Red Purple Black

ده‌سپێکا ئاشکراکرنا سه‌ره‌ ده‌زيێن گرێبه‌ستێن رويدانێن به‌هدينان ... نزار پيرو

PDFPrintE-mail

لده‌سپێکا رويدانێن سه‌رهه‌لداين لزاخۆ و لديڤدا چريسکا وان گه‌هاى دهوک و ده‌ڤه‌رێن ئالێ ڕۆژئاڤايێ زێيێ به‌هدينا، گه‌له‌ک چيرۆک و چيڤانوک لديڤ وان رويدانان و لايه‌نێن به‌پرسيار دوان رويداناندا، هاتن به‌حس کرن و بۆ ڕۆژه‌ڤا سه‌ر زارێ پۆليتکار و ده‌زگه‌هێن راگه‌هاندنێ يێن پارتى و يه‌کگرتو و ئاراسته‌کرنا سوچو تاوانان بۆ هه‌ڤدو.

ژئاله‌کى پارتى ديموکراتى کوردستان و وه‌کو سياسه‌تا سه‌ره‌ده‌ريکرنا وێ يا ئاشکرا و گرێداى بچه‌وانيا بده‌ستڤه‌ ئينانا به‌رژه‌وه‌نديا و گهورينا رويێ رويدانان ژبو به‌رژه‌وه‌نديێن خۆ و ژبۆ ڤه‌شارتنا به‌رپرسياره‌تيا خۆ لوان رويدانێن لوێ ده‌ڤرێ ئه‌وا وه‌کو ئه‌و دبێژن مۆرا وان يا زه‌ر تێدا يا زاڵه‌، مه‌ ديت ئه‌وان بره‌نگه‌کى سه‌ره‌ده‌ريکر، کو سه‌روبه‌رى بۆ لايێ خۆ راکێشيت و کرێتکرنا سوره‌تێ خۆ بره‌نگه‌کێ دى بکه‌ته‌ ده‌ستکه‌فت و لايێ به‌رامبه‌ر کو خودانێ زه‌ره‌ر و زيانێ بو دوان رويداناندا بشه‌رێ تايفه‌گه‌ريێ لقه‌له‌م بده‌ت و ئه‌و رويدان بشه‌رێ تايفه گه‌رى دناڤبه‌را چين و ئولێن ئه‌ڤه‌ چه‌ندين سالن بهه‌ڤرا و وه‌کو برا لسه‌ر ڤى خاکى دژين لقه‌له‌م بده‌ت، و بێى کو بزانيت و ژبو به‌رژه‌وه‌نديه‌ک ته‌نگ و ژبو راستکرنا رويێ شاشيه‌کا خۆ، شاشيه‌کا مه‌ستر لبه‌رامبه‌ر چين و ئولێن ده‌ڤه‌رى ئه‌نجام دده‌ت.

ئه‌گه‌رێن گرژيێن پارتى و يه‌کگرتو و پيلانێن وان :

چه‌ندين ئه‌گه‌ر هه‌بوينه‌ ژبۆ زێده‌بونا گرژيان دناڤبه‌را پارتى و يه‌‌گرتودا بگشتى و لده‌ڤه‌را به‌هدينان بتايبه‌ت هه‌تا گه‌هاى ئاستێ په‌قينێ.

لده‌سپێکێ و هه‌ولێن پارتى ژبو رزگاربونێ ژقه‌يرانا حکمرانيێ لهه‌ریمێ و چاره‌سه‌رکرنا ئاريشان و کێمکرنا ده‌نگێ نه‌رازيبونى دناڤ هه‌ڤوه‌ڵاتيێن هه‌رێمێدا، پارتى گه‌له‌ک هه‌ول دان و يا به‌رده‌وامه‌ دوان هه‌وڵاندا ژبۆ بشکداريا ئاليێن ئوپوزيسيونێ دپروسا حکمگێرانێ دکوردستانێدا، گه‌ر بنيه‌ته‌ک ساخله‌م بيت، يانژى وێ بو مه‌ره‌مه‌ک دى بيت، و ژئالێ دى نه‌رازيبونا لايه‌نێن ئوپۆزيسيونێ لسه‌ر وێ چه‌ندى کو پشکداريێ دحکومه‌ته‌کا فره‌حزبيدا بکه‌ن، ئه‌ڤجا ژبه‌ر قه‌لساتيا لايه‌نێن ئوپوزيسيونى بيت يانژى ژبێباوه‌ريێ بيت.

