Red Purple Black

سه‌ڵاح مه‌زن به‌رپرسیی یه‌كه‌می بزووتنه‌وه‌ی گۆڕان له‌ هه‌ولێر: ده‌مانه‌وێت له‌هه‌ولێره‌وه‌ كێبڕكێی سلێمانی بكه‌ین ... دیداری: نه‌جات ئه‌حمه‌د

PDFPrintE-mail

  • به‌شێك له‌ كه‌لتوری پێشووی حزبه‌ سونه‌تیه‌كان له‌ نێو بزووتنه‌وه‌ی گۆراندایه‌
  • دانانی من پێویست بوو، تا سه‌رپه‌رشتی هه‌موو ئه‌و بیروبۆچونه‌ جیاوازانه‌ بكه‌م كه‌ له‌ شاری هه‌ولێر سه‌ریان هه‌ڵداوه‌
  • بۆ مه‌سه‌له‌ی قه‌ره‌بووكردنه‌وه‌مان، ئامارێكی گشتیمان داوه‌ته‌ وه‌زاره‌تی ناوخۆ، به‌ڵام ئه‌وه‌ 2 مانگه‌ هیچ وه‌ڵامێكیان نیه‌
  • تا ئێستا به‌فه‌رمی هیچ په‌یوه‌ندیه‌كمان له‌گه‌ڵ داموده‌زگاكانی شاری هه‌ولێر نیه‌
  • گۆڕان رازی بوو كێشه‌كانی له‌رێگه‌ی سیاسییه‌وه‌ چاره‌سه‌ر بكات، به‌ڵام وه‌ك ده‌بینین ئێستا كێشه‌كه‌ له‌سه‌ر پشتی تیمساح به‌رێوه‌ ده‌چێت
  • له‌ شاری هه‌ولێر دێوه‌زمێیه‌كی تر هه‌یه‌، بۆیه‌ ترس شتێكی ئاساییه‌و هه‌ستیشی پێده‌كردێت

به‌رپرسی یه‌كه‌می بزووتنه‌وه‌ی گۆڕان له‌شاری هه‌ولێر ئه‌وه‌ دووپات ده‌كاته‌وه‌ كه‌ دانانی ئه‌و له‌و پۆسته‌یدا پێویست بوو، چونكه‌ وه‌ك خۆی ده‌ڵی "تا سه‌رپه‌رشتی هه‌موو ئه‌و بیروبۆچونه‌ جیاوازانه‌ بكه‌م كه‌ له‌ شاری هه‌ولێر سه‌ریان هه‌ڵداوه‌". سه‌ڵاح مه‌زن به‌رپرسی یه‌كه‌می بزووتنه‌وه‌ی گۆڕان له‌هه‌ولێری پایته‌خت، دوای ئه‌وه‌ی ماوه‌یه‌كه‌ ئه‌و پۆسته‌ی پێدراوه‌ ئێستا رایده‌گه‌ینی كه‌ ئه‌وان له‌ هه‌ولێر ده‌توانن بۆ خۆرێكخستنه‌وه‌ پێشبڕكێی سلێمانی بكه‌ن، "ده‌مانه‌وێت له‌هه‌ولێره‌وه‌ كێبڕكێی سلێمانی بكه‌ین"، ناوبراو ئه‌وه‌ش ناشارێته‌وه‌ كه‌ به‌شێك له‌ كه‌لتوری پێشووی حزبه‌ سونه‌تیه‌كانی هه‌رێم له‌ نێو بزووتنه‌وه‌ی گۆراندایه‌و له‌باره‌ی په‌یوه‌ندیشیان له‌هه‌ولێر، ده‌ڵی "تا ئێستا له‌سه‌ر هیچ ئاستێكی فه‌رمی په‌یوه‌ندیمان له‌گه‌ڵ داموده‌زگاكانی شاری هه‌ولێر نیه‌". سه‌باره‌ت به‌ وه‌رگرتنه‌وه‌ی باره‌گاكانیشیان ده‌ڵی " چیتر چاوه‌ڕێی وه‌رگرتنه‌وه‌و چاككردنه‌وه‌ی باره‌گاكانمان ناكه‌ین، باره‌گای نوێ ده‌كه‌ینه‌وه‌" ئه‌وه‌ش دووپات ده‌كاته‌وه‌ كه‌ "له‌ هه‌ولێر یاسا و داموده‌زگاكانی باره‌گای ئێمه‌یان سووتاند".

شه‌قام: باله‌وه‌ ده‌ست پێبكه‌ین مه‌رجه‌كانی وه‌رگرتنی پۆستی به‌رپرسی یه‌كه‌می بزووتنه‌وه‌ی گۆران له‌ شاری هه‌ولێر له‌لایه‌ن سه‌ڵاح مه‌زن چی بوون؟

سلاح مه‌زن: له‌ راستیدا پێكهاته‌و هه‌ڵكه‌وتنی من وایه‌ كه‌ ده‌چمه‌ ناو هه‌ر كارێك هیچ مه‌رجێكم نیه‌، به‌ڵام زۆر جاریش به‌وهۆیه‌وه‌ تووشی زیان بوومه‌ پێویستیم به‌وه‌ ده‌بێت كه‌ ئه‌رك و هێزی زیاتر سه‌رف بكه‌م و له‌ هه‌مان كاتیشدا ره‌نگه‌ مافیشم بخورێت، بۆیه‌ له‌و بواره‌دا ئه‌زموونێكی زۆرم هه‌یه‌، له‌ رابردوو زۆر بوومه‌ته‌ به‌رپرسی سه‌نته‌ره‌كان و كۆمه‌ڵه‌كانی مه‌ده‌نی و ته‌نانه‌ت كاتی خۆش بوومه‌ راوێژكاری رۆژنامه‌ی هاوڵاتی به‌ بێ مه‌رج هاتم، بۆیه‌ ئه‌وكاته‌ی كه‌ به‌وجۆره‌ ده‌سه‌ڵاته‌كان وه‌رده‌گرم كاته‌كان به‌ شه‌و رۆژییه‌وه‌ ده‌یبڕم و زۆرجاریش ئه‌و ئه‌رك و ماندووبوونانه‌ی من بۆته‌ كۆستێكی قورس له‌سه‌ر خێزانه‌كه‌م و دایكیشم له‌ رابردوو زۆر به‌منه‌وه‌ ماندوو ده‌بوون له‌ئه‌نجامی وه‌رگرتنی ئه‌و ئه‌ركه‌ قورسانه‌ی كه‌ ده‌كووتنه‌ سه‌رشاری من، زۆر جاریش له‌ وه‌رگرتنی ئه‌ركه‌كان پاداشتم وه‌رنه‌گرتووه‌، ته‌نانه‌ت ئه‌و ئه‌ركه‌ی ئێستاشم له‌ بزووتنه‌وه‌ی گۆران هیچ پاداشتێكم نیه‌ به‌قه‌د ئه‌وه‌ی من ئامانجێكم هه‌یه‌ كه‌ ئه‌ویش پرسی گۆرانكارییه‌ كه‌ ده‌مێكه‌ من كاری بۆ ده‌كه‌م و باوه‌رم پێی هه‌یه‌ بۆ به‌ره‌وپێشبردن و دیموكراتیزه‌كردن و چه‌سپاندنی عه‌داله‌تی كۆمه‌ڵایه‌تی كه‌ من باوه‌ری ته‌واوم پێیان هه‌یه‌ ئه‌وكاته‌ی كه‌ بزووتنه‌وه‌ی گۆرانیش دروستبوو كاری بۆ ئه‌و ئامانجانه‌ كرد، بۆیه‌ منیش خۆبه‌خشانه‌ ده‌ستم به‌كاركردن كرد له‌گه‌ڵیان و وه‌ك سه‌ربازێكی ون توانای خۆم خسته‌كار بۆیه‌ هیچ مه‌رجێكم نه‌بووه‌، ته‌نیا ئه‌وه‌یه‌ كه‌ من كار بۆ ئه‌وه‌ ده‌كه‌م كه‌ بزووتنه‌وه‌ی گۆڕان له‌و قۆناغه‌ی ئێستادا كه‌ ده‌بینین دوای ئه‌و رووداوانه‌ی له‌ماوه‌ی رابردوو به‌سه‌ریدا هات له‌گه‌ڵ حزبه‌كانی ده‌سه‌ڵات تووشی جۆرێك له‌ چه‌قین و یان بڵێین گۆڕان له‌سه‌ر شاری هه‌ولێر كه‌متر ده‌رده‌كه‌وت من هاتوومه‌ له‌گه‌ڵ ئه‌و هه‌ڤاڵ و برادارانه‌مان بتوانین به‌ هه‌موو تواناكانمان بیخه‌ینه‌گه‌ڕ بۆ ئه‌وه‌ی بتوانین گۆران له‌ قۆناغێكه‌وه‌ بگوازینه‌وه‌ قۆناغێكی تر كه‌ ئه‌مه‌ لای من ئه‌ركێكی گه‌وره‌یه‌و ره‌نگه‌ ئه‌ركه‌كه‌ش بۆ كاتێكی دیاركراوبێت چونكه‌ من تا هه‌تا له‌ نێو بزووتنه‌وه‌ی گۆڕان شه‌ڕناكه‌م بۆ وه‌رگرتنی كورسی و مانه‌وه‌م له‌سه‌ری و یان ئه‌وه‌تا له‌ كۆنگره‌ كار بۆ ته‌كه‌تولات یان پشتی ئه‌و بگرم یان ئه‌م، نه‌خێر من له‌ ئێستادا له‌ رووی فكیرییه‌وه‌ قه‌ناعه‌تێكم بۆ دروستبووه‌ بۆیه‌ كاری خۆمی بۆ ده‌كه‌م.

