Red Purple Black

كورته‌ چیرۆك .. چۆله‌كه‌كانی كیشوه‌ری ره‌ش ... مامند محمد قادر

PDFPrintE-mail

به‌فر لوتكه‌ی چیا و لاپاڵ و ده‌شتی باریكی نێوانیان و تووله‌ رێگا و لق و پۆپی دره‌خته‌ خۆڕسكه‌كانی داپۆشیوه‌ و ناوچه‌كه‌ ته‌نانه‌ت به‌ شه‌ویش له‌ژێر تریفه‌یه‌كی كزی مانگدا هه‌ر به‌ رووناكی ده‌پارێزی و ستوونه‌كانی دووكه‌ڵی سه‌ر خێوه‌ته‌ بڵاوه‌كان ره‌شتر ده‌كات، هێمنی له‌ دیمه‌نی سارد و كپی ژێر گۆمه‌زی ئاسمانی خامۆشه‌وه‌ هه‌ڵده‌قوڵی، هێنده‌ نابات تا ده‌نگدانه‌وه‌ی ته‌قینه‌وه‌یه‌كی به‌هێز هاواری شاخ و دۆڵه‌كان واگا دێنی و تیشكی زه‌ردی مه‌یله‌و سووری پڕووشكی گڕگرتووی پارچه‌ به‌رد و كانزا به‌ فه‌زا بڵاوبووه‌وه‌كان بۆ چه‌ند ساتێك به‌سه‌ر به‌فرا ده‌ڕژی و تێكه‌ڵ به‌ سپیاتییه‌كه‌ی ده‌بی.

خێوه‌ته‌كه‌ی پووره‌ (زاری) كه‌وتۆته‌ دیوی رۆژهه‌ڵاتی خێوه‌تگاكه‌ و پۆڵووه‌كانی ناو ئاگردان هه‌ر له‌م ساته‌ زووه‌ی شه‌ودا ترووسكه‌یان تیا نه‌ماوه‌ و، مام (سلێمان) یش كه‌ ته‌مه‌نی ده‌گاته‌ نزیكه‌ی شه‌ست ساڵێك له‌سه‌ر پشتا راكشاوه‌ و چاوه‌كانی له‌یه‌ك ناوه‌ بی ئه‌وه‌ی هێشتا نووستبێش، ئه‌و دووچاری نه‌خۆشی سیلی درێژخایه‌ن بووه‌ كه‌ نۆره‌ كت و پڕه‌كانی ناوه‌ ناوه‌ هێرشی بۆ ده‌هێنن و كۆكه‌ ووشك و نه‌پچڕاوه‌كانی تێكه‌ڵ به‌ حه‌په‌ی سه‌گی گونده‌ دووره‌كانه‌وه‌ ده‌كه‌ن، هه‌رچه‌نده‌ كه‌ مام سلێمان پیاوێكی به‌ داواكاری نیه‌ و به‌سه‌ر ئه‌ستۆی هیچ كه‌سێك بارگرانییه‌ك نیه‌، كه‌چی جار جار ناچار ده‌بی به‌ ده‌نگه‌ گڕه‌ كزه‌كه‌ی دره‌نگی شه‌و بووكه‌كه‌ی له‌ خه‌و هه‌ستێنی تا یارمه‌تی بدات بۆ كارێكی ئاوده‌ست یا دانیشتن له‌ناو جێگا بۆ كه‌مكردنه‌وه‌ی ئازاری جه‌سته‌ی كه‌ زۆر جارانیش وا ده‌بی بۆ ماوه‌یه‌ك به‌ بێده‌نگی فرمێسكه‌كانی هه‌ڵڕێژی و دواتر پاڵ بكه‌وێته‌وه‌.

تاریك و روون پێش ده‌نگی مه‌نجه‌ڵی مسی و مه‌سینه‌ی كانزایی ده‌كه‌وی كه‌ تێكه‌ڵ به‌ وورته‌ وورتی ژنان ده‌بی كه‌ به‌یانییان زوو زوو له‌به‌ر رووناكی فانۆسه‌ هێشتا نه‌كوژاوه‌كاندا به‌فر ده‌توێننه‌وه‌ و هێنده‌ نابات ده‌نگی خرمه‌ی پێیان به‌سه‌ر ده‌نكۆڵه‌ی فشه‌ڵ و ووشكی به‌فرا ده‌بیستری كه‌ به‌ ته‌مبه‌ڵی و به‌ره‌ به‌ره‌ دوورتر ده‌كه‌وێته‌وه‌ تا به‌ ته‌واوی له‌ناو ده‌وه‌ندا وون ده‌بی و دوای ماوه‌یه‌ك جارێكی تر و به‌ ئیقاعێكی به‌ره‌و ژوور دووباره‌ ده‌بیسترێته‌وه‌ تا له‌ناو خێوه‌ته‌كاندا وون ده‌بی كه‌ نوێژی تیا ده‌كرێت و وه‌ك هه‌ر جارێك به‌ پاڕانه‌وه‌ و نووزانه‌وه‌ و ستایش كردنی یه‌زدان كۆتایی دێت.