ره‌دکرنا لايه‌نێن ئوپوزيسيونێ بو حه‌زا پارتى، دلگرانيه‌ک لجه‌م پارتى په‌يداکر و هه‌تا کو يه‌کگرتويا ئيسلامى ئه‌و مه‌سه‌له‌ بديماهى نه‌ ئيناى و بريارا خۆ يا داوى نه‌دا بپشکدارى نه‌بوناوان دحکومه‌تێدا، رێک خووشنه‌کر بو په‌قينى دناڤبه‌را واندا.

نه‌يا ڤه‌شارتيه‌ کو يه‌گرتويا ئيسلامى رکابه‌رێ ئاشکرايێ هه‌رێ بهێزێ پارتى ديمکراتى کوردستانه‌ لده‌ڤه‌را به‌هدينان.

"به‌لێ ئه‌و تشتێ ڤه‌شارتى و پارتى ئاماژه‌ پێناده‌ت يانژى بو خۆيا نابيت، رکابه‌رێ پارتى يێ نه‌ يێ ئاشکرايه لده‌ڤه‌را به‌هدينان، کو ڕۆژ بۆ ڕۆژێ بهێزدبيت و ڕۆژه‌ک دێهێت دێ په‌قيت، ئه‌وژى هێزا جه‌ماوه‌رێ ده‌ڤه‌رێ، يێ نه‌يێ رازى و بێزاره‌ ژ کردارێن په‌رپرسێن پارتى و سياسه‌تا پارتى لبه‌رامبه‌رى ده‌ڤرا به‌هدينان"

پارتى، ده‌مه‌ک درێژه‌ مژوڵى چه‌ندين پيلانايه‌ لدژى يه‌کگرتو بگشتي‌ و لده‌ڤه‌را به‌هدينان بتايبه‌ت، ده‌سپێکێ هه‌ۆلا ده‌زگه‌هێ بارزان يێ خێرخوازى ژبو ژده‌ست ئينانه‌ده‌را هاريکاريێن هه‌يڤا سۆر يا ئيماراتى ژده‌ستێ يه‌کگرتو کو مه‌بله‌غێ دوو مليون دولارايه‌‌ هه‌يڤانه و ده‌زگه‌هێ بارزان سه‌رکه‌فت دوێ چه‌ندێدا‌ و بهاريکاريا په‌يوه‌نديێن دناڤبه‌را سه‌رکردێن پارتى و وى ووڵاتى. هه‌روه‌سا هه‌ولێن پارتى يێن به‌رده‌وام بو گرتن و ژده‌ستدانا ژێده‌رێن دراڤى يێن ده‌رڤه‌ يێن يه‌کگرتو.

ل ئاله‌کێ دى و د پيلانه‌کا داڕێشتدا يا فه‌زيحه‌تا کومپانييه‌کێ لدهوکێ، ئه‌و کومپانيا تاوانبار بده‌ستبسه‌رداگرتنا مليونه‌ها دولارێن خه‌لکێ دهوکێ و و بازرگان و به‌برسێن ئاليێن جودا يێن ده‌ڤه‌رێ و وه‌کو پيلانه‌ک داڕێشتى و بو مه‌ره‌مێن سياسى.( لده‌مێن بهێت و بتێر ته‌له‌سى دراپۆرته‌کا تايبه‌تدا ئه‌ڤ بابه‌ته‌ دێهێته‌ ديارکرن و شروڤه‌کرن).