شه‌قام: به‌ڵام وه‌ك ئه‌وه‌ی كه‌ له‌ راگه‌یاندنه‌كان باس ده‌كرا له‌ شاری هه‌ولێر له‌ مه‌كۆی بزووتنه‌وه‌ی گۆران ته‌كه‌تولات له‌ نێوان سه‌فینی مه‌لا قه‌ره‌ و عوسمان بانیمارانی دا هه‌بووه‌ له‌ماوه‌ی رابردوو هه‌رچه‌ند زۆرجار ئه‌و مه‌سه‌له‌یه‌ له‌لایه‌ن هه‌ڵسوڕاوانی ئه‌و بزووتنه‌وه‌ ره‌تده‌كرانه‌وه‌، به‌ڵام پرسیاری من لێره‌دا ئه‌وه‌یه‌ كه‌ (نه‌ سه‌فین نه‌ عوسمان) به‌ڵام سه‌ڵاح مه‌زن بووه‌ به‌رپرسی ئه‌و بزووتنه‌وه‌یه‌ له‌ شاری هه‌ولێر؟

سه‌ڵاح مه‌زن: هه‌ر قۆناغێك تایبه‌تمه‌ندی خۆی هه‌یه‌ و كه‌سی خۆشی ده‌وێت تا بتوانیت له‌و قۆناغه‌دا بتوانێت كاری بۆ بكه‌ن ئه‌ودوو به‌رێزی تۆ باسیان ده‌كه‌ی كه‌ من ئێستاش له‌ په‌یوه‌ندیدام له‌گه‌ڵیان هه‌ر یه‌كه‌شیان له‌ شوێنێك له‌ شوێنه‌كانی تر سه‌رپه‌رشتی رێكخستنه‌كانی بزووتنه‌وه‌ی گۆڕان ده‌كه‌ن، واته‌ له‌ ریزه‌كانی ئه‌و بزووتنه‌وه‌ چالاكیان هه‌یه‌، جا دانانی من بۆ ئه‌و قۆناغه‌ وه‌ك پێویست بووه‌ تا من بتوانم سه‌رپه‌رشتی هه‌موو ئه‌و بیروبۆچونه‌ جیاوازانه‌ بكه‌م كه‌ له‌ نێو بزووتنه‌وه‌ی گۆراندا له‌شاری هه‌ولێر سه‌ریان هه‌ڵداوه‌، خه‌ڵكێك باسی ته‌كه‌توول ده‌كات به‌ڵام ده‌ڵێم له‌نێو بزووتنه‌وه‌ی گۆران ته‌كه‌توول نیه‌، ئه‌گه‌ر هه‌شبێت ئه‌وا ته‌كه‌توولی بیروبۆچوونێكی جیاواز هه‌یه‌ له‌ناو بزووتنه‌وه‌یه‌كی وه‌ك گۆران كه‌ بزووتنه‌وه‌یه‌كی نوێخوازو فراوانی خه‌ڵكه‌ هه‌روه‌ك له‌ پرۆژه‌ ده‌ستوری بزووتنه‌وه‌ی گۆران هه‌ستی پێده‌كه‌ین كه‌ ئاساییه‌ بیروبۆچوونی جیاجیاو گروپی جیاجیا هه‌بێت به‌ مه‌رجێك له‌ چوارچێوه‌ی ئامانجه‌كانی بزووتنه‌وه‌ی گۆراِندا بجووڵێته‌وه‌.

شه‌قام: واته‌ مه‌به‌ستت ئه‌وه‌یه‌ كه‌ سه‌ڵاح مه‌زن بۆ ئه‌وه‌ داندراوه‌ كه‌ بتوانێت سه‌رپه‌رشتی ئه‌و ئه‌و بیروبۆچونه‌ جیاوازانه‌ بكات كه‌ له‌ ناو بزووتنه‌وه‌ی گۆران له‌ شاری هه‌ولێردا هه‌یه‌؟

سه‌ڵاح مه‌زن: به‌ڵی به‌ تێڕوانینی من ئه‌وه‌ یه‌كێك له‌ هۆكاره‌كان بووه‌ كه‌ من ده‌توانم هه‌موو بیروبۆچوونه‌ جیاجیاكانی نێو ئه‌و بزووتنه‌وه‌یه‌ له‌و شاره‌دا له‌ چوارچێوه‌یه‌ك له‌ یه‌كتریان نزیك بكه‌مه‌وه‌، جگه‌ له‌وه‌ش من كه‌ پێشتر له‌ بواری چالاكی مه‌ده‌نی و رۆژنامه‌وانیش كارو چالاكیم هه‌بووه‌، بزووتنه‌وه‌ی گۆرانیش وه‌ك بزووتنه‌وه‌یه‌كی نوێی نوێخوازی دیاره‌ زیاتر پشت به‌ چالاكوانانی مه‌ده‌نی و رۆژنامه‌نوسان و رووناكبیران و خه‌ڵكی ته‌كنۆكرات ده‌به‌ستێت، له‌گه‌ڵ ئه‌وه‌ش من له‌به‌ر ئه‌وه‌ی پێشینیه‌كی سیاسیشم هه‌بوو ئیتر ئه‌زموونی كاری سیاسم و توانای بیركردنه‌وه‌م له‌بواری رۆژنامه‌وانی و كۆمه‌ڵگای مه‌ده‌نی تێكهه‌ڵكێشم كردوه‌ تا بتوانم له‌و قۆناغه‌دا به‌ بزووتنه‌وه‌ی گۆران و كۆمه‌ڵگه‌ی كوردی به‌گشتی بكه‌م.

شه‌قام: ئه‌ی چۆن بوو مه‌سه‌له‌ی دانانی به‌رپرسی یه‌كه‌می بزووتنه‌وه‌ی گۆران له‌ شاری سلێمانی زووتر یه‌كلاكرایه‌وه‌ له‌وه‌ی له‌شاری هه‌ولێر دره‌نگتر بوو، شاری واش هه‌یه‌ كه‌ تا ئێستا یه‌كلانه‌بۆته‌وه‌، ئه‌مه‌ چۆنه‌؟

سه‌ڵاح مه‌زن: هه‌ر خودی بزووتنه‌وه‌ی گۆران ئه‌گه‌ر شیبكه‌ینه‌وه‌ له‌ رووی پێكهاتن و دروستبوون و سه‌رهه‌ڵدان و كارو چالاكیه‌كانیه‌وه‌ش جیاوازه‌ ئه‌مه‌ جگه‌ له‌وه‌ی له‌ رووی پێكهاتنی كۆمه‌ڵگه‌ی كوردی له‌ هه‌ولێر و سلێمانی لێكبده‌یته‌وه‌ و ره‌وشی سیاسی و ئیداری و مه‌ده‌نی له‌نێوان هه‌ولێر و سلێمانی لێكبده‌یته‌وه‌ هه‌ندێكجار هه‌ست به‌ جیاوازی و له‌یه‌كتر نه‌چون ده‌كرێت، بزووتنه‌ووی گۆرانیش له‌ سلێمانی له‌وانه‌یه‌ چوارچێوه‌كه‌ی جیاوازتر بێت له‌گه‌ڵ ئه‌و چوارچێوه‌ی كه‌ له‌ هه‌ولێردا هه‌یه‌و ئه‌و ره‌وه‌شی له‌ هه‌ولێردا هه‌یه‌ جیاوازه‌ له‌وه‌ی له‌ سلێمانیدا هه‌یه‌، له‌گه‌ڵ ئه‌وه‌ش ناتوانین نكۆڵی له‌وه‌ بكه‌ین كه‌ بزووتنه‌وه‌ی گۆران له‌ سلێمانی سه‌ریهه‌ڵداوه‌ زۆربه‌ی سه‌ركرده‌كان و ژووره‌كانی بزووتنه‌وه‌ی گۆران له‌ شاری سلێمانین بۆیه‌ له‌ سلێمانی زیاتر كه‌وتوونه‌ته‌ خۆ به‌ڵام ئێمه‌ ئێستا خه‌ریكی كاركردنین تا كێبڕكی سلێمانی بكه‌ین، باوه‌ڕیش ناكه‌م ئه‌نجومه‌نی بزووتنه‌وه‌ی گۆران له‌ شاری سلێمانی ئه‌وه‌نده‌ له‌ پێش ئه‌نجومه‌نی رێكخستنی شاری هه‌ولێر بێت ئێمه‌ هه‌وڵ ده‌ده‌ین كێبڕكیان له‌گه‌ڵدا بكه‌ین له‌چوارچێوه‌ی بزووتنه‌وه‌ی گۆراندا.

