته‌له‌فزیۆنه‌كانی كوردستان زۆر باشترن له‌ ته‌له‌فزیۆنه‌كانی ئوردون و سوریا و ئێران

 

د. نیاز لاجانی به‌ڕێوه‌به‌ری گشتیی كه‌ناڵی ئاسمانی زاگرۆس له‌م دیمانه‌ تایبه‌ته‌ی "شه‌پۆل"دا تیشك ده‌خاته‌ سه‌ر ئه‌و راپرسییه‌ی سه‌نته‌ری ئاسووده‌ كه‌ تێیدا كه‌ناڵه‌كه‌یان پله‌ی یه‌كه‌می له‌سه‌ر ئاستی كه‌ناڵه‌ كوردییه‌كان به‌ده‌ستهێنا و رایگه‌یاند ده‌یانه‌وێت له‌ ئاستی ئه‌و متمانه‌یه‌ی بینه‌رانی زاگرۆس تیڤیدا بن و وتی كه‌ كۆمه‌ڵێك به‌رنامه‌ی جۆراوجۆری ته‌رفیهی و سیاسیی و كۆمه‌ڵایه‌تیان ئاماده‌ كردووه‌ و له‌ ئاینده‌یه‌كی نزیكدا له‌ شاشه‌ی كه‌ناڵه‌كه‌یانه‌وه‌ په‌خش ده‌كرێت و له‌ كۆتایشدا باسی له‌وه‌ كرد گۆڕانگارییه‌كی زۆر به‌سه‌ر هه‌واڵ و سه‌رجه‌م لایه‌نه‌كانی كاری كه‌ناڵه‌كه‌یاندا دێت و به‌مه‌ش ده‌توانن متمانه‌ی بینه‌ران مسۆگه‌ر بكه‌ن.

شه‌پۆل: به‌پێی راپرسییه‌كی سه‌نته‌ری ئاسوده‌ كه‌ناڵی زاگرۆس به‌ هاوبه‌شی له‌گه‌ڵ دوو كه‌ناڵی تر پله‌ی یه‌كه‌می به‌ده‌ستهێنا. ئێوه‌ ئه‌جینداتان چییه‌ بۆ په‌ره‌پێدانی زیاتری بواری كاركردنتان؟.

د. نیاز: ئه‌گه‌ر ته‌ماشای مێژووی ته‌له‌فزیۆنی زاگرۆس بكه‌یت، به‌ كۆمه‌ڵێك قۆناغی جیا جیادا تێپه‌ڕیوه‌، هه‌ر قۆناغێك كۆمه‌ڵێك په‌یام و به‌رنامه‌ و سیاسه‌تی تایبه‌تی خۆی هه‌بووه‌، به‌ڵام له‌گه‌ڵ ئه‌وه‌دا ئه‌و راپرسییه‌ ئێمه‌ی خوشحاڵتر كرد، كه‌ بینه‌رانی ئێمه‌ تا ئێستا متمانه‌یه‌كی ته‌واویان به‌ به‌رنامه‌كانی زاگرۆس هه‌یه‌. ئه‌گه‌ر تێبینی بكه‌ین ئێستاش ریكڵامی كۆمه‌ڵێك به‌رنامه‌ی نوێ له‌ زاگرۆس بڵاو ده‌بێته‌وه‌، كه‌ بریتین له‌ ژماره‌یه‌ك به‌رنامه‌ی سیاسیی و رۆشنبیریی و ته‌رفیهی. جگه‌ له‌وه‌ش ئه‌و به‌رنامانه‌ی ئێستا هه‌ن و سه‌ركه‌وتنیان به‌ده‌ستهێناوه‌ به‌رده‌وام ده‌بن. له‌لایه‌كی تره‌وه‌ كار له‌سه‌ر فیلم و زنجیره‌ دراما ده‌كه‌ین و به‌مزووانه‌ كۆمه‌ڵێك زنجیره‌ دراما له‌ شاشه‌ی زاگرۆسه‌وه‌ پێشكه‌ش ده‌كرێن. زۆر ئه‌فكاری تریشمان هه‌یه‌، به‌ڵام جارێ له‌ بواری گفتوكۆكردندان.

