Red Purple Black

رێگا ره‌ئوف: هۆشیاریی سێكسی لای تاكی كورد له‌ ئاستێكی زۆر نزمدایه‌ ... دیمانه‌: ستیڤان شه‌مزینانی

PDFPrintE-mail

  • شتێكی سه‌یر و نامۆ نییه‌ ئه‌گه‌ر ژن سێكس وه‌ك شتێكی ناشرین و بڤه‌ سه‌یر بكات
  • په‌یوه‌ندیی نێوان ژن و پیاو ته‌نیا سێكس نییه‌، به‌ڵكو ده‌كرێت په‌یوه‌ندییه‌كی ساده‌ و هاوڕێیانه‌ بێت
  • شه‌رع رێگه‌ نادات به‌وه‌ی باس له‌ مه‌سه‌له‌ی سێكس بكرێت وه‌ك شتێكی ژیانی و ساده‌

رێگا ره‌ئوف كۆمه‌ڵناس و نووسه‌ر و هه‌ڵسوڕاوی ژنان و خاوه‌نی په‌رتووكی "هاوارێك له‌ كوردستانه‌وه‌" له‌م دیمانه‌ تایبه‌تی "شه‌پۆل"دا باس له‌ په‌یوه‌ندیی نێوان هه‌ردوو ره‌گه‌زه‌كه‌ و هۆشیاریی سێكسیی و هۆكاره‌كانی نه‌بوونی هۆشیاریی سێكسیی له‌ كۆمه‌ڵی كورده‌وارییدا ده‌كات.

شه‌پۆل: گرنگیی دروستكردنی هۆشیاریی سێكسیی لای تاكی كورد، چۆن ده‌بینیت؟. پێتوانییه‌ راگه‌یاندنی كوردیی هێشتا شه‌رم له‌ ورووژاندنی بواری سێكس ده‌كاته‌وه‌؟.

رێگا ره‌ئوف: هۆشیاریی كۆمه‌ڵایه‌تی له‌ هه‌موو كۆمه‌ڵگه‌یه‌كدا مه‌سه‌له‌یه‌كی گرنگ و ژیانییه‌ بۆ تاكه‌كانی كۆمه‌ڵ، چوون هۆشیاریی ته‌نیا ئاگادارت ناكاته‌وه‌ له‌ مه‌سه‌له‌ سیاسییه‌كانی ناو كۆمه‌ڵگه‌، به‌ڵكو ئاگادار و رۆشنت ده‌كاته‌وه‌ له‌ مه‌سه‌له‌ و كێشه‌ی تاكه‌كان به‌شێوه‌یه‌كی زانستییانه‌. هه‌ر شتێك له‌ناو كۆمه‌ڵگه‌دا خرایه‌ به‌ر باس و لێكۆڵینه‌وه‌ دوا ئه‌نجام تاكه‌كانی كۆمه‌ڵگه‌ رۆشن ده‌كاته‌وه‌ به‌شێوه‌یه‌ك به‌ ئازادانه‌ باسی لێبكرێت و زانستییانه‌ چاره‌سه‌ری بۆ دابنرێت. مه‌سه‌له‌ی رۆشنبیریی سێكسی له‌ناو كۆمه‌ڵگه‌ی ئێمه‌ مه‌سه‌له‌یه‌كی زۆر هه‌ستیار و بگره‌ قه‌ده‌غه‌ بووه‌، بۆیه‌ وه‌ك مه‌سه‌له‌یه‌كه‌ بێ گفتوگۆ ماوه‌ته‌وه‌ و قسه‌ و باسی زانستییانه‌ی له‌سه‌ر نه‌كراوه‌. به‌ رای من ئه‌م مه‌سه‌له‌یه‌ زۆر گرنگه‌ بخرێته‌ به‌ر باس و لێكۆڵینه‌وه‌ و ئاگاداركردنه‌وه‌ی تاكه‌كان لێی.