لايه‌نێن ده‌ره‌کى دڤێ ‌معاده‌لێدا :

لێکدانا رويدانێن به‌هدينان و ته‌وقيتا وان ريدانان دگه‌ل سه‌ره‌دانا سه‌روکێ هه‌رێمێ بو ترکيا و وه‌کو هاته‌ به‌حسکرن و ئاشکراکرن کو ئه‌و سه‌ره‌دان بتنێ بو به‌حسکرن و چاره‌سه‌رکرنا دوزا کوردى لتورکيا بو، به‌لى وه‌کو ديار کو تورکيا نه‌ بتنێ يا مژولى دوزا کوردێن باکور و باشوره‌ به‌لکو تورکيا يا شه‌ره‌کێ سياسى لسه‌نگه‌رێ سوريا ژى دکه‌ت و کوردێن رۆژئاڤاژى هژماره‌کا بسه‌نگن‌ دوى سه‌نگه‌ريدا، له‌وما دورنينه‌ گه‌نگه‌شێن تورکيا دگه‌ل بارزانى دڤێ چارچوڤێژيدابن، ژبه‌رکو وه‌کو مه‌ ديتى بارزانى و هه‌ر دگه‌ل زڤڕيناخو لتورکيا ده‌ستهاڤێت کومبونان دگه‌ل هێزێن کوردى يێن سوريا و لديڤدا مه‌کته‌با سياسى يا پارتى درێژه‌ بوان کومبونان کرن، هه‌ژى گوتنێيه‌ لديڤ سه‌ره‌دانا بارزانى بو ترکيا و به‌رى ريدانێن زاخۆ سه‌روکێ يه‌گرتو دسه‌ره‌دانه‌کێدابو لتوركيا.

گرێدانا نزيکبونا يه‌کگرتو ل ئيخوانێن سوريا ئه‌وێن تورکيا وان به‌رهه‌ڤ دکه‌ت ژبۆ ده‌ستهه‌لاتداريێ لسوريا لئاله‌کى و هه‌ڤپه‌يمانى و په‌يوه‌نديێن بهێز يێن دناڤبه‌را هه‌رێما کوردستانێ و پارتى ديموکراتى کوردستان و ترکيا ژلايه‌‌کى و ژلايه‌کێ ديڤه‌ لێکتێنه‌گه‌هشتن و دژايه‌تيا دناڤبه‌را پارتى و يه‌کگرتودا، ئه‌ڤه‌ هه‌مى خالێن زه‌قن ژبۆ ديارکرنا راستيێن رويدانێن زاخۆ و ده‌ڤه‌را به‌هدينان.

ئه‌گه‌رێن ناڤخۆيێ و شه‌رێ دناڤبه‌را باڵێن جودايێن

دناڤ پارتى دا :

 

لئاله‌کێ دى و هه‌ر لده‌سپێکا وان ريدانان هنه‌ک ئاژانسێن راگه‌هاندنێ ديارکرن کو چريسکا رويدانێن به‌هدينان ئه‌گه‌را وێ دژايه‌تيا دناڤبه‌را دوو به‌برسێن پارتى لده‌ڤه‌رێ بويه‌ و لديڤدا زێده‌بون بخوڤه‌ ديتيه‌ و ژده‌ست ده‌رکه‌فتيه‌‌، هه‌ر وان ئاژانسان ديارکريه‌ کون هه‌ر ئیک ژوان په‌پرسان يێ بسه‌ر ئاڵه‌کيڤه‌ دناڤ پارتى ديموکراتى کوردستاندا.