شه‌پۆل: هۆكاری پاشه‌كشه‌ی كه‌ناڵی زاگرۆس له‌ رووی به‌رنامه‌ ته‌رفیهییه‌كانه‌وه‌ بۆچی ده‌گه‌ڕێنیته‌وه‌؟.

د. نیاز: له‌م چه‌ند مانگی رابردووی كوردستان، دۆخێكی سیاسیی ناخۆش هه‌بوو، ئه‌و جه‌وه‌ سیاسییه‌ كه‌ له‌م چه‌ند مانگه‌دا دروستبوو، وایكرد ته‌له‌فزیۆنی "زاگرۆس"یش راده‌ره‌كه‌ی خۆی وه‌ربگێڕێت به‌لای فه‌زا سیاسییه‌كه‌دا و به‌رنامه‌كانمان له‌و چه‌ند مانگه‌ زیاتر به‌ سیاسیی كران. هه‌ر له‌و ماوه‌یه‌دا زۆربه‌ی خه‌ڵك ته‌نانه‌ت خه‌ڵكی ساده‌ و ئاسایی، بوونه‌ بینه‌ر و جه‌ماوه‌ری به‌رنامه‌ سیاسییه‌كان و هه‌واڵ، ئێمه‌ش زوو له‌مه‌ تێگه‌یشتین و كۆمه‌ڵێك به‌رنامه‌ی ته‌رفیهیمان به‌شێوه‌یه‌كی كاتی راگرت، بۆ ئه‌وه‌ی بتوانین زۆرترین هه‌واڵ و به‌رنامه‌ی سیاسیی ئاماده‌ بكه‌ین، به‌ڵام له‌ ئاینده‌یه‌كی نزیكدا به‌رنامه‌ی ته‌رفیهی باشمان ده‌بێت و له‌ ئێستاشدا به‌رنامه‌ی "زار و خۆشی" له‌ ئاماده‌كردندایه‌، كه‌ كاك بژار دیلان پێشكه‌شی ده‌كات و به‌رنامه‌یه‌كی زۆر خۆش و ته‌رفیهی و هونه‌ریی و په‌روه‌رده‌ییه‌، ئه‌م به‌رنامه‌یه‌ له‌ یه‌كه‌م و دووه‌م رۆژی جه‌ژندا دوو ئه‌ڵقه‌ی پێشكه‌ش ده‌كرێت و پاشان ده‌بێته‌ به‌رنامه‌یه‌كی هه‌فتانه‌. به‌ رای من ئه‌م به‌رنامه‌یه‌ یه‌كێكه‌ له‌ به‌رنامه‌ زه‌خمه‌كان و جێگه‌ی زۆربه‌ی به‌رنامه‌ ته‌رفیهییه‌كانی پێشوو ده‌گرێته‌وه‌.

شه‌پۆل: كه‌ناڵه‌كانی ئێمه‌ به‌ زاگرۆسیشه‌وه‌ گشتیین نه‌ك ته‌خه‌سوسی، ئێوه‌ هه‌وڵتان نه‌داوه‌ ببنه‌ كه‌ناڵێكی ته‌خه‌سوسی و خۆتان له‌و هه‌مه‌ڕه‌نگییه‌ قووتار بكه‌ن؟.

د. نیاز: ئێستا هه‌ردوو مۆدیل هه‌یه‌ له‌ دنیادا، زۆربه‌ی ئه‌و ته‌له‌فزیۆنانه‌ی رینگیان له‌ سه‌ره‌وه‌یه‌ و به‌ ته‌له‌فزیۆنی جه‌ماوه‌ریی ده‌ناسرێن، ئه‌و ته‌له‌فزیۆنانه‌ن كه‌ گشتگیرن، به‌ڵام ئه‌و ته‌له‌فزیۆنانه‌ی ته‌خه‌سوسین، دیاره‌ بۆ ته‌مه‌ن و زه‌وقێكی تایبه‌ت ده‌بن، بۆ نموونه‌ كه‌ناڵێكی مۆسیقی وه‌ك "ئێم تیڤی" زیاتر گه‌نجی 14-25 ساڵ ته‌ماشای ده‌كات، ره‌نگه‌ گه‌نجێكی سی ساڵه‌ش ته‌ماشای نه‌كات، یان كه‌ناڵێكی وه‌ك "سی ئێن ئێن" ته‌نیا ناوه‌نده‌ ئه‌كادیمی و خه‌ڵكه‌ سیاسییه‌كان سه‌یری ده‌كه‌ن، هیچ ماڵێك هه‌تا له‌ سوێدیش ته‌ماشای "سی ئێن ئێن" ناكه‌ن. بۆیه‌ ته‌نیا ئه‌و ته‌له‌فزیۆنانه‌ پێیان ده‌وترێ جه‌ماوه‌ریی كه‌ گشتگیر و هه‌مه‌ڕه‌نگن و گرنگی به‌ هه‌موو لایه‌نه‌كانی ژیان ده‌ده‌ن. بۆیه‌ من قسه‌كه‌ی خۆم كورت ده‌كه‌مه‌وه‌ و ده‌ڵێم زاگرۆس ته‌له‌فزیۆنێكی گشتگیر و هه‌مه‌ڕه‌نگه‌ و له‌ ئاینده‌شدا هه‌ر به‌و شێوه‌یه‌ی ئێستا ده‌مێنینه‌وه‌.