به‌ بڕوای من راگه‌یاندنی كوردیی به‌ده‌ر نییه‌ له‌و شێوه‌ بیركردنه‌وه‌یه‌ی له‌ناو كۆمه‌ڵگه‌دا ره‌واجی هه‌یه‌، زۆرترین راگه‌یاندن له‌سه‌ر مه‌سه‌له‌ سیاسییه‌كان ده‌كرێت، ئه‌مه‌ش شتێكی باشه‌، به‌ڵام مه‌سه‌له‌ كۆمه‌ڵایه‌تییه‌كان هاوكاتن له‌گه‌ڵ مه‌سه‌له‌ سیاسییه‌كان كه‌ سێكس وه‌ك كێشه‌یه‌كی كۆمه‌ڵایه‌تی پێموایه‌ كه‌مترین باسی لێكراوه‌، ئه‌مه‌ش هۆكاری زۆره‌ كه‌ راگه‌یاندن نه‌چێته‌ ناو ئه‌م باسانه‌وه‌. هۆكاره‌كه‌ی هه‌رچییه‌ك بێت بۆشاییه‌كی زۆر گه‌وره‌یه‌ له‌ كۆمه‌ڵگه‌ی كوردستاندا. چوون كاری راگه‌یاندن ته‌نیا لایه‌نێكی ژیانی تاك و كۆمه‌ڵ ناگرێته‌وه‌، به‌ڵكو ده‌بێت هه‌موو لایه‌نه‌كانی ژیان بگرێته‌وه‌، بۆیه‌ ئه‌م كه‌موكوڕییه‌ زۆر گه‌وره‌یه‌ بێگوومان هۆكاری زۆره‌ له‌وانه‌: ئاین، پیاوسالاریی، دابونه‌ریتی كۆمه‌ڵایه‌تی، جێگه‌ و رێگه‌ی ژن له‌ كۆمه‌ڵگه‌دا، یاسا و زۆر شتی تریش.

شه‌پۆل: هۆشیاریی سێكسیی لای تاكی كورد چۆن هه‌ڵده‌سه‌نگێنیت؟. رایه‌ك هه‌یه‌ پێیوایه‌ هۆشیاریی سێكسیی لای پیاوی كورد سفره‌ و لای ئافره‌تیش بڤه‌یه‌ و سڵه‌مینه‌وه‌ی زۆری له‌سه‌ره‌، تۆ له‌ مباره‌وه‌ چی ده‌ڵێت؟.

رێگا ره‌ئوف: ئه‌مه‌ مه‌سه‌له‌یه‌ شتێكی زۆر شاراوه‌ و نهێنییه‌ له‌لای تاكه‌كانی كۆمه‌ڵ، ته‌نانه‌ت له‌ خوێندندا نه‌بۆته‌ جێگه‌ی سه‌رنج و قسه‌ و باس و له‌ هه‌مووی گرنگتر بابه‌تێكی ته‌دریس نییه‌، له‌حاڵێكدا سێكس وه‌ك هه‌ر شتێكی تری گرنگی ژیان ده‌بوایه‌ و ده‌بێ ببێته‌ جێگه‌ی باس و لێكۆڵینه‌وه‌ی هه‌م تاك و هه‌م كۆمه‌ڵگه‌. نه‌بوونی ئه‌م باسه‌ به‌ رای من په‌یوه‌ندیی به‌چه‌ندین شته‌وه‌ هه‌یه‌، یه‌كه‌م مه‌سه‌له‌ی ئاین، كه‌ هه‌میشه‌ وه‌ك به‌ربه‌ستێك به‌كارده‌هێنرێ له‌وه‌ی مرۆڤه‌كان ئازاد بن له‌ هه‌ست و نه‌ست ده‌ربڕینیاندا و هه‌م له‌وه‌ی تاكه‌كان واته‌ ژن و پیاو له‌ یه‌كتر دوور ده‌خاته‌وه‌ و به‌ربه‌سته‌كه‌ پته‌وتر ده‌كات. دووه‌م مه‌سه‌له‌ی دابونه‌ریتی دواكه‌وتووانه‌یه‌، ئه‌مه‌شیان هه‌م سه‌رچاوه‌ له‌ ئاین وه‌رده‌گرێت و هه‌م له‌ یاساكان، ئه‌م دابونه‌ریته‌ به‌ جۆرێك سه‌یری سێكس ده‌كات نه‌ك گرنگ و پێویست نییه‌، به‌ڵكو وه‌ك شتێكی ناحه‌ز و ناشرین چاوی لێكردووه‌. پیاو له‌ كۆمه‌ڵگه‌ی ئێمه‌دا له‌ناو ئه‌م جۆره‌ په‌روه‌رده‌یه‌ گه‌وره‌ ده‌بێت بۆیه‌ هۆكاره‌كه‌ پیاوان نین، به‌ڵكو جۆری په‌روه‌رده‌ی كۆمه‌ڵایه‌تییه‌ وایكردووه‌ ئه‌وانیش به‌و جۆره‌ بیر بكه‌نه‌وه‌، هه‌رچه‌نده‌ من ناڵێم سفره‌، به‌ڵام به‌داخه‌وه‌ هۆشیاریی سێكسی لای تاكی كورد به‌ ژن و پیاوه‌وه‌ له‌ ئاستێكی زۆر نزمدایه‌.

