حزبی تازه‌ت پیرۆزه ... فه‌یسه‌ڵ نوره‌دین موختار

 

كورته وه‌ڵامێك بۆ (نامۆ سامانه‌و سامانه‌كه‌شم كوردستانه)

 بۆ دنیای گه‌یاندن و جیهانگیری هیچ نه‌ته‌وه‌یه‌ك به‌قه‌د كورد به‌ئاوه‌ژوویی سوودی له‌م سیسته‌مه وه‌رنه‌گرتووه، خه‌ریكه عه‌قڵیه‌تی كۆڵانی دوور له پۆله‌كانی خوێندن بۆ نێو ئه‌و كه‌ناڵی پێگه‌یاندنی مه‌عریفه‌یه ده‌گوازرێته‌وه، پاش ئه‌وه‌ی رۆژی 19/1 له هه‌ردوو رۆژنامه‌ی ئه‌لیكتڕۆنی (كوردستان نێت) و (ده‌نگه‌كان) كورته‌ سه‌رنجێكم به‌ وتارێك بڵاوكرده‌وه سه‌باره‌ت به‌خۆپێشاندانه‌كه‌ی رۆژی 17/1 ی ستۆكهۆڵی سوید نووسرابوو، رۆژی 21/1 جوێنباران كرام‌و ئه‌فه‌ندییه‌كی ئه‌وروپی به‌ وشه‌ی (گو) ، (بێ ئه‌ده‌ب) ، به‌دره‌وشت) ، (كاسه‌لێس) (مشه‌خۆر) وه‌ڵامی داومه‌ته‌وه، ئه‌و ئه‌فه‌ندی‌یه دیاره نازانێت له‌ بواری رۆژنامه‌گه‌ریدا هه‌ر یه‌كێك له‌و وشانه به‌شێكن له ناو زراندن‌و ناو زراندنیش دوای ئه‌وه‌ی ده‌عوای بۆ ده‌نووسرێت جوێنده‌ر رووبه‌رووی سزای یاسایی ده‌بێته‌وه!؟

 له وتاره‌که‌م‌دا من ناوی هێچ حزبێكم نه‌هێناوه‌و به‌رگریشم له‌هیچ حزبێك نه‌كردووه، به‌ڵام ئه‌مجاره مه‌جبوورم به‌و نووسه‌ره بڵێم كه‌ ئه‌گه‌ر كۆمیته‌ی ریفراندۆم به‌‌ته‌مای (پارتی دیموكراتی كوردستان/ عێراق) بووایه كه‌سیان بۆ كۆنه‌ده‌كرایه‌وه خۆپێشاندانی ناوبراو به‌ پشتیوانی‌و ئاماده‌بووانی ئه‌ندام‌و لایه‌نگرانی (یه‌كێتی نیشتمانی كوردستان، حزبی شیوعی كورستان، كۆنگره‌ی گه‌لی كوردستان، حزبی دیموكراتی كوردستانی ئێران و. . . .) له‌گه‌ڵ كۆمه‌ڵێك خه‌ڵكی بێلان سه‌ركه‌وتنی برده‌وه، (پارتی) یه‌كه‌ی ئه‌و تا (فیدراسۆنی كۆمه‌ڵه‌ كوردیه‌كان) یشی له‌به‌شداریبوونی راسته‌خۆ پاشگه‌ز كرده‌وه.

 ده‌ڵێ حاشا من عێراقی نیم، پیرۆزه، به‌ڵام داكۆكیت له بارزانی كرده‌ووه نه‌تزانیوه ئه‌و عیراقچی‌یه‌و ده‌توانیت سه‌یری به‌رنامه‌و په‌یره‌وی ناوخۆی (پارتی دیموكراتی كوردستان / عێراق) بكه‌یت، ئه‌و نووسه‌ره بێجگه‌‌له بیوگرافێی خۆی، ئه‌و وتاره هه‌رهه‌مووی به‌نه‌فه‌سێكی پارتی‌یانه‌ی بیر ته‌سك نووسیوه، ئه‌گه‌ڕ نا نازانم پارتی كه‌ی باسی له‌سه‌ربه‌خۆی كوردستان كردووه ئێستاش دڵی بۆ حوكمی زاتی حه‌قیقی لێده‌دات، كارمه‌ندێكی حوكمه‌تی هه‌رێمی كوردستان له پارتی زۆر ئازاتر قسه‌ ده‌كات، گله‌یی له‌ یه‌كێك ده‌كات به‌ ناوی (تانیا) كه‌باسی فیدرالی كردووه، ئاگادارنیه پارتی رۆژانه له‌ راگه‌یاندنه‌كانی خۆی باس له فیدرالی ده‌كات!

 ئه‌و ئه‌فه‌ندیه‌ ئه‌وروپیه‌ دیاره‌ له زمانی ئینگلزی‌و سویدیش كلۆله، بۆ سویدیه‌كه نه‌یتوانیوه ته‌نیا هه‌شت وشه له داخوازینامه‌یه‌كی لاوانی لیبرالی سویدی به‌ته‌واوی بۆ سه‌ر زمانی كوردی وه‌ربگێڕێت كه‌له خۆپێشاندانه‌كه‌دا دابه‌شیان كرد، بۆ زمانی ئینگلیزیش له چوار وشه‌ نه‌گه‌یشتووه كه تانیا ئه‌و رۆژه پێشكه‌شی كرد، شاعیر نامۆ واده‌زانێت هه‌ریه‌كێك له سلێمانی بێت واته یه‌كێتی‌و لێپرسراوه، ئه‌مه‌ لێدانه‌كه‌ی (حه‌مه‌ فه‌ریق حه‌سه‌ن) ی چیرۆك نووسم بیردێنێته‌وه، 1995 حه‌مه‌ فه‌ریق و چه‌ند كه‌سێكی تر لیژنه‌یه‌كی ئاشتی‌یان پێكهێنابوو سه‌ردانی حزبه‌كانیان ده‌كرد، بۆ سه‌ردانی پارتی چوونه‌ هه‌ڵه‌بجه‌، چه‌كداره‌كانی (حه‌مه‌خان) زۆریان له حه‌مه فه‌ریق دابوو چونكه‌ له سلێمانی هاتبوو، كه‌واته‌ تۆ یه‌‌‌‌‌كێتی (حه‌مه‌خان مسته‌شارێكی به‌عسی بوو دوای راپه‌ڕینی 1991 له‌لای پارتی بووه سه‌رله‌شكر) .

 جا برای ئه‌فه‌ندیم، منیش ده‌متوانی به‌ كه‌ره‌سته‌ بازاڕیه‌كانی تۆ وه‌ڵامت بده‌مه‌وه به‌ڵام ئه‌وه شێوازی من نیه، له كۆتاییدا سوپاست ده‌كه‌م كه‌خۆت دانتپیاناوه كه سه‌نگه‌رت گواستۆته‌وه‌و ئه‌نكێتی پارتایه‌تیت پڕ‌كردۆته‌وه‌ كه‌واته: حزبی تازه‌ت پیرۆزه.

سه‌رنج، دیاره وتاری ناوبراو زۆر هه‌ڵه‌ی تیایه ده‌توانرا هه‌ر به‌ نووسینه‌كانی خۆی وه‌ڵامی بدرێته‌وه بۆیه من وا راده‌گه‌یه‌نم كه چیتر كاتی خۆم به‌و جۆره وه‌لامانه‌ ناكوژم خوێنه‌ری زیره‌ك ده‌توانێت موفاره‌قاتی قسه‌ له خودی وتاره‌كه بدۆزێته‌وه