شه‌قام: واته‌ ئێوه‌ ده‌توانن كێبڕكێی ئه‌نجومه‌نی شاری سلێمانی بكه‌ن؟

سه‌ڵاح مه‌زن: ئێمه‌ وه‌ك نه‌ریتێكی نوێ و شارستانی و دیموكراتی مه‌سه‌له‌ی كێبڕكی كارێكی زۆر ئاساییه‌ كه‌ له‌نێو بازنه‌كان و رایه‌له‌كانی بزووتنه‌ووه‌ی گۆڕان ده‌رفه‌رتی بۆ ده‌ره‌خسێنین و ده‌رفه‌تی ئه‌وه‌ش ده‌ده‌ین كه‌ به‌ هه‌موو توانایه‌ك به‌شداری ئه‌و كێبركیانه‌ بكه‌ین ده‌بێت ئه‌و كاره‌شمان ره‌نگدانه‌وه‌ له‌نێو كۆمه‌ڵگاشدا هه‌بێت.

شه‌قام: یه‌كه‌م كار دوای ده‌ست به‌كاربوونت وه‌ك به‌رپرسی رێكخستنه‌كانی گۆران چی بوو؟ تۆ چیت رێكخسته‌وه‌؟

سه‌ڵاح مه‌زن: كاتێك به‌رپرسیاره‌تی له‌ بزووتنه‌وه‌ی گۆران وه‌رده‌گریت ده‌بێت ئه‌وه‌ بزانیت كه‌ گۆران بزووتنه‌وه‌یه‌كی به‌هێزی ئۆپۆزسیۆنه‌ له‌سه‌ر شاری هه‌ولێر كه‌ كێبركی له‌گه‌ڵ پارته‌كانی ده‌سه‌ڵات ده‌كات بۆ ئه‌وه‌ی له‌نێو چوارچێوه‌ی ده‌سه‌ڵاتیش پێشیان بكه‌وێت جا وه‌رگرتنی پۆستێكی وه‌ها له‌ بزووتنه‌وه‌یه‌كی له‌م چه‌شنه‌ كه‌ خۆی تووشی كۆمه‌لێك ته‌نگوچه‌ڵه‌مه‌و به‌ كۆمه‌لێك بارودۆخی جیاواز تێپه‌ریوه‌و له‌ بارودۆخێكی تره‌وه‌ش هاتۆته‌ كایه‌وه‌و ده‌ته‌وێت له‌و ره‌وه‌شی ئێستاش بیگوازیته‌وه‌ بۆ ره‌وشێكی تر، بێگومان چه‌ند ئاستێك هه‌یه‌ كه‌ تۆ كاری له‌سه‌ر بكه‌ی له‌وانه‌ ئاستی رێكخستن به‌وه‌ی كه‌ ده‌بێت به‌دواداچوون له‌سه‌ر بازنه‌كان بكه‌یت و خه‌ڵكێكی به‌ تواناو كارا بێنیته‌ پێشه‌وه‌ و له‌سه‌ر ئاستی میدیاكان و په‌یوه‌ندیه‌كان و خۆرێكخستنه‌وه‌ی كارگێری و به‌رێوه‌به‌ریته‌كانی نێو ماڵی گۆران كار بكه‌یت، جا ئه‌و كارانه‌ من به‌هاوكاری هاورێكانم له‌شاری هه‌ولێر به‌ یارمه‌تی هه‌موو ئه‌و گۆرانخوازانه‌ی كه‌ ئێستا له‌نێو چوارچێوه‌ی گۆران هه‌نه‌ سودیان لێوه‌ربگرم جا له‌ كۆمه‌ڵێك بوار ج به‌وه‌ی سود له‌تواناكانیان وه‌ربگرین یا ئه‌وه‌ی كه‌ گوی بۆ بۆچوونه‌كانیان بگرین تا هه‌موومان پێكه‌وه‌ به‌ گۆرانخوازه‌كانی شاری هه‌ولێر به‌شدار بكه‌ین له‌به‌ره‌وپێشبردنی بزووتنه‌وه‌ی گۆران له‌و قۆناغه‌ی كه‌ تێیكه‌وتووه‌ بۆ قۆناغێكی پێشكه‌وتووتر، بۆ نموونه‌ له‌وكاته‌ی من ئه‌و به‌رپرسیارته‌م وه‌گرتووه‌ به‌ ده‌یان كۆبونه‌وه‌م له‌گه‌ڵ رایه‌له‌كان و بازنه‌كانی ئه‌و بزووتنه‌وه‌ كردوه‌و خۆشبه‌ختانه‌ 3 كۆبوونه‌وه‌ی فراوانی ئه‌نجومه‌نی بزووتنه‌وه‌ی گۆرانم كردوه‌ كه‌ ئه‌و ئه‌نجومه‌نه‌ وه‌ك په‌رله‌مانێكی ئه‌و بزووتنه‌وه‌یه‌ له‌ شاری هه‌ولێر كه‌ هه‌موو بازنه‌ و رایه‌كان كۆده‌بێته‌وه‌.

شه‌قام: واته‌ له‌و ماوه‌یه‌ی كه‌ تۆ بویته‌ به‌رپرسی یه‌كه‌می ئه‌و بزووتنه‌وه‌یه‌ له‌و شاره‌ ده‌زانی خاڵه‌ لاوازه‌كان چین؟

سه‌ڵاح مه‌زن: به‌ڵی.

شه‌قام: گرنگترین ئه‌و خاڵه‌ لاوازانه‌ چین؟

سه‌ڵاح مه‌زن: هه‌ر بزووتنه‌وه‌یه‌كی سیاسی خاڵی به‌هێز و لاوازیشی هه‌یه‌، ئێمه‌ له‌ خواره‌وه‌ بۆ سه‌ره‌وه‌ به‌دوای گرفته‌كاندا ده‌گرێین له‌وێوه‌ خاڵه‌ لاوازه‌كانمان ده‌ستنیشانكردوه‌ و ده‌شزانین خاڵه‌ به‌ هێزه‌كانمان چین بۆیه‌ كار له‌سه‌ر به‌هێزتر كردنی خاڵه‌ به‌هێزه‌كانمان ده‌كه‌ین و خاڵه‌ لاوازه‌كانیشمان كاری بۆ ده‌كه‌ین تا بتوانین ئه‌دای باشتر بكه‌ین له‌گه‌ڵ ئه‌وه‌ش كار بۆ ئه‌وه‌ ده‌كه‌ین كه‌ هه‌ردووكیان تێكه‌ڵ به‌یه‌كتر بكه‌ین تا سود له‌ یه‌كتر وه‌ربگرن و هاوكاری یه‌كتر بكه‌ین تا هه‌موومان به‌ یه‌ك شه‌پۆلی گه‌وره‌ به‌ره‌وپێشه‌وه‌ بچین.

شه‌قام: هه‌ست ده‌كه‌ی له‌ نێو ئه‌نجومه‌نی ئێستای بزووتنه‌وه‌ی گۆران له‌ شاری هه‌ولێر ئاساری ته‌كه‌تول مابێت یان ئاساری ته‌كه‌تولت هه‌ستپێكردوه‌ له‌و ماوه‌یه‌ كه‌ تۆ بویته‌ به‌رپرسی ئه‌و بزووتنه‌وه‌یه‌؟

سه‌ڵاح مه‌زن: له‌به‌ر ئه‌وه‌ی بزوتنه‌وه‌ی گۆران به‌رهه‌می ئه‌و كۆمه‌ڵگایه‌ی كوردیه‌ ئه‌وه‌شت لێناشارمه‌وه‌ كه‌ له‌ پێكهاته‌ی گۆراندا به‌شێك له‌ كه‌لتوری پێشووی حزبه‌ سونه‌تیه‌كانی دیكه‌ له‌ نێو بزووتنه‌وه‌ی گۆرانیشدا خۆیان دۆزیه‌وه‌ تا حزبه‌ نه‌ته‌وه‌یه‌كان یا چه‌په‌كان و عه‌لمانیه‌كان و به‌ تایبه‌تی یه‌كێتی نیشتمانی كوردستان و چه‌په‌كان زۆر دیارن ئه‌وه‌ش ده‌زانین كه‌ كۆمه‌لێك كه‌موكوری له‌و حزبانه‌دا هه‌یه‌و كۆمه‌ڵێك نه‌ریتی وه‌ها هه‌یه‌ كه‌ بۆ رۆژگاری ئه‌مرۆمان ده‌ست نادات، بۆیه‌ ئاساییه‌ له‌نێو بزووتنه‌وه‌ی گۆران تا ئه‌وكاته‌ش بۆچونی جیاواز هه‌بێت له‌سه‌ر شێوازی كاركردن وگۆرانكاری و له‌سه‌ر چه‌ندین بڕوابوون متمانه‌بوون بۆ گۆرانكاری كه‌ ئێمه‌ باس له‌ گۆران ده‌كه‌ین ده‌بێت پرسیاری ئه‌وه‌ بكه‌ین بزانین خۆت تا چه‌ند ده‌توانی خۆت بگۆریت تۆ له‌ كامه‌ خاڵ توانیوته‌ خۆت و خێزانه‌كه‌ت و ده‌وه‌ربه‌ركه‌ت بگۆڕی ئینجا كۆمه‌ڵگایه‌كه‌ت بگۆڕی ئایا تۆ ئه‌و كه‌سه‌ بتوانایه‌ی كه‌ خۆت پێگه‌یاندوه‌ به‌ فه‌لسه‌فه‌و كه‌لتوری گۆرانكاری بێگومان له‌نێو گۆران هه‌موو ئه‌و كێشانه‌ هه‌یه‌ به‌ڵام ئێمه‌ وورده‌ ورده‌ ده‌مانه‌وێت چاره‌سه‌ریان بكه‌ین و خه‌ڵكه‌ به‌ تواناكان بهێنینه‌ پێشه‌وه‌ خه‌ڵكه‌كانی تریش ناڵێم په‌راوێزیان بخه‌ین بتوانین ئه‌وانیش به‌ شێوه‌یه‌كی تر به‌شداری ئه‌و گۆرانكاریانه‌ بكه‌ن.