هه‌ستکرن و به‌حسکرن ل هه‌بونا ئال يانژى پاڵێن جودا دناڤ پارتيدا يا به‌ربه‌ڵاڤه‌ لسه‌ر زمانێ راگه‌هاندنێ و دناڤ خه‌لکى و هه‌تا لجه‌م ئه‌ندام و ده‌زگه‌هێن بسه‌ر پارتيڤه، هه‌رچه‌نده‌ پارتى هه‌رده‌م ئه‌و چه‌ند ره‌تکريه و دان بوێ چه‌ندێ نه‌دايه، به‌لێ ئه‌و چه‌ند دوره‌ ژراستيێ و هه‌بونا باڵێن جودا دناڤ پارتى دا راستيه‌که‌ و به‌ڵگه‌يێن هه‌ين لسه‌ر وێ چه‌ندێ و د کونگرا پارتى يا ديماهيێ دا بزه‌قى هه‌ست بوێ جه‌ندێ دهاتکرن، ئه‌وژى دچه‌وانيا پاڵاوتنا ئه‌ندامێن سه‌رکردادايه‌تيا پارتى و پروپاگندێن بو ده‌نگدانێ دهاتن کرن و چ نه‌مابو هنه‌ک رموزێن پارتى يێن ديار نه‌هێنه‌ پالاوتن و هنه‌ک ژوان ژبو ديارکرنا نه‌رازيێ هولا کونگرێ بجههێلان و لديڤ دا بته‌ده‌خولا هنه‌کان، هاتن رازيکرن و هاتن زڤراندن بو هولا کونگرێ و هاتنه‌ پاڵاوتن بو سه‌رکردايه‌تيا پارتى. هه‌روه‌سا په‌یامێن سه‌رکێشێن هه‌ردو باڵێن سه‌ره‌کى دراگه‌هاندناندا و ئاراسته‌کرنا کێمته‌رخه‌ميى بو ئێک و دو، ڤێ راستيێ دياردکه‌ن.

ئێک ژ رموزێن ديار دناڤ سه‌رکردايه‌تيا پارتيدا کو خودان سه‌نگ و خودان جه‌ماوه‌ره‌ لده‌ڤه‌را به‌هدينان و بسه‌ر باڵه‌کێ پارتيڤه‌ دهێته‌ لقه‌له‌مدان، ژبه‌ر رولێ وى يی درێژ ل ده‌ڤه‌رێ و کليلێن رويدان و که‌يسێن لده‌ڤه‌رێ ريداين لپشتى سه‌رهه‌لدانێ و هه‌تا نوکه‌ دبه‌ريکاويدانه‌، دڤان رۆژاندا بو خوديێ هنه‌ک راگه‌هاندنێن ئاگرى و دوخه‌که‌ به‌رف ئاقاره‌کێ نه‌ديار بر، هه‌روه‌سا و هه‌مان که‌س که‌سێ ئێکێ بو کو راگه‌هاندن داين لسه‌ر بويه‌رێن ڤێ ديماهييێ يێن ده‌ڤه‌رێ.

ژئاله‌کێ دى بويه‌رێن به‌هدينان جهێ شوکى بون بو سه‌روکێ هه‌رێمێ و ئه‌و که‌يس کره‌ که‌يسێ خۆ يێ سه‌ره‌کى و برياردا، راستى و ريجالێن ڤێ مه‌سه‌لێ ديارکه‌ت. ئه‌وبو، سه‌روکێ هه‌رێمى لژنه‌يه‌کا ته‌حقيقى دامه‌زراند ژبۆ دراسه‌تکرنا ڤان رويدانان و ديارکرنا راستيان.

وه‌ کو ديار جه‌نابێ وى پشته‌ڤانيه‌کا موکوم لڤێ لژنێ کر و داخازا ديارکرنا راستيان کر بهه‌ر نرخه‌کێ هه‌بيت و بزيترين ده‌م. ئه‌وبو پشتى ليژنێ کارێ خۆ ئه‌نجامداى و راپۆرت گه‌هاى به‌ر ده‌ستى سه‌رۆکێ هه‌رێمێ، سه‌روکێ هه‌رێمێ حازربو لجهێ بويه‌رێ و وه‌کو ئاشکرا و راگه‌هاندنا پارتى دبێژيت کو ئه‌و سه‌ره‌دانه‌ک ئاساييه‌ چ په‌يووندى ببويه‌رێن ڤێ ديماهيێ يێن ده‌ڤه‌رێڤه‌ نين و بتنێ بۆ ديتنا خه‌لکێ ده‌ڤه‌رێ يه‌ و گه‌ر گهۆرينژى بهێن کرن لده‌ڤه‌رێ گهۆرينێن ئاسايينه‌، به‌لێ ئه‌و ده‌نگێن لجاده‌و کولانێن ده‌ڤه‌رێ به‌ر گوه دکه‌ڤن، گوت گوتک و به‌حس و خه‌به‌رێن ئالێ نه‌يێ ئاشکرا يێ سه‌ره‌دانا سه‌روکێ هه‌رێمێنه‌ بو به‌هدينان.

