Red Purple Black

چيرۆکا ئاڵايه‌کى ... نزار پيرو

PDFPrintE-mail

کاغه‌زه‌کا سپى دگه‌ل کۆمه‌کا پێنوسێن ره‌نگاۆره‌نگ لپێشيا وێ بون.

هه‌رگاڤه‌کێ يا ڕه‌نگه‌کى رادکه‌ت و کارێ که‌ڤاله‌کى دکه‌ت.

نێزيکه‌ ساڵه‌ک دێ خاترێ خازيت و ساڵه‌ک نوى وێ ببه‌ مێهڤان.

هه‌ر بيرهاتن و هه‌لکه‌فتنه‌کێ، ئه‌وێ که‌ڤاله‌ک چێدکر.

لناڤه‌راستا کاغه‌زا سپى، ئه‌وێ کوچکه‌کێ ئاگرى يێ به‌را چێکر.

دناڤ کوچکيدا، ئاگره‌ک هه‌لکر.

گۆره‌کا باقدرێژ، بسه‌رێ کوچکى ڤه‌کر.

دوو دلێن سۆر چێکرن و لهنداڤ دله‌کى، دوو ئاڵا چه‌قاندن.

ئێک، ئاڵايێ وو‌ڵاتێ خه‌ونا و به‌رفێ بو.

ئه‌وێ دى، ئاڵايێ فيدراليزما شازده‌ ده‌ڤه‌رێن جودا بوون، ئه‌وێن چه‌ندين سالا چه‌پ و راستا کرينه‌ ڕۆژهه‌ڵات و ڕۆژئاڤا.

ل هنداڤى دلێ دى، دوو ئاڵايێن دى چه‌قاندن.

ئێک ئاڵايێ وو‌ڵاتێ ڕۆژێ و ئاگرى و به‌رخودانێ بو.

ئه‌وێ دى، جاره‌کادى ئاڵايێ وو‌ڵاتێ خه‌ونا و به‌رفێ بو.

ل هنداڤ و ل خار کوچکێ ئاگرى، دوو دلێن دى چێکرن.

دنيڤاواندا نڤيساند ( گوت يول)

لسه‌ر دلێ ئالێ سه‌رى نڤيساند ( فروڤايناختن )

لخار دلێ ئالێ بنى نڤيساند ( سه‌ر ساڵا وه‌ پيرۆزبه‌ )

لدوماهيێ، بستێرکێن بچوک ئه‌و که‌ڤاڵ خه‌ملاند.

خۆدانا که‌زيکا، که‌ڤالێ خۆ بدوماهى ئينا و قه‌ستا باڤێ خۆکر.

" که‌ڤالێ من بدوماهى هات، تو چ دبێژى؟ بدلێ ته‌يه‌؟ "

" ده‌ستێ ته‌ خۆش، ئه‌ڤ که‌ڤاڵه‌، دياريه‌ ژبۆ من؟ "

" نه‌خێر، سبه‌ وێ مێهڤانه‌ک هێت قوتابخانێ، ئه‌ز ژبۆ وى دێ که‌مه‌ ديارى"

" که‌ڤالێن ته‌ هێژانه، ئه‌ز پاشه‌رۆژا ته‌ گه‌ش دبينم، به‌لێ پرسه‌ک من هه‌يه‌، ژبۆ چى ته‌ ئاڵايه‌ک بتنێ جێنه‌دکر؟"

خۆدانا دوو که‌زيکا ده‌مه‌کێ کورت ما بێده‌نگ، لديڤدا و وه‌کو هه‌ر زارۆيه‌کێ ژ ره‌نگان حه‌زدکه‌ت، بوێ حه‌زا خۆ هاته‌زمان.

" سوور و زه‌ر و ره‌ش، ئاڵايێ وو‌ڵاتێ ژدايکبونا منه‌، ئه‌و وو‌ڵاته‌ ئه‌وێ ناڤ و پاسپۆرتاخۆ دايه‌ من"

" شين و زه‌ر ژى، ئاڵايێ وى ووڵاتى يه‌ ئه‌وێ ئه‌ز لێ دژيم و جهێ هه‌ڤاڵ و هيڤى و خه‌ونێت منه‌"

'" که‌سک و سپى و سۆر و زه‌ر، ئاڵايێ وى زمانيه‌ ئه‌وێ ئه‌م پێ دئاخڤين، ل پێشيێ وولاتێ وه‌ بو،

وه‌ عه‌شق و ئه‌ڤينا ڤى ووڵاتى و ڤى ئاڵاى د دلێ مندا مه‌زنکر

هه‌تا بومن خويابوى، ووڵاتێ من يێ دروست ئه‌وه‌،

به‌لێ وێ چه‌وا، ووڵاتێ من به‌،

ئه‌ز لسه‌ر خاکا وى نه‌ژيامه‌،

من ئاڤا وى نه‌ڤه‌خواريه‌، من خه‌لکێ وى نه‌ هه‌مبێزکريه‌،

پرسێن من گه‌له‌کن، ئه‌ز به‌رسڤان دخازم،

چاڤێت خۆ ل ووڵاته‌کى من ڤه‌کرن، نه‌ ووڵاتێ من، ئه‌ز سێ ساڵ بوم لباخچى زارۆکان من هه‌ست بڤێ چه‌ندێ کر،