مه‌سه‌له‌یه‌ك ئه‌وه‌نده‌ قه‌ده‌غه‌ بێت و ئه‌وه‌نده‌ دیوار و رێگریی بۆ دروست كرابێت، بێگوومان ده‌بێته‌ شتێكی نه‌شاز و ناشرین و مانا ئه‌سڵییه‌كه‌ی خۆی له‌ ده‌ستده‌دا. سێكس له‌ جێی ئه‌وه‌ی وه‌ك مه‌سه‌له‌یه‌كی خۆشنودیی چاو لێبكرێت، وه‌ك شتێكی ناشرین و عه‌یبه‌ سه‌یر ده‌كرێت و ئه‌مه‌ش ده‌بێته‌ هۆی ئه‌وه‌ی له‌سه‌ر تاكه‌كان ره‌نگ بداته‌وه‌. ژن وه‌ك تاكێكی ناسه‌ربه‌ست و نائازاد به‌ مافه‌كانی خۆی و به‌تایبه‌ت مه‌سه‌له‌ی سێكس یه‌كه‌یه‌كی جیاواز نییه‌ له‌و كۆمه‌ڵگه‌یه‌. ژن كه‌ مافی ژیان به‌ ده‌ستی خۆی نه‌بێت ئیتر چۆن مه‌سه‌له‌ی سێكس وه‌ك شتێكی جوان یان خۆش چاو لێده‌كات؟. ئه‌وه‌شمان بیر نه‌چێت كوشتنی ژن هۆكاری سه‌ره‌كی ئه‌م مه‌سه‌له‌یه‌ بووه‌، بۆیه‌ ئه‌گه‌ر ژن هه‌م بترسێت و هه‌م سێكس وه‌ك شتێكی ناشرین و بڤه‌ سه‌یر بكات، شتێكی سه‌یر و نامۆ نییه‌.

شه‌پۆل: هه‌ست ناكه‌یت پیاوی كورد ته‌نیا وه‌ك ئامڕازێكی سێكسیی سه‌یری ئافره‌ت ده‌كات؟. هه‌رواش پێتوانییه‌ ئافره‌تی كورد هه‌میشه‌ حه‌زه‌ر له‌ پیاو ده‌كات و وه‌ك په‌لامارده‌ر لێی ده‌ڕوانێت؟.