شه‌پۆل: بۆچی كه‌ناڵی زاگرۆس گرنگی به‌ درامای كوردیی نادات؟. بۆچی هیچ درامایه‌كتان به‌رهه‌م نه‌هێناوه‌؟.

د. نیاز: ئاستی دراما كوردییه‌كان به‌ به‌راوورد به‌و وڵاتانی ده‌وروبه‌ر نه‌ك وڵاتانی ئه‌وروپا، ئاستیان زۆر نزمه‌، بۆیه‌ ئه‌مه‌ یه‌كێكه‌ له‌و كێشانه‌ی ئێمه‌ له‌ دراما دڵسارد ده‌كاته‌وه‌ كه‌ كێ بیكات؟ چۆن بكرێت؟ ئه‌كته‌ره‌كان و سیناریسته‌كان كێن؟ ئه‌مانه‌ هه‌مووی كێشه‌ی گه‌وره‌ن. ئه‌و درامایانه‌شی كه‌ ده‌بینرێن، راسته‌ به‌ زمانی كوردییه‌ و جلیان كوردییه‌ و له‌ كوردستانه‌، به‌ڵام ئه‌وه‌ زیاتر له‌ شانۆیه‌كی پڕ ده‌نگ ده‌چێت نه‌ك دراما كه‌ له‌وانه‌یه‌ خه‌ڵك له‌ ناچارییدا ته‌ماشای بكه‌ن، به‌ڵام له‌گه‌ڵ ئه‌وه‌شدا بوونیان خراپ نییه‌. به‌ڵام ئه‌گه‌ر ئێمه‌ وه‌ك زاگرۆس دراما بكه‌ین ده‌بێ باش بیكه‌ین، ده‌بێ باشتر بێ له‌وانه‌ی پێشووتر، ئه‌گینا وا باشتره‌ خۆمان له‌ قه‌ره‌ی ئه‌و لایه‌نه‌ قورسه‌ نه‌ده‌ین. جگه‌ له‌وه‌ مادام درامای كوردیی بناغه‌یه‌كی پته‌وی نییه‌، پێویست ناكات شتێك بكه‌ین خه‌ڵك له‌ بێ چاره‌ییدا ته‌ماشای بكه‌ن.