رۆژ هه‌ڵدێت و تیشكه‌ خێرا و نه‌سره‌وته‌كانی راوه‌دووی لاپاڵه‌ یه‌ك پارچه‌ سپی و لوتكه‌ له‌ ته‌م وونبووه‌كان ده‌نی تاكو دوێنی خۆی دووباره‌ بكاته‌وه‌، زۆر ناخایه‌نی كه‌ ده‌نگی منداڵان دێته‌ گوی كه‌ به‌ جله‌ كۆن و ئاشناكانیانه‌وه‌ رووده‌كه‌نه‌ قوتابخانه‌ كه‌ له‌ به‌رد و قوڕ دروستكراوه‌ و به‌ قه‌د و لقی داربه‌ڕوو داپۆشراوه‌ كه‌ كه‌وتۆته‌ لای باشووری خێوه‌تگه‌وه‌ رێگای سی چواره‌كه‌ كاتژمێرێك دووره‌ به‌ پی، هه‌رزه‌كارانیش زۆربه‌ی رۆژان رووده‌كه‌نه‌ ناوچه‌ نیمچه‌ دووره‌كان كه‌ هه‌ڵگری جۆراوجۆریان له‌ پشتی ناسكی خۆیان به‌ستووه‌ بۆ گواستنه‌وه‌ی سووته‌مه‌نی و جگه‌ره‌ و شتوومه‌كی تر تا به‌ قاچاخ به‌سه‌ر گرد و ڵاپاڵی چیا سه‌ركه‌ون به‌و تووله‌ رێگا و رێچكانه‌ی به‌ هۆی زۆری هاتن و چوون به‌سه‌ریاندا بوون به‌ رێگای ئاسایی بۆ بازاڕه‌كانی ئه‌ودیو كه‌ به‌ ده‌ڵاڵ و قاچاخچی و وورده‌ بازرگان جمه‌ی دێت تا به‌ كۆڵ و باری تری جیاواز بگه‌ڕێنه‌وه‌ بازاڕی تری ئه‌مدیو بۆ به‌ده‌ستهێنانی خه‌رجیی رۆژانه‌یان، زۆر جاریش وا رێك ده‌كه‌وێت كه‌ له‌ رێگادا تووشی پاسه‌وانانی سنوور دێن كه‌ به‌ ته‌قه‌ دوایان ده‌كه‌ون یا ده‌كه‌ونه‌ بۆسه‌كانیان و له‌ چی بار و پاره‌یه‌ك هه‌یه‌ رووت ده‌كرێن، ئێواران دره‌نگ به‌ ماندوویی ده‌گه‌ڕێنه‌وه‌ ماڵ و پێداویستییه‌كانی خێزان له‌ شه‌كر و رۆن و چا و هیتر دابین ده‌كه‌ن. ژنانیش به‌ كاره‌ سه‌ره‌كییه‌كانی ناو ماڵ و نان كردن و ئاماده‌كردنی خواردن و جل شۆرین و دابین كردنی ئاو و ئاژه‌ڵ دۆشین و ئاماده‌كردنی منداڵان بۆ قوتابخانه‌ و. هتد كاته‌كانیان به‌سه‌رده‌به‌ن. به‌ڵام پیاوانی به‌ ساڵاچوو له‌ زۆربه‌ی كاته‌كانی رۆژدا له‌ناو خێوه‌ت ده‌مێننه‌وه‌ و شان ده‌ده‌ن به‌ ژێرسه‌رینه‌ خۆماڵییه‌ ده‌ستكرده‌ پڕ و هه‌ڵاوساوه‌كان و رۆژه‌كانیان له‌گه‌ڵ هه‌ڵكێشانی هه‌ناسه‌ی قووڵی تێكه‌ڵ به‌ دووكه‌ڵی شینی جگه‌ره‌ و گه‌ڕاندنه‌وه‌ی یادوه‌رییه‌كانی ساڵانی رابردووی ته‌مه‌ن و ناوهێنانی خودا به‌سه‌رده‌به‌ن. پیاوانی دوور له‌ كه‌س و كار و په‌روازه‌بووش له‌ناو دۆڵ و ناو ده‌وه‌ن و په‌نا به‌ردا به‌ جه‌سته‌ی لاواز و ماندوو و چاوی رۆچوو و دڵی پڕ له‌ هیوا و حه‌سره‌ت و قودسیه‌تی نیشتمان رووبه‌رووی ئاگر بوونه‌ته‌وه‌.