رێگا ره‌ئوف: ناتوانم بڵێم ته‌نیا پیاوی كورد وایه‌، ئه‌وه‌ی كه‌ ژن وه‌ك ئامڕازێكی سێكسی ده‌بینێت په‌یوه‌ندیی به‌ زۆر هۆكاره‌وه‌ هه‌یه‌، له‌وانه‌ش په‌روه‌رده‌ی كۆمه‌ڵایه‌تی، یاسا. بۆ نموونه‌ یاسا ژن وه‌ك مرۆڤ حساب ناكات، شووكردنی ژنیش به‌رامبه‌ر به‌ ماره‌یی ئه‌و تێڕوانینه‌ پیشتڕاست ده‌كاته‌وه‌. له‌ هه‌ر كۆمه‌ڵگه‌یه‌كدا ژن وه‌ك مرۆڤی ناته‌واو سه‌یر بكرێت ئه‌وه‌ كۆمه‌ڵگه‌ نه‌خۆشه‌ و پیاویش وه‌ك ئه‌ندامێكی ئه‌و كۆمه‌ڵگه‌یه‌ به‌ده‌ر نابێت له‌و نه‌خۆشییه‌. كه‌واته‌ جۆری تێڕوانینه‌كه‌ كۆمه‌ڵایه‌تییه‌ نه‌ك شه‌خسی. من ناتوانم به‌ ناوی هه‌موو ژنی كورده‌وه‌ وه‌ڵام بده‌مه‌وه‌، چوون ئه‌وه‌ ده‌بێ پایه‌یه‌كی زانستی هه‌بێت كه‌ ئایا هه‌موو ژنی كورد وا ده‌ڕواننه‌ پیاوان؟. به‌ڵام ئه‌وه‌نده‌ ده‌توانم بڵێم كه‌ ژنی كورد به‌پێی جێگه‌ و رێگه‌ی كۆمه‌ڵایه‌تی مامه‌ڵه‌ ده‌كات، ئه‌م جێ و رێگه‌یه‌ش ناسازه‌ له‌گه‌ڵ ماف و خواسته‌كانیدا، بۆیه‌ كه‌ دێینه‌ سه‌ر په‌یوه‌ندیی ژن و پیاو، بێجگه‌ له‌ په‌یوه‌ندییه‌ سێكسییه‌كه‌ شتێكی تر نایه‌ته‌ پێش چاو له‌ حاڵێكدا په‌یوه‌ندیی نێوان ژن و پیاو یان كوڕ و كچ ته‌نیا سێكس نییه‌، به‌ڵكو ده‌كرێت په‌یوه‌ندییه‌كی زۆر ساده‌ و هاوڕێیانه‌ بێت. ئه‌گه‌ر په‌یوه‌ندیی نێوان ژن و پیاو له‌ كۆمه‌ڵگه‌دا دروست و مرۆڤانه‌ نه‌بێت، بێگوومان ئه‌م جۆره‌ بیركردنه‌وانه‌ هه‌یه‌ و ده‌مێنێت، كه‌ زۆر جار بێ بنه‌ما و ناڕاستن، به‌ڵام له‌به‌رئه‌وه‌ی نزیكبوونه‌وه‌ نییه‌ له‌نێوان ئه‌م دوو مرۆڤه‌دا بۆیه‌ زۆر ئاسایی زۆر شتی تریش بینا ده‌كرێت له‌ زهنی مرۆڤه‌كاندا به‌بێ ئه‌وه‌ی راست بێت.

شه‌پۆل: ئاین له‌ كۆمه‌ڵی كورده‌وارییدا رۆڵێكی گرنگی هه‌یه‌ و ئه‌و تێزه‌ش هه‌میشه‌ له‌سه‌ر زاره‌ كه‌ له‌ شه‌رعدا شه‌رم نییه‌ واته‌ ئاساییه‌ پرسه‌ سێكسییه‌كانیش ببێته‌ جێی باس و خواس. ئه‌ی كه‌واته‌ بۆچی هێشتا كۆمه‌ڵی كوردیی ورووژاندنی پرسی سێكس به‌ ناشه‌رعی و حه‌رام ده‌بینێت؟.

رێگا ره‌ئوف: من وای نابینم كه‌ ئاین گرنگی دابێت به‌و مه‌سه‌له‌یه‌، به‌ پێچه‌وانه‌وه‌ ئاین به‌ درێژایی مێژوو رق و كینه‌ له‌ نێو ژن و پیاو دروست ده‌كات. له‌یه‌كیان ده‌كات به‌نامۆ و هۆكاری كێشه‌ی قورسی كومه‌ڵایه‌تی‌. بۆ نموونه‌ شه‌رع باس له‌ حه‌ڵاڵبوونی سێكس ده‌كات، بۆچی به‌ ژن ده‌ڵێت خۆت بشاره‌وه‌، مه‌گه‌ر جه‌سته‌ی ژن به‌پێی ئه‌م مه‌سه‌له‌یه‌ نابێته‌ هۆكارێك بۆ بزواندنی سێكسی پیاو؟. كه‌واته‌ یه‌كلایه‌نه‌ شه‌رعییه‌تی داوه‌ به‌ مه‌سه‌له‌كه‌. جیاكردنه‌وه‌ی كچان و كوڕان به‌پێی شه‌رع ته‌نیا له‌به‌رئه‌وه‌ ئه‌وه‌یه‌ نه‌ك مه‌سه‌له‌ی سێكس بێته‌ پێشه‌وه‌. ئیتر كامه‌یه‌ شه‌رعییه‌ت؟. ئه‌وه‌ نییه‌ پیاو وه‌ك مه‌سئول له‌ره‌گه‌زی ژن ده‌كات به‌ بكوژ؟ ئیتر كوا شه‌فافییه‌تی دین؟ ئه‌وه‌ی كه‌ باسی لێبكرێت شتیك نییه‌ دیانه‌ت و به‌ تایبه‌ت ئیسلام كردبێتییه‌ دیاری بۆبه‌شه‌ر ئه‌وه‌ دان پێدانانێكی ئیجبارییه‌ چوون به‌شه‌رییه‌ت به‌و جۆره‌ درێژه‌ ده‌دات به‌ ژیان، من پێموایه‌ دین‌ رێگریی سه‌ره‌كییه‌ نه‌نانه‌ت له‌ به‌رامبه‌ر وروواژندنی پرسه‌كه‌دا. ده‌یان نموونه‌ی تر هه‌یه‌ كه‌ شه‌رع ئه‌سڵه‌ن رێگه‌ نادات به‌وه‌ی باس له‌ مه‌سه‌له‌ی سێكس بكرێت، وه‌ك شتێكی ژیانی و ساده‌ی نێو ژیانی مرۆڤه‌كان، به‌ڵكو ته‌داخولی ته‌واوی تێدا ده‌كات و توانا و ئیراده‌ی ژن و پیاو به‌رته‌سك ده‌كاته‌وه‌ له‌ چوارچێوه‌ی شه‌رع و یاساكانیدا پێناسه‌یان ده‌كات، بۆیه‌ به‌لای منه‌وه‌ رێگه‌دان نییه‌ به‌ باسكردنی پرسه‌كه‌ به‌ڵكو رێگه‌ لێگرتنییه‌تی.