شه‌قام: ئه‌و ئاسته‌نگانه‌ی به‌رده‌م بزووتنه‌وه‌ی گۆران له‌ شاری هه‌ولێر چین؟

سه‌ڵاح مه‌زن: كۆمه‌لێك ئاسته‌نگ هه‌یه‌ له‌به‌رده‌م بزووتنه‌وه‌ی گۆران كه‌ نه‌توانێت وه‌ك بزوتنه‌وه‌یه‌كی چالاك و به‌قه‌د قه‌واری سیاسی خۆی كاربكات، چونكه‌ ده‌بینین بزووتنه‌وه‌ی گۆران له‌ هه‌ولێر زیاتر له‌ 100 هه‌زار ده‌نگی هێناوه‌ به‌ ژماریه‌ك كورسی له‌ په‌رله‌مانی كوردستان و عێراقیش به‌ده‌ستهێناوه‌ كه‌واته‌ بزووتنه‌وه‌ی گۆران خاوه‌ن قه‌واره‌یه‌كی جه‌ماوه‌ری فراوانه‌، به‌ڵام ئایا بزووتنه‌وه‌ی گۆران توانیویه‌تی له‌سه‌ر ئاستی میللی و فه‌رمی نواندن و نوێنه‌رایه‌تی خۆی بكات، نه‌خێر نه‌یتوانیوه‌ ئه‌وه‌ بكات كه‌ نابێت ئه‌وه‌ش بشارینه‌وه‌ كه‌ ئه‌و بارودۆخه‌ی له‌ رابردوو به‌سه‌ریدا هات له‌ هه‌ڕه‌شه‌و راونان كاریگه‌ری زۆری له‌سه‌ر گۆران هه‌بوو تا ئێستاش خاڵه‌ سلبیه‌كانی ئه‌و بارودۆخه‌ به‌سه‌ر ره‌وشی گۆران كاریگه‌ری هه‌یه‌ بۆ نموونه‌ تا ئێستا ئێمه‌ شوێنێكمان نیه‌ پێی بلێین مه‌كۆی سه‌ره‌كی گۆران له‌ شاری هه‌ولێر تا كاروچالاكیی خۆمان بكه‌ین و نه‌شمانتوانیوه‌ ئه‌و مه‌كۆیه‌ ئاماده‌بكه‌ین كه‌ له‌ میتۆدی ئێمه‌دا هه‌یه‌ چونكه‌ مه‌كۆ هه‌ر ئه‌وه‌ نیه‌ كه‌ جێگای كۆبوونه‌وه‌و بڕیار ده‌ركردن بێت یا جێگه‌ی كارمه‌ند بێت نا ده‌بێت مه‌كۆ شوێنێكی كه‌لتوری شارستانی و سه‌كۆیه‌ك بێت كه‌ هه‌موو رووناكبیرانی شارو خه‌ڵكی ته‌كنۆكرات و چالاكوانانی مه‌ده‌نی بتوانن له‌و مه‌كۆیه‌ خۆیان ببینه‌وه‌ و ببێته‌ شوێنێكی چالاكی مه‌ده‌نی و ببێته‌ شوێنێك تا ئه‌ندامی بزووتنه‌وه‌كه‌ش بێن و بیكه‌نه‌ شوێنێك تا ئاڵوگۆری كه‌لتوری تێدا رووبدات نه‌ك شوێنێك بێت وه‌ك باره‌گا بیكه‌ینه‌ شوێنی جگه‌ره‌خواردن و چاخواردنه‌وه‌ وه‌ك دیوه‌خانه‌كانی حزبه‌ سونه‌ته‌یه‌كان بێت ئێمه‌ نامانه‌وێت وابێت به‌ڵام به‌هۆی ئه‌و ئاسته‌نگانه‌ی به‌رده‌ممان نه‌مانتوانیوه‌ ئه‌و به‌ده‌ست بهێنین و تا ئێستا له‌سه‌ر هیچ ئاستێكی فه‌رمی په‌یوه‌ندیمان له‌گه‌ڵ داموده‌زگاكانی ئه‌و شاره‌ نیه‌، له‌گه‌ڵ پارته‌كانی ده‌سه‌ڵات په‌یوه‌ندیه‌كانمان له‌ئاستێكی لاوازدایه‌، بۆیه‌ ئێمه‌ له‌بواری رێكخستنه‌وه‌ی ناو ماڵی خۆمانین و دواتر ده‌مانه‌وێت ده‌ست بۆ كه‌ناڵه‌كانی تر ببه‌ین و به‌رنامه‌یه‌كمان هه‌یه‌ وه‌ك جارجار كه‌ بخشین بۆ هه‌موو ئه‌و شوێنانه‌ی كه‌ پێویستیان به‌ به‌رنامه‌ی گۆران هه‌یه‌.

شه‌قام: واته‌ مه‌به‌ستت ئه‌وه‌یه‌ جاری كارتان به‌ ناوه‌نده‌ جیاجیاكانی كۆمه‌ڵگا و چالاكوانانی مه‌ده‌نیه‌، دواتر ده‌كه‌ونه‌ په‌یوه‌ندی گرتن له‌گه‌ڵ حزبه‌ سیاسیه‌كان؟

سه‌ڵاح مه‌زن: نا ئێمه‌ به‌هه‌ردوولا كاری خۆمان ده‌كه‌ین، چونكه‌ رێكخستن لای ئێمه‌ به‌و مه‌فهوومه‌ی كه‌ لای حزبه‌كانی تر هه‌یه‌ لای ئێمه‌ وانیه‌و شێوازێكی دیكه‌ی وه‌رگرتووه‌ ئه‌وه‌نده‌ قورس نیه‌ بۆیه‌ هه‌موو تاكێكی كوردی له‌ هه‌موو كات و ساتێكدا ده‌توانێت په‌یوه‌ندی له‌گه‌ڵ بزووتنه‌وه‌ی گۆڕان بگرێت و بزووتنه‌وه‌ی گۆڕانیش ده‌توانێت سوود له‌ توانای ئه‌و تاكانه‌ وه‌ربگرێت تا هه‌موومان به‌یه‌كه‌وه‌ كار بۆ ئه‌وه‌ بكه‌ین كه‌ چۆن ئه‌و شاره‌ زیاتر ئاوه‌دان بكه‌ینه‌وه‌، زیاتر ئه‌و شاره‌ به‌ مه‌ده‌نی بكه‌ین و به‌یه‌كه‌وه‌ وه‌ك هه‌ولێریی هه‌ولێر جوان بكه‌ین و خه‌ڵك والێبكه‌ین كه‌ گیانی پارێزراوبێت و بتوانێت ماف و ئازاده‌یه‌كانی بۆ ده‌سته‌ به‌ر بكرێت ئه‌وه‌ش به‌ پێی توانا كاری بۆ ده‌كه‌ین.

شه‌قام: دوا هه‌نگاوی ئێوه‌ بۆ وه‌رگرتنه‌وه‌ی باره‌گانتان له‌ شاری هه‌ولێر چی بووه‌؟

سه‌ڵاح مه‌زن: یه‌كێك له‌و كێشانه‌ی كه‌ له‌و ماوه‌یه‌ی زیاتر له‌ سی َمانگه‌ خه‌ریكین كێشه‌ی باره‌گاكانه‌، له‌به‌ر ئه‌وه‌ی باره‌گاكانی ئێمه‌ له‌ شاری هه‌ولێر له‌ بارودۆخێكدا سوتێندراو تاڵانكراو زه‌ره‌رێكی زۆری به‌ بزووتنه‌وه‌ی گۆران گه‌یاند به‌ تایبه‌تی كۆمه‌ڵێك دیكۆمێنت و داتا به‌تاڵان بردران و تائێستاش ده‌سه‌ڵاتی سیاسی به‌ فه‌رمی دوای لێبوردنی نه‌كردوه‌، له‌ چوارچێوه‌ی كۆبوونه‌وه‌ پێنج قۆڵیه‌كانی ده‌سه‌ڵات و ئۆپۆزسیۆنیش دیاره‌ باسكراون بۆ ئه‌وه‌ی قه‌ره‌بووبكرێته‌وه‌ ئه‌وه‌ بوو ئێمه‌ لیژنه‌یه‌كمان پێكهێناو ئامارێكی گشتی كرا، بۆ زیانه‌كان دواتر له‌ رێگه‌ی نوێنه‌ری خۆمان داومانه‌ به‌ وه‌زاره‌تی ناوخۆ ئه‌وه‌ 2 مانگه‌ هیچ وه‌ڵامێكیان نیه‌ به‌ڵام دواجار به‌ ئێمه‌یان ووتوه‌ كه‌ بۆ داوای سیاسی تۆمارناكه‌ن كه‌ پێشتر وا قسه‌ی له‌سه‌ر كرابوو كه‌ ئه‌و كێشه‌یه‌ له‌رێگه‌ی رێكه‌وتننامه‌ی سیاسی چاره‌سه‌ر بكرێت كه‌ پێشتر ئێمه‌ پێمان له‌سه‌ر ئه‌وه‌ داده‌گرت كه‌ ئه‌مه‌ له‌رێگه‌ی یاساییه‌وه‌ چاره‌سه‌ر بكرێت، به‌ڵام ئه‌وان ووتیان با له‌رێگه‌ی سیاسیه‌وه‌ بێت بزووتنه‌وه‌ی گۆران بۆ ئاسایی كردنه‌وه‌ی بارودۆخه‌ تا ببینه‌ ده‌ستپێشخه‌ری بۆیه‌ رازیببون تا ئاڵۆزتر نه‌بێت به‌ڵام ده‌سه‌ڵات و ده‌موده‌زگاكانی ده‌وڵه‌ت ده‌یانه‌وێت كاتمان لێ به‌فیرۆبده‌ن و كه‌مته‌رخه‌می ده‌كه‌ن و بۆیه‌ كێشه‌كه‌ له‌سه‌ر پشتی تیمساح به‌رێوه‌ ده‌چێت، بۆیه‌ دوا په‌یامی ئه‌وه‌مان ئه‌وه‌یه‌ كه‌ ئێمه‌ راناوه‌ستین له‌سه‌ر ئه‌وه‌ی كه‌ ئه‌و بینایه‌ وه‌ربگرینه‌وه‌ یا وه‌رینه‌گرینه‌وه‌ هه‌رچه‌ند ئێمه‌ كاری خۆمان كردوه‌، به‌ڵام ئه‌گه‌ر ئێمه‌ له‌ وه‌رگرتنه‌وه‌و چاككردنه‌وه‌ باره‌گاكه‌مان سه‌رنه‌كه‌وین ئه‌وا باره‌گایه‌كی تری نوێ ده‌كه‌ینه‌وه‌ یا هه‌مان باره‌گا سووتاوه‌كه‌ خۆمان چاكبكه‌ینه‌وه‌.