له‌گه‌ڵ ئه‌وه‌دا ئه‌گه‌ر سیناریۆی باش هه‌بێ، بێگوومان هه‌وڵده‌ده‌ین درامامان هه‌بێت. ئه‌وه‌ش له‌ بیر مه‌كه‌ به‌رهه‌مهێنانی دراما كاری كۆمپانیاكانه‌، خۆت ده‌زانی له‌ كوردستان ئه‌و كۆمپانیایانه‌ نین یان كه‌من، ئه‌گینا ئه‌وه‌ ئیشی كۆمپانیای تایبه‌ته‌ و دواتر ته‌له‌فزیۆنه‌كان لێیان ده‌كڕن، ته‌له‌فزیۆنه‌كانیش كه‌ ده‌یكڕن، ده‌بێ سپۆنسه‌ری بۆ بدۆزنه‌وه‌، چوونكه‌ ئه‌وانیش ناتوانن به‌رگه‌ی ئه‌و هه‌موو پاره‌یه‌ بگرن كه‌ بۆ كڕینی دراما خه‌رجی ده‌كه‌ن، چوونكه‌ من باش ده‌زانم درامایه‌كی باش پاره‌یه‌كی خه‌یاڵی تێده‌چێت، كه‌ له‌وانه‌یه‌ هه‌ر ئه‌ڵقه‌یه‌كی 10-15 هه‌زار دۆلاری تێبچێت، بۆیه‌ ره‌نگه‌ بودجه‌ی ته‌له‌فزیۆنێك هه‌ر ئه‌وه‌نده‌ بێت كه‌ بتوانێت درامایه‌كی چه‌ند ئه‌ڵقه‌یی پێ بكڕێت، به‌ڵام كاتێك سپۆنسه‌رت بۆ دۆزیه‌وه‌ ریكڵام بكات له‌ ناو دراماكه‌دا، ئه‌وكات هه‌م سپۆنسه‌ره‌كه‌ قازانج ده‌كات، هه‌م كۆمپانیای به‌رهه‌مهێنی دراماكه‌، هه‌م ته‌له‌فزیۆنه‌كه‌ چوونكه‌ بینه‌ری خۆی پێ زیاد ده‌كات.

شه‌پۆل: به‌رنامه‌ و سنووری كاركردنتان زۆر لۆكاڵییه‌ و جاری وا هه‌یه‌ له‌ شارێك ده‌رناچێت، چیتان كردووه‌ بۆ ئه‌وه‌ی له‌ كه‌ناڵێكی لۆكاڵییه‌وه‌ ببنه‌ كه‌ناڵێكی سه‌رتاسه‌ریی؟.

د. نیاز: زۆر به‌رنامه‌مان هه‌یه‌ له‌ ده‌ره‌وه‌ كڕیومانه‌، وه‌ك به‌رنامه‌ی شته‌ سه‌یر و سه‌مه‌ره‌كان، كامێرای شاراوه‌، فیلم، فیلمی به‌ڵگه‌نامه‌یی له‌سه‌ر زانست و ئه‌ده‌ب و ناوداران و جه‌نگه‌كان و سروشت و فه‌زا و. . هتد، ئه‌مانه‌ هه‌موویان له‌ ده‌ره‌وه‌ كڕدراون و وه‌رگێڕدراون بۆ كوردیی. به‌ بڕوای من به‌ بوونی په‌یامنێرێك له‌ ده‌ره‌وه‌ نابیته‌ جیهانی، به‌ڵكو به‌م جۆره‌ به‌رنامانه‌ ده‌بیته‌ جیهانی و ده‌بیته‌ پردێك بۆ به‌ستنه‌وه‌ی ئێره‌ و ئه‌وێ. به‌هۆی ئه‌م به‌رنامانه‌وه‌ زه‌وق و سه‌لیقه‌ و رۆشنبیریی خه‌ڵكی خۆشمان به‌رز ده‌بێته‌وه‌ و ئاشنا ده‌بن به‌ زانست و دراما و هونه‌ری میلله‌تانی تر. ئێمه‌ش یه‌كێك له‌و ته‌له‌فزیۆنانه‌ین گرنگی زۆر به‌م بواره‌ ده‌ده‌ین و زۆرجار خه‌ڵك و مامۆستای زانكۆ و مامۆستای رۆژنامه‌نووسی به‌ منیان وتووه‌، مینی دیسكه‌ڤه‌ری، مینی "بی بی سی"، مینی فیلم نێت، هه‌موو ئه‌مانه‌ له‌ زاگرۆسدا خۆیان ده‌دۆزنه‌وه‌، چوونكه‌ به‌رۆژ دوو سێ سه‌عات فیلمی به‌ڵگه‌نامه‌ییمان هه‌یه‌، وه‌ك هه‌واڵیش رۆژی سێزده‌ نه‌شره‌ی هه‌واڵ له‌ دووسه‌د چركه‌مان هه‌یه‌، كه‌ هه‌موو ئه‌مانه‌ وا ده‌كه‌ن بینه‌ر ئه‌وه‌ی به‌ زمانی بیانی له‌ ته‌له‌فزیۆنه‌ جیهانییه‌كاندا ده‌یبینێت به‌ زمانی كوردیی له‌ زاگرۆس بیبینێت.