گولله‌تۆپ ئه‌و خاكه‌ نه‌فره‌ت لێكراوه‌ بی به‌زه‌یی و بست به‌ بست ده‌كوتێته‌وه‌ و پیر و ئافره‌ت و منداڵ و گوێدرێژ له‌ یه‌كتر جیا ناكاته‌وه‌ و هه‌ر جارێكیش ژماره‌یه‌ك له‌ جه‌سته‌ی سووتاو و خه‌ڵكانێكی ده‌ست و لاق په‌ڕیو و لاشه‌ی ئاژه‌ڵی مردوو به‌ دوای خۆیدا جی ده‌هێڵی، به‌ڵام ژیان له‌سه‌ر ره‌وتی جارانی به‌رده‌وام ده‌بی.

شه‌و دادێت و ئه‌ندامانی خێزان ده‌وری ئاگردانه‌كانیان ده‌گرن، باس و خواسی رۆڵه‌كان و ژیان و سته‌می ئه‌م جیهانه‌ ده‌كری، جار به‌ جاریش رۆڵه‌ دوور و په‌راگه‌نده‌كان شه‌و به‌ نهێنی ده‌خزێنه‌ ناو كه‌س و كار و هانیان ده‌ده‌ن بۆ دان به‌ خۆدا گرتن و ئارام بوون و بڕوابوون به‌ خۆ و ئازایی، سوورن له‌سه‌ر ئه‌وه‌ی كه‌ كێشه‌كه‌یان ره‌وایه‌ و جیهانیش له‌گه‌ڵیاندایه‌، ده‌ڵێن كه‌ كه‌ خه‌باتی ئێمه‌ وه‌ك هه‌ر گه‌لێكی ئازادیخواز ته‌نها بۆ زامن كردنی پاشه‌ڕۆژێكی ساده‌یه‌ بۆ نه‌وه‌كانمان، تێكۆشانمان بۆ پاراستنی ئابڕوو و مافی مرۆڤایه‌تیمانه‌، خوێن رشتنمان باجی بوونی پێناسه‌یه‌كه‌ بۆ بوونمان.

رۆژ ده‌ڕوات و ئه‌م خاكه‌ به‌ خوێن ئاو ده‌درێ و كێشه‌كه‌ش وێنه‌ی زیندووی خۆی له‌ ویژداندا هه‌ڵده‌كۆڵی و له‌ قوڕگی گه‌لانی چه‌وساوه‌دا ده‌نگ ده‌داته‌وه‌،

 له‌ به‌یانییه‌كی زوودا به‌ر له‌وه‌ی تیشكی زه‌رده‌په‌ڕ له‌ ئاسۆی به‌ ته‌م گیراوا سه‌رده‌ربێنی، له‌ هه‌ڵمه‌تێكی ناكاودا ئاگر قینی نه‌پساوه‌ی به‌سه‌ر چی هه‌یه‌ له‌م خاكه‌دا ده‌بارێنی، بی ئه‌وه‌ی مۆڵه‌ت به‌ خۆشاردنه‌وه‌ش بدات، به‌بی ئه‌وه‌ی شه‌رم له‌ نووزه‌ی ئافره‌ت و ریشی سپی بكات، دڵی ئافره‌ت شه‌قار ده‌كا و منداڵ ده‌تۆقێنی. هاواری مرۆڤایه‌تی له‌ هه‌موو بسته‌ خاكێكی جیهان به‌رز ده‌بێته‌وه‌، به‌ڵام له‌و ساته‌دا ده‌نگی بێژه‌ری رادیۆ هه‌ر هه‌موو ده‌نگه‌كان كپ ده‌كات و كێشه‌كه‌ له‌ لیستی تیرۆریزم پۆڵێن ده‌كات.

This e-mail address is being protected from spambots. You need JavaScript enabled to view it


ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.