شه‌قام: واته‌ تا ئێستا ئێوه‌ سكاڵای یاساییتان تۆمار نه‌كردوه‌؟

سه‌ڵاح مه‌زن: به‌ڵإ سكاڵای یاسایمان تۆمار نه‌كردوه‌ له‌به‌ر ئه‌و هۆكاره‌ی باسمكرد.

شه‌قام: به‌ڵام هه‌ست ناكه‌ن ئێوه‌ هه‌ڵه‌ بووینه‌ له‌ تۆمارنه‌كردنی سكاڵای یاسایی كه‌ تۆمارتان نه‌كردوه‌؟

سه‌ڵاح مه‌زن: ده‌زانی چۆنه‌، ئه‌وكاته‌ی كه‌ باره‌گاكانی هه‌ولێر سوتێندران و تاڵانكرا ئێمه‌ خه‌ڵكێكمان راسپارد تا بچن سكاڵایی یاسای تۆمار بكه‌ن، به‌ڵام ئه‌و خه‌ڵكانه‌ی كه‌ بۆ ئه‌و كاره‌ راسپێردرابوون خۆیان له‌ ژێر هه‌ڕه‌شه‌و و فشاردا بوون دواتر تۆ سكاڵا له‌ كوی تۆمارده‌كه‌ی، ئه‌وه‌ی كه‌ خۆی باره‌گای ئێمه‌ سووتان یاسایه‌ داموده‌زگاكان به‌ ده‌ستی خۆیه‌تی، تۆ ده‌چی له‌ پۆلیس سكاڵا تۆمار ده‌كه‌ی باشه‌ خۆ باره‌گاكانمان له‌ژێر ده‌سه‌ڵاتی ئه‌وان سوتێندراو خۆ ئێمه‌ باره‌گاكانمان سپارد به‌ ده‌سه‌ڵات بۆ ئه‌وه‌ی بیپارێزی به‌ڵام بینیمان سوتێندرا، بۆیه‌ ئه‌وكات نه‌مانتوانی یه‌كسه‌ر تۆماری بكه‌ین دواتریش پێیان باش بوو له‌چوارچێوه‌ی سیاسی چاره‌سه‌ری بكه‌ین، ئه‌گه‌ر ئێستاش سكالا تۆمار بكه‌ین ئه‌وا بێگومان زیاتر له‌ 6 مانگی ده‌وێت تا كاره‌كان به‌ ئه‌نجام ده‌گه‌یه‌نین بۆیه‌ ئێمه‌ چاوه‌ڕوانی ئه‌وكاته‌ ناكه‌ین.

شه‌قام: ئێوه‌ وه‌ك بزووتنه‌وه‌ی گۆران ده‌زانن كی باره‌گاكه‌ی ئێوه‌ی سووتاند؟

سه‌ڵاح مه‌زن: بكه‌ره‌كانی سوتاندنی باره‌گاكانمان دیاره‌و دیاره‌ به‌ به‌رنامه‌یه‌كی پێشوه‌خت بووه‌و هه‌ر له‌سه‌ر زاری ئه‌ندامێكی ئه‌نجومه‌نی سه‌ركرایه‌تی پارتی دیموكراتی كوردستان ده‌ڵێت چه‌ند خه‌ڵكێكی نامه‌سئول له‌ پارتی دیموكراتی كوردستان ئه‌و كاره‌یان ئه‌نجامداوه‌.

شه‌قام: ئێوه‌ ناسنامه‌یان ده‌زانن و ده‌زانن كێ بوون؟

سه‌ڵاح مه‌زن: ئه‌وه‌یان به‌ نهێنی لایخۆمان ده‌مێنێته‌وه‌، په‌یوه‌ندی به‌ بزووتنه‌وه‌ی گۆران هه‌یه‌.

شه‌قام: باشه‌ به‌نیاز نین له‌ داهاتوو بكه‌رانی ئه‌وكاره‌ بده‌نه‌ دادگا؟

سه‌ڵاح مه‌زن: هه‌ر تاوانێك كه‌ رووده‌دات كۆنیش بێت به‌ڵام تاوانه‌كه‌ به‌سه‌ر ناچێت سه‌یری مێژوو بكه‌ین پاش نزیكه‌ی 100 ساڵ ئێستا تاوانی ئه‌رمه‌نیه‌كان سه‌رهه‌ڵده‌داته‌وه‌ كه‌واته‌ تاوان كۆن نابێت و تاوانبارانیش له‌بیر ناكرێت.

شه‌قام: ئێوه‌ وه‌ك بزووتنه‌وه‌ی گۆڕان ده‌زانن ئه‌و زیانانه‌، به‌ به‌های چه‌نده‌ كه‌ لێتان كه‌وتووه‌؟

سه‌ڵاح مه‌زن: پاره‌ لای ئێمه‌ گرنگ نیه‌، چونكه‌ ئێمه‌ ده‌مانه‌وێت باره‌گاكانمان بۆ چاكبكرێته‌وه‌ تا كاری خۆمان بكه‌ین ده‌كرێت ئه‌و باره‌گایه‌ به‌ برێك پاره‌ی زۆر یا كه‌متر یا زۆر كه‌متر چاكبكرێته‌ ئێمه‌ ئاماده‌ین له‌سه‌ر كورسی پلاستیكیش دابنیشین تا ئیش و كاره‌كانی خۆمان بكه‌ین.

شه‌قام: ئێوه‌ هیچ مه‌رجتان هه‌یه‌ له‌ كاتی وه‌رگرتنه‌وه‌ی باره‌گاكانتان؟

سه‌ڵاح مه‌زن: پێمانباشه‌ ده‌سه‌ڵاتی سیاسی ئه‌وه‌ی ئه‌و تاوانه‌ی ئه‌نجامداوه‌ كه‌ مه‌كۆی بزووتنه‌وه‌ی گۆرانی سوتاند پێویسته‌ داوای لێبوردن له‌ هه‌موو خه‌ڵكی شاری هه‌ولێر بكات و دوای لێبوردن له‌ پرۆسه‌ی دیموكراسی كوردستان بكات كه‌ خۆیان به‌ ده‌ستی خۆیان ناشرینیان كرد، كه‌ ئه‌وان هه‌میشه‌ شانازیان پێوه‌ ده‌كرد، چونكه‌ سوتاندنی مه‌كۆیه‌كی ئۆپۆزسیۆنی سیاسی مه‌ده‌نی له‌ پایته‌خی هه‌رێم زه‌ره‌ورو زیانێكی گه‌وه‌ره‌ بوو.

شه‌قام: ئێوه‌ وه‌ك رێكخستنه‌كانی گۆڕان له‌ شاری هه‌ولێر تا چه‌ند كارتان بۆ كۆنگره‌ی یه‌كه‌می بزووتنه‌وه‌ی گۆڕان كردووه‌ كه‌ به‌نیازن ئه‌نجامی بده‌ن؟

سه‌ڵاح مه‌زن: به‌شێوه‌یه‌كی گشتی له‌نێو بزوتنه‌وه‌ی گۆڕان ئاماده‌كاری هه‌یه‌ بۆ ئه‌نجامدانی كۆنگره‌، ئه‌وه‌ش ده‌بینین كه‌ كۆنفراسه‌كانی له‌ ده‌ره‌وه‌ ده‌ستیان پێكردوه‌و له‌شاری سلێمانیش ئاماده‌كاری هه‌یه‌ دیاره‌ له‌ شاری هه‌ولێریش ره‌وشێكی تایبه‌ت هه‌یه‌ به‌ڵام ئێمه‌ له‌ هه‌مو كاتێك ده‌توانین ئاماده‌كاری بۆ كۆنگره‌ بكه‌ین هه‌ر كاتێكیش بمانه‌وێت ده‌توانین ده‌ستپێبكه‌ین.