شه‌پۆل: به‌مدواییانه‌ هه‌واڵی ئه‌وه‌ بڵاوكرایه‌وه‌ ته‌نیا له‌ شاری سلێمانی 400 ماڵی له‌شفرۆشی هه‌یه‌ و له‌به‌رامبه‌ر ئه‌مه‌ش كه‌مپینی دژ دروستكراوه‌؟. تۆ پێتوایه‌ چۆن رووبه‌ڕووی دیارده‌ی له‌شفرۆشی ببینه‌وه‌ له‌ كوردستان؟. ئایا فراوانبوونی ئه‌و دیارده‌یه‌ له‌ كوردستان بۆچی ده‌گه‌ڕێته‌وه‌؟.

رێگا ره‌ئوف: مه‌سه‌له‌ی له‌شفرۆشی له‌ كوردستان وه‌ك هه‌ر كۆمه‌ڵگه‌یه‌كی تری دنیا په‌یوه‌ندیی به‌ چه‌ند هۆكارێكه‌وه‌ هه‌یه‌، یه‌كه‌م، هه‌ژاریی و نه‌بوونی ده‌رامه‌ت. دووه‌م، بازاڕی گه‌رمی له‌شفرۆشی و داواكاریی له‌لایه‌ن پیاوانه‌وه‌ بۆته‌ هۆكاری ئه‌وه‌ی كه‌ باشترین سه‌رمایه‌ له‌ رێگه‌ی بازرگانیكردن به‌ جه‌سته‌ی ژنانه‌وه‌ كۆبكرێته‌وه‌. له‌ كوردستان ژماره‌یه‌كی زۆری خه‌ڵك به‌ هۆی نه‌بوونی ئابوورییه‌كی باشه‌وه‌ په‌نایان بردۆته‌ به‌ر ئه‌م دیارده‌یه‌. كه‌واته‌ بۆته‌ سه‌رچاوه‌یه‌كی بژێویی ژیان. خاڵێكی تر ئه‌وه‌یه‌ داواكاریی بۆ سێكس كڕین زیادی كردووه‌، چوونكه‌ گه‌نجانی كوردستان فشارێكی زۆریان له‌ سه‌ره‌ به‌تایبه‌ت به‌ سه‌ر ئازادیی هاوڕێ گرتنیان. كه‌ له‌و ماوه‌یه‌ی پێشوودا راپۆرتێكم خوێنده‌وه‌ له‌سه‌ر ئه‌م بابه‌ته‌ و هه‌ندێك له‌ گه‌نجان به‌م جۆره‌ گوزارشتیان لێكردبوو. هه‌موو كۆمه‌ڵگه‌یه‌ك دووچاری كێشه‌ی كۆمه‌ڵایه‌تی ده‌بێته‌وه‌، به‌ بڕوای منیش له‌شفرۆشی كێشه‌یه‌كی كۆمه‌ڵایه‌تییه‌ له‌ كوردستاندا، به‌ڵام ئه‌وه‌ ئه‌ركی ده‌سه‌ڵات و كۆمه‌ڵگه‌ی مه‌ده‌نییه‌ له‌سه‌ر ئه‌م كێشه‌یه‌ قسه‌ و باس بكه‌ن و رێگه‌چاره‌ی بۆ بدۆزنه‌وه‌.