شه‌پۆل: هه‌واڵ و ستۆدیۆی هه‌واڵتان زۆر لاوازه‌، هه‌وڵتانداوه‌ گرنگی زیاتر به‌ بواری هه‌واڵ بده‌ن؟.

د. نیاز: من به‌ڵێن ده‌ده‌م به‌ بینه‌رانی ته‌له‌فزیۆنی زاگرۆس، كه‌ ناگاته‌ مانگێكی دیكه‌ گۆڕانكارییه‌كی زۆر له‌ بواری هه‌واڵدا ده‌كه‌ین.

شه‌پۆل: هه‌ندێك ره‌خنه‌گر پێیانوایه‌ ئاستی ته‌له‌فزیۆنه‌ كوردییه‌كان له‌ ئاست تموح و پێویستی تاكی كورد نییه‌. ئێوه‌ له‌و باره‌وه‌ چی ده‌ڵێن؟.

د. نیاز: منیش پرسیار ده‌كه‌م، ئایا میلله‌تی ئێمه‌ش له‌ ئاستی هۆشیاریی میلله‌تانی تره‌؟. ئایا داموده‌زگا ئه‌كادیمییه‌كانی ئێره‌ وه‌ك داموده‌زگا ئه‌كادیمییه‌كانی وڵاتانی ده‌وروبه‌ره‌؟. ئه‌گه‌ر وابێت هه‌قه‌ ته‌له‌فزیۆنه‌ كوردییه‌كانیش له‌و ئاسته‌دا بن. ناكرێت له‌ هه‌موو شتێكدا له‌ پاش میلله‌تانی تره‌وه‌ بین، به‌ڵام داوای ته‌له‌فزیۆنێك بكه‌یت وه‌ك ته‌له‌فزیۆنێكی فه‌ڕه‌نسی وابێت. ئێستا من و تۆ پێش دیمانه‌كه‌ قسه‌مان له‌سه‌ر شار ده‌كرد، تا ئێستا شار له‌ وڵاتی ئێمه‌دا دروست نه‌بووه‌، كۆمه‌ڵگه‌یه‌ك شاری نه‌بێ چۆن چاوه‌ڕوان ده‌كه‌یت كه‌ناڵێكی هه‌بێت وه‌ك كه‌ناڵی وڵاتێكی ئه‌وروپی؟. بۆیه‌ ئه‌و خه‌ڵكانه‌ی ئه‌م قسانه‌ ده‌كه‌ن، یان له‌ بیری ده‌كه‌ن له‌ كوێ ده‌ژین یان موزایه‌ده‌ ده‌كه‌ن به‌سه‌ر ته‌له‌فزیۆنه‌كانه‌وه‌.

با وا به‌راوورد بكه‌ین، ئایا سیستمی ته‌ندروستی تۆ باشتره‌ له‌ سیستمی ته‌ندروستی ئوردون؟. ئایا رێگا و بانه‌كانی ئێره‌ باشتره‌ له‌ رێگا و بانه‌كانی ئوردون؟. بێگوومان هی ئوردون باشتره‌، ته‌نانه‌ت ئابووری و كشتوكاڵی ئوردون له‌ كشتوكاڵ و ئابووری ئێره‌ باشتره‌، له‌ كاتێكدا تۆ وڵاتێكی پڕ له‌ نه‌وتی، به‌ڵام به‌ ویژدانه‌وه‌ ده‌ڵێم ته‌له‌فزیۆنه‌كانی ئێمه‌ باشتره‌ له‌ ته‌له‌فزیۆنه‌كانی ئوردون، گۆڤار و رۆژنامه‌كانی ئێمه‌ باشترن له‌ رۆژنامه‌ و گۆڤاره‌كانی ئوردون، ته‌نانه‌ت له‌ گۆڤار و رۆژنامه‌كانی سوریاش باشترن. بڕۆ سه‌یری ته‌له‌فزیۆنه‌كانی سوریا بكه‌، كه‌س تاقه‌تی نییه‌ ته‌ماشای بكات، به‌ڵام رێگاوبان و سیستمی ته‌ندروستی و شاریان زۆر زۆر له‌ ئێمه‌ پێشكه‌وتووتره‌. بۆیه‌ ئه‌گه‌ر به‌راوورد بكه‌ین ته‌له‌فزیۆنه‌كانی ئێمه‌ له‌ ته‌له‌فزیۆنی زۆربه‌ی وڵاتانی دراوسێ به‌ ئێرانیشه‌وه‌ پێشكه‌وتووتره‌. ئێمه‌ له‌ هه‌موو شتێكدا له‌ دوای ئێرانه‌وه‌ین، به‌ڵام ته‌له‌فزیۆنه‌كانمان زۆر له‌وانه‌ی ئێران باشتر و پێشكه‌وتووتره‌.