شه‌قام: تۆ باسی ئه‌وه‌ت كرد كه‌ ئێوه‌ زیاتر 100 هه‌زار ده‌نگتان هێناوه‌ له‌ شاری هه‌ولێر، ئایا ده‌نگه‌كانتان وه‌ك خۆی ماوه‌، یا لاواز بووه‌ له‌ شاری هه‌ولێر؟

سه‌ڵاح مه‌زن: ئێمه‌ هه‌ست به‌وه‌ناكه‌ین كه‌ گۆڕانكاری له‌ ده‌نگه‌كان روویدابێت به‌ڵكو زیاتر بوونه‌، له‌به‌ر ئه‌وه‌ی له‌و هه‌موو بارودۆخه‌ی كه‌ روویدا گۆڕانخوازان له‌ چوارچێوه‌ی بزووتنه‌وه‌ی گۆڕان ئه‌گه‌ر به‌ زه‌رده‌خه‌نه‌ش بێت خۆیان له‌ بزووتنه‌وه‌ی گۆڕان ده‌دۆزنه‌وه‌ دیسان داواكارییه‌كانی خه‌ڵك زیاتربووه‌و ئێمه‌ش به‌بۆچوونی خۆمان به‌پێی ئه‌و پێوه‌ری كه‌ هه‌مانه‌ به‌ تێڕوانی ئێمه‌و دۆستان و لایه‌نگرانمان زیادی كردووه‌.

شه‌قام: له‌و ماوه‌ی كه‌ وه‌ك به‌رپرسی ئه‌و بزووتنه‌وه‌یه‌ له‌ شاری هه‌ولێر ده‌ست به‌كاربوی هیچ كاتێك هه‌ستت به‌وه‌ كردوه‌ كه‌ خه‌ڵك به‌ ترسه‌وه‌ بێته‌ لاتان؟

سه‌ڵاح مه‌زن: به‌گشتی له‌ شاری هه‌ولێر دێوه‌زمێیه‌كی تر هه‌یه‌، ئه‌و دێوه‌زمه‌یه‌ش وه‌ك نه‌ریتێكه‌ له‌ كۆنه‌وه‌ ره‌نگه‌ مابێت ته‌نانه‌ت له‌ سه‌رده‌می دیكتاتۆریه‌تی به‌عسیش شاری هه‌ولێر به‌ده‌یان دامه‌زراوه‌ی پۆلیس و ئاسایش و سوپاو هێزی تایبه‌تی هه‌بووه‌، بۆیه‌ هه‌ولێر هه‌رده‌م بۆ تۆقاندن تۆربه‌ندی كراوه‌ له‌دوای راپه‌رینیش هه‌ولێر گۆره‌پانی شه‌ڕی ناوخۆ بووه‌، گۆره‌پانی هه‌وڵدان بۆ ره‌شكردنه‌وه‌ی یه‌كتر بووه‌ به‌تایبه‌تی بۆ بزووتنه‌وه‌یه‌كی وه‌ك گۆڕان كه‌ تووشی هه‌ڕه‌شه‌و راونان و سوتاندنی مه‌كۆ له‌و ره‌وشه‌ بزووتنه‌وه‌ی گۆران له‌ژێر هه‌ره‌شه‌دابوو بۆیه‌ ترس شتێكی ئاساییه‌ هه‌یه‌، هه‌ستیشی پێده‌كردێت، به‌تایبه‌تی خه‌ڵكی رووناكبیر و ته‌كنۆكرات و خه‌ڵكی ده‌ستبژێری ئه‌و شاره‌ ده‌سته‌مۆ كراون به‌ كۆمه‌لێك ئیمتیازات و ماف بۆیه‌ دوو شت تێكه‌ڵ بووه‌ له‌ لایه‌ك ترس له‌لایه‌كی تریش به‌رژه‌وه‌ندی، به‌ڵام ئێمه‌ ده‌مانه‌وێت ئه‌و چوارچێوه‌یه‌ بشكێنین بۆ ئه‌وه‌ی خه‌ڵك ده‌ستبه‌رداری به‌رژه‌وه‌ندیه‌كانی خۆیان بن و خۆیان له‌نێو به‌رژه‌وه‌ندیه‌كانی خه‌ڵكدا بدۆزنه‌وه‌ و ئه‌و ترسه‌ش بڕه‌ێته‌وه‌.

شه‌قام: دوای ئه‌وه‌ی كه‌ له‌سه‌ر ئاستی باڵا باس له‌ ئاساییكردنه‌وه‌ی په‌یوه‌ندی نێوان بزووتنه‌وه‌ی گۆران و یه‌كێتی كرا، به‌ڵام هه‌ر زوو به‌هۆی هێرشه‌ راگه‌یاندنه‌كانیانه‌وه‌ ئه‌و هه‌وڵه‌ پوكایه‌وه‌ به‌ تایبه‌تی ئه‌وكاته‌ی كه‌ میدیای ئه‌و بزووتنه‌وه‌ جۆرێك له‌ فه‌شه‌لی حكومه‌تی دوو ساڵی رابردووی هه‌رێمی كوردستان پشانده‌دا، پاشانیش یه‌كێتی له‌ رێگه‌ی میدیاكانیه‌وه‌ وه‌ڵامی بزووتنه‌وه‌ی گۆڕانی دایه‌وه‌؟ تۆ وه‌ك به‌رپرسی یه‌كه‌می ئه‌و بزووتنه‌وه‌ له‌شاری هه‌ولێر خوێندنه‌وه‌ت چیه‌؟

سه‌ڵاح مه‌زن: بزووتنه‌وه‌ی گۆڕان له‌گه‌ڵ هه‌موو بزووتنه‌وه‌یه‌كی سیاسی كۆمه‌ڵایه‌تی كه‌ له‌سه‌ر گۆره‌پانی كوردستان كاربكات به‌بی هیچ مه‌رجێكی پێشینه‌ په‌یوه‌ندی ده‌گرێت له‌سه‌ر بنه‌مای رێزگرتن له‌یه‌كتر، ئێمه‌ له‌ شاری هه‌ولێریش ده‌توانین له‌سه‌ر هه‌موو ئاسته‌كانی حزبی و مه‌ده‌نی و حكومی ده‌توانین په‌یوه‌ندی بكه‌ین له‌سه‌ر بنه‌مای به‌رژه‌وه‌ندی هاوبه‌ش له‌سه‌ر بنه‌مای ئه‌و كه‌ خزمه‌ت به‌ گه‌له‌كه‌مان بكه‌ین له‌ سیاسیه‌تیش نه‌ دۆستایه‌تی تا سه‌ر و دوژمانه‌یتی تا سه‌ر نیه‌، به‌ڵام به‌ تێڕوانی من په‌یوه‌ندی نێوان بزووتنه‌وه‌ی گۆران و یه‌كێتی خه‌ڵك زۆر باسی ئه‌وه‌ ده‌كه‌ن كه‌ له‌نێو بزووتنه‌وه‌ی گۆران بیربۆچوونی جیاجیا هه‌یه‌، به‌ڵام من ئه‌وه‌ ده‌بینیم كه‌ له‌نێو یه‌كێتی ئه‌و بۆچونه‌ جیاجیایانه‌ هه‌بێت له‌و په‌یوه‌ندی گرتنه‌، بۆ نموونه‌ ره‌نگه‌ هه‌بێت له‌نێو یه‌كێتی پێی باشه‌ بێت كه‌ بزووتنه‌وه‌ی گۆڕان به‌ره‌وپێش بچێت و به‌شێكی تریش پێی باش بێت كه‌ به‌ره‌وپێشه‌وه‌ نه‌چێت و به‌شێكی پێی باشه‌ له‌و نێوه‌نده‌ دابێت ئه‌وه‌شمان له‌و قه‌یرانانه‌ بینی كه‌ له‌ماوه‌ی رابردوو بارودۆخی سیاسی پێیداتێپه‌ری، به‌ڵام له‌گه‌ڵ هه‌موو ئه‌وانه‌ش من پێمباشه‌ له‌سه‌ر بنه‌مای به‌ژه‌وه‌ندی تایبه‌تی هه‌ردوولاو به‌رژه‌وه‌ندیه‌ گشتیه‌كان بزووتنه‌وه‌ی گۆڕان له‌گه‌ڵ هه‌موو حزب و رێكخراوه‌كان مه‌ده‌نی په‌یوه‌ندی هه‌بێت.

شه‌قام: ئه‌ی له‌گه‌ڵ پارتی؟

سه‌ڵاح مه‌زن: پێویسته‌ له‌گه‌ڵ پارتیش په‌یوه‌ندیمان هه‌بێت، راسته‌ ئێمه‌ پارتێكی ئۆپۆزسیۆنین و پارتیش پارتێكی ده‌سه‌ڵاته‌ ئێمه‌ ده‌مانه‌وێت لایه‌نه‌كان كه‌موكوری بۆ خه‌ڵك ده‌ستنیشان بیكه‌ن جا ئه‌و پارته‌ چه‌نده‌ قبوڵیه‌تی ئه‌وكاره‌ بكه‌ین و به‌رده‌وامیش ده‌بین چونكه‌ ئه‌و كاری ئێمه‌یه‌ وه‌ك ئۆپۆزسیۆن.