دابینكردنی بیمه‌ی كۆمه‌ڵایه‌تی بۆ ئه‌و ژنانه‌ی له‌شی خۆیان ده‌فرۆشن یه‌كێكه‌ له‌و رێگه‌چارانه‌ی كه‌ ده‌توانێ به‌ر بگرێت به‌ په‌ره‌سه‌ندنی ئه‌م دیارده‌یه‌. مه‌سه‌له‌یه‌كی تر ئه‌وه‌ی بۆ نموونه‌ له‌ سوێد به‌پێی قانوون ئه‌و كه‌سه‌ تاوانباره‌ كه‌ سێكس ده‌كڕێت، واته‌ پیاوان. چوون له‌ باری مرۆڤایه‌تییه‌وه‌ وا دانراوه‌ ژن ئه‌گه‌ر له‌به‌ر هه‌ر هۆكارێك له‌شی خۆی بفرۆشێت جێگه‌ و رێگه‌یه‌كی نه‌شیاوه‌ و له‌ ئاستی خواره‌وه‌ی كۆمه‌ڵگه‌یه‌، كه‌واته‌ ئه‌و پیاوه‌ی ئیمكانی هه‌یه‌ به‌ پاره‌ و جێگه‌ و رێگه‌یه‌كی به‌رزی كۆمه‌ڵایه‌تی هه‌یه‌، ده‌توانێ ئه‌م كاره‌ نه‌كات، بۆیه‌ سزاكه‌ له‌سه‌ر پیاوه‌كه‌یه‌ نه‌ك له‌سه‌ر ئه‌و كه‌سه‌ی كه‌ خۆی له‌لایه‌ن كۆمه‌ڵگه‌وه‌ سزا دراوه‌ به‌ هه‌ژاریی. خاڵێكی تر ئه‌وه‌یه‌ ده‌سه‌ڵات ده‌بێ له‌ رێگه‌ی هۆشیاركردنه‌وه‌ی خه‌ڵك و دانانی بڕیار و یاسای مرۆڤانه‌ ئه‌وه‌ نیشانی خه‌ڵك بدات له‌شفرۆشی ئاكامی باشی لێناكه‌وێته‌وه‌، به‌ڵكو ده‌بێته‌ هۆی چه‌ندان نه‌خۆشی كۆمه‌ڵایه‌تی، ده‌روونی كه‌ تاكه‌كان پێوه‌ی ده‌ناڵێنن، به‌ڵام ده‌سه‌ڵات له‌ كوردستان سه‌رباری ئه‌وه‌ی ده‌زانن ئه‌م دیارده‌یه‌ زۆر په‌ره‌یسه‌ندووه‌ نه‌ك هه‌ر باسی ناكه‌ن، به‌ڵكو هه‌وڵ ده‌ده‌ن په‌رده‌پۆشی بكه‌ن كه‌ هه‌ڵه‌یه‌كی گه‌وره‌یه‌ چوونكه‌ له‌وانه‌یه‌ ئاكامی ئه‌مه‌ له‌ دوای چه‌ندین ساڵی تر ده‌ربكه‌وێت كه‌ چی تراژیدیایه‌كی ناوه‌ته‌وه‌، چی به‌ كوشتنی ژنان یان به‌هاتنه‌ ژیانی مناڵانێك له‌م رێگه‌یه‌وه‌ یاخۆ به‌ تووشبوونی ئه‌و ژنانه‌ به‌ نه‌خۆشی ده‌روونی و چه‌ندین نه‌خۆشی تر كه‌ تایبه‌ته‌ به‌ نه‌خۆشییه‌كانی ئامڕازه‌كانی سێكس له‌ مرۆڤه‌كاندا، ئه‌وكاته‌ش به‌رگرتن به‌ر كاره‌ساته‌كه‌ زۆر زۆر زه‌حمه‌ته‌ نه‌ك ئێستا.