نه‌ ناڤێ من وه‌کو ناڤێن وان بۆ، نه‌ ره‌نگێ پۆرا من وه‌کو يا وان بو،

ئه‌وان تشته‌ک دخۆار، من تشته‌ک دى،

ئه‌ز بچوک بوم، من دزانى شاشيه‌ک يا هه‌ى

به‌لێ من نه‌دزانى ئه‌و شاشى، چى يه‌؟

پشتى سێ ساڵێن من بون شه‌ش ساڵ و ئه‌ز فێرى زمانێ وان بوم، وه‌ بارکر و قه‌ستا واره‌ک دى و ووڵاته‌ک دى و زمانه‌ک دى کر،

له‌وما ئه‌ز دناڤ هه‌ڤاڵێن خۆدا خۆ هه‌لدکێشـم و شانازيێ دکه‌م و ئه‌ز دبێژم،

من سێ ووڵات يێن هه‌ين.

نهاژى ئه‌ز به‌رسڤان دخازم

ئه‌م کينه‌؟

کا ووڵاتێ مه‌؟

ئه‌م لدوڤ چ دگه‌رين؟

بابێ وێ سه‌رێ خۆ هژاند و ما بێده‌نگ.

دگه‌ل خۆ، د دلێ خۆ يێ سوتيدا و دهزرا خۆدا دگوت،

ژبه‌ريته باڤێ ته‌ ئه‌و پرس کريه‌ و مايه‌ بێ به‌رسڤ،

ئه‌م لديڤ وان به‌رسڤان دگه‌رين،

ده‌ره‌وا ل خۆ ل وه‌ دکه‌ين.

ڕۆژا پاشتر لقوتابخانێ، خودانا دوو که‌زيکا، که‌ڤالێ خۆ ده‌ينا پێشيا خۆ و ما لهێڤيا نوبه‌تێ.

نوبه‌تا وێ هات، خۆ دا ناسکرن

" ناڤێ من گولستانه‌، سێ ووڵاتێن من هه‌نه‌"

" ئاڵايێ ووڵاتێ من يێ ئێکێ، يێ ره‌ش و سۆر و زه‌ره‌، ئه‌و ئاڵايێ ووڵاتێ ژدايکبونا منه"

به‌رى به‌حسێ ووڵاتێ خۆ يێ دووێ بکه‌ت، مێهڤانى داخاز لێ کر دناڤ وان ئاڵايێن ره‌نگاوره‌نگ ئه‌وێن لسه‌ر وێ نه‌خشا جيهانێ ئه‌وا لپێشياوان، ئاڵايێ خۆ يێ ئێکێ ديارکه‌ت.

پشتى ئاڵايێ ووڵاتێ خۆ يێ ئێکێ ديارکر،

ئاڵايێ ووڵاتێ من يێ دووێ يێ شين و زه‌ره‌، ئه‌ز لڤى ووڵاتى دژيم.

پشتى ئاڵايێ ووڵاتێ خۆ يێ دووێژى ديارکر،

ئاڵايێ ووڵاتێ من يێ سيێ، يێ که‌سک و سۆر و سپى و زه‌ره‌، ئه‌و ئاڵايێ داى و باڤ و ئاڵايێ زمانێ مه‌ يێ ماڵێ يه‌.

جاره‌کادى خۆدانا دو که‌زيکا قه‌ستا نه‌خشا جيهانێ و وان ئاڵايان کر، ژبو ئاڵايێ ووڵاتێ خۆ يێ سيێ ژى، بده‌ته‌ نياسين.

چاڤێن وێ يێن بچوک وه‌کو گه‌ميه‌کێ که‌تنه‌ دناڤ وان گزيرکێت ره‌نگاوره‌نگ و هێدى هێدى لديف گزيرکا خۆ يا سيێ دگه‌ران.

ده‌مه‌ک بورى، بێده‌نگ مان،

به‌لێ به‌رى وه‌ستيان چاڤێن وێ يێن بچوک بئێشينيت

به‌رى بێده‌نگى خۆ ل جهێ بکه‌ته‌ خۆدان

مێهڤانێ بها گران، ئه‌و بێده‌نگى به‌زاند، داخاز ژقوتابيا کر، ده‌ستان بو گولستانێ بقوتن.

بئافه‌رين و ده‌ست قوتانێ، گولستان زڤرى جهێ خۆ.

قوتابيه‌کێ دى، دياريا خۆ پێشکێش کر و پێناسا خۆ کر.

هه‌مي يێ دهزرا ويدا

بتنێ گولستان،

هێشتا دگه‌ميا خۆدابو و لديڤ گزيرکا خۆ يا به‌رزه‌

دگه‌را.

 نزار پيرو

  This e-mail address is being protected from spambots. You need JavaScript enabled to view it

   

 


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.