شه‌قام: مه‌به‌ستم ئه‌وه‌یه‌ كه‌ له‌دوا سه‌ردانی سه‌رۆكی پارتی بۆ لای رێكخه‌ری یه‌كه‌می بزووتنه‌وه‌ی گۆڕان هه‌ست به‌وه‌ ده‌كرێت كه‌ په‌یوه‌نده‌كه‌تان ئاسایی ببێته‌وه‌؟

سه‌ڵاح مه‌زن: په‌یوه‌ندی نێوان بزووتنه‌وه‌ی گۆران له‌گه‌ڵ پارتی یا یه‌كێتی له‌سه‌ر بنه‌مای ئه‌و چاكسازییه‌ كه‌ لایه‌نه‌ ئۆپۆزسیۆنه‌كان داویانه‌ به‌ ده‌سه‌ڵات، ئه‌گینا بزووتنه‌وه‌ی گۆڕان باوه‌ڕی به‌ په‌یوه‌ندی مه‌راسیمگێری نیه‌ كه‌ له‌نێوان حزبه‌كاندا هه‌یه‌ كه‌ ئه‌ و كه‌لتوره‌یان له‌شاخه‌وه‌ هێنایه‌ شار كه‌ تۆ سه‌ردانی حزبێك ده‌كه‌ین ده‌بێت كۆمه‌لێك ئۆتۆمبیل رێز بكه‌یت ئه‌و بێت پێشوازیت لێبكات، كه‌چی قسه‌كان هه‌موو دوباره‌ ده‌بنه‌وه‌، بۆیه‌ په‌یوه‌ندی لای ئێمه‌ شێوازێكی تری وه‌رگرتوه‌ په‌یوه‌ندیه‌كه‌ له‌سه‌ر بنه‌مای كارو شتی تازه‌یه‌.

شه‌قام: تۆ وه‌ك هه‌ڵسوراوێكی بزووتنه‌وه‌ی گۆڕان تا چه‌ند پێتباشه‌ گۆڕان به‌شداری حكومه‌تی دوو ساڵی داهاتووی حكومه‌تی هه‌رێم بكات؟ یا به‌ پێچه‌وانه‌ پێتباشه‌ ئه‌و دوو ساڵه‌ش خه‌ریكی كاری ئۆپۆزسیۆنی بێت؟

سه‌ڵاح مه‌زن: ئۆپۆزسیۆن ئامانجی ئه‌وه‌یه‌ كه‌ بگاته‌ ده‌سه‌ڵات كه‌ گه‌یشته‌ ده‌سه‌ڵات ئه‌وكات وه‌ك پارتێكی ئۆپۆزسیۆن نامێنی و پارتی تر ئه‌و كاره‌ بكه‌ن، بزووتنه‌وه‌ی گۆران ره‌وشێكی وای دروستكرد كه‌ ئه‌و بزووتنه‌وه‌ی گۆرانخوازی نێو كۆمه‌ڵگای كوردی به‌رده‌وام بێت ته‌نانه‌ت به‌یانی ئه‌گه‌ر بزووتنه‌وه‌ی گۆڕان شكستیش بخوات ئه‌وا ده‌یان چالاكوانی مه‌ده‌نی و سیاسی و خه‌ڵكی دیموكراتخواز سه‌رده‌رده‌هێنن جا بزووتنه‌وه‌ی گۆران ئامانجی ته‌نیا وه‌رگرتنی ده‌سه‌ڵات نیه‌ ئامانجی ئه‌وه‌یه‌ كه‌ سه‌رجه‌م كۆمه‌ڵگای كوردی بگه‌ی و چۆن گۆرانكاری له‌نێو سیسته‌می سیاسیدا بكه‌یت و چۆن ده‌تزانی ده‌ستورێكی دیموكرات به‌رهه‌م بهێنین كه‌واته‌ شه‌ر له‌سه‌ر سه‌ندوقی ده‌نگدان ده‌كه‌ین تا بتوانین نوێنه‌رانی كارمه‌و لێهاتوو له‌ده‌ستبژێری خه‌ڵك و رووناكبیران بگه‌ینینه‌ په‌رله‌مان تا داكۆكی له‌ مافه‌كانی خه‌ڵك بكه‌ن، ئینجا حكومه‌تێكی ته‌كنۆكرات جا شه‌رت نیه‌ ئه‌و كه‌سانه‌ له‌نێو بزووتنه‌وه‌ی گۆڕاندا بن ئه‌وه‌ مه‌رجی ئێمه‌ نیه‌ ئێمه‌ ده‌مانه‌وێت خه‌ڵكی كارامه‌ و لێهاتوو بهێنین تا خزمه‌ت به‌ به‌رژه‌وه‌ندیه‌كانی خه‌ڵك بكات، جا به‌شداریكردن دوو راونگه‌ی هه‌یه‌ تۆ به‌شداری ده‌كه‌ی له‌ چوارچێوه‌ی به‌رنامه‌ی حزبێكی تر كه‌ ئه‌و به‌رنامه‌ سه‌ره‌كییه‌ی حكومه‌ته‌ كه‌به‌رێوه‌ی ببات یا تۆ به‌شداری ده‌كه‌ی له‌ چوارچێوه‌ی به‌رنامه‌یه‌كی نیشتمانی هاوبه‌شی هه‌مه‌لایه‌ن كه‌ هه‌موولایه‌ك به‌شداری دارشتنی ئه‌و به‌رنامه‌یه‌ بكه‌ن یا كاتێك گۆڕان ده‌نگی ته‌واوی هێنا خۆی به‌رنامه‌ی حكومه‌ت دابرێژێت له‌و چوارچێوه‌ به‌شداری هه‌موو حكومه‌تێك ده‌كه‌ین و هه‌ر سیاسیه‌ك ئه‌گه‌ر باوه‌ڕی به‌وه‌ نه‌بێت كه‌ ده‌گاته‌ ده‌سه‌ڵات با واز له‌ سیاسه‌ت بهێنێت.

شه‌قام: ئه‌ی خوێندنه‌وه‌ت بۆ حكومه‌تی دووساڵی رابردووی هه‌رێم چۆنه‌؟

سه‌ڵاح مه‌زن: له‌وكاته‌دا ناتوانم خوێندنه‌وه‌ی بۆ بكه‌م، به‌ڵام كۆمه‌ڵێك پێوه‌ر هه‌یه‌ كه‌ ده‌توانین كاری له‌سه‌ر بكه‌ین بۆ هه‌ڵسه‌نگاندنی حكومه‌ت، له‌وانه‌ تا چه‌ند ئه‌و حكومه‌ته‌ توانیویه‌تی بارودۆخی كوردستان ئاسایی بكاته‌وه‌ یا داهاتی تاك به‌ره‌و به‌رزبوونه‌وه‌ ببات، كه‌ به‌ پێی دوا ئامار رێژه‌یه‌كی زۆر بێكارمان هه‌یه‌، كۆمه‌لێك پێوه‌ری ده‌ولی هه‌یه‌، بۆیه‌ من ناڵێم سه‌ركه‌وتوو بوو، ناشڵم سه‌ركه‌وتووش نه‌بوو به‌ڵام ده‌كرا زۆر كاری باشتری بكردبوایه‌، به‌ڵام به‌هۆی ئه‌و هه‌ڵانه‌ی كه‌ تێده‌كه‌وێت به‌ تایبه‌تی مه‌سه‌له‌ی رۆتین و گه‌نده‌ڵی جیاوازی كردن له‌نێو چیانایه‌تی خه‌ڵك و نه‌بوونی ده‌رفه‌تی یه‌كسان بۆ خه‌ڵك و نه‌هێنانه‌ دی به‌لێنه‌كانی به‌رنامه‌كه‌ی كه‌ به‌خه‌ڵكی دابوو نه‌یتوانی كار بكات.

شه‌قام: بۆچوونی تۆ له‌سه‌ر ده‌ست له‌كاركێشانه‌وه‌ی ئه‌و 4 په‌رله‌منتاری گۆران چیه‌؟

سه‌ڵاح مه‌زن: كارێكی ئاساییه‌ چونكه‌ هه‌ر كه‌سێك بیه‌وێت به‌ خواستی خۆی به‌شداری له‌كار سیاسی بكات و بۆیه‌ به‌ ئاسایی ده‌یبینم.

شه‌قام: ئه‌گه‌ر سه‌ڵاح مه‌زن له‌ جێگه‌ی ئه‌وان بوایه‌ هه‌مان هه‌ڵوێستی ده‌بوو یا درێژه‌ی به‌كاری په‌رله‌مانتاری ده‌دا؟

سه‌ڵاح مه‌زن: من ئه‌گه‌ر ئه‌ندامی په‌رله‌مان بومایه‌ وازم نه‌ده‌هێنا چونكه‌ په‌رله‌مان مینبه‌رێكی گرنگه‌ تا بتوانم داكۆكی له‌ماف و ئاخوازییه‌كانی خه‌ڵك بكه‌م.