شه‌پۆل: تا هه‌نووكه‌ ئافره‌تی كورد رووبه‌ڕووی ته‌نگ پێهه‌ڵچنینی سێكسیی ده‌بێته‌وه‌. بۆچوونێك هه‌یه‌ پێیوایه‌ ئه‌مه‌ بۆ لاوازیی كه‌سێتی ئافره‌تی كورد ده‌گه‌ڕێته‌وه‌. تۆ له‌ مباره‌وه‌ چ را و سه‌رنجێكت هه‌یه‌؟.

رێگا ره‌ئوف: پێموایه‌ ده‌بێ له‌سه‌ر ئاستی تاكه‌كان ئه‌م رۆشنبیرییه‌ زیاد بكرێت كه‌ ئه‌گه‌ر شتێكت پێ خۆش نه‌بێت به‌ ئاسانیی و ته‌واوی بتوانێت بڵێت نا. ئه‌و "نا"یه‌ش دروست به‌ مانای نا بێت، نه‌ك وه‌ك چۆن هه‌ندێك جار به‌ مانای به‌ڵێ لێكده‌درێته‌وه‌. مه‌به‌ستم ئه‌وه‌یه‌ راسته‌ تاكی ژن ره‌نگه‌ لاواز و ده‌سته‌مۆ كرابێت و نه‌توانێت له‌ ئاستی شتێكی نه‌خوازراودا بڵێ "نا"، به‌ڵام هاوكاتیش زۆر باش ئه‌وه‌ ده‌زانین كولتووری ئێمه‌ "نا" به‌ مانای "نا" وه‌رناگرێت. كه‌م نین ئه‌و كوڕانه‌ی ئه‌گه‌ر كچێك پێیان بڵێت نا، پێیانوایه‌ كه‌ ده‌بێت زیاتر هه‌وڵبده‌ن، ئه‌مه‌ش ده‌بێته‌ هۆی تێكشكاندنی كه‌سێتی ژن و هاوكات لێسه‌ندنه‌وه‌ی مافی "نا" وتنه‌، به‌ڵام چاره‌سه‌ری ئه‌مه‌ به‌ ته‌نیا له‌سه‌ر ژن نییه‌، ده‌بێ یاسا دابنرێت له‌سه‌ر ئه‌م ته‌نگ پێهه‌ڵچنینه‌ و سزای یاسایی ئه‌و كه‌سانه‌ بدرێت كه‌ كاری وا ده‌كه‌ن و هه‌روه‌ها هۆشیاریی كۆمه‌ڵایه‌تی بۆ ژنان له‌ رێگه‌ی تیڤی، رادیۆ و رۆژنامه‌ و كه‌ناڵه‌كانی راگه‌یاندن بكرێته‌وه‌ تا ژنان بزانن كه‌ یاسایه‌كی وا هه‌یه‌ داكۆكی له‌ مافیان ده‌كات.

   له‌ وڵاتانی ئه‌وروپا یاسایه‌ك هه‌یه‌ به‌ ناوی ئیهانه‌كردن به‌ كه‌رامه‌تی ژنان، ئه‌م یاسایه‌ زۆر شت ده‌گرێته‌وه‌، له‌وانه‌ توانج لێدان، ده‌ستبردن بۆ له‌شی ژن له‌ شوێنه‌ گشتییه‌كان، ته‌نانه‌ت ئه‌گه‌ر پیاوێك به‌ زۆر موماره‌سه‌ی سێكس له‌گه‌ڵ ژنه‌كه‌ی بكات به‌پێی ئه‌م یاسایه‌ سزا ده‌درێت، چوون سێكسی ژن په‌یوه‌سته‌ به‌ موڵكه‌ شه‌خسییه‌كانی ژن خۆیه‌وه‌ كه‌ ده‌توانێ ئاسه‌واری زۆر خراپ له‌سه‌ر فیكر و ده‌روون و ژیانی دابنێت، ئه‌گه‌ر به‌ زۆر موماره‌سه‌ی له‌گه‌ڵ بكرێت یان ئه‌گه‌ر توانجی لێبدرێت یاخۆ هه‌ر كارێكی تری نه‌شیاو كه‌ ده‌بێته‌ مایه‌ی نیگه‌رانی و وه‌ڕسكردنی ژن. بێگوومان ژنانیش هاوكات ئه‌وه‌ ده‌زانن ئه‌م یاسایه‌ هه‌یه‌ و پشتیوانیان لێ ده‌كات، بۆیه‌ ئه‌م جۆره‌ هه‌ڵسوكه‌وته‌ زۆر كه‌مه‌ له‌لایه‌ن خه‌ڵكه‌وه‌ له‌ ئه‌وروپا. نموونه‌یه‌كتان بۆ باس بكه‌م، كچێك باوكی ماوه‌ی چه‌ندین ساڵه‌ به‌ وشه‌یناشرین بانگی كردبوو "به‌ره‌ڵڵا"، كچه‌كه‌ شكاتی له‌ باوكی كرد و درا به‌ دادگا و دادگاش سزای چه‌ندین ساڵی دا به‌سه‌ر باوكه‌كه‌دا كه‌ به‌ كچه‌كه‌ی وتووه‌ به‌ره‌ڵڵا، ئه‌مه‌ ئه‌وه‌ی دووپات كرده‌وه‌ بۆ كۆمه‌ڵگه‌ هه‌ر وشه‌یه‌ك له‌لایه‌ن هه‌ر كه‌سێكه‌وه‌ بوترێت ته‌نانه‌ت ئه‌گه‌ر كه‌سه‌كه‌ باوكیش بێت، رێگه‌ی پێنادرێ.

