تابلۆی عیشق ....  دڵشاد ئیبراهیم

13-05-2011 05:11

تۆ ئه‌و خونچه نه‌كراوه‌یه‌ی

له وه‌رزی گه‌ڵاڕێزان‌و غه‌ریبیدا

بۆ ده‌روونی زه‌ردهه‌ڵاتووم

به‌هارێكی سه‌وز ئه‌هێنی

مه‌رگی زستانی غوربه‌ت‌و

ده‌وای زامێكی تاقانه‌و

هه‌ناسه‌ی ژینێكی تاسه‌ر ئه‌خولقێنی

تۆ تۆوی ئاسۆی ڕۆشنی

ئومێدی ڕۆژگارێكی نوێ

له كێڵگه‌ی بیرو خه‌یاڵمدا ئه‌چێنی

چونكه به تاڤگه‌ی گزنگی

نیگای چاوانی سیحراویت

تابلۆی عیشقێكی بێ‌وێنه

له‌سه‌ر دڵم ئه‌نه‌خشێنی. . !