دوهێ ژێده‌ره‌کێ تايبه‌ت و نزيک بويه‌ران بو سايتى ئه‌ڤستا کورد ديارکر کو ‌به‌رى چه‌ند ڕۆژان که‌سێ به‌رنياس بناڤێ وه‌حيد کوڤلى ژ ئاليێ هێزێن ئه‌وله‌کاريا هه‌رێما کوردستانێڤه ‌هاتيه‌ گرتن، لێ هه‌تا نها ئه‌گه‌را گرتناوى نه‌هاتيه‌ ديارکرن. هه‌مان ژێده‌رى دا ديارکرن کو هنده‌ک به‌رپرسێن بلندژى هاتن گرتن و ل ژێر ڤه‌کولينێنه‌ و هه‌ر وه‌ها ته‌که‌ز کر کو هنه‌ک به‌رپرسێن دنژى درێزێدانه‌، و وه‌کو سايتى ئاماژه‌ پێداى، ئه‌ڤ ريدانه چێبون‌ لپشتى راده‌ستکرنا راپورتا ليژنه‌يا ڤه‌کولينان لسه‌ر بويه‌رێن به‌هدينان بو سه‌روکێ هه‌رێمێ.

سه‌ره‌دانا ده‌مدرێژ يا سه‌روکێ هه‌رێما کوردستانێ بو ده‌ڤه‌را به‌هدينان و رژدبونا ژێده‌رێن پارتى و راگه‌هاندنا وان بئاسايى وه‌رگرتنا مه‌ره‌ما سه‌ره‌دان و مانا سه‌روکێ هه‌رێمێ لده‌ڤه‌رێ و پێگيريکرناوان بوێ چه‌ندێ کو هه‌ر گهۆرينه‌کا لوێ ده‌ڤه‌رێ روبده‌ت ده‌رناکه‌ڤيت ژچارچوڤێ گهۆرينێن ئاسايى، ئه‌ڤ چه‌نده‌ دوو راستيا دياردکه‌ت، ئه‌وژى، يان ڕاگه‌هاندنا پارتى و ئه‌ندامێن وێ و به‌شه‌ک ژ سه‌رکردايه‌تياوێ دبێ ئاگه‌هن ژناڤه‌روکا راپۆرتا ليژنا لديفجونێ و ل ‌وان ريێن سه‌روکێ هه‌رێمێ و سه‌روکێ پارتى دێ گرته‌به‌ر بو ده‌ربازبونێ لڤێ قه‌يرانێ، يانژى پارتى و راگه‌هاندنا خۆ دێ هه‌مان سيناريو و هه‌مان سه‌ره‌ده‌ريێ دوباره‌که‌ن بو جه‌واشه‌کرنا خه‌لكى و ڤه‌شارتنا راستيان و کردارێن خۆ يێن جاره‌سه‌ريێ بو راگرتنا ئاڤا ريی خۆ و هه‌ر وه‌کو لده‌سپێکێ سه‌ره‌ده‌رى دگه‌ل ريدانێدا کرى، يانژى هێڤێنێ ڤێ مه‌سه‌لێ و ئه‌ڤ‌ گهورينه گه‌ر راستبن، دێ رويێ به‌هدينان گهورن و دێبنه‌ مورا ئه‌وى ئاقارێ ئه‌ڤ ده‌ڤه‌ره‌ چاڤه‌رێدکه‌ت.

 نزار پيرو

    This e-mail address is being protected from spambots. You need JavaScript enabled to view it

 

 


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانن، کوردستان نێت لێیان به‌رپرسیار نییه‌.