شه‌پۆل: ده‌وترێ كێشه‌ی ته‌له‌فزیۆنه‌كان حزبی بوونه‌، ئایا حزبیبوون چه‌ند زیانی به‌ كاری ئێوه‌ گه‌یاندووه‌؟.

د. نیاز: جارێ پێش هه‌ر شت ته‌له‌فزیۆنی زاگرۆس ئۆرگان نییه‌، حزب ته‌نیا سپۆنسه‌ری ده‌كات، له‌گه‌ڵ ئه‌وه‌دا ئێمه‌ ته‌واو ئازادین له‌ هه‌ر شتێك كه‌ بڵاوی ده‌كه‌ینه‌وه‌، له‌ ماوه‌ی ئه‌م شه‌ش ساڵه‌دا كه‌ من به‌ڕێوه‌به‌ری ئه‌م كه‌ناڵه‌ بووم، نه‌ به‌ نووسراوێك، نه‌ به‌ ته‌له‌فۆنێك، نه‌ به‌ دانیشتنێك، بچووكترین تێبینی له‌لایه‌ن حزبه‌وه‌ نه‌بووه‌ له‌سه‌ر كاره‌كانی ئێمه‌، به‌پێچه‌وانه‌وه‌ ئازادبووین له‌وه‌ی بڵاومان كردۆته‌وه‌ و ته‌له‌فزیۆنی "زاگرۆس"یش به‌وه‌ ناسراوه‌ كه‌ رای جیاواز و ئه‌فكاری جیاواز تێیدا قسه‌ی خۆیان كردووه‌ و ره‌خنه‌ی زۆری تێدا گیراوه‌، به‌ڵام به‌ رادده‌یه‌كی مه‌عقول.

پارتی جگه‌ له‌وه‌ی پاڵپشتمان بووه‌ له‌ رووی ماددیی و مه‌عنه‌ویی، هیچ زیانێكی له‌ كاره‌كانی زاگرۆس نه‌داوه‌، به‌ڵام من ته‌سه‌ور ده‌كه‌م حزبێك كه‌ خۆی حزبێكی خراپ بێت، ئه‌فكار و پرۆگرام و ئه‌جیندای خراپی هه‌بێت كه‌ له‌ كوردستان ئه‌و حزبانه‌ بوونیان هه‌یه‌، بێگوومان میدیاكه‌شی خراپ ده‌بێت، چوونكه‌ ئامانجی میدیاكه‌ ده‌بێته‌ ئامانجی حزبه‌كه‌ كه‌ ئامانجێكی خراپ و مه‌ترسیداره‌ و هه‌مووشمان ده‌زانین ئه‌م حزبانه‌ له‌ كوردستان كێن و چین و چ تاریكییه‌ك بڵاو ده‌كه‌نه‌وه‌. حزبی ئێمه‌ش واته‌ پارتی، حزبێكی پێشكه‌وتووخوازه‌ و بڕوای به‌ ئازادیی و دیموكراتی و نوێبوونه‌وه‌ هه‌یه‌، ئێمه‌ش یه‌كێك له‌ دروشمه‌كانمان كه‌ وه‌ك ناوبڕ بڵاو ده‌بێته‌وه‌ بریتییه‌ له‌ "كوردستانێكی ئازاد و مودێرن"، بۆیه‌ ئێمه‌ و پارتی هیچ لێكدژییه‌ك له‌ نێوانماندا نییه‌ و ئامانجه‌كانمان هه‌ر یه‌ك ئامانجه‌.

تێبینی: ئه‌م دیمانه‌یه‌ له‌ ژماره‌ "3" گۆڤاری "شه‌پۆل" له‌ كۆتایی ئۆكتۆبه‌ری 2011 بڵاوكراوه‌ته‌وه‌.


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.