شه‌پۆل: ئه‌گه‌رچی كۆمه‌ڵی كورده‌واریی به‌ره‌و كرانه‌وه‌ی زیاتر ده‌ڕوات، به‌ڵام هێشتا په‌رله‌مانتار هه‌یه‌ شه‌رم ده‌كات گفتوگۆ له‌سه‌ر خه‌ته‌نه‌ی ژنان بكات. پرسیاره‌كه‌ی من ئه‌وه‌یه‌ بۆچی كۆمه‌ڵی كورده‌واریی هێنده‌ له‌ پرسی سێكس و له‌ش و لاری مرۆڤدا شه‌رم ده‌كات؟. ئه‌مه‌ ده‌رهاویشته‌ی چییه‌؟.

رێگا ره‌ئوف: مه‌سه‌له‌ی خه‌ته‌نه‌ی ژنان كێشه‌یه‌كی كۆمه‌ڵایه‌تییه‌ وه‌ك چۆن مه‌سه‌له‌ی له‌شفرۆشی كێشه‌یه‌كی كۆمه‌ڵایه‌تییه‌، به‌ڵام دیسانه‌وه‌ دووپاتی ده‌كه‌مه‌وه‌ كه‌ ئه‌گه‌ر ده‌سه‌ڵات ئه‌م كێشانه‌ وه‌ك كێشه‌ی كۆمه‌ڵایه‌تی به‌ ره‌سمی نه‌ناسیت هه‌روای لێدێت. بێگوومان تاكه‌كان ده‌ور و نه‌خشیان هه‌یه‌ له‌ پێچه‌ مێژووییه‌كاندا قسه‌ی خۆیان بكه‌ن، به‌ڵام ناتوانین چاوه‌ڕوانی ئه‌وه‌مان هه‌بێت كه‌ هه‌موو تاكێك به‌هه‌مان ئه‌رك و كار هه‌ڵبسێت. ئه‌گه‌ر ژنێك كه‌ ئه‌ندام په‌رله‌مانه‌ و ناتوانێت قسه‌یه‌كی ئاوا له‌ ده‌می بێته‌ ده‌ره‌وه‌ له‌به‌رئه‌وه‌ی شه‌رم ده‌كات یان ره‌نگه‌ به‌ كێشه‌ی خۆی نه‌زانێت یان هه‌ر هۆیه‌كی تری هه‌بێت، ئه‌وه‌ ئه‌و جه‌و و فه‌زایه‌یه‌ كه‌ له‌ناو په‌رله‌مان هه‌یه‌ كه‌ ئه‌و ژنه‌ ناتوانێت وه‌ك مرۆڤێك قسه‌ی خۆی بكات. من دڵنیام ئه‌گه‌ر كه‌سێك له‌ ناو په‌رله‌مان ئه‌و جۆره‌ شه‌هامه‌ته‌ له‌ خۆی نیشان بدات ئه‌و خه‌ڵكانێكی زۆر وه‌ك كه‌سێكی ئازا و چاونه‌ترس و هه‌وڵده‌ر بۆ ئاڵوگۆڕی ده‌یبینن نه‌ك وه‌ك ئه‌وه‌ی حه‌یای چووبێت باس بكرێت.

This e-mail address is being protected from spambots. You need JavaScript enabled to view it


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.