شه‌قام: چۆن ئه‌دای په‌رله‌مانتاری بزووتنه‌وه‌ی گۆران ده‌بینی؟

سه‌ڵاح مه‌زن: بزووتنه‌ووه‌ی گۆڕان له‌سه‌ر چه‌ند ئاستێك كاری كردوه‌ له‌ نێوه‌ جیاجیاكانیش ئه‌وه‌ ده‌بیندرا، جا تواندراوه‌ بزووتنه‌وه‌ی گۆران وه‌ك بزووتنه‌وه‌كی داكۆكار له‌ مافی خه‌ڵك بناسێنین، فراكسیۆنه‌كانی بزووتنه‌وه‌ی گۆرانیش به‌تایبه‌تی له‌ په‌رله‌مانی كوردستان رۆلێكی باشیان گێڕاوه‌ توانیویانه‌ ببنه‌ جێگه‌ی روانگه‌ی خه‌ڵك و خۆشه‌ویستی خه‌ڵك چونكه‌ داكۆكیان له‌ مافی خه‌ڵك كردوه‌ كاری باشیان كردوه‌ به‌ڵام له‌ كه‌موكورتی به‌ده‌رنیه‌ كه‌ وه‌ك ده‌بیستمه‌وه‌ له‌نێوخۆشیان له‌په‌رله‌مان به‌یه‌ك تیم كارناكه‌ن، كه‌ ئه‌مه‌ش زۆر گونجاوه‌ كه‌ ئه‌ندام په‌رله‌مانی بزووتنه‌وه‌ی گۆرانیش هه‌ر یه‌كه‌و تێڕوانینی خۆی هه‌بێت بۆ مه‌سه‌له‌كان دڵنیاشم هه‌موو له‌و ئاسته‌دان كه‌ خزمه‌ت به‌ هاوڵاتیان بكه‌ن، بۆیه‌ به‌گشتی كارو چالاكی باشیان كردوه‌.

شه‌قام: ئه‌ی ئه‌وانه‌ی په‌رله‌مانی عێراق؟

سه‌ڵاح مه‌زن: من به‌ تایبه‌ت باسی په‌رله‌مانتاره‌كانی گۆران ناكه‌م، به‌ڵام ئه‌وه‌ ده‌ڵێم كه‌ هه‌موو په‌رله‌مانتاره‌كانی كورد له‌ به‌غدا وه‌ك پێویست و چالاكانه‌ كاریان نه‌كردوه‌ ئه‌و هه‌موو ئه‌و پرسانه‌ی نێوان هه‌رێم وعێراق بوروێژنن و به‌لێنه‌كانی به‌ خه‌ڵكیان دابوو كاری بۆ بكه‌ن مانای ئه‌وه‌ش نیه‌ كه‌ هیچیان نه‌كردبێت، ئه‌وه‌ ده‌زانین كه‌ راسته‌ ئه‌وان له‌ژێر بارودۆخێكی تایبه‌ت له‌ به‌غدا كار ده‌كه‌ن به‌ڵام ده‌كرا كاری باشتر بكه‌ن.

شه‌قام: وه‌ك بزووتنه‌وه‌ی گۆران به‌رنامه‌تان چیه‌ بۆ هه‌ڵبژاردنی پارێزگاكان؟

سه‌ڵاح مه‌زن: ئه‌و باسه‌ تا ئێستا هیچكات به‌رنامه‌ی بۆ دانه‌ندراوه‌ هه‌ركاتی كات و به‌رنامه‌ی بۆ داندرا ئه‌وكات ده‌كه‌وینه‌ خۆ، به‌ڵام ده‌بێت ئه‌وه‌ بزانین كه‌ ئه‌و ئه‌نجومه‌نه‌ی ئێستای پارێزگای هه‌ولێر ئه‌نجومه‌نێكی مردووه‌ چونكه‌ ته‌نیا پارێزگار به‌ ته‌نیا كاره‌كه‌ی به‌رێوه‌ده‌بات بۆیه‌ ئێمه‌ ده‌مانه‌وێت ده‌سه‌ڵاته‌كان بگۆرین، جا ده‌رچوونی پارێزگاكان ده‌بێت ئه‌و مه‌سه‌له‌یه‌ یه‌كلابكاته‌وه‌ و ئه‌وكات ده‌مانه‌وێت خه‌ڵكی ته‌كنۆكرات و شاره‌زاو لێهاتوو و دڵسۆز بێت مه‌رج نیه‌ له‌ بزووتنه‌وه‌ی گۆرانیش بێت ئێمه‌ پشتگیریان ده‌كه‌ین.

شه‌قام: بزووتنه‌وه‌ی گۆڕان له‌ هه‌ڵبژاردنی پارێزگاكان به‌ لیستی سه‌ربه‌خۆ به‌شدار ده‌كات یان لیستی هاوبه‌ش دروستده‌كات؟

سه‌ڵاح مه‌زن: تا ئێستا ئه‌و پرسه‌ یه‌كلانه‌كراوه‌ته‌وه‌و ده‌بێت له‌گه‌ڵ لایه‌نه‌كانی ئۆپۆزسیۆن دابنێیشت بۆ یه‌كلاكردنه‌وه‌ی.

شه‌قام: ئێوه‌ تا چه‌ند ئه‌و به‌لێنه‌ی كه‌ به‌ خه‌ڵكتان دابوو له‌ 25/7 كارتان له‌سه‌ر كردوه‌؟

سه‌ڵاح مه‌زن: بزووتنه‌وه‌ی گۆرانیش به‌ده‌ر نیه‌ له‌كۆمه‌ڵێك كه‌موكورتی، چونكه‌ تا ئێستا كه‌لتورێكی پارته‌ سونه‌تیه‌كان به‌سه‌ر بزووتنه‌وه‌ی گۆران ماوه‌ ئه‌و به‌لێنامه‌ی كه‌ بزووتنه‌وه‌ی گۆران ده‌یدات به‌لێن شتێكه‌و و جێبه‌جێكردنیش شتێكی تره‌ جا ئه‌وه‌ ده‌بێت خه‌ڵك ئه‌وه‌ هه‌ڵبسه‌نگێنێت بۆ ئه‌وه‌ی بزانین تا چه‌ند بزووتنه‌وه‌ی گۆران وه‌فادار بووه‌ له‌ به‌لێنه‌كانی بۆ خه‌ڵك، به‌ڵام له‌به‌رئه‌وه‌ی بزووتنه‌وه‌ی گۆران له‌ ره‌وشێكی ئاسایی نه‌ژیاوه‌ ناكرێت پێوانه‌ی بۆ بكرێت.

شه‌قام: سه‌باره‌ت به‌ كۆبوونه‌وه‌ی پێنج قۆڵیه‌كه‌ی نێوان ده‌سه‌ڵات و ئۆپۆزسیۆن ئایا ده‌ست پێده‌كاته‌وه‌ یا تا مه‌رجه‌كان جێبه‌جێنه‌كرێت ده‌ست پێناكاته‌وه‌؟

سه‌ڵاح مه‌زن: ئه‌و 4 مه‌رجه‌ ته‌نیا بۆ ئه‌وه‌یه‌ كه‌ بارودۆخه‌كه‌ بگه‌رێندرێته‌وه‌ پێش 17ی شوبات، چونكه‌ ئه‌و هه‌موو زه‌ره‌روزیانی كه‌ ده‌سه‌ڵات له‌ خۆی و پارته‌كانی ئۆپۆزسیۆن و ره‌وشی ئارامی كوردستانی دا، بۆ ئه‌وه‌یه‌ كه‌ بگه‌رێنیه‌وه‌ ئه‌وكاته‌، به‌ڵام ئه‌و پرۆژه‌ چاكسازه‌ی كه‌ ئۆپۆزسیۆن داوه‌یه‌تی به‌ ده‌سه‌ڵاتی سیاسی ئه‌وه‌ گرنگه‌ و هه‌مه‌لایه‌نه‌ بۆ چاكسازی بنه‌ره‌تی له‌ حكومه‌ت، هه‌رچه‌نده‌ له‌ ئاستی ده‌سه‌ڵات ئه‌وه‌ هه‌یه‌ كه‌ بگه‌ڕێینه‌وه‌ بۆ كۆبوونه‌وه‌كان كۆبووه‌نه‌وه‌ بكه‌ن له‌ پێناو كۆبوونه‌وه‌، هه‌میشه‌ سه‌رقاڵت بكه‌ن له‌ پێناو كۆبوونه‌وه‌.

سه‌ڵاح مه‌زن:

* پێشتر ئه‌ندامی سه‌ركردایه‌تی شیوعیه‌ كوردستانیه‌كان بوو ساڵی 1992-1993 *ئه‌ندامی مه‌كته‌بی سیاسی پارتی كاری سه‌ربه‌خۆ بووه‌ له‌ 1993-1995، *یه‌كه‌م سه‌رنووسه‌ری رۆژنامه‌ی رزگاری بووه‌، *سه‌رۆكی كۆمه‌ڵه‌ی وه‌فای خێرخوازی ساڵی 1998-2000، *به‌رێوه‌به‌ری بنكه‌ی رووناكبیری رۆژ ساڵی 2000-2003، *سه‌رۆكی سه‌نته‌ری داهێن ساڵی 2004 -2009، *راوێژكاری رۆژنامه‌ی هاوڵاتی بووه‌ له‌ ساڵی 2007، *ساڵی 2002 – 2008 سه‌رپه‌رشتیاری ناوه‌ندی چاك بووه‌ له‌ هه‌رێمی كوردستان، *ئێستاش به‌رپرسی یه‌كه‌می بزووتنه‌وه‌ی گۆران له‌شاری هه‌ولێر.

تێبینی

ئه‌م دیمانه‌یه‌ له‌ ژماره‌ 219 گۆڤاری (شه‌قام) بڵاوكراوه‌ته‌وه‌


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.